Génesis 5 - Chayahuita (Shahui)

Atan shinpita napopisoꞌ

¹ Atan shinpita napopiso shaꞌhuichinquëma nitotocoꞌ. Yosëri piyapi nipachina, inaora pochachin ninin.

² Quëmapi, sanapi, nisahuaton, noya yaꞌhuëcaiso marëꞌ noya yonquirapiton shaꞌhuitërin. Acorinso tahuëri chachin nohuitaton: “Isopitasoꞌ: ‘Piyapiroꞌsaꞌ,’ itarahuë,” tënin.

³ Atan pasa cara shonca piꞌipitasoꞌ, huiꞌnin nasitërin. Nasitohuachina, Sito itopi. Inasoꞌ, paꞌpin noyá quëparin.

⁴ Sito nasitërin piquëran Atansoꞌ, posa pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

⁵ Yaꞌipiya quëran Atansoꞌ, iscon pasa cara shonca piꞌi icanin. Ina quëran chiminin huachi.

⁶ Sito pasa aꞌnatërápo piꞌipitasoꞌ, huiꞌnin nasitërin. Nasitohuachina, Inosë itopi.

⁷ Inosë nasitërin piquëran Sitosoꞌ, posa pasa canchisë piꞌi aquëtë yaꞌhuaantarin. Aꞌnapita huiꞌnipitanta quëmapiꞌsaꞌ, sanapiꞌsaꞌ, yaꞌhuëtërin.

⁸ Yaꞌipiya quëran Sitosoꞌ, iscon pasa shonca cato piꞌi icanin. Ina quëran chiminin huachi.

⁹ Inosënta iscon shonca piꞌipitasoꞌ, huiꞌnin nasitërin. Nasitohuachina, Cainan itopi.

¹⁰ Cainan nasitërin piquëran Inosësoꞌ, posa pasa shonca aꞌnatërápo piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

¹¹ Yaꞌipiya quëran Inosësoꞌ, iscon pasa aꞌnatërápo piꞌi icanin. Ina quëran chiminin huachi.

¹² Cainan canchisë shonca piꞌipitasoꞌ, huiꞌnin nasitërin. Nasitohuachina, Maarariro itopi.

¹³ Maarariro nasitërin piquëran Cainansoꞌ, posa pasa catapini shonca piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

¹⁴ Yaꞌipiya quëran Cainansoꞌ, iscon pasa shonca piꞌi icanin. Ina quëran chiminin huachi.

¹⁵ Maarariro saota shonca aꞌnatërápo piꞌipitasoꞌ, huiꞌnin nasitërin. Nasitohuachina, Carito itopi.

¹⁶ Carito nasitërin piquëran Maararirosoꞌ, posa pasa cara shonca piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

¹⁷ Yaꞌipiya quëran Maararirosoꞌ, posa pasa iscon shonca aꞌnatërápo piꞌi icanin. Ina quëran chiminin huachi.

¹⁸ Carito pasa saota shonca cato piꞌipitasoꞌ, huiꞌnin nasitërin. Nasitohuachina, Inoco itopi.

¹⁹ Inoco nasitërin piquëran Caritosoꞌ, posa pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

²⁰ Yaꞌipiya quëran Caritosoꞌ, iscon pasa saota shonca cato piꞌi icanin. Ina quëran chiminin huachi.

²¹ Inoco saota shonca aꞌnatërápo piꞌipitasoꞌ, huiꞌnin nasitërin. Nasitohuachina, Matosarino itopi.

²² Inocosoꞌ, nani tahuëri Yosë chinotaton, ina nohuantërinsoráchin ninin. Matosarino nasitërin piquëran Inocosoꞌ, cara pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

²³ Yaꞌipiya quëran Inocosoꞌ, cara pasa saota shonca aꞌnatërápo piꞌipi yaꞌhuëtërin.

²⁴ Inasoꞌ, Yosë nohuantërinsoráchin nininso marëꞌ aꞌnanaya ayarin. Yosëri inápaquë quëparin.

²⁵ Matosarino pasa posa shonca canchisë piꞌipitasoꞌ, huiꞌnin nasitërin. Nasitohuachina, Namico itopi.

²⁶ Namico nasitërin piquëran Matosarinosoꞌ, canchisë pasa posa shonca cato piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

²⁷ Yaꞌipiya quëran Matosarinosoꞌ, iscon pasa saota shonca iscon piꞌi icanin. Ina quëran chiminin huachi.

²⁸ Namico pasa posa shonca cato piꞌipitasoꞌ, aꞌnara huiꞌnin nasitërin.

²⁹ Nasitohuachina, Noi itërin. “Siniorori piyapi co huachi noya yaꞌhuëcaso marëhuëꞌ shaꞌhuitaton, anaꞌintërin. Napoaton isoroꞌpaꞌ nitapirin. Paꞌpi chiníquën sacataquë huarëꞌ cosharo manëꞌ. Iso huaꞌhuashaso nipirinhuëꞌ, nanan anoyatatonpoa achinotarinpoaꞌ,” taꞌton, ina pochin nininën acotërin.

³⁰ Noi nasitërin piquëran Namicosoꞌ, aꞌnatërápo pasa iscon shonca aꞌnatërápo piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

³¹ Yaꞌipiya quëran Namicosoꞌ, canchisë pasa canchisë shonca canchisë piꞌi icanin. Ina quëran chiminin huachi.

³² Noisoꞌ, aꞌnatërápo pasa piꞌipitaquë huarëꞌ huiꞌnin paninantërinso nasitërin. Ina quëran cato huiꞌninpita yaꞌhuëtaantarin. Huiꞌninpitasoꞌ: Simo, Camo, Cahuito, inapita itopi.