Hechos 26 - Chayahuita (Shahui)

Huaꞌan Acriparintaꞌ Paono nataninsoꞌ

¹ Ina quëran huaꞌan Acripari Paono itapon: —Inta noniquë nipachin. Maꞌsona onporansoꞌ shaꞌhuitocoi paꞌpoyainquën, itërin. Itohuachina, Paonori anquitahuaton, itapon:

² “Noya sinioro huaꞌanpaꞌ, noya cancantato, nonchinquën natanco. Cotioroꞌsaꞌ nani naꞌcon shaꞌhuirapirinaco niꞌton, cari noꞌtëquën shaꞌhuitaranquën.

³ Quëmasoꞌ cotioroꞌsaꞌ aꞌchininsoꞌ noyá nitotëran. Nisha nisha inachintopisoꞌ yaꞌipiya nitotëran. Ama noꞌhuitatonhuëꞌ, noya natanco.

Coꞌhuara imashatëraponhuëꞌ, Paono naporinsoꞌ

⁴ Huaꞌhuatapo quëran huarëꞌ yaꞌhuërahuësoꞌ, Quirosarinquëntaꞌ yaꞌhuërahuësoꞌ, inapita yaꞌipi cotioroꞌsaꞌ nitotopi.

⁵ Casoꞌ Parisioco. Quiyasoꞌ cotioroꞌsaꞌ imapisoꞌ, noꞌtë noꞌtëquën natërai. Yaꞌipi cotioroꞌsaꞌ nitotopi. Nohuantopi naporini, inachachin shaꞌhuichitënënquënhuëꞌ.

^6-7 Iráca shimashonënpoapita nontaton, Yosëri itërin: ‘Aꞌna tahuëri nichaꞌësaranquëmaꞌ, nanpimiataramaꞌ,’ itërin. Yaꞌipi cotioroꞌsaꞌ ina ninapi, shonca catoꞌ huënton chachin ninarapi. Nani tahuëri tashirë chachin ina chinotatonaꞌ, naporapi. Cantaꞌ ina ninarahuë. Ina marëꞌ sinioro huaꞌan, cotio huaꞌanoꞌsaꞌ shaꞌhuirapirinaco.

⁸ Aꞌna tahuëri Yosë ananpitaantarinpoaꞌ, tënai. ¿Onpoatomataꞌ canpitasoꞌ co ina yanatëramahuë? tënahuë.

Paonori Quisoso imapisopita aparisitërinsoꞌ

⁹ Cantaꞌ iráca co Quisoso Nasaritoquë yaꞌhuërinsoꞌ imarahuëꞌ. Ina imapisopitantaꞌ noꞌhuirahuë. Aparisitaꞌhuasoꞌ yaꞌhuërin, topirahuëꞌ.

¹⁰ Quirosarinquë yaꞌhuasoco, Quisoso imapisopita tashinan pëiquë poꞌmorahuë. Cotio huaꞌanoꞌsaꞌ nanan quëtërinaco poꞌmoaꞌhuaso marëꞌ. Yatëpahuachinara, carintaꞌ: ‘Tëpacoꞌ,’ itërahuë.

¹¹ Niyontonpiso pëiroꞌsaquë yaꞌconahuato, naꞌaroꞌ aparisitërahuë. Quisoso aꞌpocaiso marëꞌ naporahuë. Chiníquën noꞌhuito, nisha piyapiꞌsaꞌ yaꞌhuëpiquë huarëꞌ paato, aparisitërahuë.

Paono yaꞌnan imarinsoꞌ

¹² Aꞌna tahuëri cotio huaꞌanoꞌsaꞌ nanan quëtërinaco Tamascoquë pacaꞌhuaso marëꞌ. Quisoso imapisopita macaꞌhuaso marëꞌ paꞌsapirahuëꞌ,

¹³ camotëchin iratërasoco, inápa quëran chiníquën aꞌpintimarincoi. Piꞌi quëran chini chiníquën aꞌpintërincoi. Huënaráchin huënaráchin niꞌnahuë. Caꞌtanincosopitantaꞌ niꞌpi.

¹⁴ Yaꞌipicoi noꞌpaquë anotasocoi, Quisoso nontërinco. Cotio nananquë nontërinco, natanahuë. ‘Saono, Saono, ¿onpoatontaꞌ aparisitaranco? Niꞌquëꞌ. Cahuario yaaꞌpahuatëra, naraꞌhuaya inëshin nininquë ohuanëꞌ. Cahuariori noꞌhuitaton toꞌtahuachina, aquë aquëtëꞌ iquitërin. Inapochachin quëmantaꞌ noꞌhuiranco niꞌton, aquë aquëtëꞌ co noyahuëꞌ cancantaran,’ itërinco.

¹⁵ ‘¿Inquëntaꞌ quëmasoꞌ Sinioro?’ itërahuë. ‘Ca Quisosoco, aparisitarancosoꞌ.

