Hebreos 7 - Chayahuita (Shahui)

Quisocristo Miriquiso pochin nininsoꞌ

¹ Miriquisosoꞌ iráca yaꞌhuërin. Co cotio piyapihuëꞌ niponahuëꞌ, noya Yosë imarin. Sarimoquë yaꞌhuëpisopita huaꞌanëntërin. Naporahuaton, Yosë nohuanton, corto huaꞌan yaꞌconin. Piyapi marëꞌ Tata Yosë nontërin. Iráca Apraani nohuitërin. Inimico copirnoroꞌsaꞌ minsërahuaton, oꞌmantahuachina, Miriquisori nacapirin. Nacapirahuaton, Apraan noya nontërin. Ina quëran corto huaꞌan niꞌton, Yosë nontërin Apraan noya noya yaꞌhuëcaso marëꞌ.

² Nani nontohuachina, Apraani nani maꞌsha canarin quëran diesmo Yosë marëꞌ acorinsoꞌ quëtërin. Miriquisosoꞌ nóya huaꞌan. Nininën chachin “huaꞌan noya nicacasoꞌ yonquirinsoꞌ” tapon naporin. Naporahuaton, Sarimo huaꞌan niꞌton, “huaꞌan sano cancantërinsoꞌ” tapon naporin.

³ Aꞌshin, paꞌpin, shimashonënpita, inapita co nohuitërëhuahuëꞌ. Onporosona nasitërinsoꞌ, onpo piꞌipi quëransona chimininsoꞌ, inapita co nitotërëhuahuëꞌ. Co Yosë quiricanën quëran shaꞌhuitërinpoahuëꞌ. Piyapi marëꞌ Yosë nontárin. Co Yosëri ocoirinhuëꞌ niꞌton, piꞌpian Yosë huiꞌnin pochin niꞌnin. Nanpiárin pochin cancantërëhuaꞌ.

⁴ Iráca naꞌa corto huaꞌanoꞌsaꞌ yaꞌhuëpirinahuëꞌ, cotioroꞌsaráchin yaꞌconpi. Miriquisoso nipirinhuëꞌ nisha piyapi. Co cotio quëmapihuëꞌ niponahuëꞌ, aꞌnapita corto huaꞌanoꞌsa quëran chini chiníquën nanantërin. Apraani noya niꞌnin. Apraanꞌton Yosëri acorin piyapinënpita nicacaso marëꞌ. Inasoꞌ chiníquën nanantërin, tënëhuaꞌ. Napoaponahuëꞌ, inimiconënpita maꞌshanënaꞌ matërin quëran, diesmo ocoirinsoꞌ Miriquiso quëtërin. Inasoꞌ corto huaꞌan niꞌton, maꞌparin.

⁵ Aꞌna cotio huënton Nihuiroꞌsaꞌ itopisoꞌ. Iráca Yosë nohuanton, Moisësëri shaꞌhuitërin. “Nihuiroꞌsaráchin corto huaꞌan yaꞌcoinaꞌ. Inapita chinotopiso pëiquë paꞌpachinaꞌ, piyapi marëꞌ Yosë nontapi,” itërin. Ina quëran piyapiꞌsaꞌ itantarin: “Yosë nohuanton, nani maꞌsha yaꞌhuëtarinquëmaꞌ. Napoaton diesmo quëtocoꞌ. Corto huaꞌan maꞌpahuachinquëmaꞌ, quëtocoꞌ,” itërin Moisësëri. Quëmopinënpita niponahuëꞌ, Yosë nohuanton, maꞌparin.

⁶ Miriquisosoꞌ co cotio quëmapihuëꞌ niponahuëꞌ, diesmo Apraan maꞌparin. Naporahuaton, ina marëꞌ Yosë nontahuaton, “Yosë noya catahuainquën,” itërin. Yosëri chachin Apraan nani shaꞌhuitërin noya catahuacaso marëꞌ.

⁷ “Chini chiníquën nanantohuatëra, aꞌnapita marëꞌ Yosë nontërëꞌ, ‘Yosë noya catahuainquën,’ itërëꞌ,” tënëhuaꞌ. Napoaton Apraan quëran Miriquisosoꞌ chini chiníquën nanantërin.

