Hebreos 10 - Chayahuita (Shahui)

¹ Iráca pënëntërinsoꞌ nanan imapachinara, maꞌsharoꞌsaꞌ tëpapi. Oshanënaꞌ yonquiatonaꞌ, napopi ama Yosëri anaꞌintacaso marëhuëꞌ. Quisocristo chiminacasoꞌ ninoton, Yosëri shaꞌhuitërin maꞌsharoꞌsaꞌ huënainëna aꞌpatacasoꞌ. Quisocristoíchin anoyacancantërinpoaꞌ. Ina chiminin niꞌton, oshanënpoaꞌ inquitërinpoaꞌ. Iráca nani piꞌiquë maꞌsha tëpapirinahuëꞌ, co tëhuënchachin piyapinënpita oshanënaꞌ inquitërinhuëꞌ.

² Oshanënaꞌ inquipi naporini, co nani piꞌiquë naquëranchin naquëranchin maꞌsha tëpaꞌitonahuëꞌ. Cancanënaꞌ anoyatopi naporini, noyápiachin cancanchitonahuëꞌ.

³ Nani piꞌiquë maꞌsharoꞌsaꞌ tëpahuachinara, yonquiantapi. “Tëhuënchachin oshahuanëhuaꞌ,” topi.

⁴ Maꞌsharoꞌsaꞌ tëpapirinahuëꞌ, ina huënainën quëran co onporontaꞌ oshanënaꞌ inquitërinhuëꞌ.

⁵ Napoaton Quisocristo isoroꞌpaquë yaoꞌmahuachina, paꞌpin itapon: “Iporaso huachi maꞌsharoꞌsaꞌ tëpacaisoꞌ, ofrenda quëcacaisoꞌ, inapita co nohuantëranhuëꞌ. Quëma nohuanton, piyapi chachin nasitomarahuë natëaꞌhuanquënso marëꞌ.

⁶ Naꞌa maꞌsharoꞌsaꞌ ahuiquitopi. Nisha nisha maꞌsha oshanëna marëꞌ tëpapirinahuëꞌ, co inapita marëꞌ noya niꞌnanhuëꞌ.

⁷ Ina quëran itërahuë: ‘Napoaton tata, nani oꞌmarahuë nohuantëransoꞌ nicaꞌhuaso marëꞌ. Quiricanënquë ninorancoso chachin nisarahuë,’ itërahuë,” tënin.

⁸ Quisocristo paꞌpin nontaton, naporin: “Iporaso huachi maꞌsharoꞌsaꞌ tëpacaisoꞌ co nohuantëranhuëꞌ. Nisha nisha maꞌsha oshanëna marëꞌ tëpapirinahuëꞌ, co inapita marëꞌ noya niꞌnanhuëꞌ,” itërin. Iráca pënëntërinso natëtonaꞌ inapopirinahuëꞌ, naporin.

⁹ Ina quëran itantarin: “Maꞌtana nani oꞌmarahuë quëma nohuantëransoꞌ nicacaꞌhuaso marëꞌ,” itërin. Napoaton co huachi iráca Yosë chinotacaiso marë maꞌsha tëpapiso pochin nicacasoꞌ yaꞌhuërinhuëꞌ. Quisocristo nasha pochin Yosë chinotacaso anitotërinpoaꞌ.

¹⁰ Quisocristo piyapi chachin nasitimarahuaton, oshanënpoa marëꞌ chiminin. Yosë nohuanton, aꞌnaroíchin chiminin. Canpoantaꞌ ina imapatëhuaꞌ, oshanënpoaꞌ inquitërinpoaꞌ. Noyápiachin cancan quëtërinpoa huachi.

¹¹ Nani tahuëri corto huaꞌanoꞌsaꞌ sacatápi. Naquëranchin naquëranchin maꞌsharoꞌsaꞌ tëpapirinahuëꞌ, co oshanënaꞌ inquipihuëꞌ.

¹² Quisocristoso nipirinhuëꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarahuaton, Yosë inchinanën quëran huënsëarin.

¹³ Inimiconënpita minsëaquë huarëꞌ inaquë ninarin.

