Génesis 33 - Chayahuita (Shahui)

Cacopo Isaorëꞌ nanan anoyatopisoꞌ

¹ Cacoposoꞌ, Isao catapini pasa quëmapiꞌsarë chachin huëꞌsarin niꞌnin. Ina niꞌsahuaton, cara huënton huiꞌninpita acorin. Niataquë aꞌna huënton, Naquirataquë aꞌna huënton, cosonaroꞌsataquë, aꞌna huënton.

² Cosonaroꞌsaꞌton huaꞌhuinpitarë chachin aquëchitërin. Ina quëran Nia huaꞌhuinpitarë chachin ahuancanatërin. Naquirasoꞌ, Cosirëꞌ piquëran acorin.

³ Inaporahuaton, Cacoposo quëchitërin. Iin masho yaꞌcariapon pochin, canchisëro mosharin. Isonin quëran noꞌpaquë huarëꞌ monshorahuaton mosharin.

⁴ Cacoposoꞌ tëꞌhuaton naporin. Napopirinhuë Isaorisoꞌ, taꞌaquirahuaton iin iporin. Iporahuaton, apinorin, naporin. Cato chachin noya ancantatonaꞌ, ninaꞌnëtopi.

⁵ Ina quëran Isaosoꞌ, sanapiꞌsaꞌ, huaꞌhuaroꞌsa inapita niꞌnin. Niꞌsahuaton iin natanin: —¿Isopita poꞌ? ¿Inpitata? itërin. —Huiꞌnahuëpita taꞌa. Yosë nohuanton yaꞌhuërinsoꞌ, tënin Cacopo.

⁶ Naporoꞌ cosonaroꞌsaso huaꞌhuinpitarë chachin, Isao huëcapaipi. Ina notënanquë huëꞌsahuatonaꞌ, isonpi. Isonpi quëran noꞌpaquë huarëꞌ monshorahuatonaꞌ, moshaipi.

⁷ Ina quëran Nia yaꞌhuërëꞌ huaꞌhuinpitarë chachin, inapoantapi. Piquëran Cosisoꞌ, aꞌshinë chachin, huëꞌsahuatonaꞌ, Isao notënanquë inahuanta inapoantapi.

⁸ Ina quëran Isaosoꞌ, Cacopo natanin: —¿Maꞌmarëta ina nápo pëꞌtahua huëntonoꞌsa aꞌparansopita, nacapirimarahuë? itërin. —Noya ninicatë yaꞌhuantacaso marëꞌ aꞌpatëranquënsopita, itërin Cacopori.

⁹ —Ama iyaꞌhua napoquësohuëꞌ. Canta yaꞌhuëtërinco chachin. Co quëtaancoso yaꞌhuërinhuëꞌ, itërin Isaori.

¹⁰ Itopirinhuëꞌ, Cacoposoꞌ taantarin: —Ama iya masho napoquësohuëꞌ. Tëhuënchachin noya ninicatë yaꞌhuantacaso nohuantohuatan, onpopionta maquë taꞌa. Quëmaora chachin noya nontaantarancosoꞌ nicato, Yosë chachin napotërincoso pochin cancantërahuë.

¹¹ Yosë nohuanton maꞌhuanahuë, co manta pahuantërincohuëꞌ. Napoaton, quëshiranquënsopita, onpopionta maquëꞌ, itërin. Napotápaton Isao anohuantërin. Yaꞌipi aꞌpatërinsopita manin huachi.

¹² Ina quëran Isao taantarin: —Noyapaꞌ. Huëquë nipachin carinquën caꞌtainquën paꞌa, itërin.

¹³ Napotohuachina, Cacoporiso itapon: —Tëhuënchachin iya masho nosoroatonco napotëranco. Nipirinhuëꞌ huiꞌnahuëpita huaꞌhuaroꞌsaráchin. Ohuicaroꞌsaꞌ, ohuacaroꞌsaꞌ, inapitanta nasha huaꞌhuatopiso yaꞌhuërin. Manon quëpahuatësoꞌ, aꞌna tahuëri marëáchin nanitërin, ohuicaꞌhuaroꞌsa taquicaisoꞌ.

¹⁴ Noya quëmasoꞌ pataquë topirahuë. Quiyaso nipirinhuëꞌ oshaquëranchin pacapoi. Huaꞌhuaroꞌsapitarëꞌcoi, pëꞌtahuaroꞌsapitarëꞌcoi oshaquëran paꞌsarai. Co huaꞌquiya quëranhuëꞌ, Sëir parti cantoontapatënquën, inaquë niquënaantarihua huachi, itërin.

¹⁵ —Noyapaꞌ. Naporan niꞌquëhuarëꞌ, quëchitotaꞌi nipachin. Nipirinhuëꞌ caꞌtainquënso marëꞌ caraya piyapinëhuëpita pachi, itërin. Itopirinhuëꞌ, Cacoposo taantarin: —Ama iya napoquësohuëꞌ. Noya quiyaora paꞌsarai, itërin.

¹⁶ Napotohuachina, Isaoso piyapinënpitarë chachin Sëir parti paantarin.

¹⁷ Cacoposo nipirinhuëꞌ, Socoto parti paꞌnin. Inaquë pëitacaiso marëꞌ piyapinënpita camairin. Naporahuaton, pëꞌtahuanënpita naꞌicaiso marëꞌ tanporaꞌhuaroꞌsa anitërin. Napoaton, ina noꞌpaꞌ “Socoto” itërin.

¹⁸ Inaquë huaꞌquimiachin yaꞌhuërin. Ina quëran Cacoposoꞌ, yaꞌipi huëntonënë chachin Siquimo ninano notënanquë paꞌnin. Inaquë nëꞌmëtë pëiroꞌsa otëantarin. Inapoaton Patan-aran quëran huëꞌninsoꞌ, Canaan noꞌpaquë noya canquirin.

¹⁹ Nëꞌmëtë pëiroꞌsa ótënpisoꞌ noꞌpaꞌ, Cacoposoꞌ pasa coriqui marëꞌ paꞌanin. Ina noꞌpasoꞌ, aꞌna quëmapi Amoro itopisoꞌ huiꞌninpitari huaꞌanëntopirinhuëꞌ, paꞌantërin. Inasoꞌ, aꞌnara huiꞌnin yaꞌhuëtërin, Siquimo itopi.

²⁰ Ina piquëran Cacoposoꞌ, Yosë chinotacaso marëꞌ aꞌnara artaro ninin. Ina nisahuaton aninihuanin: Ir Iroi Israiro, itërin.