Hechos 12 - Chayahuita (Shahui)

Irotisëri aparisitërinsoꞌ

¹ Naporoꞌ tahuëriꞌsaꞌ aꞌna huaꞌan yaꞌhuërin, Irotisë itopisoꞌ. Quisoso imapisopita noꞌhuiton, sontaroꞌsaꞌ aꞌparin aparisitacaiso marëꞌ.

² Santiaco maconpi. Inasoꞌ Coansha iin. Mapachinara, sahuëniquë atëpatërin.

³ Tëpapi niꞌton, cotio huaꞌanoꞌsari paꞌyatopi. Ina natantahuaton, Pitrontaꞌ macacaiso marëꞌ camaitërin. Naporoꞌ cotioroꞌsaꞌ niyontonapi pan co ahuëpocatopisohuëꞌ capacaiso marëꞌ.

⁴ Mapachinara, tashinan pëiquë apoꞌmotërin. Shonca saota sontaroꞌsaꞌ acorin aꞌpaicaiso marëꞌ. Catapini, catapini yaꞌpiri niꞌsapi. Niyaꞌhuërëtatonaꞌ, tashirë chachin aꞌpairapi. “Pascoa naꞌhuëhuachin, piyapiꞌsaꞌ niꞌtërantapaiquë Pitro anaꞌintarahuë,” tënin huaꞌan yonquiaton.

⁵ Pitro tashinan pëiquë yaꞌhuapirinhuëꞌ, Quisoso imapisopita Yosë nontapi. Pitro marëꞌ chiníquën Yosë nontapi.

Pitro tashinan pëi quëran chaꞌërinsoꞌ

⁶ Tashiraya pochin huaꞌani anaꞌintacasoꞌ nisahuasoꞌ, Pitro huëꞌësárin. Catoꞌ sontaroꞌsari ahuancoanapipi. Catoꞌ catinaquë tonpopi. Ahuënan quëran aꞌna sontarori nitonpotanpatërin. Inchinan quëran aꞌnarintaꞌ nitonpotanpatërin. Inapotahuatonaꞌ, yaꞌipi huëꞌësapi. Yaꞌcoanaquë catoꞌ sontaroꞌsa chachin tashinan pëiꞌ aꞌpairápirinahuëꞌ.

⁷ Aꞌnanaya Sinioro anquëninën inaquë yaꞌnotimarin. Huënaráchin aꞌpinin. Pitro pichianahuaton, ochinanin. “Manóton huënsëquëꞌ paꞌa,” itërin. Napotohuachina, tanpain quëran catina inaora niiꞌquiritërin. Cato quëran chachin niiꞌquiritërin.

⁸ “Aꞌmoanahuaton, sapatëꞌ poꞌmoquëꞌ,” itërin. Itohuachina, inaporin. “Aipi aꞌmoransontaꞌ aꞌmosahuaton, imaquico,” itantarin.

⁹ Ina quëran pipihuachina, Pitrori imarin. “Coꞌtaꞌmaꞌ anquëni ocoiarincohuëꞌ. Topinan huaꞌnarëso pochin niꞌsamarahuë,” topirinhuëꞌ.

¹⁰ Sontaro yaꞌnatontarinsoꞌ naꞌhuëtirin. Ina quëran aꞌnantaꞌ naꞌcotiantarin. Pëianshinanquë huarëꞌ canquirin. Inaquë panca yaꞌcoana huaꞌna quëran nininsoꞌ yaꞌhuëpirinhuëꞌ, inaora niꞌsoatërin. Pipirahuaton, aꞌna cachiquë paꞌnin. Inaquë aꞌnaroáchin anquëniri patërin.

¹¹ Naporoꞌ Pitro noꞌtëquën yonquirin: “Co huaꞌnarëso pochin niꞌnahuëꞌ. Sinioro chachin anquëninën aꞌpatimarinco nichaꞌëincoso marëꞌ. Irotisë, cotio huaꞌanoꞌsaꞌ, inapita yatëpapirinacohuëꞌ, nichaꞌërinco,” tënin.

¹² Ina yonquiaton, Maria pëinënquë paꞌnin. Coansha Marco aꞌshin inasoꞌ. Inaquë naꞌa imapisopita niyontonahuatonaꞌ, Yosë nontapi.

¹³ Paira tahuirinquë canconahuaton, yaꞌcoananënquë piꞌnitonin. Piꞌnitohuachina, aꞌna nanon huëꞌnin, Rota itopisoꞌ.

