Hechos 24 - Chayahuita (Shahui)

Huaꞌan Huirisëquë shaꞌhuirapipisoꞌ

¹ Aꞌnatërápo tahuëri nanihuachina, corto huaꞌan chini chiníquën nanantërinsoꞌ canquirin, Ananiasë itopisoꞌ. Aꞌnaquën cotio ansianoꞌsari caꞌtanpi. Nonapinaꞌpi huaꞌaontaꞌ huëꞌnin, Tirotoro itopisoꞌ. Huirisë yaꞌhuërinquë huëꞌsahuatonaꞌ, Paono shaꞌhuirapipi.

² Paono quëntahuachinara, Tirotorori itërin: —Ipora sinioro huaꞌan, piꞌpian nonchinquën natanco. Ma noya quëmasoꞌ huaꞌanëntërancoi. Noya yonquiaton, naꞌcon catahuarancoi niꞌton, sano yaꞌhuërai.

³ Ina marëꞌ yaꞌipicoi noya niꞌnainquën. “Yosparinquën,” itërainquën. Quëmasoꞌ tëhuënchachin chiníquën nanantëran.

⁴ Apira piꞌpisha yanontaranquën, noya natanco. Co huaꞌquiꞌ nontaranquënhuëꞌ.

⁵ Iso quëmapi Paono itopisoꞌ paꞌpi co noyahuëꞌ, tënai. Yaꞌipi parti paaton, piyapiꞌsaꞌ nisha nisha ayonquirin. Aꞌchinpachina, cotioroꞌsaꞌ ninoꞌhuipi. Yaꞌipi parti naporin. Nisha imarin. Nasarinoroꞌsaꞌ itopisoꞌ imaton, naꞌa piyapiꞌsaꞌ aꞌchintarin imacaiso marëꞌ.

⁶ Yosë chinotopiso pëintaꞌ yatapirin. Nisha piyapiꞌsaꞌ inaquë ichiyaꞌconin, co inapitasoꞌ yaꞌconacasohuëꞌ nipirinhuëꞌ. Naporoꞌ quiyari manai. [Quiya coisëquë yaquëpapiraihuëꞌ anaꞌintacaso marëꞌ.

⁷ Capitan huaꞌan Nisiasëso nipirinhuëꞌ, notohuaroꞌ sontaroꞌsaꞌ quësahuaton manin. Osërëtërincoi.

⁸ “Noma huaꞌan yaꞌhuërinꞌpaꞌ paatomaꞌ, shaꞌhuirapicoꞌ,” itërincoi. Napoaton isëquë huëꞌnai.] Noꞌtëquën shaꞌhuirapiarai. Quëmari Paono natanquëꞌ inachachin shaꞌhuichinquën, itërin Tirotorori.

⁹ Cotioroꞌsaꞌ huëꞌpisopitantaꞌ inachachin napotopi. “Noꞌtëquën shaꞌhuitërinquën,” itopi.

¹⁰ Ina quëran huaꞌani imirin quëran tasatërin Paono nontacaso marëꞌ. Napotohuachina, Paonori itërin: —Naꞌa piꞌipi sinioro huaꞌan quëma huaꞌanëntërancoi. Napoaton noya cancantato, nontaranquën.

¹¹ Iꞌhuamiáchin Quirosarinquë paantarahuë Yosë chinotaꞌhuaso marëꞌ. Shonca catoꞌ tahuëríchin nisarin paꞌnahuësoꞌ. Aꞌnapita natanpatan, inachachin shaꞌhuitarinënquën. Co huaꞌquiyatërarahuëꞌ.

¹² Yosë chinotopiso pëiquë paꞌpatora, co insontaꞌ noꞌhuirahuëꞌ. Niyontonpiso pëiquëntaꞌ noya paꞌnahuë. Co cachiquë tërantaꞌ chiníquën aꞌchinahuëꞌ. Piyapiꞌsaꞌ niyontonpachinara, co shaꞌhuitërahuëꞌ ninoꞌhuicaisoꞌ.

¹³ Topinan quëran nonpinapirinaco. Naꞌcon shaꞌhuirapipirinacohuëꞌ, niꞌnincoso chachinso co yaꞌhuërinhuëꞌ.

¹⁴ “Nisha imarin,” topi. Inaíchin noꞌtëquën nonpi. Tëhuënchachin Quisoso nanamën imarahuë. Nipirinhuëꞌ, Yosë noꞌtëquën chinotërahuë. Shimashonëhuëpita chinotopiso chachin chinotërahuë cantaꞌ. Yaꞌipi Yosë quiricanën natërahuë. Iráca pënëntërinsoꞌ, pënëntonaꞌpiroꞌsaꞌ ninshitopisoꞌ, inapita yonquirahuë.

