Génesis 37 - Chayahuita (Shahui)

¹ Cacoposo nipirinhuëꞌ, Canaan parti quëparitërin yaꞌhuëcaso marëꞌ. Paꞌpincontaꞌ inaquë chachin yaꞌhuëaponahuëꞌ, co huaꞌquiyahuëꞌ yaꞌhuërin.

Cosi, iinpitarë chachin napopisoꞌ

² Cacopo huiꞌninpita naporinso shaꞌhuichinquëma nitotocoꞌ. Cosi shonca canchisë piꞌipitapon pochin, iinpitarë chachin paꞌpin ohuicanënpita aꞌpairin. Paꞌpin cosonanënpita: Pira, Siripa, inapita huaꞌhuinpitarëꞌ aꞌpairin. Iinpitaso co noyahuëꞌ nipi niꞌton, Cosisoꞌ paꞌpinquë yáshaꞌhuirapirin.

³ Cacoposoꞌ aꞌnapita huiꞌninpita quëran, Cosi naꞌcon naꞌcon nosororin. Nani másho nicaquë huarëꞌ, Cosiso huaꞌhuatërin niꞌton, nosoromiatërin. Napoaton aꞌmocaso marëꞌ noyápiachin nininsoꞌ nitërin.

⁴ Iinpitariso nipirinhuëꞌ, paꞌpini ina naꞌcon naꞌcon nosororinsoꞌ nicatonaꞌ, co quëꞌyapihuëꞌ. Co quëꞌyatonaraihuëꞌ, co nanitopihuëꞌ noya nontacaisoꞌ.

^5-7 Aꞌna tashi Cosi huaꞌnarin. Tahuëririnquë, iinpita shaꞌhuitërin: —Natanco iyaroꞌsa huaꞌnarahuëso shaꞌhuichinquëmaꞌ: Huëꞌëhuëquë, iminquë yaꞌipinpoa trico masarëhuaꞌ. Manëhuasonta tonporarëhua niꞌnahuë. Aꞌnanaya ca tonporahuësosoꞌ, huanirin. Canpita tonporamasoso nipirinhuëꞌ, ca tonporahuësoꞌ mosharapi. Yaꞌipi tahuitatonaꞌ, monshopi quëran mosharapi, itërin. Ina natanahuatonaꞌ, iinpitariso aquë aquëtë noꞌhuipi.

⁸ Napohuachina, inapitari itapon: —Huaꞌan yaꞌconpato iyahuëpita camaiyápo ¿tocomaranquën ti? ¡Catoroꞌ quëma camaiyáponcoi! itopi. Huaꞌnarinso marëpita naꞌcon naꞌcon noꞌhuipi. Shaꞌhuihuachina, co yainhuëꞌ natanpi.

⁹ Ina piquëran Cosisoꞌ, huaꞌnaantarin. Naporonta iinpita shaꞌhuitaantarin: —Natanco iyaroꞌsa aꞌna huaꞌnaantarahuëso shaꞌhuitaantaꞌinquëmaꞌ. Huaꞌnato niꞌpirahuëꞌ, piꞌi, yoqui, shonca aꞌna tayoraroꞌsaꞌ, inapita monshorahuatona moshararinaco niꞌnahuë, itërin.

¹⁰ Cosi ina huaꞌnarinsoꞌ, paꞌpin iinpita inapita shaꞌhuitohuachina, paꞌpini pënënaton itapon: —¿Maꞌta tapon inapochinpita huaꞌna huaꞌnamantaransoꞌ? Napoahuarëꞌ mamaparin, iyaparinpita, ca chachiontaꞌ ¿aꞌna tahuëri moshaponquën ti? itërin.

¹¹ Iinpitariso noyapatonaꞌ, aquë aquëtë noꞌhuirápi. Paꞌpinso nipirinhuëꞌ, huiꞌnin naporinso naꞌcon yonquirárin.

Cosi paꞌanpisoꞌ

¹² Aꞌna tahuëri Cosi iinpitasoꞌ, Siquimo ninano yaꞌcari paꞌpi. Paꞌpina ohuicanënpita, chiponënpita inapita quëpapi pasto yonitona aꞌcacaiso marëꞌ.

¹³ Naporoꞌ paꞌpini Cosi itapon: —Niꞌquë conpa. Iya mashoroꞌsa Siquimo yaꞌcari yaꞌhuëapi. Inaquë ohuicaroꞌsaꞌ, chiporoꞌsaꞌ, inapita aꞌpairapi. Paaton niꞌcontaquë topirahuë, itërin. —Noya tatapaꞌ. Paꞌi nipachin, itërin.

¹⁴ —Inta conpa. Paꞌsahuaton iyamashoroꞌsa niꞌcontaquëꞌ. Ohuicaroꞌsaꞌ, chiporoꞌsaꞌ, inapitanta onpoinsona nisapisoꞌ, nahuicontaquëꞌ. Ina quëran huëꞌsahuaton, onpoapisona shaꞌhuitiico canta nitochi, itërin. Cacoposo Ipron motopianaroꞌsa quëran, Cosi aꞌparin. Inaso paꞌsápaton Siquimoquë canconin.

¹⁵ Ina parti chihuëaton paꞌsápirinhuëꞌ, aꞌna quëmapiri quënanahuaton itapon: —¿Maꞌta yonisaran?

¹⁶ —Iyahuëpita yonisárahuë taꞌa. ¿Co pora nitotëranhuëꞌ insëquësona pëꞌtahuanëna aꞌpaiyapiso to? itërin.

