Génesis 8 - Chayahuita (Shahui)

Pacon huinquintomarinsoꞌ

¹ Naporoꞌ Yosëri Noi, yaꞌipi maꞌsharoꞌsa nanchaquë yaꞌhuëapisopita, inapita yacatahuarin. Ina nohuanton pacon huinquintacaso marëꞌ ihuan paꞌnin.

² Coꞌhuara huinquinchátërasohuëꞌ, oꞌnanꞌton mëꞌtarin. Naporoꞌ marë acoporo quëran pipirinsoꞌ, nioncotërin. Inápaquë iꞌ yaꞌcopinamën niiꞌsoatërinsonta inaporin.

³ Pasa aꞌnatërápo shonca tahuëri quëran, iꞌ piꞌpiyan piꞌpiyan huinquintomarin.

⁴ Canchisë yoqui, shonca canchisë tahuëri quëran, Ararato motopiroꞌsa huiꞌnimotënquë nanchasoꞌ, yaꞌmitërin.

⁵ Iscon yoqui nanirahuaton tahuëririnquë, motopiroꞌsa huiꞌnimotëna yaꞌnopi huachi.

⁶ Inapita yaꞌnohuachinara, catapini shonca tahuëri quëran, Noiso nancha huintananën iꞌsoatërin.

⁷ Naporoꞌ aꞌnara itatan aꞌparin. Inasoꞌ, itohua itohua yanpo yanpónantarin. Iꞌ huinquintacaso ninaton, naporin.

⁸ Ina piquëran, Noisoꞌ iꞌ huinquintërinso nitotacaso marëꞌ, nëpë yaꞌhuërëꞌ aꞌpaantarin.

⁹ Aꞌpapirinhuëꞌ, co intopa huënsëcasohuë niꞌton, yanpo yanpónantarin. Naporarin quëran, nanchaquë chachin huënantarin. Huëntahuachina, Noiri masahuaton poꞌmoantarin.

¹⁰ Canchisë tahuëri quëran, naquëranchin aꞌpaantarin.

¹¹ Nëpëso paꞌsahuaton, iꞌhuarayasha huarëꞌ huënantarin. Oripo nara sëꞌparaꞌhuaya monoquënë chachin naquërahuaton quëntarin. Naporoꞌ Noi, yaniromarinso nitotërin huachi.

¹² Canchisë tahuëri quëran naquëranchin nëpë aꞌpaantapirinhuëꞌ, co huachi huëntarinhuëꞌ.

¹³ Noi saota pasa aꞌna piꞌitapasoꞌ, yaꞌipiroꞌpaꞌ yaniromarin huachi. Caniaritërinso yoquiquë, yaꞌnatiirinso tahuëri chachin, napopinchin nancha pëirapirinso oquirin. Naporo yaꞌipiroꞌpaꞌ yaniromarinso nocorin.

¹⁴ Aꞌna yoqui, cato shonca canchisë tahuëri nanihuachina, yaꞌipiroꞌpaꞌ noyá yaniromarin huachi.

¹⁵ Naporo chachin Yosëri Noi itapon:

¹⁶ “Iporaso huachi saꞌanëꞌquën chachin nancha quëran pipiquëꞌ. Huiꞌnanpitantaꞌ, saꞌinarë chachin pipiinaꞌ.

¹⁷ Yaꞌipi maꞌsharoꞌsanta ocoiquë paꞌinaꞌ. Anpiantëhuanoꞌsaꞌ, pëꞌtahuaroꞌsaꞌ, noꞌpaquë niohuaratërinsopita, yaꞌipi inapitanta pipiinaꞌ. Notohuaroꞌ huaꞌhuatatonaꞌ, yaꞌipiroꞌpaquë yanquëꞌinaꞌ,” itërin.

¹⁸ Napotohuachina, yaꞌipi piyapiꞌsa chaꞌëpiso pipipi.

¹⁹ Maꞌsharoꞌsanta pipipi: Pëꞌtahuaroꞌsaꞌ, niohuaratërinsopita, anpiantëhuanoꞌsaꞌ, inapitanta pipipi huachi.

²⁰ Nani pipihuachinara, Noiso aꞌnara artaro ninin. Yosë chinotacaso marëꞌ maꞌsharoꞌsa tëpacaiso nipisopita masahuaton, tëparin. Anpiantëhuanoꞌsantaꞌ, manin. Aꞌnaya aꞌnaya nisha nisha nipisopita quëran tëparin. Tëparahuaton, Sinioro chinotacaso marëꞌ artaro aipi yaꞌipi ahuiquitërin.

²¹ Maꞌsharoꞌsa ahuiquitërinso pimóchin imërahuaton, Yosëri nóya niꞌnin. Naporoꞌ inaso tapon: “Huaꞌhuatapona quëran huarëꞌ piyapiꞌsaꞌ, co noyahuëꞌ nicacaisoráchin cancantopi. Inaso niponahuëꞌ, co huachi ipora anaꞌintërahuëso pochin, isoroꞌpaꞌ anaꞌintaantapohuëꞌ. Co huachi maꞌsharoꞌsanta inapotapohuëꞌ.

²² Isoroꞌpaquë yaꞌhuapona pochin, piyapiꞌsa noya shaꞌtaponaꞌ. Nitërinsonta macaponaꞌ. Huënocanta yaꞌhuërahuaton, sëhuëonta yaꞌhuapon. Piꞌipi tahuëriꞌsanta nanirahuaton, oꞌnapinta nanipon. Tahuëri, tashiꞌ, inapitanta yaꞌhuapon,” tënin.