Génesis 41 - Chayahuita (Shahui)

Huaraon huaꞌnahuachina, Cosiri noꞌtëquën shaꞌhuitërinsoꞌ

¹ Oꞌshinaꞌpiroꞌsa huaꞌan, tashinan pëi quëran pipirinsoꞌ nani cato piꞌipitërin. Naporoꞌ huaraon chachionta huaꞌnarin. Niroiꞌ yonsanquë huaniarin nihuaꞌnarin.

² Aꞌnanaya niꞌpirinhuëꞌ, canchisë ohuacaꞌ Niroiꞌ quëran pipirapi niꞌnin. Paꞌpi amoshináchin pipirapi. Iꞌ quëran pipirahuatonaꞌ, shiꞌshinamatëroꞌ huáncana coshatapi.

³ Ina quëran niantapirinhuëꞌ, canchisë chachin Niroiꞌ quëran pipirapi niꞌnin. Inapitasoꞌ capa nishinahuën nansëyaráchin niconpi. Pipirahuatona iꞌ yonsanquë aꞌnapita ohuacaroꞌsa pirayan huanirapi.

⁴ Nicaso chachin, inapitasoꞌ, amoshinoꞌsa pashica taꞌpapi. Inapotatonaꞌ, canchisë chachin pëꞌyaquë huarëꞌ caꞌmiatopi. Naporoꞌ huaraonsoꞌ capayatërin.

⁵ Naquëranchin huëꞌëantapirinhuëꞌ, huaꞌnaantarin. Canchisë trico motoꞌ noya noyatërinsoꞌ aꞌna nanquëáchin nitërin niꞌnin.

⁶ Inapita pirayan, canchisë chachin pipiantarin. Inapitasoꞌ piꞌiri ahuiquitërinso pochin yaꞌnopi.

⁷ Inapitanta noya noyatërinso nipisopita pashica taꞌpapi. Inapotatona pëꞌyaquë huarëꞌ caꞌmiatopi. Naporo chachin huaraonsoꞌ capayataantarin. Capayatahuaton: “Co ipora topinan ina pochin huaꞌnarahuë,” tënin.

⁸ Tashiramiachin huaraonsoꞌ huaꞌnarinso yonquiaton, co napion cancantërin. Napoaton piyapinënpita camairin yaꞌipi Iquipito noꞌpaquë ninotonaꞌpiroꞌsa huëcacaiso marëꞌ. Quirica nitotoroꞌsanta amatërin. Inapita huëꞌpachinara, huaꞌnarinsoꞌ shaꞌhuitërin. Shaꞌhuitopirinhuëꞌ, co incari tëranta nanitërinhuëꞌ maꞌsona tapon huaꞌnarinso shaꞌhuitacaisoꞌ.

⁹ Naporo huarëꞌ oꞌshitonaꞌpiroꞌsa huaꞌan Cosi yonquirin. Ina yonquiaton huaraon itapon: “Ipora huarëꞌ yonquirahuë maꞌsona iꞌhua chachin nicaꞌhuasoꞌ nininsoꞌ.

¹⁰ Quëmasoꞌ chiníquën nanantëran. Caso piyapinënco nipirahuëꞌ shaꞌhuitaranquën. Pan ninaꞌpiroꞌsa huaꞌanoco chachin, iráca noꞌhuitoncoi tashinan pëiquë apoꞌmotërancoi. Inasoꞌ tashinan pëiꞌ, aꞌpairinënquënsopita capitan pëinënquë yaꞌhuërin.

¹¹ Aꞌna tashisoꞌ catocoi chachin huaꞌnarai. Aꞌnaya aꞌnayacoi nisha nisha tapon huaꞌnarai.

^12-13 Inaquë chachin quiyaroꞌcoi aꞌnara iprio huiꞌnapi yaꞌhuëarin antaꞌ. Inasoꞌ ina capitani chachin, asacatacaso marëꞌ paꞌanin. Huaꞌnaraiso shaꞌhuitohuatëira, maꞌsona tapon naporinso noꞌtëquën shaꞌhuitërincoi. Shaꞌhuitërincoiso chachin caso naquëranchin asacataantaranco. Aꞌnaso nipirinhuëꞌ, noninquë ahuënquëconotahuaton atëpatëran,” itërin.

¹⁴ Inapo shaꞌhuitohuachina, copirnoso Cosi macontacaso marëꞌ piyapinën aꞌparin. Aꞌnaroáchin tashinan pëi quëran ocoipi. Cosiso niyaꞌitahuaton, nitaparin. Noya nininsoꞌ aꞌmosahuaton, huaraon nicapon paꞌnin.