¹⁴ Aꞌnaroíchin chiminaponahuëꞌ, anoyacancantërinpoaꞌ. Yaꞌipi imarëhuasopita oshanënpoaꞌ inquitatonpoaꞌ, noyápiachin cancan quëtërinpoaꞌ.

¹⁵ Ispirito Santontaꞌ inachachin anitotërinpoaꞌ. Quiricanën quëran shaꞌhuitërinpoaꞌ.

¹⁶ “Aꞌna tahuëri piyapinëhuëpitarëꞌco anoyatohuato, iso pochin nisarahuë: Nasha cancan quëtarahuë natëtochináchin cancantacaiso marëꞌ. Anoyacancantarahuë noya yonquicaiso marëꞌ.

¹⁷ Co huachi oshanënaꞌ yonquiarahuëꞌ. Yaꞌipi co noyahuëꞌ nipisopita naniantarahuë,” tënin.

¹⁸ Quisocristo oshanënpoaꞌ nani inquitohuachinpoaꞌ, co huachi maꞌsha tëpacasoꞌ yaꞌhuërinhuëꞌ. Inasáchin anoyacancantërinpoaꞌ.

Quisocristo imatëhuaꞌ, Yosë nohuitërëhuasoꞌ

¹⁹ Napoaton iyaroꞌsaꞌ, iporasoꞌ nanitërëhuaꞌ Yosë chachin nohuitacasoꞌ. Noya noya patoanaquë yaꞌconëso pochin nohuitërëhuaꞌ. Piyapinpoaꞌ nirihuarahuëꞌ, chiníquën cancantatëhuaꞌ, Yosë nontahuaꞌ. Quisoso huënainën paꞌnin niꞌton,

²⁰ nasha ira pochin nininsoꞌ acorin Yosë nohuitacaso marëꞌ. Noya noya ananpirinpoaꞌ. Iráca noya noya patoanaquë Yosë yaꞌnopirinhuëꞌ. Nëꞌmëtëri yaꞌcopitërin niꞌton, co piyapiꞌsari nohuitopihuëꞌ. Iporasoꞌ Quisocristo oꞌmaton, piyapi chachin nasitimarin. Chiminin niꞌton, nanitërëhuaꞌ Yosë nohuitacasoꞌ.

²¹ Chiníquën nanantaton, noya noya corto huaꞌan pochin canpoa marëꞌ Yosë nontárin. Yaꞌipi imarëhuasopita catahuarinpoaꞌ.

²² Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

²³ “Yosë noꞌtëquën shaꞌhuitërinpoaꞌ. Quisocristoíchin nichaꞌësarinpoaꞌ,” taꞌtëhuaꞌ, imamiatahuaꞌ. Ama piꞌpian tërantaꞌ nisha yonquiaꞌhuasohuë. Nani shaꞌhuitërinpoaꞌ niꞌton, co nonpintarinpoahuëꞌ.

²⁴ Aꞌnapitantaꞌ yonquiaꞌahuaꞌ. Naꞌcon nosoroatëhuaꞌ, catahuahuaꞌ inahuantaꞌ noya ninosorocaiso marëꞌ. Nipënëahuanꞌ noya nicacaso marëꞌ.

²⁵ Aꞌnaquën co huachi niyontonpihuëꞌ Yosë chinotacaiso marëꞌ. Ama inapita pochin cancantahuasohuëꞌ. Sinioro oꞌmacasoꞌ tahuëri naniriarin niꞌton, niyontonatëhuaꞌ, naꞌcon naꞌcon nicatahuahuaꞌ chiníquën cancantacaso marëꞌ.

²⁶ Quisocristo nanamën nani nitotërëhuaꞌ. Nitotarihuarahuëꞌ, naquëranchin naquëranchin co noyahuëꞌ nipatëhuaꞌ, aꞌpopisopita pochin cancantararihuaꞌ. Aꞌpohuatëhuaꞌ, co insontaꞌ nanitarinhuëꞌ oshanënpoaꞌ inquitinpoasoꞌ.

²⁷ Ina quëran paꞌpi tëꞌhuatacasoꞌ yaꞌhuërin. Yosë chiníquën anaꞌintarinpoaꞌ. Aꞌna tahuëri inimiconënpita pënquë aꞌpararin.

