Génesis 32 - Chayahuita (Shahui)

Cacopo, Isaorëꞌ niquënanpisoꞌ

^1-2 Napano piyapinënpitarë chachin paꞌmantahuachina, Cacoponta piyapinënpitarë chachin paantarin. Paasoi Cacoposoꞌ, Yosë anquëninënpitari nacapirin. Inapita quënanahuaton, tapon: “Isopitasoꞌ, Yosë sontaronënpita huënton. Catahuainacoso marëꞌ aꞌpaimarinsoꞌ,” tënin. Napoaton ina roꞌtësoꞌ: Maanain, itërin.

^3-4 Naporoꞌ Cacoposoꞌ, comisionoꞌsa Isao shaꞌhuitacaiso marëꞌ Sëir noꞌpaquë aꞌparin: “Iyaꞌhua huënantárin niꞌton, iso pochin nanan aꞌpatiarinquën: ‘Ca iya masho huënantárahuë. Maꞌsona quëma camaitëranso nisarahuë. Cato shonca piꞌipi api Napano yaꞌhuërinquë yacapatërahuë.

⁵ Naꞌa ohuacaroꞌsaꞌ, moraroꞌsaꞌ, ohuicaroꞌsaꞌ, inapita yaꞌhuëtërinco. Piyapinëhuëpitantaꞌ, quëmapiꞌsaꞌ, sanapiꞌsaꞌ, yaꞌhuëtërinco. Iso nanan, aꞌpataranquën noya ninicatë yaꞌhuëantacaso marëꞌ tënin,’ itocoꞌ,” itërin. Napotahuaton aꞌparin.

⁶ Comisionoꞌsa huënantahuachinara, Cacopo shaꞌhuitiintapi: —Iya masho Isao nicapoi aꞌparancoi niꞌtoi, paꞌnai. Huëꞌsaranso nitotaton, inaora chachin nacapiinquënso marëꞌ huëꞌsarin. Catapini pasa quëmapiꞌsari imaquiarin, itiipi.

^7-8 Ina natanahuaton, Cacoposo paꞌpi paꞌyanin. Paꞌyanaton yonquirárin. Yonquirárin quëran, piyapinënpita, ohuicanënpita, ohuacanënpita, camiyonënpita, inapita cato huënton acorin. “Iya mashori, aꞌna huënton ahuëhuachinaꞌ, aꞌna huëntonso taꞌararin,” taꞌton naporin.

⁹ Ina quëran iin tëꞌhuataton, iso pochin Yosë nontërin: “Sinioro, quëmaso Yosënquën. Tata masho Apraan chinotërinquën. Tata Isaconta chinotërinquën. Quëma shaꞌhuitëranco niꞌton, yaꞌhuërahuëquë huëꞌsarahuë. Quëmopinëhuëpita yaꞌhuërinquë huëꞌsarahuë. Naporahuaton: ‘Ca nohuanton noya paꞌsaran,’ itëranco.

¹⁰ Tëhuënchachin co noyacohuëꞌ niꞌto, co nosoroancosoꞌ yaꞌhuërinhuëꞌ. Co noꞌtëquënáchin catahuaancoso yaꞌhuëpirinhuëꞌ. Iráca yaꞌhuërahuë quëran pipipo, Cortaniiquë pëntoitërahuë. Naporoꞌ co maꞌsha tëranta quëparahuë. Pitananëhuëroꞌcoáchin paꞌnahuë. Napopirahuëꞌ, iporasoꞌ cato huënton pochin huaꞌanëntërahuë.

¹¹ ¡Nosoroatonco Sinioro iya masho Isao quëran, nichaꞌëco! Nani huëꞌsarin niꞌton, ahuërahuatonco, saꞌahuëpita, huiꞌnahuëpitarëꞌco chachin niquitohuachinco.

¹² Nani quëma chachin, catahuancoso marëꞌ aꞌninquëchin shaꞌhuitëranco. Naporahuaton, shihuëpitanta caquëran pipipisopita, inotëraꞌhuaya pochin naꞌacaisoꞌ shaꞌhuitëranco. Marë yonsanquë inotërahuaya yaꞌhuërinsoꞌ, co pichicasohuëꞌ. Ina pochin naꞌacaisoꞌ nani shaꞌhuitëranco,” itërin.

¹³ Naporo tashi inaquë Cacopo huëꞌërin. Tahuëririnquë capayatahuaton, yaꞌcariya yaꞌhuërinsopita quëran, pëtahuaroꞌsa huayonin. Iin masho Isao nicanacaso marëꞌ huayonin:

^14-15 Cato pasa chipo sanapi, cato shonca chipo, cato pasa ohuica, cato shonca carniro, cara shonca camiyo paya nasha huaipiso huaꞌhuinpitarë chachin, catapini shonca ohuacaꞌ, shonca toroaꞌhua, cato shonca mora sanapi nininsoꞌ, shonca mora quëmapi, inapita.

¹⁶ Inapita huayonahuaton, piyapinënpita quëtërin aꞌna huënton aꞌna huënton quëpacaiso marëꞌ. Coꞌhuara paꞌshátërasoihuëꞌ, maꞌsona nicacaisonta shaꞌhuitërin: —Canpitaso quëchitocoꞌ. Aꞌna huëntonꞌton paꞌin. Amasha aquëmiachin nipachin aꞌna yaꞌhuërëꞌ, paantaꞌin. Ama napopináchin pacosohuëꞌ, itërin.

