Génesis 42 - Chayahuita (Shahui)

Cosi iinpitanta Iquipitoquë paꞌpisoꞌ

¹ Iquipitoquë trico paꞌanacaso yaꞌhuërinsoꞌ, Cacopontaꞌ nataantërin. Ina natantahuaton, huiꞌninpita itapon: “¡Co topinan niniꞌsápamaso yaꞌhuërinhuëꞌ!

² Nani shaꞌhuitërinaco Iquipito noꞌpaquë trico paꞌanacaso marëꞌ yaꞌhuërinsoꞌ. Napoaton inaquë paꞌmatomaꞌ, paꞌamacoꞌ. Ama tana tiquiinpoaso marëhuëꞌ inapocoꞌ,” itërin

³ Paꞌpini napotohuachina, Cosi iinpitasoꞌ, shonca yaꞌpi trico paꞌanapona Iquipitoquë paꞌpi.

⁴ Mincaminso nipirinhuëꞌ, paꞌpini co nohuantërinhuëꞌ aꞌpacasoꞌ. Inasoꞌ, Cosi iin miachin. Ina yoꞌnanquëranchin pipipisoꞌ. “Paꞌninquë tapona maꞌsha yaonpoápirinhuëꞌ,” taꞌton, co yaaꞌparinhuëꞌ.

⁵ Cacopo huiꞌninpitasoꞌ, aꞌnapita piyapiꞌsarëꞌ paꞌpi. Yaꞌipi Canaan parti tanarotopi niꞌton, notohuaroꞌ paꞌmapi.

⁶ Nani shaꞌhuitëranquëmaso chachin Cosisoꞌ, huaraon yaꞌhuërënamën yaꞌipi Iquipitoquë camaitarin. Naporahuaton ina camaitohuachina, yaꞌipi parti quëran huëꞌpisopita, trico paꞌantapi. Iinpitanta camahuachinara, nontacaiso marëꞌ isonpi quëran noꞌpaquë huarëꞌ monshorahuatonaꞌ, moshaipi.

⁷ Ipora quënanapon chachin Cosisoꞌ, iinpita nohuitërin. Nohuitaponahuëꞌ, co nohuitërinhuë pochin ninin. Napoaton noꞌhuitatë pochin co yashinhuëꞌ nontërin: —¿Canpita poꞌ? ¿Intoparanta huëꞌnamaꞌ? itërin. —Canaan parti quëran, trico paꞌanapoi oꞌmarai, itopi.

⁸ Cosiriso iinpita nohuitërin. Inapitariso napoaponahuëꞌ, co ina nohuitopihuëꞌ.

⁹ Naporoꞌ Cosisoꞌ, iráca huaꞌnaton iinpita shaꞌhuitërinsoꞌ yonquirin. Ina yonquiaton itapon: —Canpitasoꞌ, nëhuëtonaꞌpirosanquëma tënahuë. Noꞌpanëhuëi insëquësona co noya aꞌpaipinanhuëꞌ niꞌcamaso marëꞌ huëꞌnamaꞌ, itërin.

^10-11 —¡Co sinioro inacoihuëꞌ! Quiyasoꞌ quëma piyapinënpita pochin ninai. Tricoíchin paꞌanapoi oꞌmarai. Ina tataquëranchin yaꞌipicoi ninai. Co onporo tëranta nëhuëtochinaihuëꞌ, itopi.

¹² —Nonpiánamaꞌ. Noꞌpanëhuëi insëquësona co noya aꞌpaipinanhuëꞌ niꞌcamaso marëꞌ huëꞌnama ipora, taantarin Cosisoꞌ.

¹³ Napotopirinhuëꞌ, inapitariso itaponaꞌ: —Quiyasoꞌ quëma piyapinënpita pochin ninai. Yaꞌipiya quëran ina tataquëranchin, shonca catocoi ninai. Canaan parti yaꞌhuërai. Huaꞌhua nininsosoꞌ, tatarëꞌ quëparitërin. Aꞌnaso nipirinhuëꞌ, ayarin, itaantapi.

