Hechos 17 - Chayahuita (Shahui)

Tisaronicaquë aꞌchininso marëꞌ noꞌhuipisoꞌ

¹ Ina quëran Anpiporisë naꞌhuëtahuatonaꞌ, Aporoniantaꞌ naꞌhuëtaantapi. Ina quëran Tisaronicaquë canconpi. Inaquë cotioroꞌsaꞌ niyontonpiso pëiꞌ yaꞌhuërin.

² Inachintërin nichinapon chachin cara chinoto tahuëri inaquë Paono Yosë quiricanën aꞌchinin.

³ —Quisocristo imacoꞌ canpitantaꞌ. Inasoꞌ inápa quëran oꞌmarin, Yosëri aꞌpaimarinsoꞌ. Ina nohuanton, oshanënpoa marëꞌ chiminin. Chiminpirinhuëꞌ, Yosë nohuanton, nanpiantarin. Iráca quiricanën quëran ninorinso chachin naporin. Inasoꞌ Cristo, Yosëri acorinsoꞌ, tënin.

⁴ Aꞌnaquën natanahuatonaꞌ, natëpi. Natëtonaꞌ, imasapi. Naꞌa Crico piyapiꞌsantaꞌ imasapi. Nisha piyapiꞌsaꞌ niponaraihuëꞌ, Yosë chinotopi. Paono aꞌchininsoꞌ natanahuatonaꞌ, Quisoso imasapi. Naꞌamiachin sanapiꞌsantaꞌ chiníquën nanantopisopita imasapi.

⁵ Aꞌnaquën cotioroꞌsaso nipirinahuëꞌ, co yanatëpihuëꞌ. “Naꞌa piyapiꞌsaꞌ Quisoso imasapi,” taꞌtonaꞌ, apiratopi. Apiratatonaꞌ, noꞌhuipi. Cachiquë paꞌsahuatonaꞌ, noꞌhuitërayaroꞌsaꞌ, chirotëroꞌsaꞌ, inapita itaponaꞌ: “Huëcoꞌ Paono, Sirasërë chachin macatëhuaꞌ anaꞌintahuaꞌ,” taꞌtonaꞌ, piyapiꞌsaꞌ ayontonpi. Noꞌhuitëratonaꞌ, Casono pëinënquë paꞌpi. Inaquë Paono yacapatërin niꞌton, macacaiso marëꞌ paꞌpi. Yaꞌcoana papaatahuatonaꞌ, yaꞌconpirinahuëꞌ,

⁶ co Paono yaꞌhuërinhuëꞌ. Co ina quënanatonahuëꞌ, Casono mapi. Aꞌnapita Quisoso imapisopitantaꞌ masahuatonaꞌ, ninano huaꞌanoꞌsaquë quëpapi. —Paono yaꞌipi parti paꞌsárin. Aꞌchintaton, notohuaroꞌ piyapiꞌsaꞌ anishacancantarin. Sirasëntaꞌ inachachin nisarin. Isëquëntaꞌ huëꞌpachinara,

⁷ Casonori pëinënquë ayaꞌconin niꞌton, inaquë yacapapi. Isopitantaꞌ imatonaꞌ, co huachi Noma copirno natëtonahuëꞌ, nisha imasapi. “Aꞌna copirno yaꞌhuarin. Inasoꞌ Quisoso,” toconpi, itopi.

⁸ Piyapiꞌsaꞌ natanahuatonaꞌ, aquë aquëtëꞌ noꞌhuitopi. Huaꞌanoꞌsantaꞌ noꞌhuitatonaꞌ, Casono, aꞌnapita imapisopita inapita chiníquën pënënpi.

⁹ Ina quëran coriqui maꞌpapi ama tashinan pëiquë poꞌmocaiso marëhuëꞌ. Nani pahuërëtohuachinara, aꞌpapi.

Piriaquë Yosë quiricanën naꞌcon nontopisoꞌ

¹⁰ Quisoso imapisopita pipirahuatonaꞌ, yaꞌhuëpiꞌpaꞌ paantapi. Naporoꞌ tashiꞌ Paono, Sirasë, inapita Piriaquë aꞌpapi. Inaquë canconahuatonaꞌ, cotioroꞌsaꞌ niyontonpiso pëiquë paꞌpi aꞌchinacaiso marëꞌ.

