Génesis 36 - Chayahuita (Shahui)

Isao quëran pipipisopita

¹ Isao quëran pipipisopita shaꞌhuichinquëmaꞌ. Inasoꞌ, Itomo itopi antaꞌ.

^2-5 Isaosoꞌ Canaan sanapiꞌsa manin: Aꞌnasoꞌ, Ata itopi. Inasoꞌ, Iron huiꞌnin. Irontaꞌ, Iti huënton piyapi. Inaquëya Isao huiꞌnahuanpachina, Iripasi itërin. Aꞌna saꞌionta Aoripama itopi. Inasoꞌ, Ano huiꞌnin, Sipion shiin. Inaquëyanta huiꞌnahuanpachina, isopita: Quiosi, Caaran, Cori, inapita. Isaosoꞌ, Ismairo huiꞌnionta manin, Pasima itopisoꞌ. Inasoꞌ, Nipayo oshiaꞌhuain. Inaquënta huiꞌnahuanpachina, Niohuiro, itërin. Ina nápo huiꞌninpita Canaan parti yaꞌhuëapon nasitopi.

⁶ Isaosoꞌ Cacopo patahuaton, aꞌna parti yaꞌhuapon paꞌnin. Saꞌinpita, huiꞌninpita, yaipi inarë yaꞌhuëpisopita quëparin. Pëꞌtahuanënpita, maꞌshanënpita, inapita Canaan parti yaꞌhuapon pochin canarinsontaꞌ, yaꞌipi quiquirin.

⁷ Cacopontaꞌ, napopin chachin maꞌhuanin niꞌton, co huachi nanitopihuë inaquësáchin yaꞌhuëcaisoꞌ. Pastonta pëꞌtahuanëna capacaiso co huachi nanipihuë niꞌton, niaꞌpopi.

⁸ Inapoaton, Isaoso Sëir motopiroꞌsa parti paꞌnin yaꞌhuapon. Shaꞌhuitëranquëmaso chachin Inasoꞌ, Itomo itopi antaꞌ.

⁹ Ina nápo Isao huiꞌninpita yaꞌhuëtërin. Inasoꞌ, yaꞌipi itomoroꞌsa shimashonën. Inapitasoꞌ, Sëir motopiroꞌsa parti yaꞌhuëpi.

¹⁰ Shaꞌhuitëranquëmaso chachin, Isaoso Ataquëya huiꞌnahuaninsoꞌ, Iripasi itërin. Yaꞌhuërëꞌ Pasimaquëya nininsoꞌ, Niohuiro itërin.

¹¹ Iripasi huiꞌninpitasoꞌ, isopita: Timan, Omaro, Sipo, Catan, Quinasi, inapita.

¹² Inapitasoꞌ Ata aminpita. Iripasisoꞌ, aꞌna cosonanën yaꞌhuëtërin Timona itopi. Inaquëya huiꞌnahuanpachina, Amarico itërin.

¹³ Niohuiro huiꞌnipitantaꞌ, isopita: Naato, Siran, Sama, Misa, inapita. Inapitanta Pasima aminpita. Pasimasoꞌ shaꞌhuitëranquëmaso chachin, Isao saꞌin ninin antaꞌ.

¹⁴ Aoripamaquëntaꞌ, Isao huiꞌnahuaninsopitasoꞌ: Quiosi, Caaran, Cori, inapita. Aoripamasoꞌ, Ano huiꞌnin, naporahuaton Sipion shiin.

^15-19 Isao shinpita huëntonoꞌsa huaꞌanëntopisopitasoꞌ, isopita: Timan, Omaro, Sipo, Catan, Quinasi, Cori, Amarico, inapita. Shaꞌhuitëranquëmaso chachin Isao paninanënsoꞌ, Iripasi itopi. Ina huiꞌninpitasoꞌ, Itomo noꞌpaquë Isao shinpita huëntonoꞌsaꞌ, huaꞌanëna yaꞌconpi. Yaꞌipi inapita Ata aminpita. Niohuironta Isao huiꞌnin chachin ninin. Ina huiꞌninpitantaꞌ, isopita: Naato, Siran, Sama, Misa, inapita. Inapitanta Itomo noꞌpaquë Isao shinpita huëntonoꞌsaꞌ, huaꞌanëna yaꞌconpi. Yaꞌipi inapitasoꞌ, Pasima aminpita. Shaꞌhuitëranquëmaso chachin Ano huiꞌnin Aoripama itopiso huaꞌhuinpitantaꞌ, isopita: Quiosi, Caaran, Cori, inapita. Inapitanta Isao shinpita huëntonoꞌsa huaꞌanëna yaꞌconpi. Yaꞌipi ina huaꞌanoꞌsaꞌ, Isao shinpita. Isaosoꞌ, Itomo itopi antaꞌ.

