Hebreos 9 - Chayahuita (Shahui)

Iráca chinotopiso pëiꞌ nininsoꞌ

¹ Iráca anoyatërinso shaꞌhuitohuachina, Moisësë nani maꞌsha shaꞌhuitërin onporahuatonsona Yosë chinotacaiso marëꞌ. Ina marëꞌ chinotopiso pëiꞌ nipi.

² Nëꞌmëtëꞌ, shaꞌhuëtëꞌ, inapita quëran nipi. Catoꞌ patoana yaꞌhuërin. Yaꞌnatimarinsosoꞌ, noya patoana itopi. Inaquë panca nanparin pochin nininsoꞌ yaꞌhuërin. Misantaꞌ yaꞌhuërin. Inaquë pan acorin, Yosë marëꞌ acopisoꞌ.

³ Nëmëtëquë patonpisoꞌ aquëtëꞌ, aꞌna patoanantaꞌ yaꞌhuërin, noya noya patoana itopisoꞌ.

⁴ Nëꞌmëtëꞌ yaꞌcariya aꞌna misaꞌhuaya yaꞌhuërin, oro quëran nipisoꞌ. Inaquë yonarin pochin pimóchin nininsoꞌ aꞌpëpi tomontacaso marëꞌ. Yosë caposonëontaꞌ yaꞌhuërin. Aipiran, acoporan, yaꞌipi oro quëran achinpitopi. Caposo acopoana yonsha oro quëran nipisoꞌ yaꞌhuërin. Inaquë piꞌpian cosharoꞌ Yosëri inápa quëran aꞌpaimarinsoꞌ poꞌmorin, mana itopisoꞌ. Aaron pitananëontaꞌ inaquë poꞌmorin. Inasoꞌ noyá yaniponahuëꞌ, Yosë nohuanton, aꞌnaroáchin papotantarin piyapinënpita yonquicaiso marëꞌ. Naporahuaton, catoꞌ naꞌpitëaꞌhuayantaꞌ inaquë acopi. Inaquë Yosë pënëntërinsoꞌ nani ninshitopi. Iráca anoyatërinsoꞌ itopisoꞌ.

⁵ Caposo aꞌtanamënquë catoꞌ anquëniaꞌhuaya pochin nonanatonaꞌ, acopi. Yosë huënaráchin nininsoꞌ ayonquiinpoaso marëꞌ napopi. Aꞌna inchinan quëran, aꞌna ahuënan quëran ninotëëpi. Naporahuaton anpiantëna quëran, caposo aꞌtanamën imotatë pochin nipi. Nisha nisha nininsopita aꞌchintacaꞌhuanquëmasoꞌ yaꞌhuëpirinhuëꞌ, co apira aquëtëꞌ shaꞌhuitaranquëmahuëꞌ.

⁶ Ina pochin maꞌsha chinotopiso pëiquë acohuachinara, noya patoanaquësoꞌ yaꞌipi corto huaꞌanoꞌsaꞌ yaꞌconpi. Nani tahuëri yaꞌconpi Yosë chinotacaiso marëꞌ.

⁷ Noya noya patoanaquëso nipirinhuëꞌ, co yaꞌipi yaꞌconpihuëꞌ. Aꞌnaíchin chini chiníquën nanantërinsoáchin yaꞌconin. Co ina tërantaꞌ nani tahuëri yaꞌconinhuëꞌ. Nani piꞌipiquë aꞌna tahuëriáchin yaꞌconahuaton, maꞌsha huënainën quëparin. Inaora oshanën marëꞌ quëparin. Naporahuaton, piyapiꞌsaꞌ co yonquiatonahuë oshahuanpiso marëntaꞌ quëparin.

⁸ Aꞌnapita piyapiꞌsasoꞌ co onporontaꞌ inaquë yaꞌconpihuëꞌ. Ina yonquihuatëhuaꞌ, Ispirito Santo anitotërinpoaꞌ. Iráca anoyatërinsoꞌ imapachinaꞌ, piyapiꞌsaꞌ co nanitopihuëꞌ Yosë nohuitacaisoꞌ, tënëhuaꞌ.

⁹ Iporahuantaꞌ ina yonquihuatëhuaꞌ, nitotarihuaꞌ. Iráca pënëntërinsoꞌ co natëhuachinahuëꞌ, maꞌsha tëpapi ama Yosëri anaꞌintacaso marëhuëꞌ. Nipirinhuëꞌ, co ina marëꞌ oshanën inquitërinhuëꞌ.

