Hebreos 12 - Chayahuita (Shahui)

Quisocristoíchin yonquiaꞌahuaꞌ

¹ Iráca quëran huarëꞌ naꞌa piyapiꞌsaꞌ parisitaponaraihuëꞌ, imamiatopi. “Yosë catahuarinpoaꞌ,” taꞌtonaꞌ, natëpi. Napoaton inapita yonquiatëhuaꞌ, canpoantaꞌ nóya imahuaꞌ. Niꞌcoꞌ. Quëmapiꞌsaꞌ nicanacaiso marëꞌ taꞌahuachinara, chiníquën taꞌapi. Co mantaꞌ quëpapihuëꞌ. Torosarëáchin taꞌapi. Naporopi aꞌmopisoꞌ co ocoihuachinahuëꞌ, co nanitopihuëꞌ chiníquën taꞌacaisoꞌ. Inapochachin canpoantaꞌ naporopi aꞌmopisoꞌ ocoipiso pochin yaꞌipi oshanënpoaꞌ naniantahuaꞌ. Co noyahuëꞌ yonquirëhuasopita naniantatëhuaꞌ, yaꞌipi cancanënpoa quëran Quisocristo imahuaꞌ. Sacaiꞌ nipirinhuëꞌ, ahuantatëhuaꞌ, noya imahuaꞌ.

² Quisocristo naꞌcon yonquiaꞌahuaꞌ. Inasáchin catahuarinpoaꞌ Yosë natëcasoꞌ. Naporahuaton, inasáchin catahuarinpoaꞌ noya noya natëtacasoꞌ. Isoroꞌpaquë oꞌmahuachina, chiníquën parisitërin. Corosëquë parisitohuachina, naꞌcon tëhuapirinahuëꞌ, co ina yonquirinhuëꞌ. “Chiminpato, piyapiꞌsaꞌ nichaꞌësarahuë,” taꞌton, nóya cancantërin. Ina quëran inápaquë panantarahuaton, Yosë inchinanën quëran chachin huënsëarin.

³ Isoroꞌpaquë yaꞌhuapon, oshahuanoꞌsari chiníquën noꞌhuipirinahuëꞌ, ahuantërin. Ina yonquiatëhuaꞌ, ama yaaꞌpoaꞌhuasohuëꞌ. Chiníquën cancantocoꞌ.

⁴ Sopai yaminsërinquëmaꞌ Yosë aꞌpocaso marëꞌ. Sacaiꞌ nipirinhuëꞌ, Quisocristo imamiatocoꞌ. Imaramaso marëꞌ aparisitopirinënquëmahuëꞌ, co tëparinënquëmahuëꞌ.

⁵ Huiꞌninpita pochin nicatonpoaꞌ, Yosë pënëninpoaꞌ chiníquën cancantacaso marëꞌ. Nani nitotopiramahuëꞌ, ¿naniantëramaꞌ ti? Quiricanën quëran napotërinpoaꞌ: “Yonquiquëꞌ conpa. Aꞌna tahuëri Yosë nohuanton, parisitaran noya noya imacamaso marëꞌ. Aꞌna tahuëri piꞌpian anaꞌintopirinquënhuëꞌ, ama sëtëquësohuëꞌ. Ama yaaꞌpoquësohuëꞌ. Ahuantacasoꞌ yaꞌhuërin.

⁶ Nosororinpoaꞌ niꞌton, aꞌna tahuëri ina nohuanton, maꞌsha onporëhuaꞌ. Huiꞌninpita pochin nicatonpoaꞌ, anaꞌintërinpoaꞌ noya noya yonquicaso marëꞌ,” tënin.

⁷ Huiꞌninpita pochin niꞌninpoaꞌ niꞌton, ahuantacasoꞌ yaꞌhuërin. Niꞌcoꞌ. Huiꞌnanpoꞌ noꞌtëquën pënënëꞌ noya noya yonquicaso marëꞌ.

⁸ Co Yosë pënëninpoahuëꞌ naporini, co tëhuënchachin huiꞌninpita pochin niꞌitonpoahuëꞌ. Yaꞌipi huiꞌninpita yonquirin noya noya cancantacaiso marëꞌ. Co piꞌpian tërantaꞌ anaꞌintohuachinquëmahuëꞌ, co Yosë huiꞌninpitanquëmahuëꞌ.

⁹ Tatanpoaꞌ pënënpachinpoara, natërëhuaꞌ. Piꞌpian anaꞌintopirinpoahuëꞌ, co noꞌhuirëhuahuëꞌ. Noya nicatëhuaꞌ, natërëhuaꞌ. Tata Yosëso nipirinhuëꞌ naꞌcon naꞌcon natëcasoꞌ yaꞌhuërin. Inasoꞌ nininpoaꞌ niꞌton, natëhuatëhuaꞌ, noya noya nanpiarihuaꞌ.

