Génesis 48 - Chayahuita (Shahui)

Iprain, Manasisi inapita noya yaꞌhuëcaiso marëꞌ shaꞌhuitërinsoꞌ

¹ Ina piquëran miachin Cacoposoꞌ caniorin. Napohuachina Cosi shaꞌhuitopi. Ina natanahuaton, nicapon paꞌnin. Huiꞌninpitanta cato chachin quëparin. Manasisi, Iprain, inapita.

² Cosiri nicapon huëꞌninso shaꞌhuitohuachinara, chiníquën cancantaton pëꞌsaranënquë huënsërin.

^3-4 Cosisoꞌ, huiꞌninpitarë chachin yaꞌcoontarahuaton paꞌpin nontoonin. Ina quëran Cacoposoꞌ Cosi itapon: —Yosë yaꞌipi nanitaparinsoꞌ, Noso ninanoquë yaꞌnotërinco. Inaso ninanoꞌ, Canaan parti yaꞌhuërin. Yaꞌnotahuatonco, iso pochin noya yaꞌhuëcaꞌhuaso marëꞌ shaꞌhuitërinco: “Niꞌquëꞌ. Ca nohuanto, notohuaroꞌ huiꞌnanpita yaꞌhuëtarinquën. Quëmá quëran pipipisopita, naꞌa nacionoꞌsa ocoyaponaꞌ. Naporahuaton, inapita, iso noꞌpaꞌ quëtarahuë. Inapitari huaꞌanëntomiataponaꞌ,” itërinco.

⁵ Huiꞌnanpita Iprain, Manasisi, inapitaso coꞌhuara yacapaponquën huëꞌshamátërasocohuëꞌ yaꞌhuëtërinquën. Inapitasoꞌ caquën nicaponaꞌ. Napoatonaꞌ, Yosë noꞌpaꞌ huaꞌanëntaꞌhuaso shaꞌhuitërincosoꞌ, huaꞌanëntaponaꞌ. Nopino, Simion, inapita pochin niꞌtonaꞌ, huaꞌanëntaponaꞌ.

⁶ Inapita piquëran huiꞌnahuanpatan, quëmaoranquën nisapi huachi. Inapitasoꞌ Iprain, Manasisi, inapita iyaꞌhuainpita nicaponaꞌ. Ina niꞌtona iin mashonëna noꞌpanëna quëran, inapitantaꞌ, noꞌpaꞌ macaponaꞌ.

⁷ Co topinan napotaranquënhuëꞌ. Mamaparin co aquëtë huaꞌhuaninso marëhuëꞌ, napotaranquën. Quëmanta nani nitotëran: Patan-aran quëran huënantasëhuaꞌ, Canaan parti quëmaquën mama tëparëhuaꞌ. Iporata ninano yaꞌcariya nicasëhuaꞌ, chiminin. Chiminpachina, inaquë chachin ira pirayan paꞌpitërëhuaꞌ. (Ina ninanosoꞌ, ipora marëꞌ Pirin itopi antaꞌ.)

⁸ Ina taꞌsochachin aꞌnanaya Cacoposoꞌ tahuërëtahuaton niꞌpirinhuëꞌ, Cosi huiꞌninpita quënanin. Inapita quënanaton, huiꞌnin natanin: —¿Inpitata isopitasoꞌ? itërin.

⁹ —Isopita mini huiꞌnahuëpita. Yosë nohuanton naroꞌpaꞌ yaꞌhuëtërincosoꞌ, itërin Cosiri. —Amashachin ayaꞌcarico. Noya yaꞌhuëcaiso marëꞌ shaꞌhuichi, itaantarin Cacopori.

¹⁰ Cacoposoꞌ noyá mashoya niꞌton, co huachi ina inahuë quënantërin. Napoaton Cosiri huiꞌninpita ayaꞌcaririn. Napohuachinara, Cacoposo shinpita iporahuaton apinorin.

¹¹ Ina quëran Cosi itapon: —Co huachi onporo tëranta quënanaꞌhuanquënsoꞌ yonquipirahuëꞌ, Yosë nohuanton huiꞌnanpitanta quënanahuë.

