Hebreos 13 - Chayahuita (Shahui)

Onporahuatonsona Yosë noya niꞌninpoasoꞌ

¹ Yaꞌipi imaramasopita capini noya ninosorocoꞌ. Iyaparima pochin niꞌcoꞌ.

² Co nohuitapomarahuëꞌ, nosorocoꞌ. Huëꞌpachina, noya nontatomaꞌ, oꞌshitocoꞌ, aꞌcacoꞌ. Iráca aꞌnaquën napopisoꞌ yonquicoꞌ. Niꞌtoroꞌsaꞌ huëꞌpachinara, “Huëcoꞌ niꞌquicoi,” itërin. Piyapitaꞌmaꞌ topirinhuëꞌ, Yosë anquëninën chachin aꞌcarin. Inapochachin canpoantaꞌ niꞌtoroꞌsaꞌ noya nontahuaꞌ.

³ Ama tashinan pëiquë poꞌmopisopita naniantocosohuëꞌ. Catahuacoꞌ. Canpitantaꞌ tashinan pëiquë yaꞌhuëaramaso pochachin yonquicoꞌ. Aꞌnaquëontaꞌ imapiso marëꞌ chiníquën aparisitohuachinaꞌ, noya yonquicoꞌ. Canpitantaꞌ inapita ninatanpiso pochin cancantatomaꞌ, nosorocoꞌ.

⁴ Quëmapiꞌsaꞌ saꞌapachinaꞌ, ama aꞌna sanapi yonquiꞌinasohuëꞌ. Sanapiꞌsantaꞌ soꞌyahuachinaꞌ, ama soꞌinaꞌ tëhuananpichinasohuëꞌ. Ama mantaꞌ monshihuainasohuëꞌ. Monshihuanpatamaꞌ, Yosë chiníquën anaꞌintarinquëmaꞌ.

⁵ Ama coriquiráchin paꞌyatocosohuëꞌ. Co naꞌcon maꞌsha yaꞌhuëtopirinquëmahuëꞌ, sano cancantocoꞌ. Ama naꞌcon naꞌcon nohuantocosohuëꞌ. Yosë chachin nani shaꞌhuitërinpoaꞌ. “Co onporontaꞌ pataranquëmahuëꞌ. Co naniantaranquëmahuëꞌ,” itërinpoaꞌ.

⁶ Napoaton chiníquën cancantatëhuaꞌ naporëhuaꞌ: “Yosë catahuarinpoaꞌ niꞌton, co tëꞌhuarëhuahuëꞌ. ¡Piyapiꞌsaꞌ maꞌsha onpotopirinpoahuëntaꞌ, co tëꞌhuatarihuahuëꞌ!” tënëhuaꞌ.

⁷ Yaꞌnan aꞌchintërinënquëmasopita yonquicoꞌ. Yosë quiricanën noya aꞌchintërinënquëmaꞌ. Chiminaquë huarëꞌ noya nicatonaꞌ, aꞌnapita catahuapi. Napoaton inapita nonanatomaꞌ, noya natëcoꞌ.

⁸ Quisocristo co onporontaꞌ nishataponhuëꞌ. Iráca nosororinpoaꞌ. Ipora huantaꞌ catahuarinpoaꞌ. Co onporontaꞌ naniantarinpoahuëꞌ. Inasáchin imahuaꞌ.

⁹ Aꞌnaquën nisha aꞌchintohuachinënquëmaꞌ, ama natancosohuëꞌ, nonpintochinënquëmaꞌ. Noꞌtëquën yonquicoꞌ. Nisha nisha nicacasoꞌ pënënpirinënpoahuëꞌ, co ina quëran noya cancantërëhuahuëꞌ. Naꞌa piyapiꞌsaꞌ nisha nisha cosharoꞌ aꞌpoaponaraihuëꞌ, co noya cancantopihuëꞌ. Quisocristoíchin nanitërin anoyacancantinpoasoꞌ. Inaora nohuanton, nosoroatonpoaꞌ, catahuarinpoaꞌ imamiatacasoꞌ.

^10-11 Quisocristo corosëquë chiminaton, oshanënpoaꞌ inquitërinpoaꞌ. Iráca pënëntërinso imapisopitaso nipirinhuëꞌ, co ina natëpihuëꞌ niꞌton, co oshanënaꞌ inquitërinhuëꞌ. Iráca corto huaꞌanoꞌsaꞌ piyapiꞌsaꞌ oshanëna marëꞌ maꞌsha tëpapi. Tëpahuachinara, corto huaꞌan chini chiníquën nanantërinsoari maꞌsha tëpapisoꞌ huënainën manin. Masahuaton, Yosë yaꞌnorinsoꞌ patoanaquë quëparin oshanëna marëꞌ. Noshinënso nipirinhuëꞌ co caꞌpihuëꞌ. Ninanoꞌ intonquë quëpapi ahuiquitacaiso marëꞌ.

