Hebreos 11 - Chayahuita (Shahui)

Yaꞌipi cancanëna quëran huarëꞌ natëpisopita

¹ “Co Yosë quënanpirëhuahuëꞌ, yaꞌhuárin. Nosoroatonpoaꞌ catahuarinpoaꞌ,” topatëhuaꞌ, tëhuënchachin ina natërëhuaꞌ. Naꞌcon Yosë shaꞌhuitërinpoaꞌ. Co ipora naniyatërarinhuëꞌ. “Oshaquëran naniarin huachi,” taꞌtëhuaꞌ, noya ninarëhuaꞌ.

² Iráca quëran huarëꞌ ina pochin cancantohuachinara, Yosëri noya niꞌnin.

³ “Yosë noꞌtëquën nontërinpoaꞌ,” taꞌtëhuaꞌ, natërëhuaꞌ. Inaora yonquinën quëran yaꞌipi isoroꞌpaꞌ acorin. Co mantaꞌ yaꞌhuëpirinhuëꞌ, “Yaꞌhuëꞌin,” topachina, maꞌsha yaꞌhuërin. Yaꞌipi niꞌnëhuasopita co inaora yaꞌhuërinhuëꞌ. Yosëri nininsoꞌ. Quiricanën quëran anitotërinpoaꞌ.

⁴ Iráca Apiri Yosë natërin. “Yosë catahuarinco,” taꞌton, maꞌsha tëparahuaton, Yosë chinotërin. Inapotohuachina, noya niꞌnin. “Noya natërinco,” tënin. Cainoso nipirinhuëꞌ co ina pochin cancantërinhuëꞌ. Napoaton Apiri nani chiminpirinhuëꞌ, ipora huantaꞌ “Ma noya Apiri natëtërin,” tënëhuaꞌ.

⁵ Iráca Inoco noya natërin niꞌton, Yosëri inápaquë quëpantarin. Napoaton co chimininhuëꞌ. Piyapiꞌsari yonisápirinahuëꞌ, co quënanpihuëꞌ. Coꞌhuara inápaquë quëpantayátërasohuëꞌ, “Inoco nóya niꞌnahuë,” tënin Yosë quiricanënquë.

⁶ Yosë yonquihuatëhuaꞌ, natëtacasoꞌ yaꞌhuërin. “Yosë yaꞌhuárin. Noꞌtëquën nontërinpoaꞌ. Ina nontohuatëhuaꞌ, natanatonpoaꞌ catahuarinpoaꞌ,” topatëhuaꞌ, noya niꞌsarinpoaꞌ. Co ina pochin cancantohuatëhuahuëꞌ, co onporontaꞌ noya niꞌsarinpoahuëꞌ.

⁷ Iráca Nointaꞌ yaꞌhuëpirinhuëꞌ, aꞌna tahuëri Yosëri itapon: “Co huaꞌqui quëranhuëꞌ maꞌsha onpoaramaꞌ. Co niꞌchinamasohuëꞌ niꞌsaramaꞌ. Naporoꞌ yaꞌipi oshahuanoꞌsaꞌ iiꞌ quëran ataꞌhuantarahuë,” itërin. Coꞌhuara oꞌnayantërasohuëꞌ napotopirinhuëꞌ: “Yosë noꞌtëquën nontërinco,” taꞌton, Noi natëtërin. Shaꞌhuitohuachina, natëton, panca nancha ninin. Ina quëran saꞌin, huiꞌninpitarë chachin chaꞌëpi. Aꞌnapitasoꞌ natanaponaraihuëꞌ, co yanatëpihuëꞌ. Napoaton naꞌinpi. Noiso nipirinhuëꞌ, yaꞌipi cancanën quëran natëtërin. “Noꞌtëquën nontërinco,” topachina, Yosëri noya niꞌnin.

