Hebreos 5 - Chayahuita (Shahui)

¹ Iráca Yosëri aꞌnaya aꞌnaya corto huaꞌan chini chiníquën nanantërinsoꞌ acorin ina marëꞌ sacatacasoꞌ. Inantaꞌ piyapi niponahuëꞌ, aꞌnapita piyapiꞌsa marëꞌ Yosë nontërin. Co noyahuëꞌ nipachinara, chinotopiso pëiquë maꞌsha quëpapi. Inaquë corto huaꞌani tëparin oshanëna marëꞌ. Ama Yosëri anaꞌintacaso marëhuëꞌ inaporin.

² Aꞌnaquën piyapiꞌsaꞌ co aquëtëꞌ nitotatonahuëꞌ, co noyahuëꞌ nipi. Inapita huëꞌpachinara, corto huaꞌani co chiníquën nontërinhuëꞌ. Inantaꞌ piyapi niꞌton, sopairi yaminsërin. Napoaton sanoanan quëran pënënin.

³ Inantaꞌ oshahuanin niꞌton, inaora oshanën marëꞌton maꞌsha tëpacasoꞌ yaꞌhuërin. Ina quëran aꞌnapita oshanëna marëntaꞌ maꞌsha tëpaantarin.

⁴ Co inaora nohuanton, corto huaꞌan yaꞌconinhuëꞌ. Yosë nohuanton, yaꞌconin. Iráca Aaronꞌton Yosëri acorin.

⁵ Quisocristontaꞌ co inaora nohuanton, corto huaꞌan chini chiníquën nanantërinsoꞌ yaꞌconinhuëꞌ. Yosëri noya nicaton, itapon: “Quëmasoꞌ huiꞌnahuë chachinquën. Ipora chachin acoaranquën piyapiꞌsaꞌ anohuitancoso marëꞌ,” itërin. Quiricanënquë chachin naporin.

⁶ Ina quëran quiricanën quëran itaantarin: “Naꞌa corto huaꞌanoꞌsaꞌ yaꞌconpirinahuëꞌ, quëmasoꞌ noya noya acoaranquën. Yaꞌipi piyapiꞌsa marëꞌ nontaranco. Miriquiso pochin nisaran. Co onporontaꞌ pipiaranhuëꞌ,” itërin.

⁷ Quisocristo isoroꞌpaquë oꞌmarahuaton, piyapi chachin nasitimarin. Yatëpahuachinara, chiníquën Yosë nontërin. Naꞌnëton, itapon: “Quëma nohuantohuatan Tata, nichaꞌëco, ama tëpaꞌinacosohuëꞌ. Nipirinhuëꞌ, co quëma nohuantohuatanhuëꞌ, maꞌsona yaonpotohuatancontaꞌ noya,” itërin. Noꞌtëquën yanatërin niꞌton, Yosëri natanaton, catahuarin noya natëcasoꞌ.

⁸ Yosë huiꞌnin chachin niponahuëꞌ, piyapi pochachin parisitërin. Co oshahuanaponahuëꞌ, piyapi niꞌton, parisitërin quëran noyá nitotërin Yosë natëcasoꞌ.

⁹ Noꞌtëquën natëton, canpoa marëꞌ chiminin. Napoaton nanitërin anoyacancantinpoasoꞌ. Ina natëhuatëhuaꞌ, noya nichaꞌësarinpoaꞌ nanpimiatacaso marëꞌ.

¹⁰ Yosë nohuanton, Quisocristo corto huaꞌan chini chiníquën nanantërinso pochin yaꞌconin. Miriquiso pochin ninin.

Ama Yosë aꞌpocaiso marëhuëꞌ pënëninsoꞌ

¹¹ Iráca ninopisoꞌ naꞌcon yaaꞌchintopiranquëmahuëꞌ. Co natantochináchinhuëꞌ cancantatomaꞌ, co yanatantëramahuëꞌ niꞌton, sacaiꞌ aꞌchintaꞌhuanquëmasoꞌ.

¹² Huaꞌqui Yosë nanamën natanapomarahuëꞌ, co nanitëramahuëꞌ Yosë noꞌtëquën natëcamasoꞌ. Noya yonquiatomaꞌ, aꞌnapita aꞌchintacamaso nipirinhuëꞌ, co noꞌtëquën yonquiyátëramahuëꞌ. Yaꞌnan aꞌchintëranquëmasoꞌ naquëranchin aꞌchintantaꞌhuanquëmasoꞌ yaꞌhuërin. Co inapita tërantaꞌ cancanëma quëran huarëꞌ yanatëramahuëꞌ. Huaꞌhuaroꞌsa pochin cancantatomaꞌ, co nanitëramahuëꞌ yaꞌipi Yosë nanamën yonquicamasoꞌ. Niꞌcoꞌ. Canopiaꞌhuaya shoꞌshoráchin yonquirin. Co nanitërinhuëꞌ coshatacasoꞌ.

¹³ Soꞌsoquë huarëꞌ coshatërin. Canpitasoꞌ co noyahuëꞌ yonquiatomaꞌ, canopiaꞌhuaya pochin yonquiconamaꞌ. Co nanitëramahuëꞌ noꞌtëquën yonquicamasoꞌ.

¹⁴ Chinotonoꞌsaso nipirinhuëꞌ, cosharomia caꞌpi. Inapochachin noya noya imapisopitasoꞌ noꞌtëquën yonquiapi. Noya nicacasoꞌ noꞌquitonaꞌ, co noyahuëꞌ nininsoꞌ aꞌnaroáchin aꞌporapi.