Hechos 19 - Chayahuita (Shahui)

Ipisoquë Paono aꞌchininsoꞌ

¹ Aporosë Corintoquë yaꞌhuasoꞌ, Paono huancoro ira paꞌtahuaton, Ipisoquë canconin. Inaquë naꞌamiáchin imapisopita quënanconin.

² —Quisoso natëhuatamara, ¿Ispirito Santo yaꞌcoancantërinquëmaꞌ ti? itërin. —Co Ispirito Santo nohuitëraihuëꞌ. Co ina aꞌchintërinacoihuëꞌ, itopi.

³ —¿Maꞌtaꞌ natëhuatamara aporihuanamaꞌ? itërin. —Coansha pënëntërinsoꞌ natëtoi, aporihuanai, itopi.

⁴ —Coanshaso pënëntërin co noyahuëꞌ yonquipisopita naniantacaiso marëꞌ. Ina quëran aporintërin. Nipirinhuëꞌ, co inasáchin shaꞌhuirinhuëꞌ. “Ca piquëran aꞌna quëmapi huëꞌsarin, Yosëri aꞌpaimarinsoꞌ. Ina imacoꞌ,” itërin antaꞌ. Napoaton Quisoso imacoꞌ, itërin Paonori.

⁵ Ina natanahuatonaꞌ: “Sinioro Quisoso imasarai. Ina natëarai huachi,” taꞌtonaꞌ, aporihuanpi.

⁶ Ina quëran Paonori sëꞌhuamotohuachina, Ispirito Santori yaꞌcoancantimarin. Ina nohuanton, nisha nisha nananquë nonpi. Co nitotopirinahuëꞌ, aꞌnaroáchin nonpi antaꞌ. Naporahuaton, Ispirito Santori catahuarin Yosëri anitotërinso shaꞌhuicaiso marëꞌ.

⁷ Shonca catoyaꞌpi pochin napopi.

⁸ Huaꞌquiꞌ inaquë Paono yaꞌhuërin. Cara yoqui pochin cotioroꞌsaꞌ aꞌchintárin. Nani simana niyontonpiso pëiquë paꞌnin. Co tëꞌhuatonhuëꞌ, aꞌchintárin. “Yosë yahuaꞌanëntërinquëmaꞌ. Ina marëꞌ Quisoso aꞌpaimarin. Ina imacoꞌ,” itarin.

⁹ Aꞌnaquënso nipirinhuëꞌ co natantochináchinhuëꞌ cancantatonaꞌ, co yanatëpihuëꞌ. Piyapiꞌsaꞌ niyontonpachinara, noꞌhuitopi. Noꞌhuitatonaꞌ, —Co Quisoso nanamën imacasoꞌ yaꞌhuërinhuëꞌ, toconpi. Napoaton Paonori patërin. Quisoso imapisopita quëparahuaton, iscoira pëiquë paꞌnin. Tirano aꞌchininquë paaton, nani tahuëri aꞌchintárin.

¹⁰ Catoꞌ piꞌipi inaquë yaꞌhuaton, aꞌchinin. Sinioro nanamën yaꞌipi Asia parti nahuinin. Cotioroꞌsaꞌ natantopi. Naꞌa nisha piyapiꞌsantaꞌ natantopi.

¹¹ Yosë nohuanton, Paono nani maꞌsha nanitaparin. Caniaꞌpiroꞌsaꞌ sëꞌhuahuachina, aꞌnaroáchin noyatopi.

¹² Panionën, aꞌmorinsoꞌ, inapita tërantaꞌ quëparahuatonaꞌ, caniaꞌpiroꞌsaꞌ quëtonpachinara, aꞌnaroáchin noyatopi. Sopairoꞌsantaꞌ pipipi.

^13-14 Aꞌnaquën cotioroꞌsantaꞌ, sopairoꞌsaꞌ yaaꞌpapi. Paono nicatonaꞌ, yanonanpi. Aꞌnaquënsoꞌ Isipo corto huaꞌan huiꞌninpita napopi. Canchisë huiꞌninpita chachin napopi. Co Quisoso imaponaraihuëꞌ, sopairi yaꞌcoancantërinsoꞌ itaponaꞌ: “Quisoso nanan quëtërincoi niꞌton, aꞌpaarainquën. Ina nanamën Paonontaꞌ aꞌchinarin. Napoaton pipiquë huachi,” itopirinahuëꞌ,

¹⁵ sopairi aꞌpanirin: “Quisoso nohuitërahuë. Paonontaꞌ nohuitërahuëꞌ. Canpitaso napoaponahuëꞌ, co nohuitëranquëmahuëꞌ,” itërin.