¹⁰ Huaꞌhuatarihuaꞌ, co huaꞌqui isoroꞌpaquë yaꞌhuëcasohuëꞌ nipirinhuëꞌ, tatanpoaꞌ pënëninpoaꞌ. Inaora yonquiaton, piꞌpian anaꞌintërinpoaꞌ natëcaso marëꞌ. Yosëso nipirinhuëꞌ, noya noya yonquiatonpoaꞌ, noꞌtëquën catahuarinpoaꞌ. Naꞌcon nosoropirinpoahuëꞌ, aꞌna tahuëri ina nohuanton parisitërëhuaꞌ ina pochin cancantacaso marëꞌ.

¹¹ Aꞌna tahuëri Yosë nohuanton, maꞌsha onporëhuaꞌ. Naporahuaton, aꞌnapita maꞌsha onpotërinënpoaꞌ. Naporo chachinsoꞌ sëtërëhuaꞌ. Parisitacasoꞌ co nohuantopirëhuahuëꞌ, noya ahuantohuatëhuaꞌ, Yosë naꞌcon catahuarinpoaꞌ. Nirótëatëhuaꞌ, noya nisarëhuaꞌ. Inapoatëhua sano cancantarihuaꞌ.

Ama Yosë aꞌpoaꞌhuasohuëꞌ

¹² Napoaton iyaroꞌsaꞌ, chiníquën cancantahuaꞌ. Ama amiatëhuarahuëꞌ, chiníquën Yosë imahuaꞌ. Niꞌcoꞌ. Aquë paꞌpatëra, canotërëꞌ, sacaiꞌ iratërëꞌ. Aꞌnaquëmaꞌ ina pochin cancantatomaꞌ, co huachi yaꞌipi cancanëma quëran Yosë imaramahuëꞌ. Ama huachi canotërëso pochin cancantocosohuëꞌ.

¹³ Yosë iranën noꞌtëquën imapatamaꞌ, co pëshonaramahuëꞌ. Yosë catahuarinquëmaꞌ noya noya yonquicamaso marëꞌ. Aꞌnapitantaꞌ nicatënquëmaꞌ, chiníquën cancantapi. Co huachi sonpacha pochin cancantapihuëꞌ.

¹⁴ Ama piꞌpian tërantaꞌ ninoꞌhuicosohuëꞌ. Naporahuaton, noya nicoꞌ. Co noya nipatamahuëꞌ, co mantaꞌ Yosë nohuitaramahuëꞌ.

¹⁵ Yosë inaora nohuanton nosoroatonpoaꞌ, yacatahuarinpoaꞌ. Aꞌnaquëniso nipirinhuëꞌ, co yatahuërëtopihuëꞌ. Inahuara yonquipisoáchin imatonaꞌ, co Yosë yonquicaisoꞌ nohuantopihuëꞌ. Ama inapita pochin cancantocosohuëꞌ. Co Yosëíchin yonquihuatamahuëꞌ, oshaquëran nitapicancanaramaꞌ. Ina quëran pënanin aꞌnaroáchin sëꞌcotëtërinso pochachin aꞌnapitantaꞌ atapicancanaramaꞌ.

¹⁶ Niꞌcona nisha nisha cancantotamaꞌ. Ama monshihuancosohuëꞌ. Noyápiachin cancantocoꞌ. Ama maꞌsha yonquiatomaꞌ, Yosë naniantocosohuëꞌ. Isao iráca naporinsoꞌ yonquicoꞌ. Maꞌsharáchin yonquiaton, co onpopinchin Yosë yonquirinhuëꞌ. Tanaton, iin nontërin: “¿Yosë naꞌcon catahuainquënsoꞌ nohuantëran ti? Co casoꞌ ina yonquirahuëꞌ. Cosharoꞌ naꞌcon naꞌcon nohuantërahuë,” itërin.

¹⁷ Ina piquëran yonquiantapirinhuëꞌ. “Yosë naꞌcon catahuainco,” tantapirinhuëꞌ, co huachi Yosëri nohuantërinhuëꞌ. Chiníquën sëtaton naꞌnëpirinhuëꞌ, iráca aꞌporinsoꞌ co huachi nanitërinhuëꞌ anoyatacasoꞌ. Ina yonquiatomaꞌ, niꞌcona Yosë naniantotamaꞌ.

¹⁸ Iráca Sinai motopi nicotoanaquë huëꞌpachinara, cotioroꞌsaꞌ paꞌpi tëꞌhuatopi. Inaquë panca pën nënërin. Co yaꞌcaritacasoꞌ yaꞌhuërinhuëꞌ. Tahuëri niponahuëꞌ, tashi pochin ninin. Yara yaráchin ninin. Panca ihuan paꞌnin.

