Génesis 39 - Chayahuita (Shahui)

Huaꞌan saꞌini, Cosi apirinsoꞌ

¹ Shaꞌhuitëranquëmaso chachin Cosisoꞌ, Ismairo nicatonoꞌsari Iquipito noꞌpaquë quëpapi. Inaquë aꞌnara Iquipito quëmapi Potihuaro itopisoꞌ paꞌantopi. Inasoꞌ, Iquipito copirnori catahuacaso marëꞌ acorin. Capitan yaꞌconaton, copirno aꞌpaipisopita sontaroꞌsa camairin.

² Cosiso napotopirinahuëꞌ, Siniorori co naniantërinhuëꞌ. Inari catahuarin niꞌton, huaꞌanën pëinënquë noya yonquiaton yacapatërin. Noya nicaton, noya yaꞌhuërin.

³ Cosisoꞌ, Yosëri catahuarin. Huaꞌanëni ina nicaton: “Nani maꞌsha Cosi nipachina, Yosëri catahuarin niꞌton, noya pipitërin,” tënin.

⁴ Napoaton paꞌyatërin. Paꞌyataton, acorin catahuacaso marëꞌ. “Maꞌpitasona ninahuëquë, quëma catahuaponco,” itërin. Naporahuaton, yaꞌipi piyapinënpita camaiaton asacatacaso marëꞌ acorin. Yaꞌipi maꞌshanënpitanta aꞌpaicaso marëꞌ acorin.

⁵ Ina acorin quëran huarëꞌ, Siniorori Potihuaro catahuamiatërin. Cosi noya nicaton, napotërin. Pëinënquënta maꞌsha nipachina catahuarin. Iminënquënta sacatohuachinaꞌ, shaꞌtopisoꞌ noya noyatërin.

⁶ Cosiri yaꞌipi maꞌshanënpita noya aꞌpaitërin niꞌton, co huachi maꞌmarë tëranta yonquiárinhuëꞌ. Topinan noya coshatárin huachi. Cosisoꞌ, noyapin noyapin niꞌtomantarin niꞌton, yaꞌipi quëran paꞌyatopi.

⁷ Napoaton co huaꞌquiya quëranhuëꞌ, huaꞌanën saꞌini niꞌsárin quëran noyarin huachi. Aꞌna tahuëri itapon: —Huëquë paꞌa quëmasoꞌ inapoquëꞌ, itërin.

⁸ Napotopirinhuëꞌ, Cosiso co piꞌpisha tëranta nohuantërinhuëꞌ. Napoaton itapon: —Niꞌquë siyora, piꞌpian shaꞌhuichinquën topirahuë: Huaꞌanëhuë yaꞌipi yaꞌhuëtërinsopita aꞌpaiaꞌhuaso marëꞌ acorinco. Cari yaꞌipi aꞌpaiarahuë niꞌton, co maꞌmarë tëranta yonquiárinhuëꞌ. Natërinco niꞌton, sano cancantërin.

⁹ Chini chiníquën nanan quëtërinco iso pëiquë camaitaꞌhuaso marëꞌ. Naporahuaton, huaꞌanëhuë co maꞌsha tëranta apiratërincohuëꞌ. Quëmasáchin tëhuënchinsoꞌ saꞌinquën niꞌton, apiratërinco. Napoaton, co caso piꞌpian tëranta nohuantërahuëꞌ paꞌpi co noyahuëꞌ nininsoꞌ nicacaꞌhuasoꞌ. ¡Naporahuaton quëmarëꞌco ninahuë naporini, co Yosë natëtohuëꞌ, paꞌpi oshahuaintohuëꞌ! itërin.

¹⁰ Napotopirinhuëꞌ, sanapiriso Cosi ichiquëhuënacaso marëꞌ nani tahuëri apisárin. Inaso napoaponahuëꞌ, co piꞌpisha tëranta nohuantërinhuëꞌ.

^11-12 Aꞌna tahuëriso nipirinhuëꞌ, Cosi pëiquë sacatapon yaꞌconin. Naporoꞌ co aꞌnapita yaꞌhuëasoihuë niꞌton, sanapiso Cosi soꞌhuianarinso matërin. Inapotaton: —Huëquë paꞌa quëmaso inapoquëꞌ, itërin. Napotopirinhuëꞌ, Cosiso nisoꞌhuianatërinso paꞌcoirahuaton, taꞌarin.

^13-15 Ina patërinso niꞌsahuaton, sanapiso yanonpinin. Yanonpinaton chiníquën huiyo tënin. Aꞌnapita piyapinënpita përacaso marëꞌ naporin. Huëꞌpachinara, itapon: —¡Niꞌcochi isoꞌ! Soꞌyahuë aꞌnara iprio piyapi quëshiantërinpoa tapiinpoaso marëꞌ. Yaꞌconahuaton masapirincohuëꞌ, canpita huëcacamaso marëꞌ caso chiníquën huiyo tënahuë. Ina natanaton, taꞌarëꞌnachin pipirin. ¡Nisoꞌhuianatërinsontaꞌ, patërin! itërin.

¹⁶ Piyapinënpita napotahuaton, Cosi nisoꞌhuianatërinsoꞌ taparin. Soꞌin huëcaquë huarëꞌ taparin.

^17-18 Ina huëꞌpachina, piyapinënpita shaꞌhuitërinso chachin inanta shaꞌhuitërin: —Iprio piyapi quënansoꞌ, patoananëhuëquë yaꞌconahuaton masapirincohuëꞌ. Chiníquën huiyo topatora, aꞌporahuatonco taꞌarin. Nisoꞌhuianatërinsontaꞌ, patërin.

¹⁹ ¡Inapotërinco piyapinën! itërin. Saꞌini shaꞌhuitërinsoꞌ natanahuaton, Cosi huaꞌanënso paꞌpi noꞌhuitërin.

²⁰ Cosi macacaiso marëꞌ piyapinënpita camairin. Nani mapachinara, tashinan pëiquë poꞌmopi. Copirno tëhuëtopisopita yaꞌhuëapiquë poꞌmopi.

²¹ Tashinan pëiquë poꞌmopirinahuëꞌ, Siniororisoꞌ co Cosi naniantërinhuëꞌ. Nosoroaton catahuaantarin niꞌton, tashinan pëi huaꞌani, noya nicaton paꞌyatërin: “Cosisoꞌ, nóya huiꞌnapi,” taꞌton, noya niꞌnin.

²² Napoaton catahuacaso marëꞌ acorin: “Quëmari aꞌnapita prisoroꞌsaꞌ, aꞌpaiaran,” itërin. Napoaton Cosi camaitërinsoráchin tashinan pëiquësoꞌ, prisoroꞌsa nipi.

²³ Cosi camaitohuachina tashinan pëiquë, noyasáchin sacatopi. Napoaton tashinan pëi huaꞌansoꞌ, co huachi Cosi sacatërinsoꞌ niꞌsárinhuëꞌ: “Siniorori chachin Cosiso catahuarin niꞌton, maꞌsona nipachina, noya pipitërin” taꞌton, naporin.