⁸ Isoroꞌpaquë corto huaꞌanoꞌsari diesmo maꞌpatopirinahuëꞌ, inapitantaꞌ piyapiꞌsaꞌ niꞌton, chiminpi antaꞌ. Miriquisoso nipirinhuëꞌ nanpiarin pochin cancantërëhuaꞌ. Yosë quiricanën nontërëhuaꞌ quëran, naporëhuaꞌ.

^9-10 Nihuiroꞌsaso nipirinhuëꞌ Apraan shinpita. Corto huaꞌan yaꞌconpi niꞌton, diesmo maꞌpatopirinahuëꞌ, co Miriquiso pochin chiníquën nanantopihuëꞌ. Coꞌhuara Nihui shinpita nasichátëraponahuëꞌ, Apraani Miriquiso quënanahuaton, diesmo quëtërin. Nihuiroꞌsaꞌ yaꞌhuërënamën quëtërin.

¹¹ Iráca Aaronꞌton corto huaꞌan yaꞌconin. Ina quëran aꞌnaya aꞌnaya Nihuiroꞌsaꞌ huënton quëran niyaꞌhuërëtëraꞌpiapi. Naporoꞌ Yosëri, pënëntërinsoꞌ nanan shaꞌhuitërin yaꞌipi israiroꞌsaꞌ imacaiso marëꞌ. Nihui corto huaꞌanoꞌsaꞌ nanan anoyatërinënpoaꞌ naporini, ¿maꞌmarëtaꞌ aꞌna corto huaꞌan Miriquiso pochin nininsoꞌ huëcacasoꞌ yaꞌhuëitonhuëꞌ?

¹² Nisha corto huaꞌan yaꞌconpachina, nisha nanan pënëninpoaꞌ.

^13-14 Quisocristosoꞌ co Nihui huëntonquë nasitërinhuëꞌ. Cota huëntonquë nasitërin. Inapitasoꞌ co onporontaꞌ corto huaꞌan yaꞌconpihuëꞌ. Co ina pochin Moisësë pënëntërinhuëꞌ. Napoaton Quisocristo co corto huaꞌan yaꞌconinhuëꞌ, tënahuë.

¹⁵ Inasoꞌ isoroꞌpaquë oꞌmarin niꞌton, nasha nanan shaꞌhuitërinpoaꞌ. Corto huaꞌan pochin canpoa marëꞌ Yosë nontárin. Miriquiso pochin co onporontaꞌ pipiarinhuëꞌ. Ina yonquihuatëhuaꞌ, naporinsoꞌ noꞌtëquën anitotërinpoaꞌ.

¹⁶ Co Nihuiroꞌsaꞌ huënton quëran yaꞌconpiso pochin nininhuëꞌ. Inasoꞌ chiminaponahuëꞌ, nanpiantarahuaton, yaꞌhuëmiatarin. Napoaton chiníquën nanantaton, noya noya yaꞌconin.

¹⁷ Yosë quiricanën quëran naporin: “Naꞌa corto huaꞌanoꞌsaꞌ yaꞌconpirinahuëꞌ, quëmasoꞌ noya noya acoaranquën inapita yaꞌhuërëtacaso marëꞌ. Yaꞌipi piyapiꞌsa marëꞌ nontaranco. Miriquiso pochin nisaran. Co onporontaꞌ pipiaranhuëꞌ,” itërin Yosëri.

¹⁸ Iráca corto huaꞌanoꞌsaꞌ pënëntërinsoꞌ nanan imapirinahuëꞌ, co oshanënaꞌ inquitërinhuëꞌ. Co tëhuënchachin catahuarinhuëꞌ. Napoaton co imacasoꞌ yaꞌhuërinhuëꞌ.

¹⁹ Moisësë pënëntërinsoꞌ nanan co mantaꞌ anoyatërinhuëꞌ. Quisocristoso nipirinhuëꞌ anoyacancantërinpoaꞌ. Anoyacancantohuachinpoaꞌ, nanitërëhuaꞌ Yosë nohuitacasoꞌ. Huëntonënquë chachin ayaꞌconinpoaꞌ. Inasoꞌ noya noya, tënëhuaꞌ.