¹² Quisocristontaꞌ ninanoꞌ aquëcha quëparahuatonaꞌ, aparisitopi. Inaquë chiminin oshanënpoaꞌ inquitinpoaso marëꞌ. Inaora huënainën quëran anoyacancantërinpoaꞌ.

¹³ Napoaton canpoantaꞌ aparisitohuachinënpoaꞌ, ahuantahuaꞌ. Iráca pënëntërinso nanan naniantatëhuaꞌ, Quisocristoíchin imahuaꞌ. Ina noꞌhuipiso pochin noꞌhuipirinënpoaontaꞌ, ahuantahuaꞌ.

¹⁴ Co isoroꞌpaquë yaꞌhuëmiatarihuahuëꞌ. Yosë yaꞌhuërinꞌpaꞌ pantacasoꞌ ninarëhuaꞌ. Inatohuaꞌ yaꞌhuëmiatarihuaꞌ.

¹⁵ Napoaton iporasoꞌ co huachi maꞌsha tëparihuahuëꞌ Yosë chinotacaso marëꞌ. Nani tahuëri ina chinotatëhuaꞌ, “Ma noyanquëncha Tata Yosë quëmaso paya. Quisocristoíchin anoyacancantërincoi niꞌton, ‘Yosparinquën Sinioro,’ itërainquën,” itahuaꞌ.

¹⁶ Noyasáchin niahuaꞌ. Nicatahuacasoꞌ ama naniantahuasohuëꞌ. Aꞌnapita maꞌsha pahuantohuachinaꞌ, ama apiratocosohuëꞌ. Inapohuatëhuaꞌ, Yosë noya chinotarëhuaꞌ niꞌton, noya niꞌsarinpoaꞌ.

¹⁷ Ansianoꞌsaꞌ pënënpachinënquëmaꞌ, noya natëcoꞌ. Noya noya imacamaso marëꞌ Yosëri acorin. Aꞌna tahuëri inapitantaꞌ yaꞌipi napopisopita Yosë shaꞌhuitapi. Nani tahuëri pënënarinënquëmaꞌ. Noya natëhuatamaꞌ, noya cancantatonaꞌ, aꞌchintarinënquëmaꞌ. Co yanatëhuatamahuëꞌ, sëtapi. Naporahuaton, canpitantaꞌ co noya noya cancantapomahuëꞌ.

¹⁸ Quiya marëꞌ Yosë nontocoꞌ. Noya nisarai, taꞌtoi, noyápiachin cancantërai. Yaꞌipi cancanëhuëi quëran Yosë yanatërai.

¹⁹ Ca marëꞌ chiníquën Yosë nontocoꞌ catahuainco aꞌnaroáchin canpitataquë paꞌi.

Quisocristo aꞌpairinpoasoꞌ

²⁰ Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

²¹ Yosë naꞌcon catahuainquëmaꞌ ina nohuantërinsoꞌ nicacamaso marëꞌ. Piꞌpian tërantaꞌ co noyahuëꞌ yonquihuatamaꞌ, anoyacancanchinquëmaꞌ. Quisocristo catahuahuachinpoaꞌ, nani tahuëri nóya nisarëhuaꞌ. Ina quëran noya niꞌsarinpoa huachi. Yaꞌipi piyapiꞌsaꞌ inasáchin chinochinaꞌ. Ama onporontaꞌ ina naniantahuasohuëꞌ. Amen.

²² Nani piꞌpian ninshitëranquëmaꞌ. Noya cancantatomaꞌ iyaroꞌsaꞌ natancoꞌ, tënahuë. Achinicancainquëmaꞌ, taꞌto ninshitërahuë.

²³ Co huaꞌquiya quëranhuëꞌ nicaponquëmaꞌ paꞌsarahuë. Iya Timotio nani tashinan pëi quëran ocoipi. Manóton huëꞌpachin, inaroꞌco paꞌsarai.

²⁴ Ansianoꞌsanquëmaꞌ saludos aꞌpataranquëmaꞌ. Yaꞌipi imaramasopitantaꞌ yonquiatënquëmaꞌ, saludos aꞌpataranquëmaꞌ. Itariaroꞌsantaꞌ saludos aꞌpatarinënquëmaꞌ.

²⁵ Inaora nohuanton, Yosë nóya catahuainquëmaꞌ. Nani ninshitëranquëma huachi.