¹¹ Inaquë yaꞌhuëpisopitaso nipirinhuëꞌ nóya yonquipi. Co Tisaronicaquë yaꞌhuëpisopita pochinhuëꞌ. Paonori aꞌchintohuachina, nóya natanpi. “Paonosoꞌ noꞌtëquën aꞌchinamara,” taꞌtonaꞌ, nani tahuëri Yosë quiricanën noyásha nontapi noꞌtëquën nitotacaiso marëꞌ.

¹² Naporahuatonaꞌ, naꞌa cotioroꞌsaꞌ natëpi. Naꞌamiachin Crico sanapiꞌsantaꞌ chiníquën nanantopisopita natëpi. Aꞌnaquën Crico quëmapiꞌsantaꞌ imasapi.

¹³ Napopisoꞌ, Tisaronicaquë nahuinin. Cotioroꞌsasoꞌ natantahuatonaꞌ, “Piriaquëntaꞌ Paono Yosë nanamën aꞌchinarin,” taꞌtonaꞌ, inatohuaꞌ paꞌpi. Canconahuatonaꞌ, Paono shaꞌhuirapitonaꞌ, piyapiꞌsaꞌ anoꞌhuitopi.

¹⁴ Napohuachinara, Quisoso imapisopitari aꞌnaroáchin Paono aꞌpapi. Aꞌnaquëni caꞌtanatonaꞌ, marë yonsanquëꞌpaꞌ quëpapi. Sirasë, Timotio, inapitaso nipirinhuëꞌ co paꞌpihuëꞌ.

¹⁵ Atinasëꞌpaꞌ Paono caꞌtanpi. Yapanantahuachinara, —Sirasë, Timotio, cato chachin shaꞌhuitoncoꞌ manóton huëꞌinaꞌ, itërin Paonori. Napotohuachina, yaꞌhuëpiꞌpaꞌ panantapi.

Atinasëquë nisha nisha moshapisoꞌ

¹⁶ Paonoso nipirinhuëꞌ Atinasëquë Sirasë, Timotio, inapita ninararin. Ninanoꞌ conitaton, notohuaroꞌ mamanshi quënanin. Inapita quënanahuaton, sëtërin. Inapoaton, napion cancantërin.

¹⁷ Napoaton naꞌcon pënëntërin. Niyontonpiso pëiquë paꞌsahuaton, cotioroꞌsaꞌ aꞌchintërin. Cotioroꞌsa pochin chinotopisopitantaꞌ natanapi. Quisoso nanamën aꞌchintohuachina, ninontápi. Naporahuaton, nani tahuëriya cachiquë paꞌnin. Inaquë aꞌnaya aꞌnaya huëꞌpachinara, nontarin. Nisha piyapiꞌsantaꞌ natanapi.

¹⁸ Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

¹⁹ Aꞌnaquënso natanahuatonaꞌ, Ariopaco itopiquë quëpapi. Inasoꞌ huaꞌanoꞌsa niyontoyantopiquë. Paono inaquë quëparahuatonaꞌ, itopi: —¿Ma nisha nanan chachintaꞌ aꞌchinan? Yanitotërai quiyantaꞌ.

²⁰ Co onporontaꞌ natanchinaihuëꞌ. Aꞌchintocoi quiyantaꞌ nitochii, itopi.

²¹ Inaquë yaꞌhuëpisopita nasha nananoꞌsaꞌ paꞌyatopi. Nisha nisha aꞌchinpisoꞌ yanatanpi. Nisha piyapiꞌsaꞌ huëꞌpisopitantaꞌ yanatanpi.

²² Paono inaquë huanirahuaton, Atinasëquë yaꞌhuëpisopita itërin: “Natanco iyaroꞌsaꞌ piꞌpian shaꞌhuichinquëmaꞌ. Canpitasoꞌ yaꞌipinquëmaꞌ naꞌcon moshatëramaꞌ, tënahuë.

²³ Cachiquë paꞌpatora, yaꞌipi moshatëramasoꞌ niꞌnahuë. Aꞌna artaro quënanahuë. Inaquë ninshitëramaꞌ. ‘isoso yosë co nohuitopirëhuahuëꞌ, moshahuaꞌ,’ tënamaꞌ ninshitatomaꞌ. Co nohuitapomarahuëꞌ, mosharamaꞌ. Apira carinquëmaꞌ aꞌchinchinquëmaꞌ, nohuitocoꞌ.

