Hechos 22 - Chayahuita (Shahui)

¹ “Natanco iyaroꞌsaꞌ, apiroꞌsaꞌ, piꞌpian yanontëranquëmaꞌ. Caso co mantaꞌ onporahuëꞌ,” tënin.

² Cotio nananquë nonsarinso natanahuatonaꞌ, aquë aquëtë taꞌtopi. Napohuachinara, itaantarin:

³ “Cantaꞌ iyaroꞌsaꞌ cotio piyapico. Tarsoquë nasitërahuë. Sirisia parti nasitopirahuëꞌ, isëquë huëcato, huiꞌnapitërahuë. Maistro Camariro aꞌchintërinco. Shimashonënpoaꞌ pënëntërinso chachin yaꞌipi aꞌchintërinco. Huaꞌhuatapo quëran huarëꞌ chiníquën Yosë yonquirahuë. Aꞌnaya tërantaꞌ nisha yonquihuachinara, canpita pochachin noꞌhuirahuë.

⁴ Iráca naꞌa Quisoso imapisopita aparisitërahuë. Yatëparahuë. Quëmapiꞌsaꞌ tonporahuato, tashinan pëiquë poꞌmorahuë. Sanapiꞌsa quëran huarëꞌ inaquë poꞌmorahuë.

⁵ Yanitotohuatamaꞌ, corto huaꞌan chini chiníquën nanantërinsontaꞌ inachachin shaꞌhuitarinquëmaꞌ. Cotio ansianoꞌsantaꞌ nitotopi. Inapitasoꞌ quirica ninshitërinaco iyaroꞌsaꞌ Tamascoquë yaꞌhuëpisopita quëtonaꞌhuaso marëꞌ. Inatohuaꞌ paꞌnahuë Quisoso imapisopita macaꞌhuaso marëꞌ. ‘Tonporahuato, Quirosarinquë quëmaarahuë anaꞌintacaiso marëꞌ, taꞌto,’ paꞌnahuë.

Quisosori yaꞌnotërinsoꞌ shaꞌhuiantarinsoꞌ

⁶ Paꞌsápatoi Tamascoquë yaꞌcaritërarai. Camotëchin nisahuasoꞌ, aꞌnaroáchin inápa quëran huënaráchin huënaráchin aꞌpintërinco.

⁷ Noꞌpaquë anotahuato, inápa quëran nontërincosoꞌ natanahuë. ‘Saono, Saono, ¿onpoatontaꞌ aparisitaranco?’ itërinco.

⁸ ‘¿Inquëntaꞌ quëmasoꞌ Sinioro?’ itërahuë. ‘Ca Quisosoco, Nasaritoquë yaꞌhuërahuësoꞌ. Aparisitaranco,’ itërinco.

⁹ Caꞌtaninacosopitantaꞌ aꞌpininsoꞌ niꞌpi. Nipirinhuëꞌ, nontërincosoꞌ co natanpihuëꞌ.

¹⁰ ‘¿Maꞌtaꞌ Sinioro onpoꞌisoꞌ?’ itërahuë. ‘Huanirahuaton, ninanoquë paquëꞌ. Inaquë aꞌna quëmapi shaꞌhuitarinquën maꞌsona nicamasoꞌ,’ itërinco.

¹¹ Huënaráchin huënaráchin aꞌpintërinco niꞌton, co mantaꞌ quënantërahuëꞌ. Napoaton caꞌtanincosopita matanparahuatonaco, Tamascoquë quëparinaco.

¹² Ina ninanoquë chachin aꞌna quëmapi yaꞌhuërin, Yosë noya chinotërinsoꞌ. Ananiasë itopi. Moisësë iráca pënëntërinsoꞌ noꞌtëquën natërin. ‘Inasoꞌ noya quëmapi,’ topi yaꞌipi cotioroꞌsaꞌ.

¹³ Huëcapairahuatonco, nontiirinco. ‘Iya Saono. ¡Sinioro nohuanton, noya niꞌtantaquëꞌ!’ itërinco. Naporo chachin noya niꞌtaantarahuato, ina quënanahuë.

¹⁴ Ina quëran itaantarinco: ‘Yosë chinotërëhuasoꞌ nani huayoninquën nohuantërinso chachin nitotamaso marëꞌ. Ina nohuanton, Quisoso yaꞌnotërinquën. Noya noya inasoꞌ. Nontërinquënsoꞌ natanan.

¹⁵ Yosë acorinquën yaꞌipi piyapiꞌsaꞌ shaꞌhuitamaso marëꞌ. Niꞌnansoꞌ, natanansoꞌ, inapita shaꞌhuiaran. Ina marëꞌ yaꞌnotërinquën.

¹⁶ Napoaton ama huaꞌquiquësohuëꞌ. Apiramiáchin huaniquëꞌ. “Quisoso imasarahuë huachi,” taꞌton, aporihuanquëꞌ. Ina nontohuatan, oshanën inquitarinquën,’ itërinco.

