Hechos 3 - Chayahuita (Shahui)

Apia anoyatërinsoꞌ

¹ Aꞌna tahuëri piꞌi tëhuërënahuasoꞌ, Pitro paꞌsarin Yosë chinotopiso pëiquë. Naporoꞌ ora niyontonatonaꞌ, Yosë nontopi. Coansharëꞌ paꞌsapirinhuëꞌ.

² Inaquë aꞌna quëmapi quënanconpi. Nasitërin quëran huarëꞌ co nanitërinhuëꞌ iratacasoꞌ. Nani tahuëri Yosë chinotopiso pëiquë quëpapi. Aꞌna yaꞌcoanaquë acopi, “Noyápiachin,” itopiquë. Inaquë acopi coriqui maꞌpatacaso marëꞌ. Piyapiꞌsaꞌ Yosë chinotopiso pëiquë yaꞌconpachinara, coriqui maꞌpatërin.

³ Pitro, Coansha, inapita yaꞌconasoiꞌ, apiari quënanin. Quënanahuaton, coriqui quëtacaisoꞌ nohuantopirinhuëꞌ.

⁴ Pitro, Coansha inapitari niꞌsahuatonaꞌ: —Niꞌcoi iyasha, itërin Pitrori.

⁵ “Coriqui quëtarinco,” taꞌton, nëꞌpëtarin.

⁶ Pitroriso nipirinhuëꞌ: —Co coriqui yaꞌhuëtopirincohuëꞌ, nanitato, anoyataranquën. Quisocristo Nasaritoquë yaꞌhuërinsoꞌ nanan quëtërinco niꞌton, anoyataranquën. Ina nohuanton, noyataran. Huanirahuaton, noya iratëquëꞌ, itërin.

⁷ Inchinan imira quëran masahuaton, ahuanirin. Aꞌnaroáchin caꞌyopirain nantërë chachin chinirin.

⁸ Ina quëran pashitiquintarahuaton, huanirin. Iratarin. Pitro, Coansha, inapita Yosë chinotopiso pëiquë yaꞌconpachinara, inapitarë chachin apiantaꞌ yaꞌconin. Noya irataton, niirárin. “Ma noyacha Yosëso paya,” tosárin.

⁹ Inapohuachina, yaꞌipi piyapiꞌsari niꞌpi. “Ma noyacha Tata Yosë catahuarinco paya,” taꞌton, iratárin.

¹⁰ Niꞌsahuatonaꞌ, piyapiꞌsari nohuitopi niꞌton, paꞌyanpi. “Isosoꞌ quëmapi, Yosë chinotopiso pëiꞌ yaꞌcoananënquë huënsërahuaton, coriqui maꞌpachantërinsoꞌ. ¿Onporahuatoncha noya iratërin nicaya?” nitopi.

Yosë chinotopiso pëiquë Pitro pënëntërinsoꞌ

¹¹ Apia anoyatërinsosoꞌ: “Ama patocosohuëꞌ,” taꞌton, Pitro, Coansha inapita co aꞌporinhuëꞌ. Cara chachin “Saromon ishpananën,” itopiquë paꞌpachinara, notohuaroꞌ piyapiꞌsaꞌ manorahuatonaꞌ, inaquë niyontonpi. “Ma noyacha niꞌton, apia aꞌnaroáchin anoyatërin paya,” taꞌtonaꞌ, paꞌyanpi.

¹² Inapita niꞌsahuaton, Pitrori itapon: “¿Onpoatontaꞌ iyaroꞌsaꞌ iso quëmapi nicatomaꞌ, paꞌyanamaꞌ? ¿Onpoatontaꞌ quiyantaꞌ niꞌsaramacoi? Co quiyaora nanitaparaihuëꞌ anoyataꞌhuaisoꞌ. Co quiyasoꞌ noya noyacoihuëꞌ. Yosë nohuanton noyataton, iratarin.

