Hechos 10 - Chayahuita (Shahui)

Cornirio nicacaso marëꞌ Pitro paꞌninsoꞌ

¹ Sisariaquë aꞌna quëmapi yaꞌhuërin. Cornirio itopisoꞌ. Inasoꞌ capitan. “Itariaroꞌsaꞌ” itopiso sontaro huënton camairin.

² Inaso nisha piyapi niponahuëꞌ, Yosë chinotërin. Yaꞌipi pëinënquë yaꞌhuëpisopitantaꞌ Yosë chinotopi. Cotioroꞌsaꞌ maꞌsha pahuantohuachinara, nosoroaton, topinan quëtërin. Nani tahuëri Yosë nontërin.

³ Piꞌi tëhuërënahuasoꞌ, co huëꞌëponahuëꞌ, huaꞌnarëso pochin aꞌninquëchin quënanin. Yosë anquëninëni huëcapaimarahuaton: “¡Cornirio!” itërin.

⁴ Anquëni niꞌsahuaton, paꞌpi tëꞌhuatërin. —¿Maꞌtaꞌ sinioro nohuantëran? itërin. —Quëmasoꞌ naꞌcon Yosë nontëran, nataninquën. Saꞌahuaroꞌsaꞌ nosoroaton, maꞌsha topinan quëtëran. Ina marëꞌ noya yonquirinquën.

⁵ Napoaton Copëquë piyapiꞌsaꞌ aꞌpaquëꞌ Simon Pitro macontaꞌinaꞌ.

⁶ Inasoꞌ, shaꞌhuëtëꞌ tapanaꞌpi Simon itopisoꞌ pëinënquë yacapatarin. Marë yonsanquë yaꞌhuërin, itërin.

⁷ Anquëni paꞌpachina, catoꞌ piyapinën amatërin. Aꞌna sontarontaꞌ amatërin, nani tahuëri camairinsoꞌ. Inantaꞌ Yosë chinotërin.

⁸ Anquëniri nontërinsoꞌ shaꞌhuitahuaton, Copëquë aꞌparin.

⁹ Tahuëririnquë yacamotëriahuasoꞌ, ninanoquë yaꞌcaritopi huachi. Naporoꞌ Pitro inapa paꞌcotëquë paꞌnin Yosë nontacaso marëꞌ.

¹⁰ Tanaton, yacoshatopirinhuëꞌ. Aꞌna piyapiri cosharoꞌ nitasoꞌ, Pitro huaꞌnarëso pochin quënanin.

¹¹ Piꞌiroꞌtëꞌ niꞌsoatarin, niꞌnin. Panca taꞌna pochin nininsoꞌ oꞌmarin. Catapini cachinën quëran huëntënimararin.

¹² Inaquë nani maꞌsha yaꞌhuërin. Tananquë yaꞌhuërinsopita, pëhuara pochin nininsopita, anpiantëhuanoꞌsaꞌ, inapita yaꞌhuërin niꞌnin.

¹³ Ina quëran noninsoꞌ natanin. “Huanirahuaton Pitro, tëpaton caꞌquëꞌ,” itërin.

¹⁴ —Inca Sinioro. Sopai inapitasoꞌ. Co onporontaꞌ ina pochin caꞌchinahuëꞌ. Iráca Moisësë pënënincoi ama ina pochin capacaꞌhuaiso marëhuëꞌ, itërin Pitrori.

¹⁵ —Noya capacasoꞌ, itëranquën niꞌton, ama quëmari “sopai” itëquësohuëꞌ. Co huachi tananpitacasoꞌ yaꞌhuërinhuëꞌ, itërin.

¹⁶ Cararoꞌ inachachin shaꞌhuitantarin. Ina quëran taꞌna pochin nininsoꞌ inápaquë quëpantarin.

¹⁷ Pitrosoꞌ yonquirárin. “Yosë nohuanton huaꞌnarëso pochin quënanahuë. ¿Maꞌtaꞌ tapon ina pochin aꞌnotërinco nica?” tënin yonquiaton. Naporoꞌ Corniriori aꞌparinsopita canquirapi. Natantiirahuatonaꞌ, Simon pëinën yaꞌcoananënquë canquipi.

¹⁸ Canquirahuatonaꞌ, natanpi: “¿Simon Pitro isëquë yaꞌhuarin ti?” topi.

¹⁹ Pitroso nipirinhuëꞌ co nataninhuëꞌ. Huaꞌnarëso pochin niꞌninsoꞌ yonquirárin. Yonquiasoꞌ, Ispirito Santori itërin: “Apira cara quëmapi yonisarinquën.

²⁰ Nohuaramarahuaton, paquëꞌ. Ama nisha nisha yonquiatonhuëꞌ, imaquëꞌ. Ca nohuanton, huëꞌpi niꞌton, noya imaquëꞌ,” itërin.

