Génesis 47 - Chayahuita (Shahui)

¹ Cosisoꞌ, paꞌpin, iinpita, inapita nontahuaton huaraon shaꞌhuitapon paꞌnin: “Tatahuë, iyahuëpita, inapita Canaan parti quëran oꞌmapi. Yaꞌipi ohuicanënapita, ohuacanënapita, maꞌshanënapita, inapitarë chachin oꞌmapi. Nani Cosin parti niquipi,” itërin.

² Ina piquëran aꞌnatërápo iinpita huayonin. Huayonahuaton, huaraoni nohuitacaso marëꞌ quëparin.

³ Naporoꞌ inari natanin: —¿Maquëta canpitaso sacatëramaꞌ? itërin. —Quiyasoꞌ quëma piyapinënpita pochincoi ninai. Shimashonëhuëipita pochachin ohuica pëꞌtahuatonaꞌpiroꞌsacoi.

⁴ Canaan parti yaꞌhuëpiraihuëꞌ, naꞌcon tanarotërai. Pastontaꞌ, ohuicaroꞌsa capacaisoꞌ, yanirin. Napoaton noꞌpanënquë oꞌmarai yaꞌhuapoi. Yosë marëꞌ nohuantëquëꞌ, Cosin parti yaꞌhuëꞌi topiraihuëꞌ, itopi.

⁵ Napotohuachinara, huaraonisoꞌ Cosi itapon: —Yacapainënquënso marëꞌ tataparin, iyaparinpita, inapita oꞌmapi. Nani oꞌmapi niꞌquëhuarëꞌ,

⁶ yaꞌipi Iquipito noꞌpaꞌ huaꞌanëntërahuëquë, noya inapita yaꞌhuëcaisoꞌ. Cosin parti noya noya noꞌpaꞌ ninin. Inaquë yaꞌhuëcaiso marëꞌ quëtëquëꞌ. Aꞌnaquën quëmopinënpita pëꞌtahuatacasoꞌ noyá nitotohuachinaꞌ, caquën pëꞌtahuanëhuëpita, aꞌpaicaiso marëꞌ acoquëꞌ, itërin.

⁷ Ina piquëran Cosisoꞌ, huaraon anohuitacaso marëꞌ paꞌpionta quëparin. Cantontahuaton Cacoposoꞌ, monsho tënin, nontacaso marëꞌ.

⁸ Huaraoni niꞌsahuaton natanin: —¿Onpo piꞌita yaꞌhuëtërinquën? itërin.

⁹ —Nani pasa cara shonca piꞌipi yaꞌhuëtërinco. Co yaꞌhuëmia yaꞌhuëatohuëꞌ, patë patë́rantarahuë. Inapoato naꞌcon parisitërahuë. Shimashonëhuëpitasoꞌ, naꞌcon naꞌcon tahuëri niꞌpi. Co caso inapita icantapohuëꞌ nimara tënahuë, itërin.

¹⁰ Cacoposo nani huaraon nontahuaton, Cosirë chachin paꞌnin huachi.

¹¹ Ina quëran Cosisoꞌ, Iquipitoquë noya noya noꞌpaꞌ nininsoꞌ quëmopinënpita quëtërin. Huaraoni camairinso chachin ninin. Inapoatona Cacoposoꞌ huiꞌninpitarë chachin Namisi parti noꞌpahuanpi. Namisisoꞌ, Cosin itopi antaꞌ.

¹² Naporahuaton Cosisoꞌ, yaꞌipi quëmopinënpita cosharo quëtárin. Panca huënton nininsoꞌ naꞌcon naꞌcon, quëtërin. Caraya nininsoꞌ, piꞌpiyan quëtërin. Inapotërin.

Iquipitoquë onpo sacatacaisoꞌ, Cosi camaitërinsoꞌ

¹³ Co insëquë tëranta trico yaꞌhuërinhuëꞌ. Napoaton naꞌcon naꞌcon tanarotopi huachi. Canaan partiquëntaꞌ, Iquipitoquëntaꞌ, piyapiroꞌsa tanari tiquirarin.

¹⁴ Inaquëpita yaꞌhuëpisopita, Cositaquë trico paꞌanápirinahuëꞌ, niiꞌquianapi huachi. Yaꞌipi coriqui trico marëꞌ pahuërëtopisoꞌ, Cosiso yontonin. Yontonahuaton huaraon pëinënquë taparin.

¹⁵ Cananoꞌsaꞌ, iquipitoroꞌsaꞌ, inapita coriquinëna iꞌquihuachinara, iquipitoroꞌsasoꞌ, Cosi nontapona paꞌpi: —¡Yosë marëꞌ cosharo quëtocoi! Capa niiꞌquianarai huachi. Capa coriqui niꞌton, co huachi cosharo quëtohuatancoihuëꞌ, tana tëpaponcoi quiyasoꞌ. Ina marëꞌ quëmanta co huachi noya nisaranhuëꞌ, itopi.

¹⁶ —¡Naporinchi paya! Capa coriquinëma niꞌquëhuarëꞌ, pëꞌtahuanëmapita nipachin quëcoꞌ. Ina quëpatamaꞌ, trico quëtarainquëmaꞌ, itërin Cosiri.

¹⁷ Napotohuachina iquipitoroꞌsasoꞌ, pëꞌtahuanëna quëshipi: Cahuarionënaꞌ, ohuicanënaꞌ, ohuacanënaꞌ, moranënaꞌ, inapita quëshipi. Inapita marëꞌ naporo piꞌiquë trico canpiatërin.