Nisha piyapiꞌsaꞌ aꞌchintacaso marëꞌ aꞌparinsoꞌ

¹⁷ Ina quëran Quirosarinquë paantahuatëra, Yosë chinotopiso pëiquë paꞌnahuë. Inaquë Yosë nontasoco, huaꞌnarëso pochin niꞌnahuë.

¹⁸ Quisoso nontaantarinco. ‘Manorahuaton, Quirosarin quëran pipiquëꞌ. Ca nanamëhuë shaꞌhuihuatan, co natëarinënquënhuëꞌ,’ itërinco.

¹⁹ ‘Inapita Sinioro nohuitërinaco. Aꞌna parti aꞌna parti paato, yaꞌipi niyontonpiso pëiroꞌsaquë yaꞌconahuë. Inaquë imarinënquënsopita ahuërahuë. Tashinan pëiquë poꞌmorahuë.

²⁰ Istipan quëma nanamën aꞌchininso marëꞌ tëpahuachinara, cantaꞌ niꞌnahuë. “Tëpacoꞌ,” itërahuë carintaꞌ. Tëpatonaꞌpiroꞌsaꞌ aꞌmopisoꞌ ocoirahuatonaꞌ, quëtërinaco, aꞌpairahuë. Yaꞌipiya nohuitërinaco,’ itërahuë.

²¹ ‘Ina nipirinhuëꞌ, paquëꞌ. Aquë yaaꞌparanquën nisha piyapiꞌsaꞌ aꞌchintamaso marëꞌ,’ itërinco. Napoaton nisha piyapiꞌsaꞌ aꞌchintarahuë,” tënin Paono.

Capitan huaꞌani maninsoꞌ

²² Piyapiꞌsaꞌ noya natanapirinahuëꞌ. “Nisha piyapiꞌsaꞌ aꞌchintarahuë,” topachina, noꞌhuitaantapi. “Tëpachinacoꞌ. ¡Paꞌpi co noya quëmapihuëꞌ! ¡Chiminchinaꞌin!” itopi.

²³ Chiníquën nonsapi. Noꞌhuitatonaꞌ, aꞌmopisoꞌ paꞌtan paꞌtantahuatonaꞌ, inápaquë moꞌshiquëpita paꞌsatapi. Chiníquën noꞌhuitohuachinara, cotioroꞌsaꞌ inachintopisoꞌ.

²⁴ Capitan huaꞌani niꞌsahuaton, sontaroꞌsa itapon: “Sontaroꞌsanpoa yaꞌhuërëhuaquë quëparahuatomaꞌ, huihuicoꞌ. Maꞌmarësona noꞌhuipisoꞌ, shaꞌhuichinpoaꞌ,” itërin.

²⁵ Inaquë quëparahuatonaꞌ, tonpopi huihuicaiso marëꞌ. Tonpopirinahuëꞌ, capitan inaquë huaniarin niꞌton, Paonori itapon: —Casoꞌ Noma piyapico nipirahuëꞌ, yahuihuiramaco. Co napotamacoso yaꞌhuërinhuëꞌ. Co coisë nitotopirinhuëꞌ, ¿yahuihuiramaco ti? itërin Paonori.

²⁶ Ina natanahuaton, capitan huaꞌan shaꞌhuitapon paꞌnin. —¿Maꞌtaꞌ ipora onpoapon? Pasoꞌ quëmapi Noma piyapi nipirinhuëꞌ, yahuihuitëran. Niꞌquëna copirno noꞌhuihuachinquën, itërin.

²⁷ Napotohuachina, capitan huaꞌani huëcapairahuaton: —¿Quëmasoꞌ Noma piyapinquën ti? itiirin. —Inaco mini, itërin Paonori.

²⁸ —Naꞌcon pahuërëtato, Noma piyapi yaꞌconahuë, itërin capitan huaꞌani. —Caso nipirinhuëꞌ nasitërahuë quëran huarëꞌ Noma piyapico. Tatahuë Noma piyapi niꞌton, cantaꞌ inapochachin ninahuë, tënin Paono.

²⁹ Ina natanahuatonaꞌ, co huachi huihuipihuëꞌ. Capitan huaꞌaontaꞌ paꞌyanaton, tëꞌhuarin. Noma piyapi nipirinhuëꞌ, catinaquë tonporinso marëꞌ copirno tëꞌhuatërin.

Cotio huaꞌanoꞌsaꞌ Paonori shaꞌhuitërinsoꞌ

³⁰ Tahuëririnquë capitan huaꞌani yanatantërin. “¿Maꞌmarëtaꞌ cotioroꞌsari shaꞌhuirapipi?” taꞌton, sontaroꞌsaꞌ shaꞌhuitërin Paono ocoicaiso marëꞌ. Naporahuaton, yaꞌipi cotio huaꞌanoꞌsaꞌ amatërin. Corto huaꞌanoꞌsaꞌ chini chiníquën nanantopisontaꞌ amatërin. Nani niyontonpachinara, inaquë Paono quëparin natanacaiso marëꞌ.