¹² Paꞌpin toꞌtopitënquë huiꞌninpita huënsëápirinahuëꞌ, Cosiri ahuanirin. Ahuanirahuaton, paꞌpin notënanquë isonin. Isonin quëran noꞌpaquë huarëꞌ monshorin. Noya nicaton napotërin.

¹³ Ina quëran cato huiꞌninpita chachin manin. Iprainsoꞌ, inchinanën quëran sëꞌquërin. Yaꞌhuërëꞌ Manasisisoꞌ ahuënanën quëran sëꞌquërin. Inapo sëꞌquërin quëran paꞌpin ayaꞌcaririn. Napoaton Iprainsoꞌ, shiin ahuënanën quëran acorin. Yaꞌhuërëꞌ Manansisisoꞌ, shiin inchinanën quëran acorin.

¹⁴ Cacoposo nipirinhuëꞌ, tanpaquënpita chiꞌhuaratahuaton, inchinanën quëran Iprain sëꞌhuamotorin. Manasisiso paninan nipirinhuëꞌ, ahuënanën quëran sëꞌhuamotorin.

^15-16 Inaporahuaton Cosi noya yaꞌhuëcaso marëꞌ iso pochin shaꞌhuitërin: “Shimashonëhuëpita Apraan, Isaco, inapita Yosë natëpi. Canta huaꞌhuatërahuë quëran huarëꞌ ina chachin noya aꞌpairinco. Ina Anquëninën chachin yaꞌipi maꞌsha onporahuë quëran, nichaꞌërinco. Inari chachin isopita huiꞌnapiꞌsa catahuain. Notohuaroꞌ huiꞌninpita yaꞌhuëchinaꞌ. Huaꞌhuayátërahuë, isoroꞌpaquë naꞌainaꞌ. Inapita nicatona piyapiꞌsaꞌ, yonquiꞌinaco. Tata Isaco, tata masho Apraan, inapitanta yonquiꞌinaꞌ,” itërin.

¹⁷ Cosiso nipirinhuëꞌ, paninantërinsoꞌ ahuënan quëran shiini sëꞌhuamotorinsoꞌ niꞌnin. Ina nicaton co noyahuëꞌ cancantërin. Napoaton paꞌpin inchinan imirin masahuaton, Iprain motën quëran chiꞌhuincatërin. Chiꞌhuincatahuaton Manasisi motënquë acotërin.

¹⁸ Inapoapon pochin paꞌpin itapon: —Co tata. ¡Ama inapoquësohuëꞌ! Isocha paninansoꞌ. Inchinan imira quëran, ina sëꞌhuamotoquëꞌ, itërin.

¹⁹ Paꞌpinso nipirinhuëꞌ, co nohuantërinhuëꞌ inapocasoꞌ. Napoaton itapon: —¡Naporin mini conpa, nani nitotërahuë! Manasisinta shinpita quëran panca nacion nisarin. Iyaaꞌhuainso napoaponahuëꞌ, noya noya nicaton shinpita quëran naꞌcon naꞌcon nacionoꞌsa pipiarin.

²⁰ Naporo tahuëri chachin, Cacopori shinpita nóya yonquirapiton iso pochin shaꞌhuitërin: —Israiro nacionquë yaꞌhuëpisopita noya yaꞌhuëcaiso marëꞌ yashaꞌhuitohuachinaꞌ, canpita nininëma yonquiatona iso pochin shaꞌhuitaponaꞌ: “Yosë quëmanta catahuainquën. Iprain, Manasisi, inapita catahuarinso pochachin catahuainquën,” niitaponaꞌ, itërin. Inapoaton, Cacoposo Iprainꞌton acorin. Manasisiso nipirinhuëꞌ, piquëran acorin.

²¹ Ina quëran Cosi tahuërëtahuaton itapon: —Niꞌquëꞌ. Caso chiminapo huachi. Yosëso nipirinhuëꞌ, yaꞌhuëmiataton catahuarinquëmaꞌ. Inari chachin shimashonëma noꞌpanënquë quëpanantaponquëmaꞌ.

²² Quëmasoꞌ yaꞌipi iyaparinpita quëran, panca pancana noꞌpaꞌ quëtëranquën. Siquimo motopi quëtëranquën. Inasoꞌ noꞌpaꞌ, amororoꞌsa ahuëato osërëtërahuësoꞌ, itërin.