^14-15 —¡Nani napotëranquëmaꞌ! Canpitasoꞌ nëhuëtonaꞌpiroꞌsanquëma tënahuë. Iyaparima huaꞌhua nininso quëcama huarëꞌ, noꞌtëquën nonamasoꞌ nitotarahuë. Huaraon yaꞌhuërin niꞌton, noꞌtëquën nontaranquëmaꞌ. Co ina quëpatamahuëꞌ, co onporonta isëquëran pipiaramahuëꞌ.

¹⁶ Aꞌnaquëma paaton macontaꞌin. Aꞌnapitanquëmaso nipirinhuëꞌ, tashinan pëi yaꞌcontaramaꞌ. Ina huëꞌpachin, naporo huarëꞌ naporamaso natëaranquëmaꞌ. Coꞌsoꞌ huëꞌpachinhuëꞌ, tëhuënchachin nëhuëtonaꞌpiroꞌsanquëmaꞌ. ¡Huaraon yaꞌhuërin niꞌton, noꞌtëquën nontaranquëmaꞌ! itërin.

^17-18 Cara tahuëri Cosiri iinpita tashinan pëiquëtërin. Inapotopirinhuëꞌ, nontaantarin: —Canta Yosë tëꞌhuatërahuë. Iso pochin nipatamaꞌ, co tëpaaranquëmahuëꞌ.

¹⁹ Tëhuënchachin noya ninaꞌpiroꞌsanquëma nipatamaꞌ, aꞌnaquëma tashinan pëiquë quëparichin. Aꞌnapitanquëmaso nipirinhuëꞌ, quëmopinëma capacaiso marëꞌ trico quëpatomaꞌ, panantacoꞌ.

²⁰ Ina quëran, noꞌtëquën nonamasoꞌ nitotaꞌhuaso marëꞌ, iyaparima huaꞌhua nininso quëshimaco. Coꞌsoꞌ quëmahuatamahuëꞌ tëhuënchachin chiminaramaꞌ, itërin. Napotohuachina: “Noyapaꞌ,” topi.

²¹ Napoaponahuëꞌ, inahua capini ninontopi: —Tëhuënchachin canpoasoꞌ iráca paꞌpi co noyahuëꞌ ninëhuaꞌ. Iyaꞌhua maꞌsha onpotohuatëhuara, nosorochináchin nontopirinpoahuëꞌ, co nosororëhuahuëꞌ. Co napion ancantërinso nicarihuarahuëꞌ, co tahuërëtërëhuahuëꞌ. Napoaton iporasoꞌ canpoantaꞌ, poꞌsarëhua huachi, nitopi.

²² Napohuachinara, Nopinori itapon: —Coꞌta carimaꞌ: ¡Ama napotocosohuëꞌ! itopiranquëmahuëꞌ, co natëramacohuëꞌ. Napoaton iporasoꞌ canpoantaꞌ, tëpatonaꞌpi iꞌhuërëtopiso pochin nitarinënpoaꞌ, itërin.

²³ Inapitasoꞌ, Cosiri yaꞌipi nataninsoꞌ co nitotopihuëꞌ. Iquipito nanan quëráchin nontërin niꞌton, napopi. Nontohuachina, aꞌnari inahua nonpiquë ohuërërin niꞌton, co nitotopihuëꞌ.

²⁴ Iinpita ninapotapiso natanahuaton, Cosiso amashamiachin paꞌsahuaton, naꞌnërin. Naꞌnëiꞌ cacotohuachina, huëantarin. Huëꞌsahuaton iinpita niꞌtonënquë piyapinënpita camairin Simion macatona tonpocaisoꞌ.

²⁵ Ina quëran camaitaantarin: “Costaronënaquë trico poꞌmotocoꞌ. Coriqui pahuërëtopisontaꞌ, inaquë chachin poꞌmoantacoꞌ. Naporahuaton, cosharo caracaiso marënta quëtocoꞌ,” itërin. Camairinso chachin piyapinënpita nipi.

²⁶ Inapotohuachinara, moranënaquë triconëna aꞌmitahuatonaꞌ, yaꞌhuëpiꞌpaꞌ panantapi huachi.