⁸ Apraantaꞌ Yosëri itërin: “Yaꞌhuëran quëran pipimiatëquëꞌ. Aꞌna parti aꞌnochinquën. Ina noꞌpaꞌ quëchinquën yaꞌhuëcamaso marëꞌ,” itërin. Co noꞌpaꞌ nohuitaponahuëꞌ, Yosë natërin. “Co nonpintarincohuëꞌ,” taꞌton, paꞌnin.

⁹ Aquë paaton, Canaan parti canconin. Inaquë yaꞌhuaponahuëꞌ, nëꞌmëtëꞌ pëiquëráchin yaꞌhuërin. Paꞌsápaton, co yaꞌhuëmiatërinhuëꞌ. Isaco, Cacopo, inapitantaꞌ nëꞌmëtëꞌ pëiroꞌsaquë yaꞌhuëpi. Yosëri nani shaꞌhuitërin. “Iso noꞌpa chachin quëchinquëmaꞌ,” itopirinhuëꞌ, co huaꞌanënchátërapihuëꞌ. “Co Yosë nonpintarinpoahuëꞌ. Aꞌna tahuëri ina nohuanton, huaꞌanëntarihuaꞌ,” taꞌtonaꞌ, Yosë natëpi.

¹⁰ Apraan yonquiárin. “Aꞌna tahuëri Yosëꞌpaꞌ noya noya yaꞌhuëcontarihuaꞌ. Inaquë noya ninanoꞌ yaꞌhuëmiatarin. Yosëri chachin canpoa marëꞌ acorinsoꞌ,” taꞌton, ina ninararin.

¹¹ Inasoꞌ, chiníquën Yosë natërin. “Nani máshoco. Sarantaꞌ co huaꞌhuanaꞌpihuëꞌ nipirinhuëꞌ, Yosë shaꞌhuitërinco niꞌton, oshaquëran huiꞌnahuë yaꞌhuëtarinco,” tëninso marëꞌ, Yosë nohuanton, huiꞌnahuanin huachi.

¹² Apraan nani másho niponahuëꞌ, huiꞌnahuanin. Ina huiꞌnin quëran chachin naꞌapi. Oshaquëran huaꞌhuayátërahuë shinpita yaꞌhuëtërin. Tayora nápoꞌ yaꞌhuëpi. Marë yonsanquë notohuaroꞌ inotëraꞌhuaya yaꞌhuërin. Inotëraꞌhuaya nápoꞌ shinpita yaꞌhuëpi. Co pichicasohuëꞌ.

¹³ Apraan, Isaco, Cacopo, inapita chiminaquë huarëꞌ Yosë natëpi. “Nani Yosë shaꞌhuitërinpoaꞌ. Co nonpintarinpoahuëꞌ. Pahuanarin nipirinhuëꞌ, aꞌna tahuëri Yosë nohuanton, yaꞌhuapon,” taꞌtonaꞌ, nóya cancantopi. “Co huaꞌqui isoroꞌpaquë yaꞌhuarihuahuëꞌ. Isëquësoꞌ topinan yacapatërëhuaso pochin ninëhuaꞌ,” topi.

¹⁴ “Co isoroꞌpaquë yaꞌhuëmiatarihuahuëꞌ. Yosëꞌpaꞌ tëhuënchinsoꞌ yaꞌhuëmiatarihuaꞌ,” taꞌtonaꞌ, napopi.

¹⁵ Yaꞌhuëpi quëran nani pipimiatopi. Ina naꞌcon yonquipi naporini, inaquë ayamantaꞌitonahuëꞌ.

¹⁶ Nipirinhuëꞌ, co isoroꞌpaꞌ naꞌcon yonquipihuëꞌ. Yosë naꞌcon naꞌcon nohuantopi. Ina yaꞌhuërinquë chachin yaꞌhuëcaisoꞌ nohuantopi. Napoaton Yosë tapon: “Nóya yonquirinaco niꞌton, huiꞌnahuëpita pochin niꞌsarahuë. Aꞌna tahuëri inápaquë quëpantarahuë. Nani tapatërahuë yaꞌhuëcaisoꞌ,” tënin.

