Hechos 6 - Chayahuita (Shahui)Canchisë quëmapiꞌsaꞌ catahuacaiso marëꞌ acopisoꞌ 1 Naporoꞌ tahuëriꞌsaꞌ Quisoso imapisopita naꞌasapi. Notohuaroꞌ yaꞌhuëpi huachi. Aꞌnaquën cotio nananquë nonpi. Aꞌnaquënso nipirinhuëꞌ cotioroꞌsaꞌ niponaraihuëꞌ, Crico nananquë nonpi. Inapitasoꞌ co noyahuëꞌ cancantatonaꞌ, taponaꞌ: “Nani tahuëriya quëyoronoꞌsaꞌ huëꞌpachinara, aꞌnaya aꞌnaya cosharoꞌ maꞌpatopirinahuëꞌ, co napopianachin quëtopihuëꞌ, apiratërinacoi. Crico quëyoronoꞌsaꞌ pahuantopi,” topi. 2 Ina natanahuatonaꞌ, caꞌtanoꞌsari yaꞌipi Quisoso imapisopita ayontonpi. Niyontonpachinara, itopi: —Natancoi iyaroꞌsaꞌ piꞌpian shaꞌhuichinquëmaꞌ. Yosë nanamën aꞌchinaꞌhuaiso marëꞌ Quisocristo acorincoi. Inaso nipirinhuëꞌ, nani tahuëri cosharoꞌ yoꞌsápatoi, co nanitëraihuëꞌ Yosë nanamën aꞌchinaꞌhuaisoꞌ. Co aꞌchinpatoihuëꞌ, co noyahuëꞌ nisarai, tënai. 3 Napoaton iyaroꞌsaꞌ, canchisë yaꞌpi huayoncoꞌ catahuaꞌinacoiso marëꞌ. Ispirito Santori noyá yaꞌcoancantërinsoꞌ huayoncoꞌ, noya yonquipisoꞌ. Noya quëmapisáchin acoaꞌahuaꞌ cosharoꞌ yocacaiso marëꞌ. 4 Quiyaso nipirinhuëꞌ Yosë nontaꞌhuaisoꞌ, nanamën aꞌchinaꞌhuaisoꞌ, inasáchin yonquiarai, itopi caꞌtanoꞌsari. 5 Natanahuatonaꞌ: —Noyapaꞌ. Paꞌahua acoaꞌahuaꞌ, topi yaꞌipiya. Ina quëran Istipan huayonpi. Inasoꞌ Yosë nóya natërin. Ispirito Santori noyá yaꞌcoancantërin. Pinipi, Porocoro, Nicanoro, Timon, Parminasë, Niconasë, inapitantaꞌ huayonpi. Niconasësoꞌ Antioquiaquë huaꞌhuatërin. Co cotio quëmapihuëꞌ niponahuëꞌ, cotioroꞌsa pochin Yosë chinotërin. Iporasoꞌ Quisoso imasarin antaꞌ. Inanapo huayonpi. 6 Inapita huayonahuatonaꞌ, caꞌtanoꞌsaquë quëpi. Yosë nontahuatonaꞌ, sëꞌhuamotopi acocaiso marëꞌ. Inapotatonaꞌ, acopi huachi. 7 Ina quëran caꞌtanoꞌsaꞌ nani tahuëri pënëntapi. Yosë nanamën aꞌchinapi. Aquë aquëtëꞌ nahuinin. Quirosarinquë naꞌcon naꞌcon piyapiꞌsaꞌ imasapi. Naꞌa corto huaꞌanoꞌsantaꞌ Quisoso nanamën natëpi. Istipan mapisoꞌ 8 “Istipansoꞌ nóya pënëntërin,” topi yaꞌipiya. Ispirito Santori catahuarin niꞌton, sacaiꞌ nininsoꞌ nanitaparin. Caniaꞌpi marëꞌ Yosë nontohuachina, aꞌnaroáchin noyatopi. Napoaton: “Tëhuënchachin Yosëri catahuarin,” topi. 9 Aꞌnaquën cotioroꞌsaso nipirinhuëꞌ, nisha niyontonpiso pëi quëran huëcatonaꞌ, Istipan noꞌhuipi. “Patron quëran pipipisopita,” itopiso quëran huëꞌpi. Inapitasoꞌ Sirini quëran, Aricantëria quëran, Sirisia parti quëran, Asia parti, inaquëranpita huëcatonaꞌ, Quirosarinquë yaꞌhuëpi. Inapitasoꞌ Istipan noꞌhuipi. Huaꞌquiꞌ chiníquën ninontopi. 10 Istipanso nipirinhuëꞌ, Ispirito Santori catahuarin niꞌton, noꞌtë noꞌtëquën nonin. Co nanitopihuëꞌ aꞌpanicaisoꞌ. 11 Napoaton poꞌoana quëran quëmapiꞌsaꞌ pahuërëpi shaꞌhuirapicaiso marëꞌ. Inapotohuachinara, shaꞌhuirapipi: —Iso quëmapisoꞌ, co noyahuëꞌ. Moisësë pinorin. Yosëntaꞌ pinorin natanai, tosápi. 12 Ina pochin nonatonaꞌ, naꞌa piyapiꞌsaꞌ anoꞌhuitopi. Cotio ansianoꞌsaꞌ, cotio maistroꞌsaꞌ, inapitantaꞌ anoꞌhuitopi. Co huachi Istipan noya niꞌpihuëꞌ. Napoaton maconpi. Maconahuatonaꞌ, quëpapi cotio huaꞌanoꞌsari natanacaiso marëꞌ. 13 Nani niyontonpachinara, naquëranchin shaꞌhuirapiantapi. Nonpinatonaꞌ, co noꞌtëquën shaꞌhuirapipihuëꞌ. —Yosë chinotopiso pëiꞌ noya nipirinhuëꞌ, nonapirarin. “Moisësë iráca pënëntërinsontaꞌ co natëcasoꞌ yaꞌhuërinhuëꞌ,” toconin. 14 Quisoso Nasaritoquë yaꞌhuërinsoꞌ imaton, naporinsoꞌ aꞌchinarin. “Aꞌna tahuëri Quisosori Yosë chinotopiso pëiꞌ ataꞌhuantarin. Moisësë pënëninpoasontaꞌ ananiantatonpoaꞌ, nisha aꞌchintarinpoaꞌ,” toconin Istipan natanai, topi shaꞌhuirapitonaꞌ. 15 Ina quëran huaꞌanoꞌsari Istipan niꞌsapi. Niꞌsapirinahuëꞌ, yaꞌpirin anquëni pochin huënaráchin niꞌtërin. |
© 2011, Wycliffe Bible Translators, Inc. All rights reserved.
Wycliffe Bible Translators, Inc.