Hebreos 8 - Chayahuita (Shahui)

Quisocristo nasha quëran anoyatërinsoꞌ

¹ Noꞌtëquën shaꞌhuitaranquëmaꞌ. Quisocristo inápaquë panantarahuaton, Yosë inchinanën quëran chachin huënsërin. Corto huaꞌan chini chiníquën nanantërinso pochin niꞌton, nanan anoyatërinpoaꞌ.

² Iráca cotioroꞌsaꞌ chinotopiso pëiꞌ nipi Yosë chinotacaiso marëꞌ. Inápaquë yaꞌhuërinso chachin nonanpi. Inaquë corto huaꞌanoꞌsari piyapiꞌsa marëꞌ Yosë nontopi. Quisocristoso nipirinhuëꞌ inápaquë Yosëri acorinquë chachin canpoa marëꞌ ina nontárin. Inaquësoꞌ noya noya catahuarinpoaꞌ.

³ Iráca corto huaꞌanoꞌsaꞌ maꞌsha tëpapi piyapiꞌsaꞌ oshanëna marëꞌ. Quisocristoso nipirinhuëꞌ inaora nohuanton, chiminin oshanënpoaꞌ inquitinpoaso marëꞌ.

⁴ Ipora huantaꞌ isoroꞌpaquë yaꞌhuërin naporini, co corto huaꞌan yaꞌcointonhuëꞌ. Cotioroꞌsaꞌ iráca nanan imatonaꞌ, corto huaꞌanoꞌsaꞌ yaꞌhuëtapi maꞌsha tëpacaiso marëꞌ.

⁵ Corto huaꞌanoꞌsaso chinotopiso pëiquë Yosë marëꞌ sacatopi. Inasoꞌ, inápaquë yaꞌhuërinso chachin nonanpisoꞌ. Iráca chinotopiso pëiꞌ yanipachinara, Yosëri Moisësë itërin: “Chinotamacoso marëꞌ nëꞌmëtë pëiꞌ nicoꞌ. Motopiquë aꞌnotëranquënso chachin niquëꞌ,” itërin.

⁶ Quisocristoso nipirinhuëꞌ, Yosë yaꞌhuërinquë chachin panantarahuaton, nanan anoyatërinpoaꞌ. Cotioroꞌsasoꞌ iráca anoyatërinso imapirinahuëꞌ, Quisocristosoꞌ nasha quëran anoyatërinso shaꞌhuitërinpoaꞌ. “Oshanëmaꞌ inquitatënquëmaꞌ, anoyacancantaranquëmaꞌ,” itërinpoaꞌ niꞌton, inaso noya noya, tënahuë.

⁷ Iráca anoyatërinso natërëhua quëran noyápiachin cancantërëhuaꞌ naporini, co nasha quëran anoyatacaso yaꞌhuëitonhuëꞌ.

⁸ Iráca anoyatërinso imaponaraihuëꞌ, co noya cancantopihuëꞌ niꞌton, quiricanën quëran Yosëri shaꞌhuitërin: “Aꞌna tahuëri ca nohuanto, yaꞌipi piyapinëhuëpitarëꞌco nasha quëran anoyatarahuë.

⁹ Iráca inapitasoꞌ Iquipito parti yaꞌhuëpirinahuëꞌ, imiranpo quëran sëꞌquërëso pochin nosoroato, nichaꞌërahuë. Naporoꞌ inapitarëꞌco anoyatopirahuëꞌ, co natantochináchinhuëꞌ cancantopi niꞌton, tananpitërahuë,” tënin Yosë.

¹⁰ Ina quëran itantarin: “Tahuëri nanihuachin, nasha quëran anoyataantarahuë. Naporoꞌ anoyacancantarahuë noya yonquicaiso marëꞌ. Nasha cancan quëtarahuë ca pochin cancantacaiso marëꞌ. Casáchin chinotarinaco niꞌton, noya aꞌpaiarahuë. Ca pochin cancantatonaꞌ, piyapinëhuëpita chachin nisapi.

¹¹ Iráca aꞌnaya aꞌnaya yanohuitohuachinacora, aꞌnapitari aꞌchintopi. ‘Yosë nohuitocoꞌ,’ itopirinahuëꞌ, co yaꞌipi nanamëhuë nitochátërapihuëꞌ. Aꞌna tahuëriso nipirinhuëꞌ nitotapi. Nasha cancan yaꞌhuëtohuachinaꞌ, cancanëna quëran chachin nohuitarinaco. Insopita tërantaꞌ nasha quëran anoyatërahuëso imapachinaꞌ, nohuitarinaco. Huaꞌanoꞌsahuë nipon, topinan piyapiꞌsahuë nipon nohuantohuachinaꞌ, nohuitarinaco.

¹² Naꞌcon nosoroato, yaꞌipi co noyahuëꞌ yonquipisopita inquitarahuë. Co huachi oshanënaꞌ yonquiarahuë,” tënin Yosë.

¹³ Nasha quëran anoyatërinso quëtërinpoa. Inasoꞌ iráca yaꞌhuërinsoꞌ yaꞌhuërëtërin. Napoaton iráca anoyatërinsosoꞌ naniantacasoꞌ yaꞌhuërin. Co huachi ina imacasoꞌ yaꞌhuërinhuëꞌ.