¹⁷ —Nani isëquëran paꞌpi: “Totanquë paꞌahuaꞌ,” niitapi pora, itërin. Cosiso paꞌsápaton, Totan ninano yaꞌcariya iinpita quënanconin.

¹⁸ Inapitarintaꞌ, áquë quëran Cosi quënanpi. Quënanahuatonaꞌ, coꞌhuara yaꞌcarichátërasohuëꞌ, tëpacaiso marëꞌ aꞌnaroáchin yonquipi.

¹⁹ Inahua capini ninontopi: —¡Niꞌcoꞌ. Huaꞌnatonaꞌpi huëꞌsarin!

²⁰ Huëco tëpaꞌahuaꞌ. Inapotatëhua poso yaninantëquë poꞌmoaꞌahuaꞌ. Ina quëran “paꞌpiniri caꞌnin,” itahuaꞌ. Inapotohuatëhuaꞌ, ¿naniintaꞌma huaꞌnarinsopita paꞌ? niitopi.

²¹ Nopinoso natanahuaton, Cosi paꞌpoyacaso marëꞌ itapon: —Ama tëpaꞌahuasohuëꞌ.

²² Co tëpatacaso yaꞌhuërinhuëꞌ. Iso inotëroquë yaninantë poso nininquë tëꞌyatocoꞌ. Ama canpitarisoꞌ maꞌsha onpotocosohuëꞌ, itërin. Iyaꞌhuain nanin quëran ocoirahuaton, paꞌpinquëꞌpaꞌ aꞌpaantacaso yonquiaton, naporin.

²³ Cosiso iinpitataquë canconpachina, noꞌhuitona noyápiachin aꞌmorinso matopi.

²⁴ Matahuatona yaninantë posoquë, tëꞌyatopi.

²⁵ Inapotahuatonaꞌ, coshatapi huachi. Coshatasoi niꞌpirinahuëꞌ, aꞌna huëntonaꞌ Ismairo nicatonoꞌsaꞌ, nioshirin huëꞌsapi. Carata parti quëran huëꞌsapi. Camiyonënaquë, pimo huaꞌsairoꞌsaꞌ, parsamo nimirio, pimo yaquiꞌ, inapita quësapi. Iquipitoquë paꞌanaponaꞌ, quëparapi.

²⁶ Naporoꞌ Cotaso iinpita itapon: —¡Iyaꞌhua tëpahuatëhuaꞌ, co manta canarihuahuëꞌ! Naporahuaton inapotohuatëhuaꞌ, nonpi nonpínantacasoꞌ yaꞌhuapon.

²⁷ Ama tëpaꞌahuasohuëꞌ. Ismairo nicatonoꞌsa tëhuënchinsoꞌ paꞌantahuaꞌ. Noꞌhuípiro mini nipirinhuëꞌ, co nishahuëꞌ. Iyanpoaꞌ, tënin. Napohuachina, iinpitari: “¡Tëhuënchachinchi paya!” topi.

²⁸ Nicatonoꞌsa inataquëchin naꞌhuërahuachinara, iinpitari Cosi ocoipi. Yaninantë poso quëran ocoirahuatonaꞌ, nicatonoꞌsa paꞌantopi. Cato shoncatë coriqui pahuërëtohuachinara, Iquipitoquë quëpapi huachi.

²⁹ Nopinoso Cosi tëꞌyatopiquë huënantahuachina, co huachi iin quënanquintarinhuëꞌ. Paꞌpi paꞌyanaton aꞌmorinso osharin.

³⁰ Ina quëran iinpitataquë huënantarahuaton, itiintarin: —¡Iyaꞌhua capa huachi! ¡Maꞌhuantacha caso nisarahuë paya! tënin.

³¹ Naporoꞌ iinpitasoꞌ, Cosi aꞌmorinso masahuatona chipo tëpapisoꞌ huënainënquë, asëꞌcotëtopi.

³² Inapotahuatona paꞌpinaquë aꞌpapi. Quëpanaꞌpisoꞌ iso pochin pënënpi: “Iso aꞌmopiso quënanai. Noya niꞌquëꞌ. ¿Huiꞌnanquën aꞌna nimara ti?” itëquëꞌ, itahuatona aꞌpapi huachi.

³³ Cacoposoꞌ nohuitahuaton, tapon: “¡Iso mini huiꞌnahuë aꞌmorinsoꞌ!” tanan niꞌniri napotërin ipora, tënin.

³⁴ Napoapon pochin co napion cancantaton aꞌmorinso nioshatërin. Naporahuaton, saꞌcatën nininsoꞌ sëtohuachinara aꞌmopisoꞌ, aꞌmorin. Ina aꞌmorin quëran huiꞌnin chimininso marëꞌ huaꞌqui naꞌnërárin, ayanárin, naporárin.

³⁵ Yaꞌipi huiꞌninpitari achinicancanpirinahuëꞌ, inaso co nohuanchátërarinhuëꞌ, sëtërinso inquicasoꞌ. Aquë aquëtë huiꞌnin marëꞌ naꞌnëton, naporin: “Chimipiroꞌsa yaꞌhuërinquë huiꞌnahuë quënancontaꞌ huarëꞌ sëtërahuësoꞌ copi tapo,” tënin.

³⁶ Ismairo nicatonoꞌsasoꞌ, Iquipitoquë camapi. Camahuachinara, Cosiso aꞌnara quëmapi Potihuaro itopisoꞌ, paꞌantopi. Inasoꞌ, Iquipito copirnori catahuacaso marëꞌ acorin. Capitan yaꞌconaton, copirno aꞌpaipisopita sontaroꞌsa camairin.