^17-18 Apraan tëhuënchachin Yosë natërin. Aꞌnaíchin huiꞌnin yaꞌhuëtërin. Nasitohuachina, Isaco itërin. Naporoꞌ Yosëri shaꞌhuitërin: “Isaco mashotohuachin, huiꞌnahuanarin antaꞌ. Naporahuaton, oshaquëran notohuaroꞌ shinpita yaꞌhuëtarin,” itopirinhuëꞌ. Huiꞌnin huiꞌnapitohuachina, Yosëri itantarin: “Huiꞌnan quëparahuaton, motopiꞌpaꞌ paquëꞌ. Inaquë huiꞌnan tëpaquëꞌ chinotancoso marëꞌ,” itërin. Tënicaso marëꞌ napotërin.

¹⁹ “Yosë co nonpintërincohuëꞌ. Ananpitaantacasontaꞌ nanitërin,” taꞌton, Apraan natëtërin. Paaton, Isaco yatëparahuachina, Yosëri itaantarin: “Tananpitëquëꞌ. Ama tëpaquësohuëꞌ,” itërin. Napoaton huiꞌnin chiminin quëran, nanpiantarinso pochin niꞌnin.

²⁰ Ina quëran Isacontaꞌ catoꞌ huiꞌninpita yaꞌhuëtërin, Cacopo, Isao inapita itopisoꞌ. Mashotohuachina, Yosë natëton, nontërin huiꞌninpita catahuacaso marëꞌ.

²¹ Cacopontaꞌ mashotahuaton, pitana paquëaponahuëꞌ, Yosë chinotarin. Yachiminpachina, ina natëton, Cosi huiꞌninpita catahuacaso marëꞌ Yosë nontërin.

²² Cosintaꞌ chiminaquë huarëꞌ Yosë natërin. Yachiminpachina, quëmopinënpita shaꞌhuitërin: “Iquipito parti ipora yaꞌhuërëhuaꞌ. Aꞌna tahuëriso nipirinhuëꞌ Yosë nohuanton, yaꞌipi israiroꞌsaꞌ isëquëran pipiapi. Noꞌpaꞌ Yosë quëtërinpoaquë chachin quëpantarin yaꞌhuëcaiso marëꞌ. Naporoꞌ nansëhuëpita quëpaꞌinaꞌ paꞌpitinacoso marëꞌ,” itërin. “Yosë co nonpintarinpoahuëꞌ,” taꞌton, naporin.

²³ Ina quëran Iquipito copirnori piyapinënpita camairin: “Israiro sanapiꞌsaꞌ huaihuachinaꞌ, quëmapiaꞌhuaya nipachin, tëpacoꞌ,” itërin. Napopirinhuëꞌ, Moisësësoꞌ nasitohuachina, aꞌshini co nohuantërinhuëꞌ huaꞌhuin chiminacasoꞌ. Yosë natëton, co copirno tërantaꞌ tëꞌhuatërinhuëꞌ. “Iso huaꞌhuahuësoꞌ noya,” itërin soꞌin nontaton. Cara yoqui noya poꞌopi.

²⁴ Ina quëran copirno huiꞌnini masahuaton, asoꞌsorin. Napoaponahuëꞌ huiꞌnapitohuachina, Yosë natëton copirno pëinën quëran pipirin.

²⁵ Yosë piyapinënpita catahuacaso marëꞌ paꞌnin. Ina marëꞌ parisitopirinhuëꞌ, co ina yonquirinhuëꞌ. Yosë natëcasoꞌ naꞌcon naꞌcon nohuantërin. “Co noyahuëꞌ nicatëhuaꞌ, capa cancantopirëhuahuëꞌ, co huaꞌquiya quëranhuëꞌ maꞌsha taꞌhuantarin,” taꞌton, co maꞌsharáchin yonquirinhuëꞌ.