¹⁵ Canconpachina, huaraoni itapon: —Caso huaꞌnapirahuëꞌ, co insonta nanitërinhuëꞌ maꞌsona tapon huaꞌnarahuëso shaꞌhuitiincosoꞌ. Quëma tëhuënchinsoꞌ nitotëran, topi natantërahuë, itërin.

¹⁶ —Co caora nohuanton nitotërahuëꞌ. Quëma piyapinënco niꞌto, Yosë chachin anitotohuachinco, shaꞌhuitaranquën. Maꞌsona noya nicacaso marëꞌ, shaꞌhuitaranquën, itërin.

¹⁷ Napotohuachina huaraoni itapon: —Huëꞌëhuëquë Niroiꞌ yonsanquë huaniárahuë huaꞌnarahuë.

¹⁸ Naporo chachin, canchisë ohuacaꞌ paꞌpi amoshináchin nipisopita, iꞌ quëran pipirapi. Pipirahuatona shiꞌshinamatëroquë coshatapi niꞌnahuë.

¹⁹ Ina quëran canchisë chachin pipiantapi niantarahuë. Capa nishinahuën nansëyaráchin pipirapi. ¡Co onporo tëranta yaꞌipi Iquipitoquë ina pochin nipisopita niꞌchinahuëꞌ!

²⁰ Nicasoco chachin, inapitasoꞌ, amoshinoꞌsa pashica taꞌpapi. Inapotatona canchisë chachin, pëꞌyaquë huarëꞌ caꞌmiatopi.

²¹ Pëꞌyaquë huarëꞌ caponaraihuëꞌ, co manta caꞌpisohuë pochin yaꞌnopi. Naporo capayatërahuë.

²² Huëꞌëantapirahuëꞌ, naquëranchin huaꞌnaantarahuë: Huëꞌëhuëquë Canchisë trico motoꞌ noya noyatërinsoꞌ aꞌna nanquëáchin nitërin niꞌnahuë.

²³ Inapita pirayan, canchisë chachin pipiantarin. Inapitasoꞌ piꞌiri ahuiquitërinso pochin yaꞌnopi.

²⁴ Inapitarinta noya noyatërinso nipisopita pashica taꞌpapi. Inapotatona pëꞌyaquë huarëꞌ caꞌmiatopi niꞌnahuë. Ninotonaꞌpiroꞌsa shaꞌhuitopirahuëꞌ, co insonta nanitërinhuëꞌ maꞌsona tapon naporinsoꞌ, shaꞌhuitiinacosoꞌ, itërin.

²⁵ Napotohuachina, Cosiri huaraon itapon: —Caso quëma piyapinënco nipirahuëꞌ, shaꞌhuitaranquën: Catoro huaꞌnaransoꞌ, aꞌnaíchin tapon huaꞌnaran. Ina quëran Yosë chachin anitotërinquën maꞌsona ina nicacasoꞌ yonquirinsoꞌ.

²⁶ Canchisë ohuacaꞌ noyápiachin nipisopita, canchisë piꞌipi tapon huaꞌnaran. Canchisë trico motoꞌ noyápiachin nipisopitantaꞌ, ina chachin tapon naporin.

²⁷ Canchisë ohuacaꞌ capa nishinahuën nansëyaráchin nipisontaꞌ, huaꞌnaran. Inapitasoꞌ, amoshinoꞌsa piquëran pipipi. Inapitanta canchisë piꞌipi chachin tapon naporin. Ina pochachin noya noyatërinsoꞌ trico motoꞌ pirayan, canchisë chachin papoantarin huaꞌnaran. Piꞌiri ahuiquitërinso pochin yaꞌnopisopitantaꞌ, ina chachin anitotërinpoaꞌ.

²⁸ Napotëranquënso chachin mini nisarin. Piyapinënco nipirahuëꞌ, Yosë maꞌsona yanininso nani shaꞌhuitëranquën.

²⁹ Yosë nohuanton canchisë piꞌipi iso Iquipito noꞌpaquë nani maꞌsha noya noyatapon. Co manta pahuanaponhuëꞌ.

