Génesis 9 - Chayahuita (Shahui)

Yosë Noirëꞌ anoyatërinsoꞌ

¹ Naporoꞌ Noi, huiꞌninpitarë chachin, Yosëri nóya yonquirapiton iso pochin shaꞌhuitërin: “Naꞌa huiꞌnahuanatomaꞌ, yaꞌipiroꞌpaquë yaꞌhuëcoꞌ.

² Yaꞌipi maꞌsharoꞌsaꞌ, anpiantëhuanoꞌsaꞌ, marëquë yaꞌhuërinsopita, inapita huaꞌanëntaramaꞌ. Inapitaso tëꞌhuatarinënquëmaꞌ.

³ Carima yaꞌipi inapita capamaso marëꞌ quëtaranquëmaꞌ. Nisha nisha huëronoꞌsanta caꞌcoꞌ. Maꞌsona tëranta nayaramaso caꞌcoꞌ.

⁴ Huënaiso nipirinhuëꞌ, ama caꞌcosohuëꞌ. Maꞌsha tëpahuatamaꞌ, huënainën noyá inquitahuatomaꞌ, caꞌcoꞌ. Huënainëni ananpirin niꞌton, ama inaso caꞌcosohuëꞌ.

⁵ Canpita capinisoꞌ, co nitëpamaso yaꞌhuërinhuëꞌ. Tëpatohuatamaꞌ, anaꞌintaꞌhuanquëmaso yaꞌhuërin. Maꞌsharoꞌsarinta piyapi tëpahuachin, anaꞌintarahuë. Tëpatohuatamaꞌ, aꞌnaya aꞌnayanquëma tëhuënchachin anaꞌintaranquëmaꞌ.

⁶ Insosona piyapi tëpahuachin, aꞌnari iꞌhuërëtarin. Cá pochachin nicamaso marëꞌ acoranquëmaꞌ. Napoaton, co nitëpamaso yaꞌhuërinhuëꞌ.

⁷ ¡Napoaponahuëꞌ, canpitaso naꞌa huiꞌnahuanatomaꞌ, yaꞌipiroꞌpaquë yaꞌhuëcoꞌ!” itërin.

⁸ Ina quëran itaantarin:

⁹ “Niꞌcoꞌ. Ipora canpitaroꞌco anoyatërahuësoꞌ, shiparimapitanta yonquiato, napotaranquëmaꞌ.

¹⁰ Yaꞌipi maꞌsharoꞌsanta yonquiato napotaranquëmaꞌ: Anpiantëhuanoꞌsaꞌ, pëꞌtahuaroꞌsaꞌ, tananquë maꞌsharoꞌsa yaꞌhuërinsoꞌ, nisha nisha nipisopita nancha quëran pipipiso yonquiato, shaꞌhuitaranquëmaꞌ.

¹¹ Ipora canpitaroꞌco anoyatato shaꞌhuitëranquëmasoꞌ, co onporonta nishataponhuëꞌ. Co huachi piyapiꞌsaꞌ, maꞌsharoꞌsaꞌ, inapita pacon quëran ataꞌhuantaantapohuëꞌ. Co huachi paconi isoroꞌpaꞌ ataꞌhuantaantaponhuëꞌ.

^12-13 Canpitarëꞌco nani anoyatomiatërahuë. Maꞌsharoꞌsarëꞌcontaꞌ, nani anoyatërahuë. Ina yonquicamaso marëꞌ yahuaꞌtanëhuë inápaquë acoarahuë.

¹⁴ Chitoro inápaquë yaꞌnohuachin, yahuaꞌtanëhuënta yaꞌnoarin.

¹⁵ Naporoꞌ canpitaroꞌco anoyatato shaꞌhuitëranquëmasoꞌ, yonquiarahuë. Ama huachi iꞌ quëran, isoroꞌpaꞌ ataꞌhuaantaꞌhuaso marëhuëꞌ, yonquiarahuë.

¹⁶ Yahuaꞌtan chitoroquë yaꞌnohuachin niꞌsarahuë. Ina niꞌpato, yaꞌipi piyapiꞌsarëꞌco yaꞌipi maꞌsharoꞌsarëꞌco anoyatërahuësoꞌ, ayonquiarinco.

¹⁷ Nani ina acorahuë ayonquiinpoaso marëꞌ. Canpitarëꞌco anoyatërahuëso ayonquiarinpoaꞌ. Maꞌsharoꞌsarëꞌconta anoyatërahuëso ayonquiarinpoaꞌ,” itërin. Ina pochin Yosëri Noi shaꞌhuitërin.

Noi huiꞌninpitarëꞌ naporinsoꞌ

¹⁸ Noi huiꞌninpita nancha quëran pipipisopita, iso nápo yaꞌhuëpi: Simo, Camo, Cahuito, inapita. Camosoꞌ, aꞌnara huiꞌnin yaꞌhuëtërin. Inasoꞌ, Canaan itopi.

¹⁹ Caramiáchin Noi huiꞌninpita nipirinahuëꞌ, inayaquëranchin isoroꞌpaquë piyapiꞌsa naꞌantapi.

²⁰ Ina piquëran Noi iminaton, inaquë opasáchin shacaton, oparotërin.

²¹ Aꞌna tahuëri Noi huino oꞌoton, noꞌpirin. Noꞌpiton, nëꞌmëtë pëinën huáncana notataton, iꞌnanpirashitë quëhuëánin.

²² Camosoꞌ, inaquë yaꞌconahuaton niꞌpirinhuëꞌ, paꞌpin noꞌpiton huëꞌësárin quënanconin. Quënanahuaton iinpita shaꞌhuitapon paꞌnin: “Tata noꞌpiton iꞌnanpirashitë quëhuëánin niꞌconahuë,” itërin. (Nani shaꞌhuirahuëso chachin Camosoꞌ, Canaan paꞌpin.)

²³ Ina natanahuatonaꞌ, Simo, Cahuito, inapitaso aꞌnara aꞌmopiso mapi. Ina masahuatonaꞌ, niimopitopi. Niimopitopiquëranchin, pinëna quëran yaꞌconatonaꞌ, paꞌpina imotopi. Niquë notëtopi niꞌton, co paꞌpina niꞌpihuëꞌ.

²⁴ Noi nonatohuachina, huiꞌnin huaꞌhua nininsoari, napotërinso natantërin.

²⁵ Natantahuaton, Canaan itapon: “¡Tata tëhuërin niꞌton, paꞌpi co noyahuëꞌ nicatënquën co huachi noya yaꞌhuëcamaso marëhuëꞌ shaꞌhuitaranquën! Yosë chiníquën anaꞌichinquën. Ipora quëran huarëꞌ iyaroꞌsa camaiáponquën. Shiparimapitanta inaporáponaꞌ,” itërin.

²⁶ Ina quëran taantarin: “Siniorosoꞌ, Yosënëhuë. Inari Simo noya nicaton noya yaꞌhuëcaso marëꞌ catahuain. Canaansoꞌ, Simo piyapinën niin.

²⁷ Yosë nohuanton, Cahuito, pancana huaꞌanënchin. Simo yaꞌhuërinquë noya ninicatona yaꞌhuëꞌinaꞌ. Canaansoꞌ, Cahuito piyapinën niin,” tënin.

²⁸ Pacon paꞌninso piquëran, Noisoꞌ cara pasa aꞌnatërápo shonca piꞌipi yaꞌhuaantarin.

²⁹ Yaꞌipiya quëran iscon pasa aꞌnatërápo shonca piꞌi icanin. Ina piquëran chiminin huachi. Ina pochin Noi ninin.