Génesis 34 - Chayahuita (Shahui)

Siquimori Tina tapiton poꞌorinso marëꞌ iꞌhuërëtopisoꞌ

¹ Cacopo huiꞌnin Niaquëya yaꞌhuëtërinsoꞌ, Tina itopi. Ina nanontohuachina, aꞌna tahuëri Siquimo ninanoquë nanon capini niniꞌcai marëꞌ paꞌnin.

² Inaquë niꞌsoꞌ, Siquimori niꞌsahuaton noyarin. Inasoꞌ, shaꞌhuitëranquëmaso chachin Amoro huiꞌnin. Amorosoꞌ, huaꞌan yaꞌconin. Ipo piyapi niꞌton, yaꞌipi iporoꞌsa huaꞌanëntërin. Siquimori Tina co nohuanchachinpirinhuëꞌ ichihuëꞌërahuaton, poꞌorin.

³ Napoaponahuëꞌ, paꞌpi nohuantërin. Napoaton Tinari nohuantacaso marëꞌ maꞌpitaso ninin.

⁴ Naporo chachin Siquimosoꞌ paꞌpin itapon: —Paaton tata, Tina macaꞌhuaso marëꞌ paꞌpin nontoonquëꞌ. Quëmopinënpitanta nontoonquëꞌ. Ina paꞌpi nohuantërahuë, itërin.

⁵ Cacoposoꞌ huiꞌnin poꞌopisoꞌ nitotaponahuëꞌ, co manta tëninhuëꞌ. Huiꞌninpita pëꞌtahuaroꞌsa aꞌpairapi niꞌton, co manta tëninhuëꞌ. Inapita canquiai huarëꞌ shaꞌhuitacasoꞌ yonquirin.

⁶ Siquimo paꞌpinsoꞌ Cacopo nontacaso marëꞌ paꞌnin.

⁷ Cacopo huiꞌninpita huënantahuachinara, napopisoꞌ natantopi. Natantahuatonaꞌ, paꞌpi noꞌhuitopi. Siquimori oshina co mashátëraponahuëꞌ, ichihuëꞌërin niꞌton, napopi: “Inapoaton inasoꞌ, israiroꞌsanpoa panca tëhuëtërinpoaꞌ. ¡Co onporonta inapocaso yaꞌhuërinhuëꞌ!” topi.

⁸ Amoroso nipirinhuëꞌ, inapita nontaton napotërin: —Huiꞌnahuë Siquimo itërahuësoꞌ, oshiparima paꞌpi nohuantërin macacaso marëꞌ. Onpopionta quëtocoꞌ.

⁹ Inapoatëhuaꞌ, yaꞌhuëaꞌahua topirahuë. Napohuatëhuaꞌ, quiyanta canpita huiꞌnama macapoi. Canpitantaꞌ, quiya huiꞌnahuëi masaramaꞌ.

¹⁰ Isëquë quëparitatomaꞌ, quiyapitarëꞌ yaꞌhuëcoꞌ. Iso noꞌpaquë yaꞌhuatoma sacatocoꞌ. Nohuantëramasoꞌ paꞌancoꞌ. Noꞌpanta yapaꞌanpatamaꞌ, paꞌancoꞌ, itërin.

¹¹ Siquimonta huanirahuaton, nonsarin huachi: —Tata napotërinquëmasoꞌ, nohuantoco taꞌa. Onposoꞌ natanpatamaco quëtaranquëmaꞌ.

¹² Sanapi marëꞌ pahuërëtërë quëran naꞌcon naꞌcon apahuërëtohuatamaco noya, co maꞌshahuëꞌ. Naporahuaton maꞌsona nicanaꞌhuanquëmasoꞌ natanpatamacontaꞌ, quëtaranquëmaꞌ. Onpopionta cari mai, topirahuë, tënin.

¹³ Napopirinhuëꞌ, inapitariso oshina naꞌinin niꞌton, iꞌhuërëtacaiso marëꞌ yamonapi. Napoaton Siquimosoꞌ paꞌpinë chachin noyasha nontatona itaponaꞌ:

¹⁴ —Noya nipirinhuëꞌ. Co quiyasoꞌ nanitëraihuëꞌ co marcahuan quëmapi oshihuëi quëtaꞌhuaisoꞌ. Quëtërai naporini, quiya marësoꞌ paꞌpi taparo niitonhuëꞌ.

¹⁵ Yaꞌipinquëma quiya pochachin marcahuanama huarëꞌ canpita naporamaso nisarai. Nohuantohuatamaꞌ, yaꞌipi quëmapinquëma marca niacotoco nipachin.

¹⁶ Naporo huarëꞌ tëhuënchinsoꞌ, canpitanta huiꞌnahuëi masaramaꞌ, quiyanta canpita huiꞌnama masarai. Inapohuatëhua aꞌna huëntoínchin pochin nisarëhua huachi.