¹⁶ Ina tosahuaton, quëmapi huaꞌyantërinsoari pashitaꞌparin Inapotaton, canchisëyaꞌpi chachin manin. Chiníquën ahuëaton, pëꞌsharaꞌpiarin. Aꞌnayaꞌpiáchin niponahuëꞌ, canchisëyaꞌpi minsërin. Aꞌmopisontaꞌ oshato oshatotërin. Iꞌnanpirapi taꞌapi.

¹⁷ Yaꞌipi ninanoquë nahuinin. Cotioroꞌsaꞌ, nisha piyapiꞌsaꞌ, inapita natanahuatonaꞌ, paꞌyanpi. “Sinioro Quisoso chini chiníquën nanantërin,” topi.

¹⁸ Ina quëran naꞌamiáchin Quisoso imapisopita huëꞌpi. “Quiyantaꞌ pënotopiraihuëꞌ. Co noyahuëꞌ ninaisoꞌ aꞌpoarai,” itopi.

¹⁹ Aꞌnaquënsoꞌ pënoton quirica yaꞌhuëtopi. Inapita aꞌporahuatonaꞌ, quëntapi ahuiquitacaiso marëꞌ. Naꞌa piyapiꞌsaꞌ nicasoiꞌ, ahuiquitopi. Paꞌtërinso pichihuachinara: “Aꞌnatërápo shonca huaranca coriqui prata quëran nininso paꞌtërin,” topi.

²⁰ Pënotonoꞌsantaꞌ pënotopisoꞌ aꞌporahuatonaꞌ, cancanëna quëran huarëꞌ imasapi niꞌton, Sinioro nanamën yaꞌipi parti nahuinin. Naꞌcon naꞌcon imasapi.

²¹ Ina quëran Paono yonquirin aꞌnapita imapisopita niꞌcoantacaso marëꞌ: “Masitonia parti niꞌcoantarahuë. Acaya partintaꞌ nisha nisha ninanoquë imapisopita niantarahuë. Nani pënëantahuato, Quirosarinquë paantarahuë. Ina quëran Nomaquëꞌpaꞌ pacaꞌhuasoꞌ yaꞌhuërin,” tënin.

²² Timotio, Irasito, inapitari inaquë catahuapirinahuëꞌ, Paonori aꞌparin Masitonia parti imapisopita aꞌchintacaiso marëꞌ. Inaso nipirinhuëꞌ, huaꞌquimiachin Asia parti quëparitantarin.

Artimisa moshapisoꞌ

²³ Naporoꞌ naꞌa piyapiꞌsaꞌ Sinioro imasapi niꞌton, mamanshi moshanaꞌpiroꞌsaꞌ noꞌhuitopi.

²⁴ Inaquë moshapisoꞌ Artimisa itopi. Naꞌa mamanshi ninaꞌpiroꞌsaꞌ yaꞌhuëpi. Mamanshi pëiaꞌhuaroꞌsaꞌ prata quëran nonanpi. Ina paꞌanatonaꞌ, naꞌcon canapi. Aꞌnaraꞌ Timitirio itopi.

²⁵ Inari yaꞌipi piyapinënpita ayontonin. Aꞌnapita maꞌsha ninaꞌpiroꞌsantaꞌ amatërin. Yaꞌipi niyontonpachinara, itapon: “Niꞌcoꞌ, iyaroꞌsaꞌ. Mamanshi ninëhua quëran naꞌcon canarëhuaꞌ.

²⁶ Paonoso nipirinhuëꞌ isëquë huëcaton, pënëntarin. ‘Aꞌnaíchin Yosë yaꞌhuërin. Piyapiꞌsari nipisoꞌ co inasoꞌ Yosëhuëꞌ,’ tosarin, natanamaꞌ canpitantaꞌ. Yaꞌipi Asia partintaꞌ nahuinin. Naꞌa piyapiꞌsaꞌ natanahuatonaꞌ, natëpi. Natëtonaꞌ, mamanshi aꞌpopi.

