Hechos 5 - Chayahuita (Shahui)

Ananiasë saꞌinë chachin nonpininsoꞌ

¹ Aꞌna quëmapi Ananiasë itopisosoꞌ nipirinhuëꞌ yanonpinin. Saꞌinsoꞌ Sahuira itopi. Inahuasoꞌ noꞌpanëna paꞌanpirinahuëꞌ, co nohuantopihuëꞌ yaꞌipi canapisoꞌ yocacaisoꞌ.

² Napoaton ninontopi. “Coriqui yoꞌconpatëꞌ, onposona canarësoꞌ ama shaꞌhuitasohuëꞌ. Yaꞌipimiáchin quëtërëso pochin quëta noya niꞌinënpoꞌ,” itërin saꞌin. “Inta nipachin inapota,” topachina, patoma coriqui canarinsoꞌ poꞌorahuaton, taparin. Napopinchin caꞌtanoꞌsaꞌ quëtontarin.

³ Co Pitrosoꞌ shaꞌhuitopirinhuëꞌ, Yosë nohuanton, nitotërin. Nitotaton, Ananiasë itërin: —¿Onpoatonta iyasha Sopai natëran? Ispirito Santo yanonpintaton patoma coriqui canaransoꞌ quëmaora marëꞌ taparan.

⁴ Coꞌhuara paꞌayantëraponhuëꞌ, noꞌpasoꞌ quëmaquën. Quëmaora nohuanton paꞌanan. Ina quëran nani paꞌanpatana coriqui canaransontaꞌ, quëmaquën. Co nohuantohuatanhuëꞌ, co yaꞌipi quëtacasoꞌ yaꞌhuëꞌitonhuëꞌ. “Yaꞌipimiáchin coriqui Yosë quëtarahuë,” tëcaton nonpinan. Co iyasha, napoꞌitonhuëꞌ. Co piyapiáchin nonpintëranhuëꞌ. Yosëntaꞌ yanonpintopiranhuëꞌ, co inasoꞌ nanitëranhuëꞌ nonpintamasoꞌ, itërin.

⁵ Ananiasë natanahuaton, aꞌnaroáchin noꞌpaquë anotaton, chiminin. Piyapiꞌsari niꞌpachinara, paꞌyanpi. Aꞌnapitantaꞌ natantahuatonaꞌ, paꞌpi tëꞌhuatopi.

⁶ Ina quëran huiꞌnapiꞌsari nonënsoꞌ soꞌpinahuatonaꞌ, quëpapi paꞌpitacaiso marëꞌ.

⁷ Cara ora quëran pochin, saꞌiontaꞌ huëꞌnin. Soꞌin chimininsoꞌ co nitochátërarinhuëꞌ.

⁸ Huëꞌpachina, Pitrori itapon: —Piꞌpian imoya yanatananquën. Achin soꞌyan isonapoꞌ coriqui quëtërincoi. ¿Isonápo marëꞌ noꞌpanëmaꞌ paꞌanamaꞌ ti? itërin. —Inanapo marëꞌ mini paꞌanai, tënin sanapi.

⁹ —¿Onpoatontaꞌ imoya canpita capini ninontatomaꞌ, Ispirito Santo yanonpintopiramahuëꞌ? “Co ina anaꞌintarinpohuëꞌ,” taꞌtomaꞌ, napopiramahuëꞌ. Niꞌquëꞌ. Quëmapiꞌsaꞌ soꞌyan paꞌpitopisopita nani huënantarapi. Quëmaꞌ yaꞌhuërë quëpantarinënquën paꞌpitinënquënso marëꞌ, itërin Pitrori.

¹⁰ Itohuachina, aꞌnaroáchin chiminaton, inaquë chachin anotërin antaꞌ. Huiꞌnapiꞌsaꞌ huëantarahuatonaꞌ, chimipi quënanquinantapi. Inantaꞌ quëpantarahuatonaꞌ, soꞌin pirayan paꞌpitopi.

¹¹ Yaꞌipi Quisoso huëntonënquë yaꞌconpisopita tëꞌhuatopi. Aꞌnapitantaꞌ natantahuatonaꞌ, “Anaꞌintohuachinpoaꞌ canpoantaꞌ,” taꞌtonaꞌ paꞌpi tëꞌhuatopi.

Caniaꞌpiroꞌsaꞌ aꞌnaroáchin anoyatopisoꞌ

¹² Naporoꞌ tahuëriꞌsaꞌ Yosë nohuanton, caꞌtanoꞌsaꞌ nani maꞌsha nanitapapi. Naꞌa caniaꞌpiroꞌsaꞌ sëꞌhuarahuatonaꞌ, aꞌnaroáchin anoyatopi. Piyapiꞌsari niꞌpachinara, “Tëhuënchachin Yosëri catahuarin,” topi. Yaꞌipi imapisopita “Saromon ishpananën,” itopiquë niyontonapi.