^30-31 Ina piquëranso nipirinhuëꞌ, canchisë piꞌipi chachin panca tanarotapi. Napoaton co huachi inso tërantaꞌ, Iquipito noꞌpaquë noya yaꞌhuërinso yonquiarinhuëꞌ. Paꞌpi pahuantomiatapi niꞌton, co huachi iso noꞌpaquë noya yaꞌhuaponahuëꞌ.

³² Caso piyapinënco nipirahuëꞌ shaꞌhuitaranquën. Nani Yosë yonquirin inapocasoꞌ. Naporahuaton co huaꞌquiya quëranhuëꞌ naniarin. Napoaton ina nohuanton, catoro inachachin huaꞌnaran.

^33-34 Inapocaso niꞌton, aꞌnara quëmapi yonquínahuan niꞌton, noyá nitotërinsoꞌ yoníquëꞌ. Yaꞌipi iso noꞌpanënquë yaꞌhuëpisopita camaicaso marëꞌ acoquëꞌ. Naporahuaton, chirinchiroꞌsa acoquëꞌ yaꞌipi huaꞌanëntëranquë paꞌinaꞌ. Cosharo yontonacaiso marëꞌ paꞌinaꞌ. Noya noyatacaisoꞌ piꞌipiroꞌsaquë yontoinaꞌ. Aꞌnatërápo costaro quëran, aꞌna costarora maꞌpachinaꞌ. Yaꞌipi Iquipito noꞌpaquë inapoꞌinaꞌ.

³⁵ Naporoꞌ piꞌipiroꞌsaquë trico yontonpisoꞌ, niquë tapainaꞌ. Quëma chachin anitotahuatënën, ninanoroꞌsaquë tapainaꞌ. Tanaro tahuëriꞌsa canquihuachina, capacaiso marëꞌ inapoꞌinaꞌ.

³⁶ Inapohuachinaꞌ, Iquipito noꞌpaquë trico tapapinan yaꞌhuapon. Canchisë piꞌi tanarotacaiso canquihuachina, ina caꞌsapi huachi. Ina capatonaꞌ, yaꞌipi iso noꞌpaquë yaꞌhuëpisopita co chiminaponahuëꞌ, itërin.

Copirno yaꞌhuërënamën camaitacaso marëꞌ Cosi acopisoꞌ

³⁷ Cosi yonquirinso natanahuatonaꞌ, huaraonso huaꞌanoꞌsapitarë chachin: “¡Ma nóyacha yonquirin paya!” topi.

³⁸ Napoaton huaraonsoꞌ piyapinënpita itapon: —Iso quëmapisoꞌ, Yosë ispiritonëni chachin yaꞌcoancantërin. Co onporonta aꞌna quëmapi iso pochin nininsoꞌ ina sacato nicacaso marëꞌ quënanarihuahuëꞌ, tënin.

^39-40 Piyapinënpita napotahuaton, Cosi itapon: —Co aꞌna quëmapi quëmá quëran yonqui yonquínahuan niꞌton, noya noya nitotërinso yaꞌhuërinhuëꞌ. Yosë chachin yaꞌipi inapita anitotërinquën. Napoaton carinquën acoaranquën pëinëhuëquë, yaꞌhuërënamëhuë camaitacaso marëꞌ. Yaꞌipi piyapinëhuëpitanta natëinënquënso yaꞌhuërin. Copirnoco niꞌto, casáchin quëmá quëran chini chiníquën nanantarahuë.

⁴¹ Niꞌquëꞌ. Ipora tahuëri carinquën acoaranquën yaꞌhuërënamëhuë yaꞌipi Iquipito noꞌpaꞌ huaꞌanëntacaso marëꞌ, itërin.

⁴² Napotahuaton huaraonsoꞌ, imisirinquë sicho poꞌmoitëranën poꞌmorinsoꞌ ocoirin. Ina ocoirahuaton Cosi imisirinquë poꞌmotërin. Inapotahuaton, piyapinënpita camairin: “Noya noya rino piꞌshi quëran nëꞌmëtë nipisoꞌ aꞌmotocoꞌ. Naporahuaton, osëtë oro quëran nipisoꞌ, apëꞌpëconotocoꞌ.

⁴³ Ina quëran, toronanëhuëquë paꞌpatora, imaquirinso toronanquë ananpëcoꞌ. Inapotahuatomaꞌ, quëpacoꞌ. Ina quëpasëmaꞌ, piyapinëhuëpitari chiníquën shaꞌhuiinaꞌ: ‘¡Isoncoꞌ!’ tëraꞌinaꞌ,” itërin. Ina pochin copirnori Cosi acorin yaꞌipi Iquipito noꞌpaquë, camaitacaso marëꞌ.