²¹ Pitro nohuaramarahuaton, comisionoꞌsaꞌ nontërin. —Ca Simon Pitroco. ¿Onpoapomataꞌ huëꞌnamasoꞌ? itërin.

²² —Capitan Cornirio aꞌparincoi. Inasoꞌ nóya quëmapi. Nisha piyapi niponahuëꞌ, Yosë chinotërin. Yaꞌipi cotioroꞌsari noya niꞌpi. Iꞌhuara yaꞌhuasoꞌ, aꞌnanaya anquëniri yaꞌnotimarahuaton, shaꞌhuitimarin. “Piyapiꞌsaꞌ aꞌpaquëꞌ Pitro macontaꞌinaꞌ. Ina aꞌchintarinquën, noya natanquëꞌ,” itërin niꞌton, aꞌparincoi huëꞌnai, itërin.

²³ Napotohuachina, “Yaꞌcointacoꞌ iyaroꞌsaꞌ,” itërin Pitrori. Napotohuachina, yaꞌcoontapi. Aꞌcahuachinara, huëꞌëpatopi. Tahuëririnquë paantahuachinara, Pitrontaꞌ paꞌnin. Aꞌnapitantaꞌ Quisoso imapisopita Pitro imapi.

²⁴ Ina tashiraya Sisariaquë canconpi. Inaquë Corniriori ninararin quënanconpi. Quëmopinënpita, nipayarinsopita, inapita amatohuachina, nani niyontonpi natanacaiso marëꞌ.

²⁵ Pitro canconpachina, Corniriori isonapairahuaton, moshapirinhuëꞌ.

²⁶ Aꞌnaroáchin Pitrori ahuaniantarin. —Huaniquëꞌ iyasha. Co casoꞌ moshancoso yaꞌhuërinhuëꞌ. Piyapico cantaꞌ, itërin.

²⁷ Ninontahuatonaꞌ, pëiquë yaꞌconpi. Inaquë naꞌa piyapiꞌsaꞌ niyontonpi quënanconpi.

²⁸ Nani ninontohuachinara, Pitrori itërin: —Cotioroꞌsacoi inachintëraisoꞌ, nani iyaroꞌsaꞌ nitotëramaꞌ. Co onporontaꞌ nisha piyapiroꞌsataquë niꞌtapoi paꞌnaihuëꞌ. Co inapitaroꞌcoi niyontonaihuëꞌ. “Co Yosë nohuantërinhuëꞌ,” topiraihuëꞌ. Iporaso nipirinhuëꞌ Yosë nani anitotërinco. Insosona Yosëri noya niꞌpachina, cantaꞌ noya niꞌi. Yaꞌipi piyapi napopianachin noya nicaꞌhuasoꞌ yaꞌhuërin, tënahuë.

²⁹ Napoaton amatohuatancora, noya huëꞌnahuë. ¿Maꞌmarëtaꞌ amatëranco? itërin.

³⁰ Napotohuachina, Corniriori itërin: —Nani catapini tahuëritarin, ipora pochin Yosë nontasoco, aꞌnanaya aꞌna quëmapi yaꞌnotërinco. Aꞌmorinsoꞌ huënaráchin huënaráchin niꞌnahuë.

³¹ Yaꞌnotirahuatonco, itërinco: “Cornirio, quëmasoꞌ naꞌcon Yosë nontëran, nataninquën. Saꞌahuaroꞌsaꞌ nosoroaton, maꞌsha quëtëran. Ina marëꞌ Yosë noya yonquirinquën.

³² Napoaton Copëquë piyapiꞌsaꞌ aꞌpaquëꞌ Simon Pitro macontaꞌinaꞌ. Inasoꞌ, Simon itopisoꞌ shaꞌhuëtëꞌ tapanaꞌpi pëinënquë yacapatarin. Marë yonsanquë yaꞌhuërin,” itërinco.

³³ Ina natanahuato, aꞌnaroáchin amatëranquën. Ma noyanquën niꞌton, huëꞌnan. Iporasoꞌ yaꞌipicoi niyontonai. Yosëntaꞌ niꞌsarincoi. ¿Maꞌtaꞌ ina shaꞌhuitërinquën natëcaꞌhuaiso marëꞌ? Yanatanai, itërin.

Cornirio aꞌchintërinsoꞌ

³⁴ Itohuachina, Pitrori itërin: —Tëhuënchachin Yosëri yaꞌipi piyapiꞌsaꞌ nosororin. Co quiyasáchin nosororincoihuëꞌ. Cancanënpoaquë yonquirëhuasopita nitotaton, noꞌtëquën yonquirinpoaꞌ, tënahuë.

³⁵ Nisha piyapiꞌsanquëmaꞌ nipomarahuëꞌ, cancanëma quëran huarëꞌ ina chinotohuatamaꞌ, nohuantarinquëmaꞌ. Noya cancantohuatamaꞌ, noya niꞌsarinquëmaꞌ.

