Génesis 28 - Chayahuita (Shahui)

¹ Nipicari napotohuachina, Isacori, Cacopo amatahuaton, noya nontërin. Co noꞌhuirinhuëꞌ. Noya yaꞌhuëcaso marëꞌ shaꞌhuitaton itapon: “Yosë noya catahuainquën conpa,” itërin. Napotahuaton pënënin: “Ama iso Canaan noꞌpaquë sanapi máquësohuëꞌ.

² Patan-aran parti tëhuënchinsoꞌ paquëꞌ. Tata masho Pitoiro yaꞌhuërinquë paꞌsahuaton, api Napano huiꞌninpita aꞌnara maquëꞌ.

³ Yosë yaꞌipi nanitaparinsoꞌ catahuainquën. Naꞌa huiꞌnanpita quëchinquën. Quëmá quëran naꞌa nacionoꞌsa pipicaso marëꞌ inapochinquën.

⁴ Yosëri Apraan noya yaꞌhuëcaso marëꞌ shaꞌhuitërinso chachin, quëmanta quëchinquën. Quëma shiparinpitantaꞌ, inachachin quëchin. Iso noꞌpaꞌ ipora yacapatërëhuasoꞌ, quëchinquëmaꞌ. Yosëri nani Apraan shaꞌhuitërin niꞌton, quëtarinquëmaꞌ,” itërin.

⁵ Ina pochin Isacori Patan-aran parti Cacopo aꞌparin. Cacoposoꞌ paꞌsahuaton, Napano yaꞌhuërinquë canconin. Nani shaꞌhuirahuëso chachin inasoꞌ, Pitoiro huiꞌnin. Pitoirosoꞌ Aran piyapi. Napanosoꞌ, Nipica yoꞌin miáchin. Nipicantaꞌ, Cacopo, Isao, inapita aꞌshinaꞌ.

Isao saꞌantarinsoꞌ

⁶ Isaosoꞌ, paꞌpini, Cacopo noya yaꞌhuëcaso marëꞌ shaꞌhuitërinsoꞌ niꞌnin. Patan-aranquë saꞌacaso marëꞌ aꞌparinsontaꞌ, niꞌnin. Naporahuaton, paꞌpini noya yaꞌhuëcaso marëꞌ shaꞌhuitapon pochin: “Ama Canaan sanapi máquësohuëꞌ,” itërinsonta natanin.

⁷ Paꞌpini, aꞌshini, shaꞌhuitërinso chachin Cacopontaꞌ, Patan-aranquë paꞌninsoꞌ niꞌnin.

⁸ Paꞌpin inaporin niꞌton, Isaosoꞌ: “Canaan sanapisoꞌ, co tatahuë costarinhuëꞌ,” tënin.

⁹ Napoaton, Ismairo nicapon paꞌnin. Inasoꞌ, Apraan huiꞌnin. Inatohua paaton, Ismairo huiꞌnin Maarata itopisoꞌ maantarin. Inasoꞌ, Nipayo oshiaꞌhuain. Nani cato Canaan sanapi macaponahuëꞌ, inanta maantarin.

Yosëri Cacopo yaꞌnotërinsoꞌ

^10-11 Cacopo Piirsipa quëran pipirahuaton, Aran ira paꞌtërin. Iꞌhuatohuachina, quëparitërin huëꞌëton pacacaso marëꞌ. Aꞌnara naꞌpi masahuaton, motoantacaso marëꞌ acorin. Ina motoantaton huëꞌërin.

¹² Naporo tashi huëꞌëton, huaꞌnarin: Aꞌnara nanpënan noꞌpaquë paquërahuaton, Yosë yaꞌhuërinquë huarëꞌ nincanin niꞌnin. Ina nanpënanquë chachin, pancatë niꞌton, Yosë anquëninënpita aꞌnaquën pantarapi, aꞌnaquënso oꞌmarapi.

¹³ Naporahuaton, Sinioro chachiontaꞌ, ina pirayan huaniarin niꞌnin. Inari nontaton, itapon: “Caso Sinioroco. Quëmaquën Tata masho, Apraan itopisoꞌ chinotërinco. Tata parionta chinotërinco. Quëhuëntëransoꞌ noꞌpaꞌ quëtaranquën. Shiparinpitantaꞌ, iso noꞌpa chachin huaꞌanëntaponaꞌ. Isoso noꞌpaꞌ, Canaan itopi.

¹⁴ Ca nohuanto shiparinpita naꞌamiataponaꞌ. Moꞌshi pochin naꞌaponaꞌ. Norti parti, sor parti, piꞌi pipirinso parti, piꞌi yaꞌconiniso parti, yaꞌipi inapita parti huaꞌanëntaponaꞌ. Quëmá quëran, yaꞌipi piyapiꞌsa nisha nisha nipisopita catahuararahuë. Shiparinpita quëraonta inapotarahuë.

¹⁵ Niꞌquëꞌ. Carinquën caꞌtanaranquën. Intópanta paꞌpatan, carinquën aꞌpaiaranquën. Carinquën chachin iso noꞌpaquë quënantaranquën. Co onporonta pataranquënhuëꞌ, yaꞌipi shaꞌhuitëranquënsoꞌ naniquë huarëꞌ catahuararanquën,” itërin.

¹⁶ Cacoposoꞌ capayatahuaton, yonquirin: “Tëhuënchachin Sinioro isëquë yaꞌhuëapirinhuëꞌ, co caso nitotërahuëꞌ,” tënin.

¹⁷ Napoaton, paꞌpi paꞌyanin. Paꞌyanaton tapon: “Iso roꞌtësoꞌ, Yosë chinotacaso marëꞌ nóya. Isëquë chachin, Yosë pëinën yaꞌhuërin. Naporahuaton ¡Yosë yaꞌhuërinso yaꞌcoananën!” tënin.

¹⁸ Tahuëririnquë Cacoposoꞌ, tashíramiachin capayatahuaton naꞌpi motoantërinso manin. Masahuaton, nohuitacaso marëꞌ onë pochin ahuanirin. Naporahuaton ina aipi toma opotërin. Inapotahuaton, Yosë marëꞌ acorin.

¹⁹ Inaquë chachin iráca aꞌna ninano yaꞌhuërin. Noso itopisoꞌ. Ina pochin nohuitopirinahuëꞌ, Cacopori nisha nininën acotaton, Pitiri itërin.

^20-21 Inaquë Cacopori Yosë shaꞌhuitaton itapon: “Quëma chachin ipora iratërahuëquë caꞌtanco. Quëma nohuanton cosharoꞌ, aꞌmocaꞌhuasoꞌ, inapitanta yaꞌhuëchinco. Naporahuaton quëma nohuanton tatahuë yaꞌhuërinquë, noya huënantaꞌi. Inapo catahuahuatanco: ‘Sinioroíchin Yosënëhuë,’ taꞌto, chinotaranquën.

²² Iso naꞌpi onë pochin ahuanirahuësontaꞌ, quëma pëinën nisarin. Naporahuaton, yaꞌipi quëtëranco quëran, piꞌpian quëtáponquën. Shonca canahuato aꞌnara quëchinquën,” itërin.