Hebreos 3 - Chayahuita (Shahui)

Moisësë quëran noya noya nininsoꞌ

¹ Imaramaꞌ niꞌton, Yosë anoyacancantërinquëmaꞌ. Huëntonënquë ayaꞌconinquëmaꞌ. Napoaton iyaroꞌsaꞌ Quisocristo naꞌcon yonquicoꞌ. Yosëri aꞌpaimarin nanamën aꞌchintinpoaso marëꞌ. Corto huaꞌan chini chiníquën nanantërinso pochin acorin. Ina nohuanton, imarëhuaꞌ.

² Yosëri acohuachina, noꞌtëquën natërin. Iráca Moisësëntaꞌ Yosë natëton, yaꞌipi piyapinënpita catahuarin.

^3-4 Quisososo nipirinhuëꞌ, Moisësë quëran chini chiníquën nanantërin. Niꞌcoꞌ. Yapëihuachinara, co pëiꞌ inaora yaꞌhuërinhuëꞌ. Piyapiri nipachina, inari huaꞌanëntërin. Inapochachin Yosëri yaꞌipiya ninin niꞌton, yaꞌipi huaꞌanëntërin. Quisocristontaꞌ Yosë huiꞌnin niꞌton, chiníquën nanantaton, yaꞌipi huaꞌanëntërinpoaꞌ.

⁵ Moisësësoꞌ inpriatonën pochin ninin. Yosëri acorin cotioroꞌsaꞌ pënënacaso marëꞌ. Maꞌsona tërantaꞌ shaꞌhuitohuachina, inachachin piyapiꞌsaꞌ shaꞌhuitantarin.

⁶ Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

Asanocancaninpoasoꞌ

⁷ Napoaton iyaroꞌsaꞌ yonquicoꞌ. Iráca Ispirito Santo nohuanton, Yosë noninsoꞌ quiricanënquë ninshitopi: “Ipora tahuëri Yosë nontarinquëmaꞌ. Natanpatamaꞌ, noya natëtocoꞌ.

⁸ Ama naniantocosohuëꞌ. Iráca Moisësëri israiroꞌsaꞌ quëpahuachina, shimashonënpoaꞌ co natëtochináchinhuëꞌ cancantopi. Inotëro parti yaꞌhuasoiꞌ, naꞌcon catahuapirahuëꞌ, co natërinacohuëꞌ.

⁹ Tënihuachinacontaꞌ, ahuantërahuë. Catapini shonca piꞌipi nani maꞌsha sacaiꞌ nininso nipirahuëꞌ, co yanatërinacohuëꞌ. ‘Co Yosë catahuarinpoahuëꞌ,’ taꞌtonaꞌ, aꞌnaquën aꞌporinaco.

¹⁰ Napoaton inapita noꞌhuito, napotërahuë: Isopita co onporontaꞌ natërinacohuëꞌ. Co yanohuitërinacohuëꞌ. Co iranëhuë paꞌtopihuëꞌ niꞌton,

¹¹ noꞌtëquën shaꞌhuitërahuë. Noyaroꞌpaquë yaꞌhuëcaiso marëꞌ yaquëtopirahuëꞌ, co imarinacohuëꞌ niꞌton, co huachi nohuantërahuëꞌ. Co onporontaꞌ inaquë yaꞌhuëcontapihuëꞌ. Co inaquë sano cancantapihuëꞌ,” tënin Yosë.

¹² Canpitantaꞌ iyaroꞌsaꞌ aꞌnayanquëma tërantaꞌ co cancanëma quëran huarëꞌ natëhuatamahuëꞌ, co noya cancantaramahuëꞌ. Niꞌcona Yosë chachin aꞌpotamaꞌ. Inasoꞌ, iporahuantaꞌ nanpiton niꞌsárinpoaꞌ.

¹³ Napoaton nani tahuëri nipënëncoꞌ. Ipora chachin coꞌhuara ayaroꞌ tahuëri naniyatërasohuëꞌ, nicatahuacoꞌ ama oshahuanacaso marëhuëꞌ. Niꞌcona oshanëmaꞌ anoꞌquihuachinquëmaꞌ. Inapotohuachinquëmaꞌ, oshaquëran Yosë naniantaramaꞌ niꞌton, co natëtochináchinhuëꞌ cancantaramaꞌ.

¹⁴ Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

¹⁵ Quiricanënquë naporin: “Ipora tahuëri Yosë nontarinquëmaꞌ. Natanpatamaꞌ, noya natëtocoꞌ. Iráca shimashonëmapita co natëtochináchinhuëꞌ cancantopi. Ama inapita pochin cancantocosohuëꞌ,” tënin.

¹⁶ ¿Inpitataꞌ natanaponaraihuëꞌ, co yanatëpihuëꞌ? Coꞌta cotioroꞌsa chachin napopi. Moisësëri Iquipito quëran ocoirahuaton, quëpapirinhuëꞌ, co yanatëpihuëꞌ.

¹⁷ ¿Insopitataꞌ catapini shonca piꞌipi Yosëri co noyahuëꞌ niꞌnin? Coꞌtana inapita chachin oshahuanpi niꞌton, noꞌhuiton, anaꞌintërin. Inotëro parti chachin yaꞌipiya chiminpi.

¹⁸ Coꞌhuara chimiyantërasoihuëꞌ, Yosëri shaꞌhuitërin: “Noyaroꞌpaꞌ yaquëtopiranquëmahuëꞌ, co natëramacohuëꞌ niꞌquëhuarëꞌ, co onporontaꞌ inaquë yaꞌhuëcontaramahuëꞌ, Co inaquë sano cancantaramahuëꞌ. Ca Yosëco niꞌto, noꞌtëquën shaꞌhuitaranquëmaꞌ,” tënin.

¹⁹ “Co Yosë nanitërinhuëꞌ nichaꞌëinpoasoꞌ,” topiso marëꞌ co Yosëri catahuarinhuëꞌ. Co yaꞌconpihuëꞌ niꞌton, co sano cancantopihuëꞌ.