²⁷ Napohuachinaꞌ, co huachi noya niꞌsarinënpoahuëꞌ. Co onpopinchin canarihuahuëꞌ. Artimisaontaꞌ naniantapi. Inasoꞌ chini chiníquën nanantërin. Yaꞌipi asiaroꞌsaꞌ moshapisoꞌ. Yaꞌipi parti quëran nohuitopi. Aquëtë chachin Paono natëhuachinaꞌ, co huachi moshato pëiquë huëꞌsapihuëꞌ. Artimisa nóya nipirinhuëꞌ, co huachi moshaapihuëꞌ,” itërin.

²⁸ Natanahuatonaꞌ, Paono chiníquën noꞌhuipi. “¡Ma noyacha Artimisaso paya! Ina chinotërëhuasoꞌ,” tosapi chiníquën nonatonaꞌ.

²⁹ Ina quëran yaꞌipi piyapiꞌsaꞌ noncaropi. Noꞌhuitatonaꞌ, Paono caꞌtaninsopita mapi, Acayo, Aristarico inapita itopisoꞌ. Inapitasoꞌ masitoniaroꞌsaꞌ. Chiníquën masahuatonaꞌ, huëntëntërahuatonaꞌ, niyontonpiso iꞌiratëquë quëpapi.

³⁰ Paonontaꞌ piyapiꞌsaꞌ nontapon yapaꞌpirinhuëꞌ, Quisoso imapisopitari toꞌshitëatonaꞌ, yaꞌcopipi. “Ama paquësohuëꞌ,” itopi.

³¹ Aꞌnaquën Asia parti huaꞌanoꞌsantaꞌ Paono amiconënpita niꞌton, nanan aꞌpatopi. “Ama niyontonpiso iꞌiratëquë paꞌinsohuëꞌ,” itopi.

³² Piyapiꞌsasoꞌ noncaroápi. Nisha nisha nonsápi. Naꞌcon naꞌcon piyapiꞌsaꞌ co nitotatonaraihuëꞌ, “¿maꞌmarëcha niyontonëhuaꞌ nicaya?” topi.

³³ Ina quëran cotio huaꞌanoꞌsasoꞌ, Aricantro itopiso camaipi piyapiꞌsaꞌ nontacaso marëꞌ. Napoaton huancánachin huanirahuaton, anquirarin piyapiꞌsaꞌ taꞌtacaiso marëꞌ: “Co quiya tëhuëraihuëꞌ,” taꞌcasoꞌ yonquipirinhuëꞌ,

³⁴ “inasoꞌ cotio quëmapi,” taꞌtonaꞌ, co yanatanpihuëꞌ. “¡Ma noyacha Artimisaso paya! Ina chinotërëhuasoꞌ,” tosapi chiníquën nonatonaꞌ. Catoꞌ ora pochin naporápi.

³⁵ Parisi quëran ninshitonaꞌpi huaꞌani atonirin. Atonirahuaton, itapon: “Tëhuënchachin iyaroꞌsaꞌ, Artimisasoꞌ chini chiníquën nanantërin. Inaso yaꞌipiya quëran nitotopi. Iráca inápa quëran anotimarin. Iso ninanonënpoaquë chachin anotimarin niꞌton, canpoari aꞌpairëhuaꞌ.

³⁶ Yaꞌipiya nitotopi niꞌton, ama huachi noꞌhuitocosohuëꞌ. Ama topinan quëran ahuëtocosohuëꞌ.

³⁷ Isopita quëmapiꞌsaꞌ quëpiramahuëꞌ. Co Artimisa shaꞌhuirapipihuëꞌ. Co moshato pëiquë ihuatopihuëꞌ.

³⁸ Timitirio, mamanshi ninaꞌpiroꞌsaꞌ, inapitari yashaꞌhuirapihuachinaꞌ, coisëquë paꞌinaꞌ. Huaꞌanoꞌsantaꞌ yaꞌhuërapi. Inaquë quëparahuatonaꞌ, shaꞌhuirapiinaꞌ.

³⁹ Aquëtë huarëꞌ nanan yaꞌhuëhuachin, huaꞌanoꞌsaꞌ niyontopiquë natancoꞌ.

⁴⁰ Ipora tahuëri topinan quëran noncaroaramaꞌ. Co mantaꞌ onpocasohuëꞌ nipirinhuëꞌ, naporamaꞌ. Niꞌcona, copirno noꞌhuihuachinpoaꞌ.

⁴¹ Yaꞌhuëramaquë pacoꞌ,” topachina, yanquëëpi.