Hechos 2 - Chayahuita (Shahui)

Ispirito Santo oꞌmarinsoꞌ

¹ Ina quëran Pinticosti tahuëri nanihuachina, Quisoso imapisopita inaquëráchin niyontonpi.

² Aꞌnanaya chiníquën irininsoꞌ natanpi. Panca ihuan pochin tënëntërimarin. Inápa quëran oꞌmarin. Yaꞌipi pëianaquë tënëanahuanin.

³ Ina quëran pën nënërinso pochin nininsopita yaꞌnoimarin. Yaꞌipiya aꞌnaya aꞌnaya motoanshirainënaquë chiniimarin.

⁴ Napohuachina, Ispirito Santori yaꞌipiya yaꞌcoancantërin. Ina quëran inari catahuarin nisha nisha nananquë nonacaiso marëꞌ. Co nitotaponaraihuëꞌ, aꞌnaroáchin nonpi huachi.

⁵ Ina ninanoquë chachin naꞌa cotioroꞌsaꞌ yaꞌhuëapi. Nisha nisha parti quëran huëꞌpi Yosë chinotacaiso marëꞌ. Napoaton nisha nisha nananquë nonpi.

⁶ Quisoso imapisopita nisha nisha nananquë nonsapisoꞌ natanpi. Natanahuatonaꞌ, notohuaroꞌ piyapi niyontonpi. Aꞌnaya aꞌnaya inahuara nananquë nonpisoꞌ natanahuatonaꞌ, paꞌyanpi.

⁷ Chiníquën paꞌyanatonaꞌ, ninontopi. —Maꞌpitataꞌ natanëhuasoꞌ. Isopitaso Cariria parti yaꞌhuëpisopitaráchin niponaraihuëꞌ,

⁸ ¿onporahuatonataꞌ canpoaꞌ nisha nisha nananquë nonëhuaso pochachin inahuantaꞌ aꞌnaroáchin nonpi? topi.

⁹ Nisha nisha parti yaꞌhuëpisopita nani huëꞌpi. Partiaroꞌsaꞌ, miriaroꞌsaꞌ, iranoꞌsaꞌ, Misapotamiaquë yaꞌhuëpisopita, Cotia parti yaꞌhuëpisopita, capatosiaroꞌsaꞌ, pontoroꞌsaꞌ, asiaroꞌsaꞌ, inapita natanapi.

¹⁰ Piriquiaroꞌsaꞌ, panpiriaroꞌsaꞌ, iquipitoroꞌsaꞌ, nipiaroꞌsaꞌ, Sirini pirayan yaꞌhuëpisopita, inapitantaꞌ nani huëꞌpi. Niꞌtoroꞌsaꞌ Noma quëran huëꞌpisopitantaꞌ natanapi.

¹¹ Aꞌnaquën cotioroꞌsaꞌ, aꞌnaquën nisha piyapiꞌsaꞌ niponaraihuëꞌ, Yosë chinotopi. Critaroꞌsaꞌ, arapiaroꞌsaꞌ, inapitantaꞌ huëcatonaꞌ, natanapi. “Nisha nishanpoaꞌ nicarihuarahuëꞌ, canpoaꞌ nanamënpoaquë chachin nontarinënpoaꞌ. Yosë paꞌyápiro nininsoꞌ shaꞌhuitarinënpoaꞌ, natanëhuaꞌ.

¹² Maꞌpitataꞌ napopi,” taꞌtonaꞌ, paꞌyanpi. —¿Onporahuatonataꞌ naponontërinënpoaꞌ? topi.

¹³ Aꞌnaquënso nipirinhuëꞌ tëhuarahuatonaꞌ: —Noꞌpitonaꞌ, napoapi, toconpi.

Pitro pënëntërinsoꞌ

¹⁴ Shonca catoꞌ caꞌtanoꞌsaso nipirinhuëꞌ, co tëꞌhuatonaraihuëꞌ huanipi. Pitrosoꞌ aꞌninquëchin huanirahuaton, chiníquën nontërin yaꞌipi piyapiꞌsaꞌ natanacaiso marëꞌ. “Noya natanco iyaroꞌsaꞌ. Yaꞌipima Quirosarinquë yaꞌhuëramasopitantaꞌ natanco onporaisona noꞌtëquën shaꞌhuichinquëmaꞌ.

¹⁵ ‘Isopita noꞌpipi,’ topiramahuëꞌ, co noꞌpiraihuëꞌ. Co yono piꞌiyátërarinhuëꞌ. Co tashiramiachin noꞌpirëhuëꞌ. Ispirito Santo yaꞌcoancantërincoi niꞌton, naporai.

¹⁶ Iráca pënëntonaꞌpi Coiro itopisoꞌ, ninoton ninshitërin ipora niꞌsaramasoꞌ. Yosë noninso chachin ninshitaton, tapon:

¹⁷ ‘Aꞌna tahuëri ispiritonëhuë aꞌpamarahuë nisha nisha piyapiꞌsaꞌ yaꞌcoancantacaso marëꞌ. Yaꞌcoancantohuachin, huiꞌnamapita nanamëhuë shaꞌhuirapi. Huiꞌnapiꞌsantaꞌ co huëꞌëponaraihuëꞌ, huaꞌnarëso pochin quënanapi. Mashoroꞌsantaꞌ huaꞌnarapi.

