Génesis 4 - Chayahuita (Shahui)

Atan yaꞌnan huiꞌninpita napopisoꞌ

¹ Atan saꞌin huaꞌhuanpachina, quëmapiaꞌhuaya huairin. “Yosë catahuarinco niꞌton, quëmapiaꞌhuaya huaꞌhuanahuë huachi,” taꞌton, nininën acotërin. Caino itërin.

² Ina quëran huaꞌhuaantarin. Quëmapi chachin huaiaantahuachina, Apiri itërin. Huiꞌnapitohuachinara, Apiriso ohuicaroꞌsa pëꞌtahuarin. Cainoso nipirinhuëꞌ, imin camayo.

³ Aꞌna tahuëri cato chachin ofrenda quëcatonaꞌ, Yosë chinotapi. Cainosoꞌ, shaꞌninso quëran Yosë chinotacaso marëꞌ quënin.

⁴ Apiriso nipirinhuëꞌ, ohuicanënpita yaꞌnan huaꞌhuatopiso quënin. Amo amoshin nininsopita Yosë chinotaton tëpacaso marëꞌ quënin. Yosëso Apiri nóya niꞌnin. Ofrendanëonta nóya niꞌnin.

⁵ Cainoso nipirinhuëꞌ, co noyahuëꞌ niꞌnin. Ofrendanëonta co noyahuëꞌ niꞌnin. Ina marëꞌ Cainosoꞌ, paꞌpi noꞌhuitërin. Noꞌhuitaton, aquinorárin.

⁶ Ina nicaton, Siniorori itapon: “¿Onpoatonta noꞌhuitaton aquinoráran? ¡Ama huachi noꞌhuitëquësohuëꞌ!

⁷ Noya ninan naporini, noya cancanchitonhuëꞌ. Nipirinhuëꞌ, co nohuantëranhuëꞌ noya nicacaso niꞌquëhuarëꞌ, co noyahuëꞌ nisápaso marëꞌ oshanën minsëarinquën. Ina nipirinhuëꞌ, noya nipatan, nanitëran ina minsëcasoꞌ,” itërin.

⁸ Natanaponahuëꞌ, co yanatëtërinhuëꞌ. Aꞌna tahuëri iin itapon: —Huëquë iyara iminquë paꞌa, itërin. Inaquë canconpachinara, iin ahuëaton, tëparin.

⁹ Siniorori nitotaton, Caino itapon: —¡Maꞌsona iyaya onporinsoꞌ, shaꞌhuitoco! itërin. Napotohuachina, Cainoso tapon: —Co nitotërahuëꞌ. ¡Co ina aꞌpairápaꞌhuaso yaꞌhuërinhuëꞌ! itërin.

¹⁰ Napotohuachina, Siniorori itapon: —¿Onpoatonta naporan? Iyaya tëpaton, paꞌpi co noyahuëꞌ ninan. Huënainën aꞌpatëran niꞌton, co huachi noya yaꞌhuëcamaso marëhuëꞌ shaꞌhuitaranquën.

¹¹ Iyaꞌhua tëparanso marëꞌ paꞌpi co noyahuëꞌ niꞌnanquën. Huënainënquë noꞌpaꞌ asëꞌcotëtëran niꞌton, ocoiaranquën.

¹² Iminaton, shaꞌtopiranhuë tërantaꞌ, co huachi noyatarinhuëꞌ. Co huachi yaꞌhuëmia yaꞌhuaponhuëꞌ, patë patë́rantapon. Co huachi sano cancantaranhuëꞌ, itërin.

¹³ —¡Maꞌhuantacha nisarahuë paya! Co ahuantochináchinhuëꞌ anaꞌintaranco.

¹⁴ Ipora tahuëri iso roꞌtë quëran ocoiaranco. Co huachi yaꞌhuëmia yaꞌhuapohuëꞌ, patë patë́rantaꞌhuaso yaꞌhuërin. Co huachi sano cancantaꞌhuaso yaꞌhuaponhuëꞌ. Co chinotaꞌhuanquënso tëranta nanitapohuëꞌ. Napoaton inso tëranta quënanpachinco, tëpaponco tënahuë, itërin Cainori.

¹⁵ —Insosona tëpahuachinquën, inanta naꞌcon naꞌcon anaꞌintacaso yaꞌhuërin. Canchisëro anaꞌintacaso yaꞌhuërin, itërin Siniorori. Napotahuaton marca acotërin. Quënanpachina ama tëpacaiso marëhuëꞌ, inapotërin.

¹⁶ Ina quëran Caino paꞌnin. Yosë quëran pipirahuaton, Noto parti yaꞌhuëconin. Inaso noꞌpaꞌ, Itin quëran piꞌi pipirinso parti quëparitërin.

Caino shinpita napopisoꞌ

¹⁷ Caino saꞌapachina, huiꞌnahuanin. Huiꞌnin nasitohuachina, Inoco itërin. Ina quëran Caino ninano ocoihuachina: “Inoco ninanoꞌ,” itërin.

¹⁸ Inoco huiꞌnahuanpachina, Irato itërin. Iratonta huiꞌnahuanpachina, Miocairo itërin. Miocairo yaꞌhuërëꞌ huiꞌnahuanpachina, Mitosairo itërin. Mitosaironta huiꞌnahuanpachina, Namico itërin.

¹⁹ Namicosoꞌ, cato saꞌahuanin. Aꞌnasoꞌ, Ata itopi. Aꞌnantaꞌ, Sira itopi.

²⁰ Ataso huaꞌhuanpachina, Caparo itopi. Caparo shinpitasoꞌ pëꞌtahuatonaꞌpiroꞌsaꞌ. Napoaton nëꞌmëtë pëiroꞌsaquë yaꞌhuëpi.

²¹ Caparosoꞌ, aꞌnara iyaꞌhuain yaꞌhuëtërin, Coparo itopisoꞌ. Coparo shinpitasoꞌ, arpa míso piꞌnipi. Nisha nisha pirinaonta míso pihuipi.

²² Siraso nipirinhuëꞌ, huaꞌhuanpachina, Toparo-caino itopi. Inasoꞌ, huaꞌna camayo yaꞌconin. Huaꞌnamia nitotahuaton, shaꞌpi huaꞌnanta nitotërin. Toparo-cainosoꞌ, aꞌnara oshin yaꞌhuëtërin, Naama itopi.

²³ Aꞌna tahuëri Namicosoꞌ, saꞌinpita itapon: “Natanquë Ata. Quëmanta Sira, noya natanco shaꞌhuichinquëmaꞌ: Aꞌna quëmapi tëparahuë pëꞌsharincoso marëꞌ. Huiꞌnapi nipirinhuëꞌ, ahuërincoso marëꞌ napotërahuë.

²⁴ Iin tëparinso marëꞌ Caino tëpahuachinasoꞌ, canchisëro aquëtë Yosëri iꞌhuërëtapon. Caso nipirinhuëꞌ, tëpatërahuëso marëꞌ tëpahuachinaco, canchisë shonca canchisëro aquëtë iꞌhuërëtacaiso yaꞌhuërin,” itërin.

Sito nasitërinsoꞌ

²⁵ Oshaquëran Atan saꞌin, huaꞌhuaantahuachina, Sito itërin. “Cainori tëparinso yaꞌhuërënamën Yosë quëtaantarinco,” taꞌton, ina pochin nininën acotërin.

²⁶ Sitonta huiꞌnahuanpachina, Inosë itërin. Naporo quëran huarëꞌ piyapiroꞌsa caniaritopi Yosë chinotatonaꞌ, “Sinioro” itacaisoꞌ.