⁴⁴ Ina piquëran huaraoni Cosi itaantapon: —Ca mini copirnocoso nipirahuëꞌ, co inso tëranta iso noꞌpaquë inaora nohuantërinsoꞌ nisarinhuëꞌ. Naniyarin quëran huarëꞌ maꞌsona nicacaisoꞌ, quëma camaitaran, itërin.

⁴⁵ Copirnori, Cosi Iquipito nananquë nisha nininën acotërin: Sahuinato-paniya, itërin. Naporahuaton Potihuira huiꞌnin Asina itopisoꞌ acoantërin. Potihuirasoꞌ, On ninanoquë corto huaꞌan yaꞌconin. Ina pochin Cosi, yaꞌipi Iquipito noꞌpaꞌ huaꞌanëntacaso marëꞌ acopi.

⁴⁶ Cosi cara shonca piꞌipitohuachina, Iquipito copirno marëꞌ caniaritërin sacatacasoꞌ. Nani acohuachina, huaraon nontahuaton caniaritërin yaꞌipi Iquipito noꞌpaꞌ paꞌtacasoꞌ.

⁴⁷ Canchisë piꞌipi noya noyatacaisoꞌ piꞌipiroꞌsaquë, huaꞌhuayátërahuë cosharo noyatërin.

⁴⁸ Cosiri yaꞌipi trico tapacaiso nininsoꞌ, maꞌpatërin. Maꞌpataton, ninanoroꞌsaquë taparin. Canchisë piꞌipi naporin. Nani ninanoroꞌsaquë trico taparin. Ina pirayan iminoꞌsaquë shaꞌpisopita mapisoꞌ, taparin.

⁴⁹ Paꞌpi notohuaroꞌ trico Cosiri ayontonin. Marë yonsanquë inotëraꞌhua yaꞌhuërinso pochin ayontonin. Paꞌpi notohuaroꞌ niꞌton, pichirápirinahuëꞌ, co onpo pichichináchinhuëꞌ nipachina, tananpitopi huachi.

⁵⁰ Coꞌhuara tanarotacaiso caniarichátërasohuëꞌ, Cosiso cato huiꞌninpita yaꞌhuëtërin.

⁵¹ Paninansoꞌ Manasisi itërin: “Yosë chachin parisitërahuësoꞌ, quëmopinëhuëpita, inapita ananiantërinco,” taꞌton, ina pochin huiꞌnin nohuitërin.

⁵² Ina quëran niantarinsosoꞌ, Iprain itërin. “Yosë nohuanton parisitërahuëso noꞌpaquë chachin noya noya acorinco,” taꞌton ina pochin huiꞌnin nohuitërin.

⁵³ Canchisë piꞌipi Iquipitoquë maꞌsha noya noyatacaisoꞌ piꞌipiroꞌsaꞌ, naꞌhuërin huachi.

⁵⁴ Naporoꞌ Cosi naporinso chachin, tanarotacaiso caniaritërin. Canchisë piꞌipi chachin naporin. Yaꞌipi aꞌnapita noꞌparoꞌsaquëntaꞌ, tanarotopi. Iquipitoquëráchin cosharo tapapinan yaꞌhuërin.

⁵⁵ Iquipito yaꞌhuëhuanoꞌsanta cosharori pahuantohuachinara, huaraon paapapi. Trico natanacaiso marëꞌ paapapi. Natanpachinara, huaraoni yaꞌipi iquipitoroꞌsa itapon: “Paatomaꞌ, Cosi nontooncoꞌ. Maꞌsona itohuachinquëmaꞌ, ina nicoꞌ,” itërin.

⁵⁶ Yaꞌipi Iquipito noꞌpaquë piyapiꞌsa tanarotacaiso caniaritohuachina, Cosiso chirinchiroꞌsa camairin: “Cosharo taparëhuaso pëiroꞌsa iꞌsoatatomaꞌ, yaꞌhuëhuanoꞌsa paꞌantocoꞌ,” itërin. Aquë aquëtë tanarotapi niꞌton, paꞌantapi huachi.

⁵⁷ Naporahuaton yaꞌipi parti quëran huëꞌsapi. Cosi trico taparinsoꞌ paꞌantacaiso marëꞌ Iquipitoquë huëꞌsapi. Co inso noꞌpaquë tërantaꞌ, cosharo noyatërinhuëꞌ niꞌton, naporapi huachi.