²⁸ Iráca Moisësë pënëntohuachina, aꞌnaquën co yaimapihuëꞌ. Aꞌpopi. Aꞌpohuachinara, anaꞌintopi. Coisëquë quëparahuatonaꞌ, shaꞌhuirapipi. Catoyaꞌpihuë nipon, carayaꞌpihuë nipon inachachin shaꞌhuirapihuachinara, co nosoropihuëꞌ. “Tëpaquëꞌ,” itopi.

²⁹ Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

³⁰ Yosë nohuitërëhuaꞌ. Inasoꞌ yaꞌipiya nitotërin. “Co noyahuëꞌ nipachinaꞌ, cari anaꞌintarahuë. Noꞌtëquën anaꞌintarahuë huachi,” tënin Yosë. “Piyapinënpita tërantaꞌ co yanatëhuachinahuëꞌ, Siniorori anaꞌintarin,” tënin antaꞌ. Quiricanënquë naporin.

³¹ Yosësoꞌ nanpiárin. Chiníquën nanantërin. Co noyahuëꞌ nipatëhuaꞌ, paꞌpi tëꞌhuatacasoꞌ yaꞌhuërin. Anaꞌintarinpoaꞌ.

³² Yaꞌnan imaramasoꞌ tahuëriꞌsaꞌ yonquicoꞌ. Quisocristo nanamën aꞌchintohuachinënquëmara, noya natanatomaꞌ, imaramaꞌ. Ina marëꞌ parisitapomarahuëꞌ, co yaaꞌporamahuëꞌ. Noya ahuantëramaꞌ.

³³ Imaramaso marëꞌ aꞌninquëchin tëhuarinënquëmaꞌ, noꞌhuirinënquëmaꞌ. Aꞌna tahuëri ahuëpirinënquëmahuëntaꞌ, noya cancantëramaꞌ. Aꞌnapita imapisopitantaꞌ parisitohuachinara, nosoroatomaꞌ, catahuaramaꞌ.

³⁴ Tashinan pëiquë poꞌmohuachinara, co tëꞌhuatomarahuëꞌ, nicapomaꞌ paꞌnamaꞌ. Paatomaꞌ, catahuaramaꞌ. Canpitantaꞌ imaramaso marëꞌ maꞌshanëmaꞌ osërëtopirinënquëmahuëꞌ, co sëtëramahuëꞌ. “Yosë chachin nohuitërëhuaꞌ. Nasha cancan quëtërinpoaꞌ. Co insontaꞌ nanitërinhuëꞌ inasoꞌ osërëtinpoasoꞌ,” taꞌtomaꞌ, nóya cancantëramaꞌ.

³⁵ Yaꞌnan imapomaꞌ, noya imaramaꞌ. Ama iporasoꞌ yaaꞌpocosohuëꞌ. “Yosë naniantërinco,” ama tocosohuëꞌ. Chiníquën cancantocoꞌ Yosë nóya acanainquëmaꞌ.

³⁶ Maꞌsha onpopiramahuëntaꞌ, noya ahuantocoꞌ. Noya natëhuatamaꞌ, naꞌcon catahuarinquëmaꞌ. Nani shaꞌhuitërinquëmaꞌ niꞌton, co nonpintarinquëmahuëꞌ. Noya nichaꞌësarinquëmaꞌ.

³⁷ Quiricanënquë naporin: “Tëhuënchachin oꞌmacasoꞌ nininsoꞌ oꞌmapon. Co huaꞌquiarinhuëꞌ.

³⁸ Cancanëma quëran huarëꞌ natëhuatamaco, noya niꞌsaranquëmaꞌ niꞌton, noya nanpimiataramaꞌ. Nipirinhuëꞌ aꞌpohuatamaco, paꞌpi co noyahuëꞌ niꞌsaranquëmaꞌ,” tënin.

³⁹ Insosona aꞌpohuachinaꞌ, parisitopiquë paꞌsapi. Canpoaso nipirinhuëꞌ, co aꞌpoarihuahuëꞌ. Natërëhuaꞌ niꞌton, nichaꞌësarinpoa huachi.