¹⁷ Nipirinhuëꞌ, coꞌsoꞌ nohuantohuatamahuëꞌ, isëquëran pipiarai. Oshihuëinta macatoi, quëpaarai, itopi.

¹⁸ Napotohuachina Siquimosoꞌ nohuantërin. Paꞌpionta nohuantërin.

^19-20 Cacopo huiꞌnin paꞌpi nohuantaton Siquimosoꞌ, aꞌnaroáchin natëtërin. Inasoꞌ, yaꞌipi Amoro huiꞌninpita quëran chini chiníquën nanantërin. Napoaton, paꞌpinë chachin ninano yaꞌcoanaquë paꞌpi. Inaquë yaꞌhuëhuanoꞌsa niyontonpi, maꞌsha yonquiatona anoyatacaiso marëꞌ. Yaꞌhuëhuanoꞌsa niyontonpachinara, itaponaꞌ:

²¹ —Pasopitasoꞌ noyaroꞌsaꞌ. Pancana noꞌpaꞌ yaꞌhuëtërinpoa niꞌton, inapitanta yacapatënënpoaꞌ paꞌanaponaꞌ. Canpoanta nanitarihua inahua huiꞌninpita macacasoꞌ. Yaꞌhuërëꞌ inapitanta canpoa huiꞌnanpoa nanitapi macacaisoꞌ.

²² Napoaponahuëꞌ inapoatëhua yaꞌhuëcaso marëꞌ, yaꞌipi quëmapinpoa marcahuanacasoꞌ nohuantopi. Inahua napopiso chachin canpoanta nicacasoꞌ nohuantopi.

²³ Inapohuatëhuaꞌ, yaꞌipi yaꞌhuëtopiso canpoanquën nisarin. Pëꞌtahuanënaꞌ, maꞌshanënaꞌ, yaꞌipi inapita canpoanquën nisarin. Huëco nohuantoco inapoaꞌahuaꞌ. Napohuatëhuaꞌ, inapitaso canpoarëꞌ yaꞌhuëcaiso marëꞌ quëparitapi, itopi.

²⁴ Siquimo paꞌpinë chachin napopiso natanatonaꞌ, nohuantopi. Napoaton yaꞌipi quëmapiꞌsa chiníquënoꞌsa nipisoꞌ, marca niacotopi huachi.

²⁵ Niacotopi quëran cara tahuëritapasoꞌ, Cacopo huiꞌninpita Siquimo ninanoquë paꞌpi. Simion, Nihui, inapita itopisoꞌ paꞌpi. Inapitasoꞌ, Tina yoꞌinamiáchin nipi. Yaꞌhuëhuanoꞌsa marca niacotopisoꞌ, paꞌpi iquitopi. Inapoasoi chachin paꞌsahuatonaꞌ, sahuëninënaquë yaꞌipi quëmapiꞌsa tëpaconpi. Co noyachátërasoihuëꞌ ahuëtopi niꞌton, co chinitopihuëꞌ.

²⁶ Amorontaꞌ, Siquimorë chachin tëpapi. Inapotahuatonaꞌ, Siquimo pëinën quëran Tina masahuatonaꞌ, paꞌpi huachi.

²⁷ Aꞌnapita iinpitanta canquirahuatonaꞌ, yaꞌipi quëmapiꞌsa nani tëpapi niꞌton, ninanoquë maꞌsha yaꞌhuërinso mamiatopi. Oshina Siquimori tapirinso marëꞌ, iꞌhuërëtatona inapotopi.

²⁸ Yaꞌipi ohuicanënaꞌ, ohuacanënaꞌ, moranënaꞌ, inapita matopi. Yaꞌipi ninanoquë yaꞌhuërinsoꞌ, aipiraonta yaꞌhuërinsoꞌ, mapi.

²⁹ Pëiroꞌsaquë maꞌsha yaꞌhuërinsopitantaꞌ, yaꞌipi ihuatopi. Naporahuaton yaꞌipi huaꞌhuaroꞌsaꞌ, sanapiꞌsaꞌ, inapitanta masahuatona quëpapi.

³⁰ Simion, Nihui, inapita huënantahuachinara, paꞌpinari itapon: —Canpitaso napoatomaꞌ, sacai anoyataꞌhuaso nitëramaco. Cananoꞌsaꞌ, huirisëroꞌsa inapitasoꞌ, yaꞌhuëhuanoꞌsaꞌ. Naporamaso natantohuachinaꞌ, noꞌhuiponaco caso huachi. Nihuëntonahuatona ahuëaponaco. Caso co naꞌashahuëꞌ piyapinëhuëpita yaꞌhuëtërinco niꞌton, yaꞌipinpoa tiquiaponënpoaꞌ, itërin.

³¹ Napotopirinhuëꞌ, inapitariso itaantapi: —¿Monshihuantë paya pochin oshihuë nitacasoꞌ nohuantopiranhuëꞌ ti? itopi.