Hechos 25 - Chayahuita (Shahui)

Huaꞌan Pistoquë shaꞌhuirapiantapisoꞌ

¹ Nasha huaꞌan canquirin huachi, Pisto itopisoꞌ. Sisariaquë huëcaton, cara tahuëri iꞌhuatërin. Ina quëran Quirosarinquë paꞌnin.

² Inaquë paꞌpachina, cotio huaꞌanoꞌsaꞌ, corto huaꞌanoꞌsaꞌ, inapitari Paono shaꞌhuirapipi.

³ “Quirosarinquë quënantaquëꞌ, natantaꞌii, topiraihuëꞌ,” itopi. Nani chinotopi naꞌpirahuatonaꞌ, iraquë tëpacaiso marëꞌ.

⁴ Napotopirinahuëꞌ, co huaꞌan nohuantërinhuëꞌ. “Inca. Co yaquëntarahuëꞌ. Sisariaquë aꞌpairapi. Co huaꞌqui quëranhuëꞌ inaquë cantaꞌ paantarahuë,” tënin.

⁵ —Napoaton paꞌpato, caraíchin huaꞌanquëmaꞌ huëcoꞌ paꞌahuaꞌ, tënahuë. Paono co noyahuëꞌ nipachin, inaquë shaꞌhuirapicoꞌ, itërin.

⁶ Inaquë shonca tahuëri pochin iꞌhuatantarahuaton, Sisariaquë paantarin. Tahuëririnquë coisë shiranënquë huënsërahuaton, Paono amatërin.

⁷ Cotioroꞌsaꞌ Quirosarin quëran nani oꞌmapi niꞌton, Paono huëꞌpachina, ahuancanapirahuatonaꞌ, naꞌcon shaꞌhuirapiapi. Nisha nisha shaꞌhuirapipirinahuëꞌ, co niꞌninso chachin yaꞌhuërinhuëꞌ.

⁸ Ina quëran Paonori itërin: —Iráca quëran huarëꞌ, sinioro huaꞌan, noya ninahuë. Co mantaꞌ onporahuëꞌ. Moisësë pënëntërinsoꞌ cotioroꞌsari natëhuachinara, co ina marëꞌ noꞌhuirahuëꞌ. Yosë chinotopiso pëintaꞌ co tapirahuëꞌ. Co nisha piyapi ichiyaꞌconahuëꞌ. Noma copirnontaꞌ natërahuë. Co onporontaꞌ piyapiꞌsaꞌ shaꞌhuitërahuëꞌ ina noꞌhuicaisoꞌ. Topinan quëran shaꞌhuirapirinaco, itërin.

⁹ Noya natanpirinhuëꞌ, huaꞌan co nohuantërinhuëꞌ cotioroꞌsari noꞌhuicaisoꞌ niꞌton, Paono itërin: —¿Nohuantëran Quirosarinquë paacasoꞌ? Inaquë shaꞌhuirapihuachinën, cari natanpato, shaꞌhuitaranquën, itërin.

¹⁰ —Co nohuantërahuëꞌ. Quëmasoꞌ Noma copirno acorinquën niꞌton, nontaranquën. Shaꞌhuirapirinacosoꞌ isëquë anoyatacasoꞌ yaꞌhuërin. Co mantaꞌ cotioroꞌsaꞌ onpotërahuësohuëꞌ, nitotëran.

¹¹ Tëpatonaꞌpi, copirno noꞌhuinaꞌpi, inapita tëpacasoꞌ yaꞌhuërin. Ina pochinco cantaꞌ naporini, tëpainacosoꞌ nohuanchitohuëꞌ. Nipirinhuëꞌ, nonpinapihuachinaco, co cotioroꞌsaquë yocancosoꞌ yaꞌhuërinhuëꞌ, tënahuë. Noma copirno chachin yanontarahuë. Ina nataincosoꞌ yaꞌhuërin, itërin Paonori.

¹² “Noma copirnosoꞌ chini chiníquën nanantërin niꞌton, co topinan aꞌparëhuëꞌ,” taꞌton, coisënënpita nontërin. Nani nontohuachina, Paono itantarin: —Noma copirno chachin yanontëran niꞌquëhuarëꞌ, ina yaꞌhuërinꞌpaꞌ aꞌpaaranquën, nontonquëꞌ, itërin.

Acripa huaꞌan canquirinsoꞌ

¹³ Huaꞌquimiáchin quëran aꞌna huaꞌan chiníquën nanantërinsoꞌ canquirin, Acripa itopisoꞌ. Sisariaquë huëꞌnin Pisto nicapon. Aꞌna sanapintaꞌ huëꞌnin, Pirinisa itopisoꞌ.

¹⁴ Huaꞌquiꞌ inaquë yacapatarin niꞌton, Pistori itërin: —Tashinan pëiquë aꞌna quëmapi yaꞌhuëarin, Paono itopisoꞌ. Iráca Huirisëri poꞌmorinsoꞌ.