^20-21 Coꞌhuara Isao inaquë paꞌshátëraponhuëꞌ, aꞌnara Or huënton piyapi Sëir itopisoꞌton inaquë yaꞌhuërin. Quëmopinënpitarë chachin yaꞌhuërin. Ina huiꞌninpitasoꞌ, isopita: Notan, Soparo, Sipion, Ano, Tison, Isëri, Tisan, inapita. Inapitaꞌton Itomo noꞌpaquë Or huënton huaꞌanoꞌsa yaꞌconpi. Inapitasoꞌ Sëir quëran pipipisopita yaꞌhuëpi.

²² Notan huiꞌninpitasoꞌ, isopita: Orin, Iman, inapita. Notan oshinsoꞌ, Timona itopi.

²³ Soparo huiꞌninpitantaꞌ, isopita: Arapan, Manaato, Iparo, Sipo, Onan, inapita.

²⁴ Sipion huiꞌninpitanta isopita: Aiya, Ano, inapita. Ina Ano chachin, inotëro parti paꞌpin moranënpita aꞌpairin. Inapita aꞌpaiasoꞌ, noꞌpa quëran iꞌsha pipirinsopita quënanin.

²⁵ Anosoꞌ, aꞌna huiꞌnin yaꞌhuëtërin, Tison itërinsoꞌ. Naporahuaton, aꞌna huiꞌnin sanapi, yaꞌhuëtërin. Shaꞌhuitëranquëmaso chachin inasoꞌ, Aoripama itërin.

²⁶ Tisonta huiꞌninpita isopita: Intan, Ispan, Itëran, Quiran, inapita.

²⁷ Isëri huiꞌninpitanta isopita: Piran, Saapan, Acano, inapita.

²⁸ Tisan huiꞌninpitanta isopita: Osi, Aran, inapita.

^29-30 Or huënton huaꞌanoꞌsasoꞌ, isopita: Notan, Soparo, Sipion, Ano, Tison, Isëri, Tisan, inapita. Ina nápo Or huënton huaꞌanoꞌsa yaꞌhuëpi. Aꞌnaya aꞌnaya huëntonënaquë, huaꞌan yaꞌconpi. Sëir parti napopi.

Itomo noꞌpaquë copirnoroꞌsa yaꞌconpisoꞌ

^31-32 Coꞌhuara israiroꞌsa copirno yaꞌhuëchatërasoihuëꞌ, isopitaꞌton Itomo noꞌpaquë copirno yaꞌconpi. Piraꞌton yaꞌconin. Inasoꞌ, Pioro huiꞌnin. Tinapa ninanoquë yaꞌhuërin.

³³ Ina chiminpachina, Sira huiꞌnin Copapo itopisori yaꞌhuërëtërin. Inasoꞌ, Posora ninanoquë yaꞌhuërin.

³⁴ Inanta chiminpachina, Osamori yaꞌhuërëtërin. Inasoꞌ, Timan parti yaꞌhuërin.

³⁵ Osamonta chiminpachina, Atatori yaꞌhuërëtërin. Inasoꞌ, Pitato huiꞌnin. Apito ninanoquë yaꞌhuërinsoꞌ. Inari matianoꞌsaꞌ, Moapo noꞌpaquë ahuëaton canarin.

³⁶ Atato yaꞌhuërëꞌ chiminpachina, Samarari yaꞌhuërëtërin. Inasoꞌ, Masarica ninanoquë yaꞌhuërin.

³⁷ Samaranta chiminpachina, Saonori yaꞌhuërëtërin. Niopo ninanoquë yaꞌhuërinsoꞌ. Inaso ninanoꞌ, Iopiratisiiꞌ yonsanquë yaꞌhuërin.

³⁸ Ina yaꞌhuërëꞌ chiminpachina, Paaro-ananori yaꞌhuërëtërin. Inasoꞌ, Acaporo huiꞌnin.

³⁹ Paaro-ananonta chiminpachina, Atatori yaꞌhuërëtërin. Inasoꞌ, Pao ninanoquë yaꞌhuërin. Atato saꞌinsoꞌ, Miitapiri itopi. Inasoꞌ, Matiriti huiꞌnin, Misaapo shiin.

^40-43 Isonápo Isao quëran pipipisopita huëntonoꞌsa yaꞌhuërin: Yaꞌhuëpiso noꞌpanënantaꞌ, inachachin aninihuanpi: Timon, Arapa, Quitito, Aoripama, Iran, Pinon, Quinasi, Timan, Mipasar, Maquitiri, Iramo, inapita. Ina nápo Itomo huëntonoꞌsa shimashonënpita yaꞌhuërin. Inapitasoꞌ Itomo noꞌpaquë yanquëatona itohua itohua yaꞌhuëpi. Isaosoꞌ, Itomo itopi antaꞌ.