Génesis 25 - Chayahuita (Shahui)

Apraan Sitoraquë huiꞌnahuaninsopita

¹ Apraansoꞌ, aꞌna saꞌin yaꞌhuëtaantarin. Inasoꞌ, Sitora itopi.

² Inaquënta huiꞌnahuaantarin. Inaquë huiꞌninpitasoꞌ: Simiran, Cocosan, Mitan, Matian, Isopa, Soa, inapita.

³ Cocosan huiꞌninpitasoꞌ: Sipa, Titan, inapita. Titan quëran pipipisopitasoꞌ: Asororoꞌsaꞌ, nitosoroꞌsaꞌ, niomoroꞌsa inapita.

⁴ Matian huiꞌninpitasoꞌ: Ipan, Ihuiri, Anoco, Apitan, Iritan inapita. Yaꞌipi inapitasoꞌ, Sitora quëran pipipi.

^5-6 Naꞌa huiꞌninpita Apraan yaꞌhuëtopirinhuëꞌ, Isacoráchin pochin yaꞌipi maꞌshanënpita, quëtërin. Sitoraquë, Acaraquë huiꞌnahuaninsopitasoꞌ, piꞌpiyan piꞌpiyan maꞌsha nicanarin. Naporahuaton, nanpiso chachin niquë aꞌparin. Piꞌi pipirinso parti yaꞌhuëcaiso marëꞌ aꞌparin. Co nohuantërinhuëꞌ Isacorëꞌ napopináchin yaꞌhuëcaisoꞌ.

Apraan chimininsoꞌ

⁷ Apraanso yaꞌipiya quëran, pasa canchisë shonca aꞌnatërápo piꞌi icanin.

⁸ Nani noyá mashoya nipachina, mashori quëparin. Chiminpachina, shimashonënpita, quënancontarin huachi.

⁹ Huiꞌninpita: Isaco, Ismairo, inapitari, paꞌpitopi. Maquipira naninquë poꞌmopi. Maquipirasoꞌ, shaꞌhuirahuëso chachin, insina nararo Mamiriri huaꞌanëntërin quëran, piꞌi pipirinso parti quëparitërin. Soaro huiꞌnin Ipron itopisoari, ina noꞌpasoꞌ huaꞌanëntopirinhuëꞌ. (Inapitasoꞌ itiroꞌsaꞌ.)

¹⁰ Ina noꞌpa chachin iráca Apraan nanpipon itiroꞌsaꞌ, paꞌantërin. Inaquë inantaꞌ, saꞌincoꞌ Sara itopisoꞌ pirayan, poꞌmopi.

¹¹ Apraan chiminpachina, Yosëri Isaco, catahuamiatërin. Inaso Nipicarë chachin: “Nanpiton niꞌsárincosoꞌ poso,” itopisoꞌ pirayan, yaꞌhuërapi.

Ismairo quëran pipipisopita

¹² Shaꞌhuitëranquëmaso chachin, Apraan Acaraquëya huiꞌnahuanpachina, Ismairo itopi. Acarasoꞌ, iquipitoron. Sara piyapinën. Ismairo huiꞌninpitasoꞌ, isopita:

^13-15 Paninantërinsoꞌ Nipayo itërin. Ina piquëran niantapisopitasoꞌ: Sitaro, Atipiri, Mipisan, Misma, Toma, Masa, Atar, Tima, Quitoro, Nahui, Sitima inapita.

¹⁶ Ina nápo Ismairo huiꞌninpita yaꞌhuëpi. Shonca cato yaꞌipiya quëran. Aꞌnaya aꞌnaya noꞌpanëna huaꞌanëntopisoꞌ, niaporaꞌpiapi. Yaꞌhuëpisonta inapotopi. Naporahuaton, inapitaso inahuara inahuara huëntonënaquë, huaꞌan yaꞌconpi.

¹⁷ Ismairo pasa cara shonca canchisë piꞌipitasoꞌ chiminin. Chiminpachina, paꞌpitopi huachi.

¹⁸ Ismairo quëran pipipisopitasoꞌ, Apira parti, Shor parti, inapita partiroꞌsari ahuancanapirin. Inaquë, noꞌpaꞌ macatona yaꞌhuëpi. Iquipito notënanquë yaꞌhuëpi. Ina partitaquëchin Iquipito quëran, Asiriaquë ira paꞌninsoꞌ naꞌhuërin. Iinpitari, co nohuantopirinahuëꞌ, inaquë noꞌpaꞌ macatonaꞌ, yaꞌhuëpi huachi.

Isaco huiꞌninpita nasitërinsoꞌ

¹⁹ Iporaso Isaco naporinso shaꞌhuichinquëmaꞌ: Inasoꞌ, Apraan huiꞌnin.