^17-18 Quëchinamën huënton quëpanaꞌpi shaꞌhuitërin: —Iya masho Isao nacapiatënquën natanpachinquën: “¿Inta quëmasoꞌ huaꞌanën? ¿Intohuata paꞌsaran? ¿Inquënta pëꞌtahuaroꞌsa quëpaaransoꞌ?” itohuachinquën, quëmari iso pochin shaꞌhuitëquëꞌ: “Isopita pëꞌtahuaroꞌsasoꞌ, quëma marëꞌ quësarahuë. Cacopo aꞌpatiarinquën. Inasoꞌ, quëma piyapinën pochin cancantërin. Nani inanta piquëran huëꞌsarin,” itëquëꞌ, itërin.

¹⁹ Aꞌnapita huënton quëpanaꞌpiroꞌsantaꞌ, shaꞌhuitërin: —Canpitanta iya masho Isao quënanpatamaꞌ, inachachin shaꞌhuitocoꞌ.

²⁰ Nani shaꞌhuitohuatamaꞌ, napotaantacoꞌ: “Inaora chachinsoꞌ, piquëran huëꞌsarin,” itocoꞌ, itërin. Isopochin yonquiaton Cacopo naporin: “Isopita pëꞌtahuaroꞌsa quëtato noꞌhuirincoso asanoarahuë. Ina piquëran caora chachin niꞌsarahuë. Tapona inapotërahuëso marëꞌ inanta noya nontaantarinco,” tënin yonquinënquë.

²¹ Inapoaton Isao quëtacasoꞌton, aquëchitërin. Inaoraso nipirinhuëꞌ, huëꞌëcaso marëꞌ yaꞌhuëarinquëranchin quëparitërin.

Cacopo anquënirë nipanirinsoꞌ

^22-23 Napoaponahuëꞌ, naporo tashi chachin coꞌhuara huëꞌëshátërasoihuëꞌ, Cacoposoꞌ huanirin. Huanirahuaton, cato saꞌinpita, cato cosonanënpita, inapita ayontonin. Shonca aꞌna huiꞌninpitanta inaquë chachin ayontonin. Ayontonahuaton Capocoiꞌ pëntoinantaquëchin, apëntoitërin. Yaꞌipi pëꞌtahuanënpita, yaꞌipi maꞌshanënpita, inapitarë chachin aquëtëran aꞌparin.

²⁴ Cacoposoꞌ inaora quëparitohuachina, aꞌnara quëmapi yaꞌnorin. Inarë tahuërianpitaquë huarëꞌ nohuantasoꞌ nipanipi.

²⁵ Napoaponahuë quëmapi yaꞌnorinsosoꞌ, co Cacopo minsëcaso nanitërinhuëꞌ. Co nanitatonhuëꞌ, Cacopo tonaransën, ahuëtërin. Catantën nipaquëtërintaquëchin ahuërin niꞌton, notohuëtërin. Nipanisoi napotërin.

²⁶ Quëmapi yaꞌnorinsosoꞌ, Cacopo itapon: —Aꞌpoco huachi, nani tahuëririarin, itërin. —Coꞌsoꞌ noya yaꞌhuëcaꞌhuaso marëꞌ shaꞌhuitohuatancohuëꞌ, co aꞌpoaranquënhuëꞌ, itërin inarintaꞌ.

²⁷ —¿Maꞌninquënta quëmasoꞌ? itaantarin quëmapiri. —Cacopo itërinaco, taantarin inantaꞌ.

²⁸ Naporoꞌ ina quëmapirisoꞌ itapon: —Co huachi Cacopo itarinënhuëꞌ. Ipora quëran huarëꞌ Israiro itarinën. Yosë chinitëran, piyapiꞌsanta chinitëran. Chinitaton canatëran niꞌton, ina pochin nohuitarinën, itërin.

²⁹ —Iporasoꞌ quëmantaꞌ nininën shaꞌhuitoco, itërin Cacopori. Napotopirinhuëꞌ, inariso itapon: —Co quëmasoꞌ nininëhuë natanancoso yaꞌhuërinhuëꞌ, itërin. Ina quëran inaquë chachin Cacopo noya yaꞌhuëcaso marëꞌ shaꞌhuitërin.

³⁰ Napoaton Cacoposoꞌ ina roꞌtë aninihuanin: “Pinoiro,” itërin. “Isëquë chachin, Yosë nirayarahuë. Ina niponahuëꞌ co chiminahuëꞌ,” taꞌton, ina pochin ina roꞌtë nohuitërin.

³¹ Piꞌi pipiriahuasoꞌ, Pinoiro quëran huëꞌsarin huachi. Catantëntaquëchin, tonaransë notohuëtërin niꞌton, sonpariarin.

³² Napoaton iso quirica ninshitasoco huarënta Israiro shinpitasoꞌ, maꞌsharoꞌsa catantënquë pancarin ipatë yaꞌhuëtërinsoꞌ, co caꞌpihuëꞌ. Inaquë Cacopo ahuëpi niꞌton, co caꞌpihuëꞌ.