^19-20 Tronpita chiníquën pihuirinsoꞌ natanpi. Naporoꞌ Yosëri chiníquën itërin: “Iso motopiquë pënënaranquëmaꞌ niꞌton, ama yaꞌcaricosohuëꞌ. Maꞌsharoꞌsa tërantaꞌ inaquë paꞌpachinaꞌ, chimiinaꞌ. Naꞌpiquë tëꞌyaratomaꞌ, tëpacoꞌ,” itërin. Ina natanahuatonaꞌ: “Sacaiꞌ ina nanan natëcasoꞌ,” taꞌtonaꞌ, paꞌyanpi. “Ama huachi chiníquën nonchincoisohuëꞌ,” itopi.

²¹ Niꞌsahuaton, Moisësëntaꞌ paꞌpi tëꞌhuatërin. “Cantaꞌ tëꞌhuatato, ropa ropátarahuë,” tënin.

²² Canpoaso nipirinhuëꞌ, co ina motopi yaꞌcarirëhuahuëꞌ. Quisocristo imapatëhuaꞌ, nisha motopi yaꞌcarirëhuaꞌ, Sion itopisoꞌ. Yosë chachin nohuitarihuaꞌ. Co ipora quënanpirëhuahuëꞌ, nanpiárin. Aꞌna tahuëri yaꞌhuërinquë chachin pantarihuaꞌ. Nasha Quirosarinquë yaꞌhuëcontarihua huachi. Notohuaroꞌ anquëniroꞌsaꞌ inaquë niyontonpi. Noya cancantatonaꞌ, Yosë chinotapi.

²³ Huëntonënquë chachin Yosë nani ayaꞌconinpoaꞌ. Inápaquë nininënpoaꞌ nani ninshitërinpoaꞌ huiꞌninpita pochin nicainpoaso marëꞌ. Inatohuaꞌ niyontonarihuaꞌ. Yosë chachin imarëhuaꞌ. Inasoꞌ yaꞌipiya huaꞌanëntaton, co imapisopitahuëꞌ noꞌtëquën anaꞌintarin. Aꞌnaquën imapisopita nani chiminpachinara, huaꞌyanënasoꞌ Yosëꞌpaꞌ yaꞌhuapi huachi. Yosë pochachin cancantopi. Inapitarëꞌquënpoa chachin niyontonarihuaꞌ

²⁴ Quisocristo chachin nohuitarihuaꞌ. Inasoꞌ nasha quëran anoyatërinso shaꞌhuitërinpoaꞌ imacaso marëꞌ. Huënainën quëran anoyacancantërinpoaꞌ. Iráca Apiri huënainën paꞌnin. Iini tëpahuachina, huënainën paꞌnin niꞌton, anaꞌintacasoꞌ yaꞌhuërin. Quisocristo chimininsosoꞌ nipirinhuëꞌ, noya noya. Huënainën paꞌnin niꞌton, nanan anoyatërinpoaꞌ.

²⁵ Napoaton Quisocristo nanamën noya natancoꞌ. Ama piꞌpian tërantaꞌ aꞌpocosohuëꞌ. Pënëntërinso nanan shaꞌhuitohuachinara, aꞌnaquën co yanatëtopihuëꞌ niꞌton, aꞌnaroáchin anaꞌintërin. Quisocristo nanamënsoꞌ noya noya niꞌton, ina naniantohuatëhuaꞌ, aquë aquëtëꞌ anaꞌintinpoasoꞌ yaꞌhuërin. Inasoꞌ inápa quëran pënëninpoaꞌ.

²⁶ Yosëri pënëntërinso nanan shaꞌhuitohuachina, ina nohuanton, panca ocohua paꞌnin. Ina quëran quiricanën quëran shaꞌhuitërinpoaꞌ: “Aꞌna tahuëri naquëranchin nontaantahuato, co isoroꞌparáchin nacontarinhuëꞌ. Inápaquë yaꞌhuërinsopitantaꞌ naco nacóntarin,” tënin.

²⁷ Aꞌna tahuëri mini yaꞌipi maꞌsha isoroꞌpaquë yaꞌhuërinsopita taꞌhuantarin. Maꞌsha yaꞌhuëmiatërinsoꞌ acohuachinasoꞌ, yaꞌhuëmiatarin.

^28-29 Huaꞌanëntërinquë chachin ayaꞌconinpoaꞌ. Inápaquë paꞌpatëhuaꞌ, co onporontaꞌ taꞌhuantarihuahuëꞌ. Napoaton: “Yosparinquën Sinioro,” itahuaꞌ. Yaꞌipi cancanënpoa quëran inasáchin chinotahuaꞌ. Noya cancantatëhuaꞌ, natëahuaꞌ noya nicainpoaso marëꞌ. Ipora huantaꞌ Yosësoꞌ noꞌtëquën anaꞌintarin niꞌton, tëꞌhuatacasoꞌ yaꞌhuërin. Pënquë maꞌsha ahuiquitërëso pochin yaꞌipi co noyahuëꞌ nininsopita anaꞌintarin.