²⁶ Copirno huiꞌnin pochin niꞌton, nohuantërin naporini, Iquipito parti naꞌcon canaitonhuëꞌ, co ina nohuantërinhuëꞌ. Yosë naꞌcon naꞌcon yonquirin. “Aꞌna tahuëri Cristo oꞌmaton, nichaꞌësarinpoaꞌ. Iporasoꞌ ina marëꞌ aparisitopirinacohuëꞌ, Yosëꞌpaꞌ noya noya acanarinco,” taꞌton, noya ahuantërin.

²⁷ Yosë natëton, Moisësë Iquipito quëran pipirin. Copirnori noꞌhuipirinhuëꞌ, co tëꞌhuatërinhuëꞌ. “Yosë co quënanaporahuëꞌ, niꞌsárinco,” taꞌton, chiníquën cancantërin. Chiníquën cancantaton, Yosë piyapinënpita catahuarin.

²⁸ “Yosë nichaꞌësarinpoaꞌ,” taꞌton, natëtërin. Napoaton piyapiꞌsaꞌ camairin: “Yaꞌipinquëmaꞌ carniroaꞌhua tëpacoꞌ. Huënainën yaꞌcoanaquë pashitocoꞌ ama anquëniri paninan nininsoꞌ tëpacaso marëhuëꞌ,” itërin. Napotohuachina, aꞌnaya aꞌnaya inahuara pëinënaꞌ yaꞌcoanaquë huënaiquë pashitëraꞌpiapi. Napoaton Yosëri catahuarin. Co paninanoꞌsaꞌ chiminpihuëꞌ. Pascoa pitaquë napopi.

²⁹ Ina quëran yaꞌipi israiroꞌsaꞌ Yosë natëtonaꞌ, noya pipipi. “Yosë catahuarinpoaꞌ,” taꞌtonaꞌ, Quëhuai marë aquëtëran paꞌpi. Pancaiꞌ niponahuëꞌ, Yosë nohuanton, aꞌnaroáchin nipatomairin niꞌton, panca ira pochin yaniro yaꞌnorin. Ina paꞌtatona pëntonpi. Iquipito sontaroꞌsaso nipirinhuëꞌ co nanitopihuëꞌ pëntonacaisoꞌ. Imatapirinahuëꞌ, iiri imotërin niꞌton, chimiitopi.

³⁰ Ina quëran israiroꞌsaꞌ Canaan parti canconpi huachi. Yosë natëtonaꞌ, inimiconënpita minsëpi. Quiricosoꞌ panca ninanoꞌ. Natëricho quëran pairatopisoꞌ inápaquë huarëꞌ pantarin. Yosëri shaꞌhuitërin tahuitacaisoꞌ. “Catahuarinpoa mini,” taꞌtonaꞌ, natëpi. Canchisë tahuëri tahuitopi. Inapotohuachinara, Yosë nohuanton, paira aꞌnaroáchin nohuaatërin.

³¹ Yaꞌipi yaꞌhuëhuanoꞌsaꞌ co Yosë yanatëpihuëꞌ niꞌton, chiminpi. Aꞌna sanapiáchin natëton, chaꞌërin. Oshahuanaꞌpi inasoꞌ, Nacapa itopisoꞌ. Inimico niponahuëꞌ, Israiro comisionënpita huëꞌpachinara, inari poꞌorin ama sontaroꞌsari tëpacaiso marëhuëꞌ.

³² Co inapitaráchin Yosë natëpihuëꞌ. Quitiono, Paraco, Sanson, Quihuiti, Tapi, Samoiro, pënëntonaꞌpiroꞌsaꞌ, inapitantaꞌ nóya natëtopi. ¡Notohuaroꞌ yaꞌhuëpi niꞌton, coꞌchi nanitërahuëꞌ yaꞌipiya shaꞌhuitaꞌhuaso paya!