¹⁸ Naporoꞌ yaꞌipi natërinacosopita ispiritonëhuëri yaꞌcoancantarin. Ina nohuanton, nanamëhuë shaꞌhuirapi.

¹⁹ Inápaquë nani maꞌsha acoarahuë. Piyapiꞌsaꞌ quënanpachinaꞌ, paꞌyanapi. Isoroꞌpaquëntaꞌ, maꞌsha acoarahuë piyapiꞌsaꞌ yonquicaiso marëꞌ. Huënaiꞌ, pën, conaiꞌ tomontarinsoꞌ, inapita niꞌsapi, tënin Yosë.

²⁰ Sinioro oꞌmacasoꞌ tahuëri naꞌcon yonquicasoꞌ yaꞌhuërin. Coꞌhuara naniyatërasohuëꞌ, nani maꞌsha onporapi. Piꞌi tashiarin. Yoqui quëhuashin huënai pochin nisarin. Yosë yonquicaiso marëꞌ inapoarin.

²¹ “Nichaꞌëco Sinioro,” topachinaꞌ, nichaꞌësarin. Anoyacancantahuaton, nichaꞌësarin huachi,’ tënin Coiro iráca ninshitaton.

²² Natanco iyaroꞌsaꞌ. Canpitantaꞌ israiroꞌsanquëmaꞌ niꞌton, Yosë nanamën anitotarinquëmaꞌ. Quisoso naporinsoꞌ shaꞌhuichinquëmaꞌ, nitotocoꞌ. Inasoꞌ Nasaritoquë yaꞌhuërin. Nani maꞌsha nanitaparin. Piyapi aꞌnaroáchin anoyatërin. Co ina pochin niꞌchinëhuahuëꞌ. Yosëri catahuarin niꞌton, naporin. Napoaton: ‘Tëhuënchachin Yosë quëran oꞌmarin,’ topi. Canpitantaꞌ nicatomaꞌ, nitotëramaꞌ.

²³ Napoaponahuëꞌ, canpitari atëpatëramaꞌ. Masahuatomaꞌ, nisha piyapiꞌsaꞌ quëtonamaꞌ corosëquë tëpacaiso marëꞌ. Co Yosë natëpihuëꞌ niꞌton, tëpapi. Iráca chachin Yosëri yonquirin huiꞌnin chiminacasoꞌ. Ina nohuanton, oshanënpoa marëꞌ chiminin. Co nohuantërinhuëꞌ naporini, co macacamasoꞌ nanichitomahuëꞌ. Canpitari atëpatopiramahuëꞌ,

²⁴ Yosëri ananpitaantarin. Chimirin quëran nichaꞌërin. Co chimirini minsërinhuëꞌ.

²⁵ Ina yonquiaton, Tapi iráca tapon: ‘Nani tahuëri Sinioro caꞌtanarinco. Inchinanëhuë quëran yaꞌhuërarin achinicancaincoso marëꞌ. Catahuarinco niꞌton, co paꞌyanahuëꞌ.

²⁶ Napoaton noya cancantërahuë. Ma noyacha Tata Yosëso paya, tënahuë. Co naniantarincohuëꞌ, taꞌto, co chiminaꞌhuasoꞌ tëꞌhuatërahuëꞌ.

²⁷ Yosë yonquiato, nontarahuë. Huaꞌyanëhuë, Sinioro, co chimipiroꞌsa yaꞌhuërinquë tëꞌyataranhuëꞌ. Quëmasáchin natëranquën niꞌton, co nohuantaranhuëꞌ nonëhuë chanatacasoꞌ.

²⁸ Quëma iranën aꞌnotëranco. Aꞌchintëranco quëma nohuitatënquën nóya nanpicaꞌhuasoꞌ. Nani tahuëri caꞌtananco niꞌton, nóya cancantarahuë,’ tënin Tapi, iráca ninshitaton.

²⁹ Niꞌcochi iyaroꞌsaꞌ. Tata masho Tapi nani chiminin. Iráca nani paꞌpitopi. Paꞌpitopisoꞌ ipora huantaꞌ yaꞌhuërarin.

³⁰ Coꞌhuara chimiyantërasohuëꞌ, Yosëri itërin: ‘Aꞌna tahuëri quëma shiparinquën acoarahuë huaꞌanëntacaso marëꞌ. Quëma yaꞌhuërënamën huaꞌanëntarin. Casoꞌ Yosëco niꞌto, co nonpintaranquënhuëꞌ,’ itërin. Napoaton shiaꞌhuain ninoton, ninshitërin.

³¹ Cristo nanpiantacasoꞌ ninorin. ‘Co chimipiroꞌsa yaꞌhuërinquë patarancohuëꞌ. Co nonëhuë chanatarinhuëꞌ,’ tënin iráca ninoton.