¹⁵ Iꞌhua Quirosarinquë yaꞌhuasoco, cotio huaꞌanoꞌsaꞌ, ansianoꞌsaꞌ, inapitari naꞌcon shaꞌhuirapipi. “Chiníquën anaꞌintëquëꞌ,” itërinaco.

¹⁶ Ina itohuachinacora, cari itapo: “Noma piyapicoi co topinan quëran anaꞌintëraihuëꞌ. Cato yaꞌpi maꞌsha nionpotohuachinara, cato chachin coisëquë paꞌsapi. Shaꞌhuirapihuachina, aꞌnantaꞌ aꞌpanitacasoꞌ yaꞌhuërin. Ina quëran coisëri noya nitotaton, tëhuënaꞌpi noꞌtëquën anaꞌintarin. Ina pochin Noma piyapicoisoꞌ ninai,” itërahuë.

¹⁷ Napoaton isëquë huëꞌpachinara, co huaꞌquirahuëꞌ. Tahuëririnquë coisë shiranënquë huënsërahuato, Paono amatërahuë.

¹⁸ Ina quëran cotioroꞌsari shaꞌhuirapipi. Panca tëhuëmara niꞌton, shaꞌhuirapiapi, topirahuëꞌ, co ina pochin shaꞌhuirapipihuëꞌ.

¹⁹ “Paono co quiya pochin Yosë chinotërinhuëꞌ. Nisha imarin. Aꞌna quëmapi Quisoso itopisoꞌ chiminaponahuëꞌ, nani nanpiantarin,” toconin, topi. Inaíchin shaꞌhuirapipi.

²⁰ Cotioroꞌsaꞌ moshapisoꞌ co piꞌpisha tërantaꞌ nitotërahuëꞌ. Napoaton Quirosarinquë yaquëpapirahuëꞌ aquëtëꞌ natantaꞌhuaso marëꞌ. “Inaquë shaꞌhuirapiinën,” itopirahuëꞌ, co nohuantërinhuëꞌ

²¹ “Noma copirno chachin yanontarahuë. Ina nataincosoꞌ yaꞌhuërin,” tënin. Napoaton tashinan pëiquë poꞌmoantarahuë. Nanitohuato, Noma copirno nontacaso marëꞌ aꞌpaarahuë, tënin Pisto.

²² —Carintaꞌ nataꞌin, tënin Acripa. —Noyahuaꞌ. Tashiraya chachin natanaran, itërin Pistori.

²³ Tahuëririnquë Acripasoꞌ Pirinisarë chachin huëꞌpi. Noyasha nitaparahuatonaꞌ, natanacaiso pëiquë yaꞌconpi. Capitanoꞌsaꞌ, ninanoꞌ huaꞌanoꞌsaꞌ, inapitantaꞌ yaꞌconpi. Naporahuatonaꞌ, Paonontaꞌ amatopi.

²⁴ Huëꞌpachina, Pistori itapon: —Noya sinioro huaꞌan huëꞌnan. Canpitantaꞌ iyaroꞌsaꞌ, noya huëꞌnamaꞌ. Yaꞌipinquëmaꞌ yanontaranquëmaꞌ, natanco. Iso quëmapi niꞌcoꞌ. Maꞌsona onpomara. Yaꞌipi cotioroꞌsari noꞌhuipi. Quirosarinquë shaꞌhuirapipi, isëquënta huëcatonaꞌ, shaꞌhuirapipi, chiníquën nonapitonaꞌ. “Co noya quëmapihuëꞌ. Atëpatëquëꞌ,” itërinaco.

²⁵ Natanpirahuëꞌ, co mantaꞌ onporinhuëꞌ. Co tëpacasoꞌ yaꞌhuërinhuëꞌ, tënahuë. “Noma copirno chachin yanontarahuë,” itërincoso marëꞌ inaquë yaaꞌpapirahuëꞌ, co nanitërahuëꞌ topinan aꞌpacaꞌhuasoꞌ.

²⁶ Quiricantaꞌ yaaꞌpapirahuëꞌ. Co nitotërahuëꞌ maꞌsona onporinsoꞌ ninshitaꞌhuasoꞌ. “¿Maꞌtaꞌ Noma copirno ichi?” taꞌto, Paono amatërahuë natanamaso marëꞌ. Quëmarintaꞌ, sinioro huaꞌan, noya natantariquëꞌ. Nani natanpatan, catahuaco ninshichi, topirahuëꞌ.

²⁷ Co topinan aꞌpacasoꞌ yaꞌhuërinhuëꞌ. Maꞌsona onporinsoꞌ ninshitahuato shaꞌhuirapicasoꞌ yaꞌhuërin, tënahuë, itërin.