²⁴ Ina Yosësoꞌ chini chiníquën nanantërin. Iráca isoroꞌpaꞌ, yaꞌipi maꞌsha isëquë yaꞌhuërinsontaꞌ acorin. Inasoꞌ huaꞌanënpoaꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipimiáchin huaꞌanëntarin. Moshatopiso pëiꞌ piyapiꞌsari nipiquë co Yosë yaꞌhuërinhuëꞌ.

²⁵ Co piyapi maꞌshanënpita nohuantërinhuëꞌ. Co mantaꞌ pahuantërinhuëꞌ. Inariáchin yaꞌipi maꞌshanënpoaꞌ quëtërinpoaꞌ. Ina nohuanton, nanpirëhuaꞌ. Ina nohuanton, cosharoꞌ, maꞌsha, inapita yaꞌhuëtërinpoaꞌ.

²⁶ Iráca aꞌna quëmapiraꞌ ninin. Inaya quëranchin yaꞌipi piyapiꞌsaꞌ naꞌapi. Nisha nisha nipisopita naꞌapi yaꞌipiroꞌpaquë yaꞌhuëcaiso marëꞌ. Coꞌhuara yaꞌhuëyatërasëhuahuëꞌ, yonquirinpoaꞌ. Nisha nisha parti yaꞌhuëcaso marëꞌ acorinpoaꞌ. Onporosona nanpicahuasontaꞌ yonquirin. Ina nohuanton, nanpirëhuaꞌ.

²⁷ Yaꞌipinpoaꞌ acorinpoaꞌ ina nohuitacaso marëꞌ. Co quënanarihuarahuëꞌ, ina naꞌcon yonquicasoꞌ yaꞌhuërin. Co inasoꞌ aquë patërinpoahuëꞌ. Co naniantërinpoahuëꞌ.

²⁸ Ina nohuanton nanpiarëhuaꞌ, paꞌnëhuaꞌ, yaꞌhuërëhuaꞌ. Aꞌnaraꞌ cancan yonquinaꞌpi ninshitaton, noꞌtëquën naporin: ‘Canpoasoꞌ Yosë huiꞌninpita pochin ninëhuaꞌ,’ tënin.

²⁹ Napoaton Yosëntaꞌ canpoa pochin nanpirárin antaꞌ. Co inasoꞌ mamanshi pochinhuëꞌ. Mamanshiso nipirinhuëꞌ piyapiꞌsari inahuara yonquinëna quëran nipi. Oro quëran, prata quëran, naꞌpi quëran, ina quëranpita nipi. Ama Yosësoꞌ mamanshi pochin cancantocosohuëꞌ.

³⁰ Iráca co Yosë nohuitopihuëꞌ niꞌton, co anaꞌintërinhuëꞌ. Iporaso nipirinhuëꞌ, yaꞌipi piyapinpoaꞌ pënëninpoaꞌ: ‘Co noyahuëꞌ yonquiramasoꞌ naniantatomaꞌ, casáchin chinotoco,’ itërinpoaꞌ Yosë.

³¹ Aꞌna tahuëri co noyahuëꞌ nipisopita noꞌtëquën anaꞌintarin. Nani Quisoso acorin coisë pochin nicaton, yaꞌipi piyapiꞌsaꞌ noꞌtëquën shaꞌhuitacaso marëꞌ. Inasoꞌ piyapi chachin niꞌton, chiminpirinhuëꞌ, Yosëri ananpitaantarin. Napoaton inasoꞌ, Yosëri acorinsoꞌ, tënëhuaꞌ,” tënin Paono.

³² “Ananpitaantarin,” tëninso marëꞌ, “Tëhuënchachin taꞌmaꞌ ananpitëca,” taꞌtonaꞌ, tëhuapi aꞌnaquën. Aꞌnaquënso nipirinhuëꞌ co tëhuapihuëꞌ. —Aꞌna tahuëri aꞌchintaantacoi, itopi.

³³ Ina quëran Paono paꞌnin.

³⁴ Aꞌnaquënso nipirinhuëꞌ natëtonaꞌ, imapi. Quisoso natëpi. Aꞌnasoꞌ Tionisio, Ariopaco huaꞌan nininsoꞌ. Aꞌnantaꞌ sanapi, Tamarisa itopisoꞌ. Aꞌnapitantaꞌ imasapi.