Génesis 7 - Chayahuita (Shahui)

Nanchaquë yaꞌconpisoꞌ

¹ Ina quëran Siniorori Noi itapon: “Yaꞌipi ipora yaꞌhuëpisopita aꞌporinaco. Quëmasáchin nohuantërahuëso ninan. Napoaton iporasoꞌ, saꞌanëꞌquën chachin nanchaquë yaꞌconquë huachi. Huiꞌnanpitantaꞌ, saꞌinarë chachin yaꞌcoinaꞌ.

² Chinotamacoso marëꞌ maꞌsharoꞌsa tëpacaiso nipisopitasoꞌ, canchisë quëmapi nisahuaton canchisë sanapi nanchaquë poꞌmoquëꞌ. Yaꞌhuërëꞌ co ina marëꞌ nipisopitasohuëꞌ, aꞌnara quëmapi, aꞌnara sanapi inaíchin poꞌmoquëꞌ.

³ Nisha nisha anpiantëhuanoꞌsantaꞌ, nanchaquë poꞌmoquëꞌ. Canchisë huaꞌanën, canchisë sanapinën naꞌantacaiso marëꞌ poꞌmoquëꞌ.

⁴ Canchisë tahuëri quëran ca nohuanto oꞌnanapon. Catapini shonca tahuëri, tashirë chachin oꞌnamiatapon. ¡Inapotato yaꞌipi isoroꞌpaquë acorahuësopita ataꞌhuantarahuë!” itërin.

⁵ Noisoꞌ, yaꞌipi Siniorori camairinso chachin ninin.

⁶ Noi saota pasa piꞌipitasoꞌ, paconi isoroꞌpaꞌ imotërin.

⁷ Naporo inasoꞌ, saꞌinë chachin nanchaquë yaꞌconin. Huiꞌninpitanta saꞌinarë chachin chaꞌëcaiso marëꞌ yaꞌconpi.

^8-9 Yosë chinotacaso marëꞌ maꞌsharoꞌsa tëpacaiso nipisopitantaꞌ, Noirë chachin catoya catoya nanchaquë yaꞌconpi. Aꞌnara quëmapi, aꞌnara sanapi yaꞌconpi. Co ina marëꞌ nipisopitahuënta yaꞌconpi. Anpiantëhuanoꞌsaꞌ, niohuaratërinsopita, inapitanta inapochachin yaꞌconpi. Yosëri shaꞌhuitërinso chachin nipi.

¹⁰ Yosëri shaꞌhuitërinso chachin, canchisë tahuëri quëran paconi isoroꞌpaꞌ imotarin huachi.

¹¹ Naporoꞌ Noisoꞌ, saota pasa piꞌi, cato yoqui, shonca canchisë tahuëritarin. Naporo chachin isoroꞌpaꞌ huëncharoatë pochin ninin. Marënta acoporo yaꞌhuërinsoꞌ, pipimiatërin. Naporahuaton inapaquëntaꞌ, iꞌ yaꞌcopinamën yaꞌhuërinso niiꞌsoatërin. Napohuachina, paꞌpi iꞌ isoroꞌpaquë anotimarin.

¹² Catapini shonca tahuëri tashirë chachin isoroꞌpaquë oꞌnamiatarin huachi.

¹³ Naporo tahuëri chachin Noi saꞌinë nanchaquë yaꞌconin. Huiꞌninpitantaꞌ, Simo, Camo, Cahuito, inapitanta saꞌinarëꞌ saꞌinarëꞌ yaꞌconpi.

¹⁴ Tananquë maꞌsharoꞌsa yaꞌhuërinsopita, pëꞌtahuaroꞌsa nipisopita, niohuaratërinsopita, anpiantëhuanoꞌsaꞌ, inapitanta yaꞌconpi.

¹⁵ Yosë nohuanton, maꞌsharoꞌsa catoya catoya nanchaquë yaꞌconpi.

¹⁶ Nisha nisha nipisopita quëran, aꞌnara quëmapi, aꞌnara sanapi yaꞌconpi. Yosëri Noi camairinso chachin nipi. Nani yaꞌconpachinara, Siniorori chachin nancha yaꞌcoananën oncorapirin huachi.

Pacon paꞌninsoꞌ

¹⁷ Catapini shonca tahuëri oꞌnanárin. Pamatohuachina, nanchaso noꞌpa quëran yanponin huachi.

¹⁸ Pamasoꞌ aquëtë chachin mëntaintararin, nanchaso nipirinhuëꞌ, noya yanponarin.

^19-20 Paꞌpi pacon paꞌsahuaton, ina inápa motopiroꞌsa quëran huarëꞌ imotërin. Inapita motopiroꞌsa imotahuaton, canchisë mitro aquëtë pantarin.

^21-22 Naporoꞌ yaꞌipi piyapiroꞌsa isoroꞌpaquë yaꞌhuëpisopita, taquiitopi. Anpiantëhuanoꞌsaꞌ, pëꞌtahuaroꞌsaꞌ, tananquë maꞌsharoꞌsa yaꞌhuërinsoꞌ, niohuaratërinsopita, inapitanta taꞌhuantopi. Yaꞌipi nii oꞌhuatona nanpipisopita, taquiitopi huachi.

²³ Noisáchin chaꞌërin. Panca nanchaquë yaꞌconpisopitarëꞌ, chaꞌërin. Aꞌnapitaso nipirinhuëꞌ, yaꞌipi taꞌhuantopi. Pëꞌtahuaroꞌsaꞌ, anpiantëhuanoꞌsaꞌ, niohuaratërinsopita, inapitanta yaꞌipi taquiitopi huachi.

²⁴ Pasa aꞌnatërápo shonca tahuëri isoroꞌpaꞌ iiri imotaton, napotërin.