^20-21 Iráca naꞌa cotioroꞌsaꞌ corto huaꞌan yaꞌconpi. Yosëri acopirinhuëꞌ, co yaꞌhuëmiatopihuëꞌ. Nipirinhuëꞌ, Quisocristo yaaꞌpaimahuachina, itapon: “Casoꞌ Yosëco niꞌto, noꞌtëquën nontaranquën. Ipora quëran huarëꞌ corto huaꞌan chini chiníquën nanantërinso pochin nicaton, piyapi marëꞌ nontaranco huachi. Yaꞌhuëmiataran. Co onporontaꞌ nisha acoaranquënhuëꞌ,” itërin Yosëri.

²² Napoaton Quisocristosoꞌ, nasha quëran canpoarëꞌ anoyatërin. Co nonpintarinpoahuëꞌ. Co onporontaꞌ nisha shaꞌhuitarinpoahuëꞌ. Ina anoyatërinpoasoꞌ noya noya. Pënëntërinsoꞌ nanan iráca imapisosoꞌ, co onpopinchin noyahuëꞌ.

²³ Iráca naꞌa corto huaꞌanoꞌsaꞌ yaꞌconpirinahuëꞌ, niyaꞌhuërëtëraꞌpiapi. Aꞌna chiminpachina, aꞌna yaꞌcoantarin. Ina chimiantahuachina, aꞌnantaꞌ yaꞌcoantarin.

²⁴ Quisocristoso nipirinhuëꞌ nanpiantarahuaton, yaꞌhuëmiatërin niꞌton, canpoa marëꞌ Yosë nontárin. Co incari tërantaꞌ yaꞌhuërëtërinhuëꞌ.

²⁵ Napoaton nanitërin noyá nichaꞌëinpoasoꞌ. “Quisocristoíchin anoyacancantërinpoaꞌ,” taꞌtëhuaꞌ, Yosë imarëhuaꞌ. Iporahuantaꞌ Quisocristo nanpiárin catahuainpoaso marëꞌ. Nani tahuëri canpoa marëꞌ Yosë nontárin.

²⁶ Quisocristoíchin nanan anoyatërinpoaꞌ. Inasoꞌ corto huaꞌan chini chiníquën nanantërinso pochin nicaton, nóya ninin. Co piꞌpian tërantaꞌ oshahuaninhuëꞌ. Co nëꞌhuëtërinso pochin nininhuëꞌ. Co oshahuanoꞌsa pochin cancantërinhuëꞌ. Inápaquë panantahuachina, Yosëri chini chiníquën nanan quëtërin.

²⁷ Co inasoꞌ aꞌnapita corto huaꞌanoꞌsa pochinhuëꞌ. Inapitasoꞌ oshahuanatonaꞌ, inahuara oshanëna marëꞌton maꞌsha tëpapi. Ina quëran piyapiꞌsaꞌ oshanëna marëntaꞌ maꞌsha tëpaantapi. Nani tahuëri naporápi. Quisocristoso nipirinhuëꞌ co oshahuanatonhuëꞌ, co maꞌsha tëpacasoꞌ yaꞌhuërinhuëꞌ. Inaora nohuanton, canpoaꞌ yaꞌhuërënamënpoaꞌ chiminin. Aꞌnaroíchin chiminaton, nanitërin yaꞌipi oshanënpoaꞌ inquitinpoasoꞌ.

²⁸ Iráca Moisësë pënëntërin quëran naꞌa quëmapiꞌsaꞌ corto huaꞌan yaꞌconaꞌpiapi. Inahuantaꞌ co noyahuëꞌ cancantatonaꞌ, oshahuanpi. Ina piquëran Yosësoꞌ huiꞌnin chachin acorin. “Co onporontaꞌ nisha acoaranquënhuëꞌ,” itaton, oshanënpoaꞌ inquitinpoaso marëꞌ acorin. Inasoꞌ noyasáchin ninin. Co onporontaꞌ oshahuanaponhuëꞌ. Napoaton nóya catahuarinpoaꞌ.