Génesis 43 - Chayahuita (Shahui)

Mincamin Iquipitoquë quëpapisoꞌ

^1-2 Canaan parti co manta capacaso yaꞌhuërinhuëꞌ niꞌton, aquë aquëtë tanarotapi. Napoaton iꞌhua Iquipitoquë trico paꞌanpisoꞌ pëꞌyapi. Pëꞌyahuachinara, Cacoposoꞌ naquëranchin huiꞌninpita camaiantarin: —Paꞌmantatoma trico paꞌamantacoꞌ, itërin.

^3-5 Napopirinhuëꞌ Cotari itapon: —Coꞌta tata huaꞌan napotërincoisoꞌ, nani shaꞌhuitërainquën: “Coꞌsoꞌ iyaparima huaꞌhua nininso quëmahuatamahuëꞌ, ama oꞌmacosohuëꞌ. Ina quëmama huarëꞌ tahuërëtaranquëmaꞌ,” itërincoi. Iyaꞌhua aꞌpaantohuatancoi, naporo huarëꞌ trico paꞌantomarainquën. Coꞌsoꞌ aꞌpaantohuatancoihuëꞌ, co paꞌmaaraihuëꞌ, itërin.

⁶ —¡Canpitaso paꞌpi co noyahuëꞌ acoramaco! ¿Maꞌmarë chachinta ina quëmapi shaꞌhuitërama aꞌna iyaꞌhua yaꞌhuëtërinquëmasoꞌ? itërin paꞌpini.

⁷ —Naꞌcon natanincoi onpo yaꞌhuëtërëhuasona nininsoꞌ: “¿Nanpiárin tataparimaꞌ?” itahuatoncoi: “¿Aꞌna iyaparimanta yaꞌhuërin?” itomantarincoi. Napo natanpachincoira, topinan aꞌpanitërai. ¡Co quiyasoꞌ nitotëraihuëꞌ: “Iyaparima huaꞌhua nininso quëshimacoi,” itiincoisoꞌ! itopi.

⁸ Naporoꞌ Cotari paꞌpin itaantarin: —Tëhuënchachin tata nanpicasoꞌ nohuantohuatëhuaꞌ, iyaꞌhua aꞌpaquë paꞌi. Cari aꞌpaiarahuë. Aꞌpaantohuatancoi aꞌnaroáchin paꞌsarai. Inapohuatëhuaꞌ, co chiminarihuahuëꞌ. Huiꞌnapoapitantaꞌ, noya nanpiapi.

⁹ Iyaꞌhua paꞌpachin, cari niꞌsarahuë. Maꞌsha onpohuachinsoꞌ, ca anaꞌintoco huachi. Coꞌsoꞌ quëshintahuatënquënhuëꞌ, chiminaquë huarëꞌ naꞌinarahuë.

¹⁰ Iꞌhua chachin napotasënquën aꞌpantërancoi naporini, ¡nani catoro paꞌsahuatoi, huënantaꞌitoihuëꞌ! itërin.

¹¹ Napotohuachina, paꞌpini itapon: —Co onpotacasohuëꞌ niꞌquëhuarëꞌ, isopoco nipachin: Huaꞌan nicanacamaso marëꞌ iso noꞌpaquë maꞌsha noya noyatërinsopita costaronëmaquë quëpacoꞌ: Parsamo nimirio, ninoiꞌ, pimo huaꞌsaiꞌ, pimo yaquiꞌ, tanpapi nitërinsoꞌ, niꞌto nitërinsoꞌ, inapita piꞌpian piꞌpian poꞌmotahuatomaꞌ, quëpacoꞌ.

¹² Coriquintaꞌ, catoroꞌ paꞌanacaso nanirinsoꞌ, quëpacoꞌ. Iꞌhua ayantërinquëmasoꞌ, inaora chachin quëtaantacoꞌ. Tapona tëhuëatonaꞌ, ayantërinënquëmaꞌ.

¹³ ¡Paco nipachin! Iyaꞌhua quëparahuatomaꞌ, huaꞌan nimaantaricoꞌ.

¹⁴ Yosë yaꞌipi nanitaparinsoꞌ nontarahuë catahuainquëmaꞌ. Ina nohuanton huaꞌan nosoroꞌinquëmaꞌ. Simionta nosoroaton ocoiꞌin. Naporahuaton, Mincanta aꞌpaintaꞌin. ¡Canta co huiꞌnahuan mashoco pochin quëparitaꞌhuaso Yosë nohuantohuachin, inapoꞌi nipachin! itërin.

^15-16 Cacopo huiꞌninpitasoꞌ, huaꞌan nicanacaiso nininsopita mapi. Ina masahuatonaꞌ, coriquinta catoro paꞌanacasoꞌ nanirinsoꞌ mapi. Naporahuaton, Mincamin quëparahuatonaꞌ, Iquipitoquë paꞌpi huachi. Cosi yaꞌhuërinquë camahuachinara, nontopi. Cosisoꞌ, Mincamin quëpiso quënanahuaton, piyapinën camairin: —Isopita pëinëhuëquë quëpaquëꞌ. Naporahuaton aꞌnara ohuacaꞌ tëparahuaton, anpiquëꞌ. Ipora camotëchin nisahuasoꞌ, inapitaroꞌco coshatarahuë, itërin.

¹⁷ Napotohuachina, piyapinënsoꞌ ina inachachin ninin. Cosi iinpita ina pëinënquë quëparin.