¹⁵ “Yosë noꞌtëquën nontërinpoaꞌ,” taꞌto natërahuë. “Aꞌna tahuëri yaꞌipi piyapiꞌsaꞌ ananpitaantarahuë. Noya piyapiꞌsaꞌ, co noya piyapiꞌsahuëꞌ, yaꞌipi ananpitaantarahuë,” tënin Yosë. Ina tahuëri casoꞌ ninarahuë. Isopitantaꞌ ina ninarapi.

¹⁶ Napoaton nani tahuëriya Yosë noꞌtëquën yanatërahuë. Piyapiꞌsantaꞌ co yanonpintërahuëꞌ.

¹⁷ Iráca Quirosarinquë yaꞌhuëpirahuëꞌ. Naꞌa piꞌipi aꞌna parti paꞌnahuë quëran iꞌhuamiáchin inaquë paantarahuë. Saꞌahuaroꞌsaꞌ nosoroato, coriqui quëtaꞌhuaso marëꞌ paꞌnahuë. Maꞌsha Yosë quëtaꞌhuaso marëntaꞌ paꞌnahuë.

¹⁸ Iráca pënëntërinsoꞌ natëto, Yosë chinotopiso pëiquë yaꞌconpirahuëꞌ, co mantaꞌ onporahuëꞌ. Co piyapiꞌsaꞌ ayontonahuëꞌ. Co ca nohuanto ninoꞌhuipihuëꞌ. Inaquë cotioroꞌsaꞌ Asia parti yaꞌhuëpisopita quënaninaco.

¹⁹ Inapita mini isëquë huëꞌsahuatonaꞌ, shaꞌhuirapiitonacohuëꞌ, co huëꞌpihuëꞌ.

²⁰ Iꞌhua cotio huaꞌanoꞌsaꞌ niyontonpachinara, amatërinaco. Isopita nataninaco. Maꞌsona onporahuësoꞌ shaꞌhuichinën.

²¹ Naporoꞌ isoíchin napotërahuë. “Yosë ananpitaantarinpoaꞌ tënahuëso marëꞌ ipora shaꞌhuirapirinaco,” itërahuë, tënin Paono.

²² Ina natanahuaton: —Noyahuaꞌ. Nani natananquën. Capitan huaꞌan Nisiasë oꞌmahuachin, iso nanan yonquiantarahuato, shaꞌhuichinquëmaꞌ, tënin huaꞌan. Quisoso nanamën aꞌchinpisoꞌ noya nitotaton, co aquëtëꞌ yanataninhuëꞌ.

²³ Ina quëran capitan shaꞌhuitërin: “Paono noya aꞌpaiquëꞌ ama taꞌainsohuëꞌ. Nipirinhuëꞌ, ama tonpoquësohuëꞌ. Nipayarinsopita huëꞌpachinaꞌ, noya yaꞌcoinaꞌ. Maꞌsha pahuantohuachin, quëchinaꞌ,” itërin.

²⁴ Huaꞌquimiáchin quëran Huirisë saꞌinë chachin huëantarahuaton, Paono amataantarin. Saꞌinsoꞌ cotio sanapi, Torosira itopi. Paono huëꞌpachina, itapon: “Quisocristo imaransoꞌ shaꞌhuitocoi noya nitochii,” itohuachina, “Tëhuënchachin Quisocristo imarahuë.

²⁵ Yosë shaꞌhuitërinpoaꞌ noya cancantacaso marëꞌ. Ina catahuarinpoaꞌ co noyahuëꞌ yonquirëhuasopita naniantacasoꞌ. Aꞌna tahuëri coisë pochin nicaton, yaꞌipi piyapiꞌsaꞌ natanarin. Co noyahuëꞌ nipisopita anaꞌintarin,” tënin Paono. Napotohuachina, huaꞌan paꞌpi paꞌyanin. —Nani huachi. Iporasoꞌ paquëꞌ. Aꞌna tahuëri yanontaantahuatënquën, amataantaranquën, itërin.

²⁶ “Paono pahuërëaponco pipicaso marëꞌ nimara,” taꞌton, huaꞌqui quëran huaꞌqui quëran amataantarin nontacaso marëꞌ. Naꞌaroꞌ Paono nontopirinhuëꞌ.

²⁷ Catoꞌ piꞌipi nanihuachina, nisha huaꞌan yaꞌcoantarin, Porsio Pisto itopisoꞌ. Huirisësoꞌ pipirin huachi. Pipiponahuëꞌ, co Paono ocoirinhuëꞌ. “Cotioroꞌsaꞌ noꞌhuihuachinaco,” taꞌton, co ocoirinhuëꞌ.