²⁰ Catapini shonca piꞌipitasoꞌ, saꞌarin. Pitoiro huiꞌnin Nipica itopisoꞌ, manin. Inaso yoꞌin, Napano itopi. Inapitasoꞌ aranoꞌsa itopi. Patan-aran parti yaꞌhuëpi.

²¹ Nipicasoꞌ, co nanitërinhuë huaꞌhuanacasoꞌ. Ina marëꞌ Isaco Sinioro nontërin. Napohuachina, nontërinsoꞌ natanahuaton, catahuarin niꞌton, Nipica cayorin huachi.

²² Catopiaꞌhuaya cayoaton, yoꞌnamënquë niahuërapi natanin. Napoaton yonquirin. “Huaꞌhuahuëpita iporaquëranchin niahuërapi niꞌquëhuarëꞌ: ¿Maꞌmarëta aquëtë huarëꞌ nanpiisoꞌ?” tënin. Inapochin yonquiaton, Siniorori anitotacaso marëꞌ nontërin.

²³ Natanpachina, Siniorori itapon: “Catopiaꞌhuaya cayoran. Inapita shinpita quëran cato nacion pipipon. Cato huënton nicatonaꞌ, niahuëráponaꞌ. Ipora shimashonëna coꞌhuara nasichátëraponahuëꞌ, niahuëpiso pochin nicaponaꞌ. Aꞌnara chini chiníquën nanantapon. Naporahuaton huaꞌhua nininsoari masho masho nininso camairápon,” itërin.

²⁴ Napoin quëran, Nipica huaicaso nanirin. Catopiaꞌhuaya huairin.

²⁵ Quëchitërinsosoꞌ quëhuashin ainaꞌhuatahuaton, yaꞌipi anporotërin. Napoaton Isao itopi.

²⁶ Ina paꞌtaso chachin, iiontaꞌ, aꞌna imirin quëran Isao matocanahuaton, huaꞌhuataantarin. Naporinso marëꞌ inasoꞌ, Cacopo itopi. Isaco saota shonca piꞌipitasoꞌ, huiꞌninpita nasitapi.

Isao tëhuërinsoꞌ

²⁷ Catopiaꞌhuaroꞌsa noya soꞌsopi. Isaosoꞌ huiꞌnapitahuaton, maꞌsha yonicaso paꞌyatërin. Míso inantërin. Cacoposo nipirinhuëꞌ, co inaporinhuëꞌ. Yaꞌhuëpiquë paꞌyatërin yaꞌhuápasoꞌ.

²⁸ Isaosoꞌ, paꞌpini naꞌcon naꞌcon paꞌyatërin. Inantërinso capaton, napotërin. Yaꞌhuërëꞌ Nipicasoꞌ, Cacopo naꞌcon naꞌcon paꞌyatërin.

²⁹ Aꞌna tahuëri Cacopo shantë aꞌitarin. Inapoaso Isaontaꞌ, inantapon paꞌnin quëran, paꞌpi canotërin huënantarin.

³⁰ Cacopo aꞌitërinso niꞌsahuaton itapon: —Nosoroco iya, tana yatëparinco casoꞌ. Quëhuashin cosharo anpiransoꞌ, canta quëtoco caꞌi, itërin.

³¹ Napotohuachina, Cacopori itapon: —Paninanquën niꞌton, naꞌcon yaꞌhuëtarinquën canacamasoꞌ. Carinquën nipachin yaꞌhuërëchinquën. Naporo huarëꞌ iso cosharo quëtaranquën, itërin.

³² Napotohuachina, Isaosoꞌ tapon: —Niꞌquë iyasha, tana caso yatëpararinco. Chiminpatosoꞌ, paninan ninahuëso marëꞌ canaꞌhuasoꞌ yaꞌhuëtërincosopita, topinan quëran nisarin, itërin.

³³ —Yoscoarëꞌ quëtaranquën itoco nipachin, itaantarin Cacopori. Napotohuachina, “Yoscoarëꞌ quëtaranquën,” itërin. Inapoaton, Isaoso paninan nininso marëꞌ canacaso yaꞌhuëtërinsopita, co paꞌyatërinhuëꞌ.

³⁴ Naporo huarëꞌ Cacopori, pan acotahuaton, shantë aꞌitërinsonta oꞌhuintërin. Nani caꞌsahuaton, oꞌosahuaton, Isaosoꞌ paꞌnin huachi. Paninan nininso marëꞌ canacaso yaꞌhuëtërinsoꞌ, co manta paꞌtërinhuë pochin nitërin.