Génesis 22 - Chayahuita (Shahui)

Yosëri Apraan tënirinsoꞌ

¹ Ina piquëran Yosëri: “¿Tëhuënchachin taꞌma Apraan natërinco to?” taꞌton, tënicaso marëꞌ përarin: —Apraan, itërin. —Maꞌta Sinioro yaꞌhuëarahuë, tënin Apraan.

² Naporoꞌ Yosëri itapon: —Huiꞌnan Isaco itëransoꞌ, aꞌnaíchin niꞌton, nosoromiatëran. Ina nipirinhuëꞌ, masahuaton Moria parti quëpaquëꞌ. Inaquë canconpatan, aꞌna motopi aꞌnotaranquën. Inaquë chinotancoso marëꞌ ina tëparahuaton, yaꞌipi ahuiquitëquëꞌ, itërin.

³ Tahuëririnquë Apraansoꞌ, tashiramiachin huënsëintarahuaton, tapatarin huachi. Ihuë Yosë chinotaton ahuiquitacaso marëꞌ pëꞌshitërinsoꞌ, moranënquë aꞌmitërin. Ina quëran huiꞌnin, cato piyapinënpita, inapita quëparin. Yosëri shaꞌhuitërinquë paꞌnin huachi.

⁴ Cara tahuëri quëran Apraansoꞌ, Yosëri shaꞌhuitërinsoꞌ noꞌpaꞌ notërin.

⁵ Naporoꞌ piyapinënpita itapon: —Isëquë ninatacoi. Moranta isëquë patarahuë. Quiyasoꞌ amasha aquëcha paꞌsahuatoi, Yosë chinotarai. Nani chinotohuatoi oꞌmantarai, itërin.

⁶ Ihuë Yosë chinotaton ahuiquitacasoꞌ, Isaco apitëntërin. Inaoranta cosoroaꞌhua, pëꞌto raꞌpi, inapita manin. Ina quëran paꞌpi huachi.

⁷ Papon pochin Isacori, Apraan itapon: —¡Tata! itërin. —¿Maꞌta conpaaꞌhuaꞌ? itërin paꞌpini. —Niꞌquë tata, nani ihuë yaꞌhuërin. Pëꞌto raꞌpinta yaꞌhuërin. Carniroaꞌhua yaꞌipi ahuiquitacaso marësoꞌ: ¿Intoparanta manëꞌ? itërin Isacori.

⁸ —Yosë nohuanton conpa yaꞌhuapon, itërin paꞌpini. Ina quëran, paantapi.

⁹ Yosëri shaꞌhuitërinquë canconpachinara, Apraanso aꞌnara artaro ninin. Tënirahuaton, ina aipi ihuë acorin. Ina quëran huiꞌnin tonporahuaton, ihuë aipi acorin.

¹⁰ Inaquë acorahuaton tëpacaso marëꞌ cosoroaꞌhua manantërin.

¹¹ Naporo chachin Sinioro anquëninëni, inápa quëran përarin: —¡Apraan! ¡Apraan! itërin. —Maꞌta Sinioro yaꞌhuëarahuë, itërin Apraani.

¹² Sinioro anquëninënisoꞌ, itapon: —Ama huiꞌnan tëpaquësohuëꞌ. Tëniponquën napotopiranquënhuëꞌ, iporasoꞌ nani nitotërahuë. Yaꞌipi cancanën quëran huarëꞌ imaranco tënahuë. Huiꞌnan aꞌnaíchin nipirinhuëꞌ, co apiratërancohuë niꞌton, nitotërahuë, itërin.

¹³ Naporoꞌ Apraan tahuërërahuaton niꞌpirinhuëꞌ, aꞌnara carniro quënanin. Yosë nohuanton pomonën quëran, naraꞌhuaya sëꞌpaquënquë aꞌtënin. Ina masahuaton huiꞌnin yaꞌhuërënamën tëparin. Inapotaton, Yosë chinotacaso marëꞌ yaꞌipi ahuiquitërin.

¹⁴ Ina quëran Apraani ina roꞌtë aninihuanin. “Pahuantërinpoasoꞌ Sinioro quëtërinpoaquë,” itërin. Napoaton, iporahuanta ina pochin nohuitapi. “Motopiquësoꞌ, pahuantërinpoasopita Sinioro quëtërinpoaꞌ,” topi nonatonaꞌ.

^15-16 Sinioro anquëninëni, naquëranchin inápa quëran Apraan përaton itapon: —Sinioro naporin: “Yaꞌipi cancanën quëran huarëꞌ natëtonco, aꞌnaíchin huiꞌnan nipirinhuëꞌ co apiratërancohuëꞌ. Inaporanso marëꞌ noya niꞌnanquën. Caso Yosëco niꞌto, noꞌtëquën shaꞌhuitaranquën.

¹⁷ Noya nicatënquën catahuamiataranquën. Ca nohuanto shiparinpita, tayoraroꞌsa nápo naꞌaponaꞌ. Marë yonsanquë inotëraꞌhuaya nápo, naꞌamiataponaꞌ. Naporahuaton, inapitaso inimiconëna minsëraꞌpiaponaꞌ.

¹⁸ Quëma natëranco niꞌton, yaꞌipi isoroꞌpaquë nacionoꞌsa yaꞌhuërinsopita, shiparinpita quëran catahuararahuë,” itërin.

¹⁹ Nani Yosë chinotahuatonaꞌ, Apraanso huiꞌninë chachin piyapinënpita quëparitopiquë, paꞌmantapi. Ina quëran yaꞌipi chachin, Piirsipaquë panantapi. Inaquë Apraan huaꞌqui yaꞌhuërin.

Nacoro huiꞌninpita nipisoꞌ

²⁰ Huaꞌquimiachin yaꞌhuapona pochin, Apraanso natantërin. “Miricantaꞌ, Nacoro saꞌin nininsoꞌ, Sara pochachin huaꞌhuanin antaꞌ,” itopi.

²¹ Paninansoꞌ, Os itopi. Ina quëran niantarinsoꞌ, Pos itopi. Ina quëran aꞌnanta niantarinsoꞌ, Quimoino itopi. (Quimoinonta huiꞌnahuanpachina, Aramo itopi.)

²² Quimoino quëran nasitaantapi: Quisito, Aso, Piritasi, Itarapi, Pitoiro, inapita.

²³ Ina Pitoiro mini, Nipica paꞌpin. Nacorosoꞌ, Apraan iyaꞌhuain. Yaꞌipiya quëran Miricasoꞌ, posa huaꞌhuinpita yaꞌhuëtërin. Ina nápo Nacorosoꞌ, saꞌinquë chachin huiꞌnahuanin.

²⁴ Naporahuaton aꞌna saꞌinquënta huiꞌnahuanin. Ina saꞌinsoꞌ, Nioma itopi. Inaquë huiꞌnahuaninsopitasoꞌ: Tipa, Caamo, Taas, Maaca, inapita.