¹⁸ Napoaponahuëꞌ, inapitaso quëpasoi paꞌyanpi. Paꞌyanatona inahua capini ninontapi: —Nonpintahuatënënpoaꞌ, pëinënquë quësarinpoaꞌ. Iꞌhua coriqui ayantërinpoaso marëꞌ quësarinpoaꞌ. Masahuatënënpoa piyapinënpita pochin asacatarinënpoaꞌ. Moranënpoapitarë chachin asacatarinënpoaꞌ, nitopi.

^19-21 Napoaton Cosi pëinënquë yayaꞌconpachinara, piyapinën itaponaꞌ: —Piꞌpian sinioro nonchinquën topiraihuëꞌ. Iꞌhua chachionta oꞌmapoi, tëhuënchachin trico paꞌanapoi oꞌmarai. Paꞌanahuatoi panantápiraihuëꞌ, huancopi huëꞌëconaiquë, costaronëhuëi iꞌshiritërai. Iꞌshiritopiraihuëꞌ, coriqui pahuërëtëraisoꞌ yaꞌipi chachin costaronëhuëiquë quënanai. Napoaton quëtaantaꞌhuanquëmaso marëꞌ quëmantarai.

²² Incariso acomara, co quiyaso nitotëraihuëꞌ. Aꞌna coriquinta ipora trico paꞌantohuatëinquëmaꞌ, pahuërëtaꞌhuaiso marëꞌ quëmarai, itopi.

²³ Napopirinahuë Cosi piyapinënisoꞌ: —Sano cancantocoꞌ. Ama paꞌyancosohuëꞌ. Naporoꞌ pahuërëtëramasoꞌ, nani manahuë. Yosë chinotëramaso nimara costaronëmaquë acotërinquëmaꞌ. Inachachin tataparimanta chinotërin, itërin. Napotahuaton, Simion tashinan pëi quëran ocoirahuaton quëshirin.

²⁴ Ina quëran, yaꞌipi chachin Cosi pëinënquë poꞌmorin. Inaquë iꞌsha nipaꞌmorantëcaiso marëꞌ quëtërin. Moranënapitantaꞌ, aꞌcarin.

²⁵ Camotëchin Cosirëꞌ coshatacaisoꞌ, nani nitotopi. Napoaton ninapona pochin, nicanacaiso marëꞌ quëshipisoꞌ, taparapi huachi.

²⁶ Cosi canquihuachina, nicanacaiso marëꞌ quëshipisoꞌ quëtopi. Naporahuatonaꞌ, isonpi quëran noꞌpaquë huarëꞌ monshorahuatonaꞌ, moshapi.

²⁷ Cosiri iinpita nontahuaton itapon: —Iꞌhua oꞌmapomaꞌ: ¿Tatahuëi yaꞌhuëarin itëramaco pora? ¿Noya yaꞌhuëarin? ¿Nanpiarin ipora huanta ti? itërin.

²⁸ Inapitasoꞌ mónsho tahuatonaꞌ: —Tatahuëisoꞌ, quëma piyapinën pochin ninin. Noya yaꞌhuëarin. Ipora huanta nanpiárin, itopi.

^29-30 Cosiso yonquitopirinhuëꞌ, Mincamin quënanin. Inaso iyaꞌhuain. Ina yoꞌnanquëranchin nipisoꞌ. Ina tasatahuaton, natanin: —¿Isona: “Iyaꞌhua aꞌna huëshirai” tënamaso ti? itahuaton, iin itapon: “¡Yosë chachin huaꞌhua catahuainquën!” itërin. Napotaso chachin iin niꞌsahuaton, naꞌnëchináchin cancantërin. Napoaton aꞌnaroáchin patoananënquë yaꞌconahuaton, naꞌnërin.

³¹ Naꞌnërinsoꞌ paꞌcotohuachina, nipaꞌmorayaton, pipiantarin. Pipirahuaton piyapinënpita camairin: “¡Oꞌhuinco huachi!” itërin.

³² Cosisoꞌ, aꞌna misaquë nisha oꞌhuintopi. Cacopo huiꞌninpitanta aꞌna misaquë nisha oꞌhuintopi. Iquipitoroꞌsanta Cosirëꞌ coshatopisoꞌ, aꞌna misaquë nisha oꞌhuintopi antaꞌ. Iquipitoroꞌsasoꞌ, iprioroꞌsarëꞌ coshatacaisoꞌ, naꞌin pochin niꞌpi. Napoaton nisha coshatopi.

³³ Cosi iinpitasoꞌ, misaquë yahuënsëhuachinara, Cosiri aꞌnaya aꞌnaya shaꞌhuitërin huënsëcaiso marëꞌ. Paninanꞌton, ahuënsërahuaton, ina quëran niantarinsoꞌ ahuënsërin. Inapotaton, huinshoin nininquë huarëꞌ ahuënsërin. Napoaton: “Piꞌipinënpoa noꞌtëquën tantiarinpoaꞌ,” topi. Napoatona itohuara capini niniꞌpi. Niniꞌsahuatonaꞌ, paꞌyanpi.

³⁴ Cosiso inaora caꞌninso chachin, iinpitanta aꞌcarin. Mincaminso nipirinhuëꞌ oꞌhuintohuachinara, aꞌnapita iinpita quëran naꞌcon naꞌcon acotopi. Nani coshatohuachinara, napopináchin oꞌopi. Inapoatona capa cancantopi.