¹⁰ Iráca nisha nisha cosharoꞌ aꞌpopi. Nisha nisha oꞌocasontaꞌ aꞌpopi. Co noyahuëꞌ nipachinara, “Oshanëhuë inquiꞌi,” taꞌtonaꞌ, nisha nisha paꞌmopi. “Inapotohuatëhuaꞌ, Yosë noya niꞌsarinpoaꞌ,” topirinahuëꞌ, co ina marëꞌ noya cancantopihuëꞌ. Yosëri nasha nanan shaꞌhuitaton, anoyataquë huarëꞌ inapocaisoꞌ yaꞌhuërin.

^11-12 Iporaso nipirinhuëꞌ, Quisocristo nani oꞌmarin. Corto huaꞌan chini chiníquën nanantërinso pochin nicaton, nóya catahuarinpoaꞌ. Co chinotopiso pëiquë yaꞌconaton, nanan anoyatërinpoahuëꞌ. Co isoroꞌpaquë nipiso pëiquë yaꞌconinhuëꞌ. Co chipo, ohuacaꞌhuaya, inapita tëparinhuëꞌ huënainën macacaso marëꞌ. Inaora huënainën chachin aꞌparin. Chiminaton, oshanënpoaꞌ inquitërinpoaꞌ. Ina quëran Yosë yaꞌhuërinquë chachin panantarin aꞌnaromaráchin nanan anoyatinpoaso marëꞌ. Inaquë noya noya catahuarinpoaꞌ. Canpoa marëꞌ chiminin niꞌton, anoyacancantarinpoaꞌ. Ina imapatëhuaꞌ, nichaꞌësarinpoaꞌ.

¹³ Cotioroꞌsaꞌ co yaꞌipi Moisësë pënëntërinsoꞌ natëhuachinahuëꞌ, nëꞌhuëtërinso pochin niꞌtonaꞌ, co nanitopihuëꞌ chinotopiso pëiquë yaꞌconacaisoꞌ. Napohuachinara, maꞌsharoꞌsaꞌ, chipo, toroaꞌhuaya, inapita chinotopiso pëiquë quëpapi. Inaquë corto huaꞌani tëparahuaton, huënainën manin. Huënainën masahuaton, ohuacaꞌhuaya huiquitërinsoꞌ yanonën ayontërin. Ayontahuaton, oshahuanaꞌpi taꞌsatërin. Inapotohuachina, nëꞌhuëtërinsoꞌ inquirinso pochin ninin niꞌton, naquëranchin nanitërin chinotopiso pëiquë yaꞌconacasoꞌ.

¹⁴ Quisocristo huënainënso nipirinhuëꞌ noya nóya. Inasoꞌ Yosë huiꞌnin niꞌton, co piꞌpisha tërantaꞌ oshahuaninhuëꞌ. Ispirito Santo yaꞌhuëmiatërinsori catahuarin niꞌton, canpoa marëꞌ chiminaton anoyacancantomiatërinpoaꞌ. Inaso huënainën aꞌparin oshanënpoaꞌ inquitinpoaso marëꞌ. Inapoaton noyápiachin cancan quëtërinpoaꞌ. Ina quëtohuachinpoaꞌ, Yosë noya chinotarihuaꞌ. Inasoꞌ nanpiarin niꞌton, canpoantaꞌ ina marëꞌ noya sacatarihuaꞌ.

¹⁵ Napoaton nasha quëran anoyatërinso nani shaꞌhuitërinpoaꞌ. Yaꞌnan anoyatërinso naꞌa piyapiꞌsaꞌ imapirinahuëꞌ, co noyahuëꞌ cancantatonaꞌ, oshahuanpi. Co maꞌsharoꞌsaꞌ huënainën quëran oshanënaꞌ inquimiatopihuëꞌ. Nipirinhuëꞌ, Quisocristo chiminin yaꞌipi huayoninsopita oshanënaꞌ inquitacaso marëꞌ. Yaꞌnan anoyatërinso imapisopita oshanënantaꞌ inquitërin.