¹³ Iráca shimashonënpoapita Apraan, Isaco, Cacopo, inapita Yosë chinotopi. Ina Yosëri chachin Quisoso noya noya acorin. Nichaꞌëinpoaso marëꞌ aꞌpaimapirinhuëꞌ, canpitari masahuatomaꞌ, huaꞌanoꞌsaquë yoꞌconamaꞌ. Piratori yaocoipirinhuëꞌ, co canpita nohuantëramahuëꞌ.

¹⁴ Quisososoꞌ noyasáchin ninin. Co piꞌpisha tërantaꞌ oshahuanpirinhuëꞌ, co nohuantëramahuëꞌ. ‘¿Intaꞌ ocoichinquëmaꞌ?’ itohuachinquëmara, tëpatonaꞌpi huayonamaꞌ.

¹⁵ Quisoso mini ananpirinpoaso nipirinhuëꞌ, atëpatëramaꞌ. Tëpapirinahuëꞌ, Yosëri ananpitaantarin. Quiyasoꞌ niꞌnai.

¹⁶ ‘Quisoso catahuarincoi,’ taꞌtoi, iso apia nohuitëramasoꞌ anoyatërai. Inantaꞌ: ‘Inasoꞌ, catahuarinco mini,’ taꞌton, noya paꞌsarin niꞌnamaꞌ canpitantaꞌ.

¹⁷ Quisoso Yosë quëran oꞌmapirinhuëꞌ, co nitotëramahuëꞌ. Napoaton, iyaroꞌsaꞌ, atëpatëramaꞌ. Huaꞌanoꞌsanëmantaꞌ co nitotopihuëꞌ.

¹⁸ Iráca pënëntonaꞌpiroꞌsaꞌ ninotonaꞌ, ninshitopi. ‘Aꞌna tahuëri Cristo parisitapon,’ topi. Yosë nohuanton, ninopi. Ninopiso pochachin parisitërin.

¹⁹ Napoaton iyaroꞌsaꞌ yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ oshanëmaꞌ inquichinquëmaꞌ.

²⁰ Quisocristo imapatamaꞌ, anoyacancantarinquëmaꞌ niꞌton, sano cancantaramaꞌ. Aꞌna tahuërintaꞌ ina chachin aꞌpatimantarinquëmaꞌ. Canpita marëꞌ nani Yosëri acorin.

²¹ Iráca quëran huarëꞌ Yosë nohuanton, noya pënëntonaꞌpiroꞌsaꞌ ninopi. ‘Aꞌna tahuëri Yosëri yaꞌipiya anoyatarin,’ topi. Anoyataquë huarëꞌ inápaquë Quisoso yaꞌhuantarin.

²² Iráca Moisësëri ninoton, shimashonënpoapita shaꞌhuitërin: ‘Aꞌna tahuëri Yosë nohuanton, aꞌna pënëntonaꞌpi yaꞌhuapon, ca pochin nininsoꞌ. Inasoꞌ Israiro quëmapi. Pënënpachinquëmaꞌ, yaꞌipi natëcoꞌ.

²³ Insosona co natëhuachinhuëꞌ, yaꞌhuërama quëran ocoimiatamaso yaꞌhuërin,’ tënin.

²⁴ Yaꞌipi pënëntonaꞌpiroꞌsaꞌ iso tahuëriꞌsaꞌ ninopi. Samoiro quëran huarëꞌ napopi.

²⁵ Yosë nohuanton, ninshitërinënquëmaꞌ, nitotëramaꞌ. Yosë chachin naporinsoꞌ natanamaꞌ. Shimashonënpita nontohuachina, yonquirinquëmaꞌ canpitantaꞌ. Iráca Apraan itërin: ‘Caora nohuanto, catahuaranquën. Quëma shiparinpita quëran yaꞌipi piyapiꞌsaꞌ noya cancantapi,’ itërin Yosëri.

²⁶ Canpitaꞌton yonquiatënquëmaꞌ, huiꞌnin ananpitaantarahuaton, aꞌparin catahuainquëmaso marëꞌ. Ina catahuahuachinquëmaꞌ, co noyahuëꞌ ninamasopita naniantaramaꞌ. Ina quëran nóya cancantaramaꞌ. Ina marëꞌ Quisoso aꞌpaimarin,” itërin.