³³ Aꞌnaquën Yosë natëtonaꞌ, nisha nisha piyapiroꞌsaꞌ minsëpi. Aꞌnaquëontaꞌ huaꞌan yaꞌconatonaꞌ, noꞌtëquën huaꞌanëntopi. “Yosë shaꞌhuitërinpoaꞌ niꞌton, catahuarinpoaꞌ,” taꞌtonaꞌ, aꞌnaquën natëpi. Napoaton Yosëri catahuarin. Aꞌnaquënsoꞌ Yosë natëtonaꞌ, paꞌpiniꞌ quëran chaꞌëpi.

³⁴ Aꞌnaquën pën chiníquën nënë nënëtapaquë tëꞌyatopirinahuëꞌ, co piꞌpian tërantaꞌ huëyapihuëꞌ. Noya chaꞌëpi. Aꞌnaquëontaꞌ Yosë nohuanton, sahuëni quëran chaꞌëpi. Yatëpapirinahuëꞌ, co chiminpihuëꞌ. Aꞌnaquëontaꞌ co chinipirinahuëꞌ, Yosëri catahuarin chiníquën cancantacaiso marëꞌ. Naꞌa inimicoroꞌsaꞌ minsërahuatonaꞌ, aꞌpapi.

³⁵ Sanapiꞌsantaꞌ huaꞌhuinpita chiminpachina, Yosë natëpi niꞌton, ina nohuanton nanpiantapi huachi. Aꞌnaquënso nipirinhuëꞌ Yosë natëtonaꞌ, chiníquën parisitopi. “Yosë aꞌpocoꞌ tëpachinënquëmaꞌ,” itopirinahuëꞌ, co yaaꞌpopihuëꞌ. “Co onporontaꞌ aꞌpoaraihuëꞌ. Yosë noya noya ananpitaantarincoi,” taꞌtonaꞌ, imapiso marëꞌ chiminpi.

³⁶ Aꞌnaquëontaꞌ Yosë imapi niꞌton, tëhuapi, huihuipi, catinaquë tonpopi, tashinan pëiquë poꞌmopi, napotopi.

³⁷ Aꞌnaquëontaꞌ naꞌpiquë tëꞌyaratonaꞌ, tëpapi. Aꞌnaquëontaꞌ sërichoquë yatonatonaꞌ, tëpapi. “Yosë aꞌpocoꞌ, tëpachinënquëmaꞌ,” itopirinahuëꞌ, co yaaꞌpopihuëꞌ. Aꞌnaquëontaꞌ sahuëni quëran tëpapi. Aꞌnaquën co tëpapirinahuëꞌ, imapiso marëꞌ chiníquën aparisitopi. Yatëpahuachinara, taꞌapi. Co huachi yaꞌhuëmia yaꞌhuëpihuëꞌ. Capa aꞌmocaisoꞌ niꞌton, ohuica shaꞌhuëtëꞌ, chipo shaꞌhuëtëꞌ inapita aꞌmopi. Co mantaꞌ yaꞌhuëtopihuëꞌ. Chiníquën parisitopi.

³⁸ Motopiroꞌsaꞌ parti, inotëro partiroꞌsaꞌ, nisha nisha parti iratopi. Naꞌpi naninquë yaꞌconahuatonaꞌ, huëꞌëpi. Inpioroꞌsari nocanpi: “Inapitasoꞌ napoonpi,” topirinahuëꞌ, Yosërisoꞌ noya noya niꞌnin.

³⁹ Yosëíchin yonquiatonaꞌ, nóya imapi. Napoaponahuëꞌ, co yaꞌipi Yosëri shaꞌhuitërinsoꞌ naniyatërasohuëꞌ, chiminpi.

⁴⁰ Canpoantaꞌ yonquiatonpoaꞌ, Yosë ninararinpoaꞌ. Iporasoꞌ Quisocristo nani chiminin niꞌton, yaꞌipinpoaꞌ anoyacancantërinpoaꞌ. Iráca imapisopita, ipora canpoantaꞌ, yaꞌipinpoaꞌ anoyacancantërinpoaꞌ. Aꞌna tahuërintaꞌ inápaquë paꞌpatëhuaꞌ, Yosë noyá nohuitarihuaꞌ.