²⁷ Huëꞌëcaiso nininquë canconpachinara, aꞌnasoꞌ, moranën aꞌcacaso marëꞌ costaronën iꞌshiritërin. Inapotopirinhuëꞌ, trico marëꞌ coriqui pahuërëtërinsoꞌ quënanin. Ina quënanaton, paꞌyanin.

²⁸ Paꞌyanaton, iinpita itapon: —Niꞌcochi. ¡Trico marëꞌ pahuërëtërahuësoꞌ, ayantaantarinaco! ¡Costaronëhuëquë chachin quënanahuë! itërin. Iinpitaso natanahuatonaꞌ, paꞌpi paꞌyanpi. Paꞌyanahuatonaꞌ, inahua capini ninontapi: ¡Yosë anaꞌintarinpoa niꞌton, co pahuërëtaponahuëꞌ trico quësarin! Nitopi.

²⁹ Yaꞌhuëpiquë cancontahuachinara, yaꞌipi napopiso paꞌpina shaꞌhuitopi:

³⁰ —Iquipito noꞌpaꞌ huaꞌanquë camahuatoira, co yashinyántërahuëꞌ nontërincoi. “Canpitasoꞌ, nëhuëtonaꞌpiroꞌsanquëma ipora,” itërincoi.

^31-32 Napotopirincoihuëꞌ: “Co quiyasoꞌ inacoihuëꞌ. Co onporonta nëhuëtochinaihuëꞌ. Ina tataquëranchin shonca catocoi ninai. Huaꞌhua nininsoꞌ, Canaan parti tatarëꞌ quëparitërin. Aꞌnaso nipirinhuëꞌ, ayarin,” itërai.

^33-34 Napotohuatoira, itaantarincoi: “Aꞌnaquëma isëquë quëparichin. Aꞌnapitanquëmaso nipirinhuëꞌ, quëmopinëma capacaiso marëꞌ trico quëpatomaꞌ, panantacoꞌ. Napoaponahuëꞌ, iyaparima huaꞌhua nininso quëshimaco. Naporo huarëꞌ co nëhuëtonapiroꞌsanquëmahuë ninamasoꞌ nitotarahuë. Ina nitotohuato, iyaparima quëparitërinsoꞌ ocoitaranquëmaꞌ. Nisahuaton, noya huachi nanitarama iso noꞌpaquë paꞌanamasoꞌ,” itërincoi, itopi.

³⁵ Nani paꞌpina shaꞌhuitahuatonaꞌ, trico ohuatopi. Ohuatohuachinara, Cosi iinpitasoꞌ, aꞌnaya aꞌnaya costaronënaquë, coriquinëna quënaantapi. Tanpanantëaꞌhuayaquë yaꞌhuëarin quënaantapi. Ina quënanatonaꞌ, paꞌpi paꞌyanpi. Paꞌpinanta paꞌyanin.

³⁶ Naporoꞌ Cacopori itapon: —Canpitaso huiꞌnahuëpita tiquitaramaco. Cosi ayarin. Simionta capa. ¡Iporaso Mincanta yaquëpataantaramaco! ¡Yaꞌipi inapita casaꞌ, ahuantaꞌhuaso yaꞌhuërin! itërin

³⁷ Naporoꞌ Nopinori, paꞌpin itapon: —Iyaꞌhua aꞌpahuatan, cari tata aꞌpaiarahuë. Coꞌsoꞌ quëshintahuatënquënhuëꞌ, cato huiꞌnahuëpita nininsoꞌ, nanitëran tëpamasoꞌ, itërin.

³⁸ Cacoposo nipirinhuëꞌ, tapon: —Huiꞌnahuësoꞌ, co onporo paꞌsarinhuëꞌ. Iin mashonën nani chiminin. Inaíchin ina yoꞌnanquëranchin nipisoꞌ yaꞌhuëarin. Paꞌnamaquë ina yaꞌhuërëꞌ maꞌsha onpoantahuachin, caso mashoco, sëto tëpaponco huachi, tënin.