¹⁶ Iporaso nipirinhuëꞌ huaniquëꞌ. Nani acoranquën piyapiꞌsaꞌ shaꞌhuitamaso marëꞌ. Nani niꞌnanco. Aꞌna tahuëri nohuantërahuësoꞌ aꞌnotaranquën. Yaꞌipi shaꞌhuiráquëꞌ.

¹⁷ Cotioroꞌsaꞌ yatëpahuachinënquën, nichaꞌësaranquën. Nisha piyapiꞌsaꞌ yaꞌhuëpiquë aꞌpaaranquën. Inapitantaꞌ yatëpahuachinënquën, nichaꞌësaranquën.

¹⁸ Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Paonori natërinsoꞌ

¹⁹ Napoaton, sinioro huaꞌan, Quisoso inápa quëran yaꞌnotimarinco niꞌton, aꞌnaroáchin imarahuë. Yaꞌipi shaꞌhuitohuachincora, noꞌtëquën natërahuë.

²⁰ Tamascoquë yaꞌhuëpisoꞌton shaꞌhuitërahuë. Ina quëran Quirosarinquëntaꞌ shaꞌhuiantarahuë. Yaꞌipi Cotia partintaꞌ inachachin shaꞌhuiantarahuë. Nisha piyapiꞌsantaꞌ aꞌchintërahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtaantacoꞌ. Tëhuënchachin imapatamaꞌ, noya nisaramaꞌ,’ itërahuë.

²¹ Ina marëꞌ cotioroꞌsaꞌ noꞌhuirinaco. Yosë chinotopiso pëiquë masahuatonaco, yatëpapirinacohuëꞌ,

²² Yosësoꞌ catahuarinco, chaꞌërahuë. Napoaton ipora huantaꞌ natëarahuë. Yaꞌipi piyapiꞌsaꞌ huaꞌanoꞌsa quëran huarëꞌ shaꞌhuitarahuë. Moisësë, pënëntonaꞌpiroꞌsaꞌ, inapita ninopiso chachin aꞌchinarahuë:

²³ Yosë nohuanton, Cristo chiminapon. Chiminaponahuëꞌ, Yosëri ananpitaantarin. Inaꞌton nanpiantarin. Ina quëran aꞌchintapon tahuëri pochin cancantacaiso marëꞌ. Co cotioroꞌsaráchin nichaꞌësarinhuëꞌ. Nisha piyapiꞌsantaꞌ nichaꞌësarin, topi ninshitatonaꞌ,” tënin.

Huaꞌaontaꞌ imacasoꞌ Paono nohuantërinsoꞌ

²⁴ Ina pochin nontahuachina, Pistori chiníquën itërin: —¡Paono, quëmasoꞌ huaꞌyantëran! Naꞌcon quirica nontaton huaꞌyantëran, itërin.

²⁵ —Coꞌchi sinioro huaꞌan huaꞌyantërahuëꞌ paya. Noꞌtëquën nonahuë. Sano yonquiato, nontaranquëmaꞌ.

²⁶ Yaꞌipi shaꞌhuitëranquëmasoꞌ huaꞌan Acripa nani nitotërin. Co poꞌoana quëran napopihuëꞌ. Yaꞌipi piyapi nitotopi. Inantaꞌ nani natantërin. Napoaton co tëꞌhuatohuëꞌ, ina nontarahuë.

²⁷ ¿Quëmantaꞌ sinioro huaꞌan, pënëntonaꞌpiroꞌsaꞌ ninshitopisoꞌ natëran paꞌ? Natëran tënahuë casoꞌ, itërin Paonori.

²⁸ —Piꞌpian nontopirancohuëꞌ aꞌnaromarëáchin quëma pochin cantaꞌ Cristo imaꞌi, ¿topiranhuëꞌ ti? itërin Acripari.

²⁹ —Paꞌpi nohuantërahuë ca pochachin nicamasoꞌ. Yaꞌipinquëmaꞌ natanamacosopita ca pochachin nicacamasoꞌ nohuantopirahuëꞌ. Catinaquëachin tonpoinëmasoꞌ co nohuantërahuëꞌ. Aꞌnaroáchin imarama naporini, noya niitonhuëꞌ. Huaꞌqui quëran imapatamantaꞌ, noya chachin niitonhuëꞌ, itërin Paonori.

³⁰ Ina natanahuaton, huaꞌan huanirin. Pisto, Pirinisa, yaꞌipi inaquë huënsëpisopitarë chachin huanipi.

³¹ Pipirahuatonaꞌ, inahuara capini ninontopi. —Iso quëmapi co mantaꞌ onporinhuëꞌ. Co tëpacasoꞌ yaꞌhuërinhuëꞌ. Co tashinan pëiquë tërantaꞌ poꞌmocasoꞌ yaꞌhuërinhuëꞌ, nitopi.

³² Ina quëran Acripari Pisto nontaton itapon: Co Noma copirno chachin nontapon yapaꞌninhuëꞌ naporini, ocoicasoꞌ yaꞌhuëꞌitonhuëꞌ, itërin.