¹⁸ Ina piꞌi naꞌhuëanatopi. Aꞌna piꞌi maantarinquë naquëranchin iquipitoroꞌsasoꞌ, Cosi paapantapi nontaantacaiso marëꞌ: —Nani quëma nitotëran capa coriqui yaꞌhuëtërincoisohuëꞌ. Yaꞌipi pëꞌtahuanëhuëipitanta canpitanquën ninin. Co huachi maꞌsha tëranta yaꞌhuëtërincoihuëꞌ pahuërëtaꞌhuaisoꞌ. Noꞌpanëhuëíchin yaꞌhuërin. Naporahuaton quiyanta yaꞌhuëarai.

¹⁹ Quiyaora chachin nipachin, noꞌpanëhuëirëꞌcoi paꞌancoi. Ina yaꞌhuërënamën trico quëtocoi. Inapohuatoi huaraon piyapinënpitacoi nisarai. Ina marëꞌ noꞌpanëhuëiquë chachin sacachi. Cosharo quëtohuatancoi, noꞌpanëhuëiquë sacatarai niꞌton, co nitapiarinhuëꞌ. ¡Taquihuatoisoꞌ, noꞌpanëhuëintaꞌ pantatarin. Inapohuatoi, quëmanta co manta canaponhuëꞌ! itopi.

²⁰ Napotohuachinara, Cosiso yaꞌipi iquipitoroꞌsa noꞌpanëna huaraon marëꞌ, paꞌantëraꞌpiarin. Co manta capacaisohuë niꞌton, noꞌpanëna paꞌanaꞌpiapi. Inapopi niꞌton, yaꞌipi Iquipito noꞌpaꞌ, huaraoni huaꞌanëntërin huachi.

²¹ Naporahuaton yaꞌipi Iquipito noꞌpaquë iquipitoroꞌsa yaꞌhuërinsoꞌ, Cosiri paꞌanaton piyapitërin.

²² Corto huaꞌanoꞌsa noꞌpanënáchin co Cosiri paꞌantërinhuëꞌ. Inapitasoꞌ huaraoni topinan trico quëtárin niꞌton, co noꞌpanëna paꞌanacaiso yaꞌhuërinhuëꞌ.

²³ Ina quëran Cosiri piyapiꞌsa itapon: —Iporasoꞌ, huaraon huaꞌanëntërinquëma huachi. Noꞌpanëmanta huaꞌanëntërin. Maꞌtana yaꞌpirin yaꞌhuëarin quëpatomaꞌ, shaꞌcoꞌ.

²⁴ Napoaponahuëꞌ, shaꞌnamasoꞌ nanitohuachin, aꞌnatërápo costaro quëran aꞌna costarora huaraon quëtamaso yaꞌhuërin. Catapini costaroso nipirinhuëꞌ, canpitaora marëꞌ nisarin. Huiꞌnamapita, yacaparinquëmasopita, inapitanta capacaiso marëꞌ nisarin. Naporahuaton ina quëran chachin shacacamaso yaꞌhuërin, itërin.

²⁵ Napotohuachina, inapitaso taantapi: —Noyapaꞌ. Inapochin nisarai. Quëmaso noya piyapinquën niꞌton, tana tëpaincoiso nipirinhuëꞌ, nichaꞌërancoi. ¡Huaraon nipachin piyapichincoi! itopi.

²⁶ Inapoaton Cosi camaitërin yaꞌipi Iquipito noꞌpaquë piyapinënpita maꞌsona nicacaisoꞌ. Shaꞌtopiso nanitohuachina, aꞌnatërápo costaro quëran, aꞌnara huaraon quëtacaiso yaꞌhuërin. Iso quirica ninshitasoco huarëntaꞌ, ina camaitërinsoꞌ, ipora huanta Iquipitoquëso ina chachin nisapi. Corto huaꞌanoꞌsaso nipirinhuëꞌ, co huaraon marëꞌ quëtacaiso yaꞌhuërinhuëꞌ. Inapita noꞌpanënasoꞌ, co huaraoni paꞌantërinhuëꞌ niꞌton, co quëtopihuëꞌ.

Cacopo nohuantërinsoꞌ

²⁷ Israiroꞌsasoꞌ, Iquipito noꞌpaquë yaꞌhuëapi huachi. Cosin parti noꞌpaꞌ mapi. Inaquë yaꞌhuëapona pochin naꞌamiatopi.

²⁸ Cacoposo shonca canchisë piꞌipi, Iquipitoquë yaꞌhuëantarin. Yaꞌipiya quëran pasa catapini shonca canchisë piꞌi icanin.

²⁹ Aꞌna tahuëri Cacoposoꞌ, nani chiminacaso yaꞌcaritërin ninatanin. Napoaton Cosi shaꞌhuitacaso marëꞌ aꞌnara aꞌparin. Huëꞌpachina, itapon: —Tëhuënchachin nosorohuatanco, nohuantërahuësoꞌ niquëꞌ. Ina yanipatansoꞌ, tonaroana sëꞌhuatoco. Sëꞌhuatatonco: “Yoscoarëꞌ nohuantëransoꞌ nisarahuë,” itocoꞌ. ¡Caso chiminpato, ama Yosë marëꞌ isëquë paꞌpitocosohuëꞌ!

³⁰ Shimashonëhuëpita quënanconaꞌhuaso tahuëri nanitohuachinco, Iquipito noꞌpa quëran quëpaco. Quëparahuatonco, inapita poꞌmopiquë, canta poꞌmoontaco, itërin. —Noyapaꞌ. Inapochinquën nipachin, itërin Cosiri.

³¹ —Yoscoarëꞌ inapochinquën itoco, itaantarin paꞌpini. Napotohuachina, Cosisoꞌ: “Yoscoarëꞌ inapotaranquën,” itërin. Ina natanaton, Cacoposo, pëꞌsaranënquë huënsërin. Inaquë huënsërin quëran, “Yosparinquën,” taꞌcaso marëꞌ mónsho tënin.