¹³ Imapisopitaráchin inaquë niyontonpi. Aꞌnapitasoꞌ: “Anaꞌintohuachinpoaꞌ,” taꞌtonaꞌ, co inaquë niyontonpihuëꞌ. Napoaponahuëꞌ, “Inapitasoꞌ nóya piyapiꞌsaꞌ,” topi yaꞌipiya.

¹⁴ Naporahuaton, naꞌcon naꞌcon piyapiꞌsari Quisoso natëtonaꞌ, imasapi antaꞌ. Naꞌa quëmapiꞌsaꞌ sanapiꞌsarë chachin yaꞌconachinpi.

¹⁵ “Quisosori catahuarin niꞌton, caꞌtanoꞌsaꞌ nani maꞌsha nanitapapi,” taꞌtonaꞌ, naꞌa caniaꞌpiroꞌsaꞌ quëntarahuatonaꞌ, cachiquë acoonpi anoyatacaiso marëꞌ. Aꞌnaquën nantëtërë chachin acoonpi. Aꞌnaquëontaꞌ sahuanasaquë tërantaꞌ aquëhuënpi. “Pitro paꞌpachin, huaꞌyanën tërantaꞌ tashinantohuachin, noyatapon nimara,” taꞌtonaꞌ, quëntapi.

¹⁶ Yaꞌcariya ninanoroꞌsaꞌ quëraontaꞌ huëꞌpi. Quirosarinquë huëꞌsahuatonaꞌ, caniaꞌpiroꞌsaꞌ quëpi. Sopairi ahuaꞌyantërinsopitantaꞌ quësapi. Yosë nohuanton, yaꞌipiya anoyatopi.

Cotio huaꞌanoꞌsari aparisitopisoꞌ

¹⁷ Napohuachina, corto huaꞌan chini chiníquën nanantërinsoꞌ noꞌhuitërin huachi. “Naꞌcon naꞌcon piyapiꞌsaꞌ Quisoso imasapi,” taꞌton, apiratërin. Satosioroꞌsantaꞌ noꞌhuitopi.

¹⁸ Napoaton caꞌtanoꞌsaꞌ masahuatonaꞌ, tashinan pëiquë poꞌmopirinahuëꞌ.

¹⁹ Yono tashiꞌ Sinioro anquëninën huëꞌsahuaton, yaꞌcoana iꞌsoatiirin. Caꞌtanoꞌsaꞌ aipiran quëparahuaton, shaꞌhuitërin:

²⁰ “Yosë chinotopiso peiquë pacoꞌ. Inaquë paꞌsahuatomaꞌ, piyapiꞌsaꞌ aꞌchintocoꞌ nasha pochin nanpicaiso marëꞌ,” itërin anquëniri.

²¹ Ina natanahuatonaꞌ, tashiramiachin Yosë chinotopiso pëiquë paꞌpi. Piyapiꞌsaꞌ huëꞌpachinara, aꞌchintapi. Corto huaꞌan chini chiníquën nanantërinsoꞌ, satosioroꞌsaꞌ, inapitasoꞌ co nitotatonahuëꞌ, niyontonahuatonaꞌ, yaꞌipi huaꞌanoꞌsaꞌ, Israiro ansianoꞌsaꞌ, inapita amatopi. Huëꞌpachinara, ponisia aꞌpapi inapita maconacaiso marëꞌ.

²² Ponisiaroꞌsasoꞌ tashinan pëiquë paꞌpirinahuëꞌ, co insontaꞌ quënanpihuëꞌ. Huëantarahuatonaꞌ, shaꞌhuitiipi.

²³ —Tashinan pëiꞌ noya niahuitopinan quënanconai. Yaꞌcoanaquë ponisiaroꞌsaꞌ aꞌpairápirinahuëꞌ. Iꞌsoapiraihuëꞌ, capa piyapi huachi, itiipi.

²⁴ Natanahuatonaꞌ, ponisiaroꞌsaꞌ huaꞌanën, corto huaꞌanoꞌsaꞌ chini chiníquën nanantopisopita, inapita paꞌyanpi. Paꞌyanahuatonaꞌ, ninontopi. “¿Intoacha pacaiya? ¿Maꞌtaꞌ onpoapona napoapi?” nitopi.

²⁵ Naporoꞌ aꞌna quëmapiri huëꞌsahuaton, shaꞌhuitiirin. —Quëmapiꞌsaꞌ tashinan pëiquë poꞌmoramasoꞌ, Yosë chinotopiso pëiquë piyapiꞌsaꞌ aꞌchintapi, itërin.

²⁶ Ina quëran ponisiaroꞌsasoꞌ huaꞌanënarë chachin paꞌsahuatonaꞌ, macoantapi. Piyapiꞌsaꞌ tëꞌhuatatonaꞌ, co ahuëpihuëꞌ. “Naꞌpiquë tëꞌyarahuachinënpoaꞌ,” taꞌtonaꞌ, oshaquëran mapi.

