Hebreos 4 - Chayahuita (Shahui)

^1-2 Yosë nani shaꞌhuitërinpoaꞌ. “Ipora huantaꞌ yacatahuaranquëmaꞌ sano cancantacamaso marëꞌ,” itërinpoaꞌ. Noya nanan nani natanëhuaꞌ. Iráca natanpirinahuëꞌ, co natëpihuëꞌ. “Yosë noꞌtëquën nontërinpoaꞌ,” co topihuëꞌ. Topinan quëran natanpi niꞌton, co Yosëri anoyacancantërinhuëꞌ. Niꞌcona canpitantaꞌ topinan quëran natantamaꞌ. Co natëhuatamahuëꞌ, co sano cancantaramahuëꞌ.

^3-4 Iráca Yosëri itërin: “Co cancanëma quëran huarëꞌ yaimaramacohuëꞌ niꞌton, noꞌhuiranquëmaꞌ. Co onporontaꞌ sano cancantaramahuëꞌ, tënahuë. Ca Yosëco niꞌto, noꞌtëquën shaꞌhuitaranquëmaꞌ,” itërin. Canpoaso nipirinhuëꞌ cancanënpoa quëran huarëꞌ imapatëhuaꞌ, huëntonënquë chachin ayaꞌconinpoaꞌ. Ina quëran sano cancantarihuaꞌ. Sano cancantohuatëhuaꞌ, co huachi nisha nisha yonquiarihuahuëꞌ. Yosësoꞌ isoroꞌpaꞌ tënirahuaton, chinotërin. Quiricanënquë shaꞌhuitërinpoaꞌ: “Iráca Yosëri isoroꞌpaꞌ ninin. Saota tahuëri quëran nani yaꞌipi tiquihuachina, tahuëririnquë sano cancantaton, chinotërin,” tënin.

⁵ Naquëranchin quiricanën quëran tantarin: “Co onporontaꞌ yaꞌconatonaꞌ, ca pochin sano cancantapihuëꞌ,” tënin.

⁶ Cotioroꞌsaꞌton noya nanan natanaponaraihuëꞌ, co natëpihuëꞌ niꞌton, co yaꞌconpihuëꞌ. Napoaton ipora huantaꞌ Yosë yonquiarin piyapiꞌsaꞌ asanocancantacasoꞌ. Iráca quëran huarëꞌ yonquirinpoaꞌ asanocancainpoasoꞌ.

^7-8 Moisësë chiminpachina, Cosoiri israiroꞌsaꞌ huaꞌanëntantarin. Noyaroꞌpaquë quëpapirinhuëꞌ. “Yaꞌconpatoi, sano cancantarai huachi,” topirinahuëꞌ, co sano cancantopihuëꞌ. Iráca Yosëri shaꞌhuitërin. “Piyapiꞌsaꞌ asanocancantarahuë,” itopirinhuëꞌ, co cotioroꞌsaꞌ ina pochin cancantopihuëꞌ. Ina quëran naꞌa piꞌipi naꞌhuërin piquëran Tapi tapon: “Ipora tahuëri Yosë nontarinquëmaꞌ. Natanpatamaꞌ, noya natëtocoꞌ. Aꞌnaquën co natëtochináchinhuëꞌ cancantopi. Ama inapita pochin cancantocosohuëꞌ,” tënin. Cosoiri asanocancantërin naporini, co ina pochin Yosëri pënëintonhuëꞌ.

⁹ Napoaton ipora huantaꞌ Yosë nohuantërin asanocancainpoasoꞌ. Yosë anoyacancantohuachinpoaꞌ, sano cancantarihuaꞌ.

¹⁰ Iráca isoroꞌpaꞌ tiquihuachina, Yosë chinotaton, sano cancantërin. Canpoantaꞌ cancanënpoa quëran imapatëhuaꞌ, inapochachin sano cancantarihuaꞌ. Yosë noya nohuitarihuaꞌ.

¹¹ Napoaton naꞌcon yonquiaꞌahuaꞌ Yosë huëntonënquë yaꞌconacaso marëꞌ. Iráca co natëtonahuëꞌ, co imamiatopihuëꞌ. Ama inapita pochin cancantahuasohuëꞌ.

¹² Yosë nanamën chiníquën nanantërin. Yosë nanpiárin niꞌton, ipora huantaꞌ quiricanën quëran nontarinpoaꞌ. Noya natëhuatëhuaꞌ, nanamën quëran chachin catahuarinpoaꞌ noya noya imacaso marëꞌ. Coꞌsoꞌ natëhuatëhuahuëꞌ, aquë aquëtëꞌ co noyahuëꞌ cancantarihuaꞌ. Sahuëni cato quëran chachin toꞌnahuatëra, inëshin niꞌton, niahuëpatëra, aꞌnaroáchin nansë acopoquë huarëꞌ nipëꞌsharëꞌ. Inapochachin Yosë nanamënsoꞌ chini chiníquën yaꞌcoancantërinpoaꞌ. Ina yonquihuatëhuaꞌ, noꞌtëquën nitotarihuaꞌ. Yaꞌipi yonquirëhuaso chachin anitotërinpoaꞌ. Yonquinënpoaquë maꞌmarësona naporëhuasopitantaꞌ anitotarinpoaꞌ.

¹³ Yaꞌipi ninëhuasopita Yosësoꞌ nitotërin. Poꞌoana quëran nipirëhuahuëꞌ, yaꞌipi niꞌninpoaꞌ. Co piꞌpisha tërantaꞌ inasoꞌ nonpintarihuahuëꞌ. Yaꞌipi yonquirëhuasopitantaꞌ noyá nitotërin. Ayaroꞌ tahuëri yaꞌipinpoaꞌ ninëhuasopita aipitarinpoaꞌ. Naporoꞌ coisë pochin nontarinpoaꞌ. Nontohuachinpoaꞌ, noꞌtëquën shaꞌhuitacasoꞌ yaꞌhuapon.

Corto huaꞌan chini chiníquën nanantërinso pochin nininsoꞌ

¹⁴ Iporasoꞌ Quisoso imarëhuaꞌ. Yosë huiꞌnin chachin inasoꞌ. Nani inápaquë panantarahuaton, Yosëꞌpaꞌ yaꞌhuarin. Corto huaꞌan chini chiníquën nanantërinso pochin Yosëri acorin catahuainpoaso marëꞌ. Napoaton ama ina naniantatëhuahuëꞌ, imamiatahuaꞌ.

¹⁵ Inasoꞌ yaꞌipinpoaꞌ noyá nohuitërinpoaꞌ. Sopai yaminsërinpoasontaꞌ nitotërin. Co chiníquën cancantërëhuahuëꞌ niꞌton, sopai shaꞌhuitarinpoaꞌ ama Yosë natëcaso marëhuëꞌ. Quisosontaꞌ isoroꞌpaquë nipon, sopairi naꞌcon yanonpintaton, nisha nisha shaꞌhuitopirinhuëꞌ minsëcaso marëꞌ, co inasoꞌ sopai natërinhuëꞌ.

¹⁶ “Tëhuënchachin nosoroatonpoaꞌ, catahuarinpoaꞌ,” taꞌtëhuaꞌ, apira apira Yosë nontahuaꞌ. Nontohuatëhuaꞌ, oshanënpoaꞌ inquitarinpoaꞌ. Maꞌsha onpohuatëhuaꞌ, ina nontohuatëhuaꞌ, inaora nohuanton, catahuarinpoaꞌ noya ahuantacaso marëꞌ.