^16-17 Niꞌcoꞌ. Quëmapi yachiminpachina, quiricatërin maꞌshanënpita macacaiso marëꞌ. Coꞌhuara chimiyantërasohuëꞌ, co macacaisoꞌ yaꞌhuërinhuëꞌ. Chiminpachina, naporo huarëꞌ mapi. Inapochachin nani Quisocristo chiminin niꞌton, yaꞌipi shaꞌhuitërinpoasoꞌ acotërinpoaꞌ. Oshanënpoaꞌ inquitatonpoaꞌ, nóya catahuarinpoaꞌ.

¹⁸ Napoaton yaꞌnan anoyatërinsontaꞌ shaꞌhuitohuachina, maꞌsharoꞌsaꞌ tëparahuatonaꞌ, huënainënaꞌ aꞌpatopi. Inapotatonaꞌ, iráca anoyatërinsoꞌ imapi.

¹⁹ Yaꞌipi piyapiꞌsaꞌ ayontonahuaton, Moisësëri pënënin. Nani maꞌsha shaꞌhuitërin natëcaiso marëꞌ. Nani shaꞌhuitohuachina, ohuacaꞌhua, chipo, inapita tëparahuaton, huënainëna manin. Ina quëran narasëꞌpaꞌ isopo itopisoꞌ masahuaton, quëhuan huaitaquë soꞌquëtahuaton, iꞌsharë chachin taꞌsatërin. Pënëntërinsoꞌ quirica, piyapiꞌsaꞌ, inapita taꞌsatërin.

²⁰ Inapotahuaton: “Nani anoyatërinso Yosë shaꞌhuitërinpoaꞌ natëcaso marëꞌ. Iso huënaiꞌ paꞌnin niꞌton, Yosë canpoarë anoyatërinso anitotërinpoaꞌ,” tënin Moisësë.

²¹ Ina quëran chinotopiso pëiꞌ, maꞌsha inaquë yaꞌhuërinsopita, inapitantaꞌ huënaiquë taꞌsatërin.

²² Iráca pënëntërinso imapachinara, nani maꞌsha huënaiquë taꞌsatopi anoyatacaiso marëꞌ. “Co huënaiꞌ taꞌsatohuatëhuahuëꞌ, co Yosë noya niꞌsarinpoahuëꞌ,” topi. Tëhuënchachin co huënaiꞌ paꞌpachinhuëꞌ, Yosë co onporontaꞌ oshanënpoaꞌ inquitërinpoahuëꞌ.

Quisocristo oshanënpoaꞌ inquitërinpoasoꞌ

²³ Iráca maꞌpitasona inápaquë yaꞌhuërinsopita nonanpisoꞌ, huënai quëran taꞌsatopi anoyatacaso marëꞌ. Maꞌsha inápaquë yaꞌhuërinsopitaso nipirinhuëꞌ, noya noya huënaiꞌ nohuantërin.

²⁴ Iráca chinotopiso pëiꞌ, piyapiꞌsari ninin. Quisocristosoꞌ, co inaquë yaꞌconinhuëꞌ. Yosë yaꞌhuërinquë chachin pantarahuaton, canpoa marëꞌ Yosë nontárin. “Oshanënaꞌ inquitaꞌhuaso marëꞌ nani chiminahuë,” taꞌton, nontárin.

²⁵ Iráca corto huaꞌan maꞌsha huënainën masahuaton, noya noya patoanaquë yaꞌconin. Nani piꞌipi inaporin. Quisocristoso nipirinhuëꞌ co naꞌaroꞌ inaporinhuëꞌ.

²⁶ Aꞌnaroíchin chiminaponahuëꞌ, yaꞌipi piyapinënpita marëꞌ chiminin. Co aꞌnaromarëáchin nanitërinpoahuëꞌ naporini, iráca quëran huarëꞌ naꞌaroꞌ chimiantaꞌitonhuëꞌ. Iporasoꞌ nani ayaro tahuëri yaꞌcariapirinpoahuëꞌ, aꞌnaroíchin chiminin oshanënpoaꞌ inquitinpoaso marëꞌ.

²⁷ Yosë nohuanton, yaꞌipi piyapinpoaꞌ aꞌnaroíchin chiminëhuaꞌ. Ina quëran Yosë chachin coisë pochin nicaton, maꞌsona onpotiinpoasoꞌ noꞌtëquën shaꞌhuipon.

²⁸ Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.