²⁷ Huaꞌanoꞌsaꞌ niyontopiquë quëpapi. Inaquë quëpahuachinara, huaꞌan chini chiníquën nanantërinsori itapon:

²⁸ —Nani pënënatënquëmaꞌ: “Ama huachi Quisoso nanamën aꞌchincosohuëꞌ,” itopiranquëmahuëꞌ, aquë aquëtëꞌ aꞌchinaramaꞌ. Yaꞌipi Quirosarinquë yaꞌhuëpisopita natanapi. Inapoatomaꞌ, Quisoso chimininso marëꞌ naꞌintaramacoi, itërin.

²⁹ —Pënënpiramacoihuëꞌ, Yosë naꞌcon naꞌcon natëcasoꞌ yaꞌhuërin. Napoaton co nanitëraihuëꞌ natëcaꞌhuainquëmasoꞌ.

³⁰ Tëhuënchachin corosëquë patanantatomaꞌ, Quisoso tëpapiramahuëꞌ, shimashonënpoapita chinotërinso Yosëri chachin ananpitaantarin.

³¹ Inapotahuaton, inchinanën quëran acorin. Inasoꞌ huaꞌanënpoaꞌ niꞌton, natëcaso yaꞌhuërin. Nóya nicaton yaꞌipi israiroꞌsanpoaꞌ nichaꞌëinpoaso marëꞌ acorin. Co noyahuëꞌ yonquirëhuasopita naniantohuatëhuaꞌ, oshanënpoaꞌ inquitarinpoaꞌ.

³² Ina nitotatoi shaꞌhuirárai. Ispirito Santorintaꞌ inachachin anitotarin. Yosë natëhuatëhuaꞌ, Ispirito Santo ayaꞌcoancantarinpoaꞌ, itërin Pitrori.

³³ Cotio huaꞌanoꞌsari natanahuatonaꞌ, chiníquën noꞌhuiantarahuatonaꞌ, yatëpapirinahuëꞌ.

³⁴ Aꞌna huaꞌan yaꞌhuërin. Inasoꞌ cotio maistro. Camariro itopi. Parisio quëmapi niponahuëꞌ: “Noya quëmapi inasoꞌ,” topi yaꞌipi piyapiꞌsaꞌ. Inasoꞌ huanirahuaton, itërin: —Isopita aipiran ocoicoꞌ piꞌpian nonchinquëmaꞌ. Apira huënantaꞌinaꞌ, itërin.

³⁵ Nani ocoihuachinara, pënënin. —Niꞌcona iyaroꞌsaꞌ tëhuëtamaꞌ. Co isopita tëpacasoꞌ yaꞌhuërinhuëꞌ, tënahuë.

³⁶ Niꞌcochi. Iráca Tiotasë yaꞌhuërin. “Ca huaꞌan yaꞌcoanahuë,” topachina, catapini pasa pochin quëmapiꞌsari imapi. Imasapirinahuëꞌ, tëpahuachinara, yaꞌipi imapisopita yanquëëpi huachi.

³⁷ Ina piquëran copirno shaꞌhuitërinpoaꞌ nininënpoaꞌ niacotacasoꞌ. Naporoꞌ aꞌnantaꞌ yaꞌhuërin, Cotasë Caririaquë yaꞌhuërinsoꞌ. Naꞌcon miáchin piyapiꞌsari imasapirinahuëꞌ, inantaꞌ tëpahuachinara, imapisopita yanquëëpi.

³⁸ Napoaton ama isopita tëpacosohuëꞌ. Tananpitocoꞌ, tënahuë. Inahuara yonquinëna quëran aꞌchinahuachinasoꞌ, oshaquëran imapisopita pipimiatapi.

³⁹ Nipirinhuëꞌ, Yosëri catahuahuachin, co canpitari acopitaramahuëꞌ. Niꞌcona Yosë chachin inimicototamaꞌ, itërin. Itohuachina, huaꞌanoꞌsari natëtonaꞌ, co tëpapihuëꞌ.

⁴⁰ Caꞌtanoꞌsaꞌ naquëranchin amatantarahuatonaꞌ, chiníquën huihuipi. “Ama huachi insontaꞌ Quisoso nanamën shaꞌhuitocosohuëꞌ,” itahuatonaꞌ, aꞌpapi huachi.

⁴¹ Aꞌpahuachinara, pipipi. “Yosë noya niꞌnincoi niꞌtoi, Quisoso marëꞌ parisitërai,” taꞌtonaꞌ, capa cancantopi. Co mantaꞌ sëtopihuëꞌ.

⁴² Nani tahuëriya Yosë chinotopiso pëiquë aꞌchinapi. Co taꞌtopihuëꞌ. Pëiroꞌsaquëntaꞌ Quisoso nanamën shaꞌhuiraꞌpiapi. “Inasoꞌ Cristo, Yosëri aꞌpaimarinsoꞌ,” tosápi.