¹⁴ Pitro noninsoꞌ nohuianantahuaton, paꞌyanin. Paꞌyanaton, co yaꞌcoana iꞌsoataponahuëꞌ, taꞌacontarahuaton, pëiquë yaꞌcoantarin. Pitro aipiran huaniarinsoꞌ shaꞌhuiconin.

¹⁵ —Quëmasoꞌ huaꞌyantëran, itopirinahuëꞌ. —Co huaꞌyantërahuëꞌ. Tëhuënchachin Pitro inaquë huaniarin, itohuachina: —Co inahuëꞌ. Anquëninën nimara, itopi.

¹⁶ Napoasoiꞌ, Pitrosoꞌ yaꞌcoana piꞌniantarin. Naporo huarëꞌ iꞌsoatopi. Pitro quënanahuatonaꞌ, paꞌyanpi.

¹⁷ Inaso nipirinhuëꞌ imirin quëran anquitërin ama noncarocaiso marëhuëꞌ. —Sinioro chachin anquëninën aꞌpatimarinco. Tashinan pëi quëran ocoirinco. Iya Santiaco shaꞌhuitoncoꞌ nitochin. Yaꞌipi imapisopitantaꞌ shaꞌhuitocoꞌ, itërin. Ina quëran aꞌna parti paꞌnin.

¹⁸ Tahuërihuachina, sontaroꞌsaꞌ paꞌpi paꞌyanpi. “¿Intoacha Pitro pacaya?” nitopi.

¹⁹ Irotisëso nipirinhuëꞌ: “Pitro maconquëꞌ,” itopirinhuëꞌ. “Capa huachi,” itohuachina, aꞌna aꞌna sontaro natanin. Co nitotohuachinarahuëꞌ, tëpacaiso marëꞌ camaitërin. Napoaton sontaroꞌsaꞌ Pitro aꞌpaipisopita tëpapi. Ina quëran Irotisë Cotia quëran pipirahuaton, Sisariaquë paꞌnin yaꞌhuapon.

Irotisë chimininsoꞌ

²⁰ Irotisi huaꞌan yaꞌhuërinquë nisha nisha piyapiꞌsaꞌ huëcatonaꞌ, cosharoꞌ paꞌanquipi. Aꞌnaquënsoꞌ cosharoꞌ yapaꞌanpirinahuëꞌ, chiníquën noꞌhuiton, co nohuantërinhuëꞌ quëtacasoꞌ. Tiroquë yaꞌhuëpisopita, Sitonquë yaꞌhuëpisopita, inapita noꞌhuirárin. Napoaton niyontonahuatonaꞌ, inaquë huëꞌpi. Poꞌoana quëran inpriatonën Pirasito itopisoꞌ nontiipi. —Quëmari huaꞌan nontëquëꞌ ama huachi noꞌhuiincoisohuëꞌ. Ina marëꞌ coriqui quëchinquën, itopi. —Noyahuaꞌ, tosahuaton, paꞌnin huaꞌanën nontacaso marëꞌ.

²¹ —Shaꞌhuitëquëꞌ huëntaꞌinaꞌ nonchi, itërin. Niyontonpachinara, noyápiachin nitaparin. Huaꞌanëntacasoꞌ shiranënquë huënsërahuaton, piyapiꞌsaꞌ nontarin.

²² Natanahuatonaꞌ, paꞌyatapi: “Ma noyanquëncha quëmaso paya. Co piyapi pochin nontërancoihuëꞌ. Yosë chachin pochin nontarancoi,” itopi chiníquën nontatonaꞌ.

²³ Topinan piyapi niponahuëꞌ natanahuaton huaꞌan nipaꞌyatërin. Yosëíchin chinotacaso nipirinhuëꞌ naporinso marëꞌ, aꞌnaroáchin Sinioro anquëninëni acaniorin. Chiníquën canioton, shonari pëꞌyarin. Parisitërarin quëran chiminin.

²⁴ Yosë nanamënso nipirinhuëꞌ nahuinarin. Nisha nisha parti shaꞌhuirápi niꞌton, naꞌa piyapiꞌsaꞌ natëtonaꞌ imasapi.

²⁵ Pirnapi, Saono, inapitasoꞌ nani yonquipi Antioquiaquë paantacaisoꞌ. Imapisopita coriqui aꞌpapisoꞌ nani quëtonpi niꞌton, Quirosarin quëran pipirahuatonaꞌ, paantapi. Coansha Marcontaꞌ quëpapi.