³² Iporasoꞌ Quisoso chachin Yosëri ananpitaantarin. Quiyari niꞌnai.

³³ Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ.

³⁴ Tapi co nanpiantaton, inápaquë pantarinhuëꞌ, nitotërëhuaꞌ. Napoaponahuëꞌ, ninshitaton, tapon: ‘Yosëri Sinioronëhuë shaꞌhuitërin: “Inchinanëhuë quëran huënsëquëꞌ

³⁵ inimiconënpita cari minsëchinquën,” itërin Yosëri,’ tënin.

³⁶ Yosë huiꞌnin chachin iyaroꞌsaꞌ, corosëquë apatanantëramaꞌ. Inapotopiramahuëꞌ, Yosëri noya noya niꞌnin. ‘Inasoꞌ Cristo, aꞌpaimarahuësoꞌ. Sinioro niꞌton, natëcasoꞌ yaꞌhuërin,’ tënin. Noꞌtëquën iyaroꞌsaꞌ nani shaꞌhuitëranquëmaꞌ,” itërin.

³⁷ Piyapiꞌsaꞌ natanahuatonaꞌ, naꞌcon sëtopi. —Co noyahuëꞌ ninai. ¿Maꞌtaꞌ iyaroꞌsaꞌ, onpoꞌiisoꞌ? itopi caꞌtanoꞌsaꞌ.

³⁸ Napotohuachinara, Pitrori itaantarin: —Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. “Quisocristo imarahuë,” taꞌtomaꞌ, aporihuancoꞌ. Ina imapatamaꞌ, Yosë oshanëmaꞌ inquitarinquëmaꞌ. Ina quëran Ispirito Santo ayaꞌcoancantarinquëmaꞌ canpitantaꞌ.

³⁹ Yosë nohuanton, Ispirito Santo aꞌpatimarinpoaꞌ. Canpitantaꞌ yaꞌcoancantarinquëmaꞌ. Huiꞌnamapitantaꞌ yaꞌcoancantarin. Aꞌnaquëontaꞌ aquë yaꞌhuëpirinahuëꞌ, Yosë nohuanton, imasapi. Imapachinaꞌ, Ispirito Santori yaꞌcoancantarin inahuantaꞌ, itërin.

⁴⁰ Itahuaton, naꞌcon pënënin. —Ipora yaꞌhuëpisopita co mantaꞌ Yosë yanatëpihuëꞌ. Ina marë noꞌtëquën anaꞌintarin. Canpitaso nipirinhuëꞌ ama inapita pochin cancantocosohuëꞌ. Yosë nontocoꞌ anoyacancanchinquëmaꞌ. Ina quëran chaꞌësaramaꞌ, itërin.

⁴¹ Napotohuachina, naꞌa natëtopi. Naporahuatonaꞌ, iꞌquë aporihuanpi. Naporoꞌ tahuëri cara huaranca pochin piyapiꞌsaꞌ yaꞌconpi. Quisoso imasapi.

⁴² Caꞌtanoꞌsa aꞌchinpachinara, paꞌyatopi natanacaisoꞌ. Noya natanatonaꞌ, natëpi. Noya niniꞌtonaꞌ, yaꞌhuërapi. Quisoso chimininsoꞌ yonquiatonaꞌ, coshatapatapi. Naporahuatonaꞌ, apira apira Yosë nontapi.

Quisoso imatonaꞌ, noya yaꞌhuëpisoꞌ

⁴³ Siniorori catahuahuachina, caꞌtanoꞌsaꞌ nani maꞌsha nanitapapi. Naꞌa piyapiꞌsaꞌ aꞌnaroáchin anoyatopi. Yaꞌipi piyapiꞌsari nicatonaꞌ, paꞌyanpi. “Tëhuënchachin Yosëri catahuarin,” topi.

⁴⁴ Yaꞌipi Quisoso imapisopita noya niniꞌtonaꞌ yaꞌhuërapi. Aꞌna huëntoíchin pochin nipi. Aꞌnaya aꞌnaya maꞌsha pahuantohuachinara, nicatahuapi. Co niapiratopihuëꞌ.

⁴⁵ Aꞌnaquënsoꞌ maꞌshanënapita paꞌanahuatonaꞌ, coriqui maꞌpatopi. Ina quëran aꞌnapita pahuantohuachinara, quëtopi.

⁴⁶ Nani tahuëri Yosë chinotopiso pëiquë niyontonpi. Quisoso chimininsoꞌ yonquiatonaꞌ, aꞌna pëiquë aꞌna pëiquë coshatapatapi. Co apiratonaraihuëꞌ, noya cancantapi. Nóya cancantatonaꞌ, coshatapatapi.

⁴⁷ “Ma noyacha Yosëso paya,” tosapi. Yaꞌipi piyapiꞌsari noya niꞌpi. Nani tahuëriya aꞌnapitantaꞌ imasapi niꞌton, Yosëri anoyacancantërin. Ina nohuanton, inapitantaꞌ yaꞌconpi.