³⁶ Iráca israiroꞌsacoi noya nanan shaꞌhuitërincoi. Piyapinënpita pochin nicatoncoi, Yosë anitotërincoi. Oshahuanëhuaꞌ niꞌton, Yosë inimicotopirëhuahuëꞌ, Quisocristo aꞌpaimarin nanan anoyatinpoaso marëꞌ. Inasoꞌ yaꞌipi piyapinpoaꞌ yahuaꞌanëntërinpoaꞌ.

³⁷ Caririaquë nanan nahuinin. Ina quëran yaꞌipi Cotia parti nahuinin niꞌton, canpitantaꞌ natantëramaꞌ. Yosë nohuanton, Coansha pënëntërin co noyahuëꞌ yonquipisopita naniantacaiso marëꞌ. Piyapiꞌsari natëhuachinara, aporintërin.

³⁸ Ina piquëran Yosëri chachin Quisocristo acorin, Nasaritoquë yaꞌhuërinsoꞌ. Yosë nohuanton, Ispirito Santori noyá yaꞌcoancantërin. Napoaton nani maꞌsha nanitaparin nicacasoꞌ. Nisha nisha parti paaton, nóya ninin. Naꞌa caniaꞌpiroꞌsaꞌ aꞌnaroáchin anoyatërin. Aꞌnaquën sopairi yaꞌcoancantërin niꞌton, chiníquën parisitopirinahuëꞌ, inari anoyatërin. Yosëri catahuarin niꞌton, aꞌnaroáchin anoyatërin.

³⁹ Quirosarinquë naporin. Yaꞌipi cotioroꞌsaꞌ yaꞌhuëpiquëntaꞌ inaporin. Ina quëran corosëquë patanantahuatonaꞌ, tëpapi. Yaꞌipiya quiyari niꞌnai.

⁴⁰ Chiminpirinhuëꞌ, cara tahuëri quëran Yosëri ananpitaantarin. Nanpiantahuachina, Yosë nohuanton, yaꞌnotërincoi.

⁴¹ Co yaꞌipi piyapiꞌsari niꞌpihuëꞌ. Yosë nohuanton, quiyarisoꞌ niꞌnai aꞌnapita shaꞌhuitaꞌhuaiso marëꞌ. Nani nanpiantahuachina, quiyarëꞌ coshatërin, oꞌorin. Quisocristo tëhuënchachin nanpiantarin, tënai.

⁴² Naporoꞌ shaꞌhuitërincoi paatoi pënëntaꞌhuaiso marëꞌ. “Paatomaꞌ, ca nanamëhuë shaꞌhuicoꞌ imatonaco noya cancanchinaꞌ. Yosë chachin acorinco niꞌton, aꞌna tahuëri coisë pochin nisarahuë. Nanpipisopita, chiminpisopitantaꞌ, yaꞌipiya co noyahuëꞌ nipachinaꞌ, anaꞌintarahuë. Inantaꞌ shaꞌhuitocoꞌ nitochinaꞌ,” itërincoi niꞌton, shaꞌhuirárai.

⁴³ Iráca quëran huarëꞌ pënëntonaꞌpiroꞌsaꞌ Quisoso ninotonaꞌ, shaꞌhuitërinënpoaꞌ ina natëcaso marëꞌ. Cancanënpoa quëran huarëꞌ ina natëcasoꞌ yaꞌhuërin. Oshanënpoa marëꞌ chiminin niꞌton, imapatëhuaꞌ, yaꞌipi oshanënpoaꞌ inquitarinpoaꞌ. “Ca oshanëhuë marëꞌ mini Quisocristo chiminin,” topatëhuaꞌ, inquitarinpoaꞌ, itërin Pitrori.

Ispirito Santori yaꞌcoancantërinsoꞌ

⁴⁴ Noninsoꞌ natanahuatonaꞌ, yaꞌipiya natëpi. Nontaso chachin, Ispirito Santori yaꞌcoancantërin.

^45-46 Ina nohuanton, nisha nisha nananquë nonsapi. Co nitotaponaraihuëꞌ, Ispirito Santo nohuanton, napoapi. “Ma noyacha Yosëso paya,” tosapi. Natanahuatonaꞌ, cotioroꞌsaꞌ Pitro caꞌtanpisopita paꞌyanpi: “Nisha piyapiꞌsaꞌ niponaraihuëꞌ, Yosë nohuanton, Ispirito Santori yaꞌcoancantërin,” topi.

⁴⁷ —Isopitantaꞌ canpoa pochin Ispirito Santori yaꞌcoancantërin niꞌquëhuarëꞌ aporihuainaꞌ, tënahuë.

⁴⁸ “Quisocristo imarai huachi,” topachinara, aporintëquëꞌ, itërin Pitrori. Napotohuachina, aporintopi. —Isëquë iyaya yacapatoncoi, huaꞌquimiáchin aꞌchintocoi, itopi. Napotohuachinara, inaquë huaꞌquimiáchin yacapatërin.