Habacuc 1 - Chayahuita (Shahui)

Co noyahuëꞌ nipisopita yonquiato Sinioro nontërahuësoꞌ

¹ Caso Apacoco. Pënëntaꞌhuaso marëꞌ Sinioro huaꞌnarëso pochin anitotërincosoꞌ, iso quiricaquë ninshitaranquëmaꞌ.

² Aꞌna tahuëri Sinioro nontato: “Sinioro. Co napion ancantato catahuancoso marëꞌ nontápiranquënhuëꞌ, ¡co aꞌpanirancohuëꞌ! Naꞌcon maꞌsha onpotatonacoi aparisitarinacoi. Napoaton nichaꞌëancoiso marëꞌ chiníquën nontaranquën. Inapo nontopiranquënhuëꞌ, ¡co nichaꞌërancoihuëꞌ!

³ Piyapiꞌsa maꞌsha onpotatonacoi aparisitarinacoi. ¡Catahuacoi huachi ama napotaꞌinacoisohuëꞌ! Naꞌcon maꞌsha onpotatonacoi, yaataꞌhuantërinacoi. Piyapiꞌsa nanan yaꞌhuëtatona coisëroꞌsaquë niquëparápi.

⁴ Pënëntëransoꞌ yaꞌhuëpirinhuëꞌ, co ina nicatona piyapiꞌsa noꞌtëquën anaꞌintopihuëꞌ. Coisëroꞌsasoꞌ, piyapiꞌsa catahuacaiso nipirinhuëꞌ, co catahuapihuëꞌ. Noya nipisopita, co noyahuëꞌ nipisopitari aparisitárin. Coisëroꞌsanta pahuërëhuachinara, co huachi noꞌtëquën anaꞌintopihuëꞌ,” itërahuë.

Sinioro aꞌpanitonco anitotërincosoꞌ

⁵ Ina quëran Siniorosoꞌ anitotërinco: “Israiroꞌsaꞌ. Aꞌnapita nacionoꞌsaquë napopisoꞌ niꞌcoꞌ. Ina nicatoma paꞌyancoꞌ. Nani yonquirahuë paꞌpi huëhuëpiro nininsoꞌ, nicaꞌhuasoꞌ. Canpitaso naporahuësoꞌ shaꞌhuitopirinënquëmaontaꞌ, noꞌtëquën shaꞌhuipisoꞌ co natëaramahuëꞌ.

⁶ Ca nohuanton papironiaroꞌsa chiníquën nanantatona ahuëarinënquëmaꞌ. Inapitasoꞌ co tënorotochináchinhuëꞌ cancantopi. Itohua itohua pacatonaꞌ, aꞌnapitari noꞌpaꞌ huaꞌanëntopiso osërëtëraꞌpiapi.

⁷ Intohuaso paꞌpachinara, piyapiꞌsa paꞌpi aꞌpayanpi. Aꞌpayanatonaꞌ, aropátopi. Inahuara nipaꞌyatacaisoráchin cancantatonaꞌ: ‘Quiyasoꞌ noyasáchin ninai,’ toconpi.

⁸ Cahuarionënapitasoꞌ, nioparto paꞌpiniroꞌsa quëran chini chiníquën taꞌapi. Inotëro asaniroꞌsa quëran tëꞌhua tëꞌhuatoro yaꞌnopi. Huaꞌhuayátërahuë sontaroꞌsa inapitaquë yaꞌmitëatona paꞌpi. Inimico quënanpachinara, aquëquëranchin pashitaꞌpapi. Panca onian maꞌsha maninso pochin nisapi.

⁹ Papona pochin yaꞌipi quënanpisoꞌ ataꞌhuantëraꞌpiapi. Huëꞌsapiso natanpachinara, naní quëran paꞌyanapi. Notohuaroꞌ piyapiꞌsa asacatacaiso marëꞌ masapi. Marë yonsanquë inotë notohuaroꞌ yaꞌhuërinso pochin masapi.

¹⁰ Copirnoroꞌsaꞌ, huaꞌanoꞌsaꞌ, inapita co natëpihuëꞌ. Noyá niacorapipirinahuë tëranta tëhuaconpi. Noꞌpaꞌ nanpënanoꞌsa acorahuatonaꞌ, inataquëchin ahuëcaiso marëꞌ ninanoroꞌsa yaꞌcontëraꞌpiaponaꞌ.

¹¹ Panca ihuan paꞌpachina, inquitërinso pochin tiquitaponaꞌ. Inahuara chinipisoraꞌ, yosënëna pochin niꞌpi,” itërinco.

Sinioro nontaantarahuësoꞌ

¹² Napotohuachincora, carinta itaantapo: “Sinioro quëmaso Yosënquën niꞌton, chinotëranquën. Noyasáchin nicaton yaꞌhuëmiatëran. Quëmari inapita quëran anaꞌintancoiso marëꞌ papironiaroꞌsa huayonan. Quëmasoꞌ paꞌpoyarápirancoihuëꞌ, anaꞌintancoiso marëꞌ inapita achiniran.

¹³ Quëmasoꞌ noyasáchin nicaton, co piꞌpian tëranta co noyahuëꞌ nipisoꞌ noya niꞌnanhuëꞌ. Paꞌpi co noyahuëꞌ nipisoꞌ co onporonta costaranhuëꞌ. ¡Tëpatoroꞌsasoꞌ, anaꞌintamaso yaꞌhuërin! Co noyahuëꞌ nipisopitari noyamiachin nisapisopita ataꞌhuantahuachinaꞌ, ¡co topinan niꞌsápamaso yaꞌhuërinhuëꞌ!

¹⁴ Samiroꞌsasoꞌ co naꞌcon paꞌtërinhuëꞌ. ¡Piyapicoisoꞌ co inapita pochin nitancoiso yaꞌhuërinhuëꞌ! Maꞌsharoꞌsanta co huaꞌanëhuanatonaraihuëꞌ, nosoro paꞌtopi. ¡Co inapita pochin quiyasoꞌ nitancoiso yaꞌhuërinhuëꞌ!

¹⁵ Papironiaroꞌsasoꞌ, sami camayoroꞌsa pochin nipi. Yoꞌnanaquë sami ohuarapiso pochin, ritiquënta amotahuatonaꞌ, yaꞌipi mapiso pochin, co oshatapihuëꞌ nisha nisha piyapiꞌsa minsëcaisoꞌ. Inapohuachinara capa cancantopi.

¹⁶ Napoaton inapitasoꞌ, ritinënaꞌ, yoꞌnananënaꞌ, inapita moshapi. Inapita moshacaiso marëꞌ maꞌsharoꞌsa tëpapi. Yonarin pochin nininsontaꞌ, aꞌpëpi. ‘Inapita catahuarincoi niꞌton, naꞌa noya cosharo yaꞌhuëtërincoi,’ topi.

¹⁷ Inapopirinahuëꞌ, ama Sinioro papironiaroꞌsa inapotiinacoiso nohuantëquësohuëꞌ. Co piyapiꞌsa nosoro tëparápaiso yaꞌhuërinhuëꞌ.