Génesis 21 - Chayahuita (Shahui)

Isaco nasitërinsoꞌ

¹ Shaꞌhuitërinso chachin, Siniorori Sara catahuarin.

² Ina nohuanton napoin quëran cayorin huachi. Tahuëri nanihuachina, quëmapiaꞌhuaya huairin. Inasoꞌ, Apraan mashoya nicaquë huarëꞌ huiꞌnahuaninso huaꞌhuatërin. Yosëri shaꞌhuitërinso tahuëriꞌsa chachin, huiꞌnin nasitërin.

³ Saꞌinquë chachin huiꞌnahuaninso nasitohuachina, Isaco itërin.

⁴ Yosë camaitërinso chachin posa tahuëritohuachina, marca acotërin.

⁵ Apraan pasa piꞌipitasoꞌ, huiꞌnin Isaco itërinsoꞌ, nasitarin.

⁶ Naporoꞌ Sara yonquirin: “Yosë catahuarinco niꞌton, capa cancantato, tëhuarahuë. Aꞌnapitantaꞌ, huaꞌhuanahuëso nitotohuachinaꞌ, yaꞌipiya quëran capa cancantatona tëhuaponaꞌ.

⁷ Co huaꞌhuanaꞌpicohuë niꞌto, co inso tëranta Apraan nontaton: ‘Tëhuënchachin Saraquë huiꞌnahuanaran,’ co ichitonhuëꞌ. Inaso nipirinhuëꞌ, máshoya niponahuëꞌ, huiꞌnahuanin huachi,” tënin.

Acara, Ismairo, inapita Apraani aꞌparinsoꞌ

⁸ Isacoaꞌhuaya oshaquëran soꞌsohuachina, aꞌshini aꞌpotërin. Aꞌpotërinso tahuëri, capa cancantacaiso marëꞌ Apraan panca pita ninin.

⁹ Capa cancantapirinahuëꞌ, Sarasoꞌ co noyahuëꞌ cancantërin. Cosona huaꞌhuini Isaco monaton yaꞌnipitarin niꞌnin.

¹⁰ Napoaton Apraan shaꞌhuitërin: “¡Cosonasoꞌ, huaꞌhuinë chachin, aꞌpaquë paꞌin! Isacoso huaꞌhuahuë chachin niꞌton, co nohuantërahuëꞌ quëma maꞌshanënpita cosona huaꞌhuionta quëtacasoꞌ,” itërin.

¹¹ Ina natanaton, Apraan panca sëtërin. Huiꞌnin niꞌton, sëtëyarin.

¹² Sëtopirinhuëꞌ, Yosëri itërin: “Ama huiꞌnapi marëꞌ sëtëquësohuëꞌ. Co cosonanën marëꞌ tëranta sëtacaso yaꞌhuërinhuëꞌ. Maꞌsona Sara nohuantërinso niquëꞌ. Isaco quëran pipipisopita, noya noya catahuararahuë. Inapita mini yonquiato nani shaꞌhuitëranquën nisapasoꞌ.

¹³ Cosona huaꞌhuionta catahuarahuë. Ca nohuanto, shinpita panca nacion ocoiaponaꞌ. Huiꞌnan chachin anta niꞌton, catahuarahuë,” itërin.

¹⁴ Tahuëririnquë tashiramiachin Apraansoꞌ, Acara quëtacaso marëꞌ cosharo manin. Aꞌnara shaꞌhuëtë morsaquë iꞌsha taꞌpanahuaton, quëtërin. Huiꞌnionta Ismairo itërinsoꞌ, aꞌpaantërin quëpacaso marëꞌ. Inahuaso paꞌpachinara, Piirsipa inotëro parti chihuëatonaꞌ, topinan paꞌsápi.

¹⁵ Iꞌsha shaꞌhuëtë morsaquë yaꞌhuërinsoꞌ, taꞌquipi. Taꞌquihuachinara Acarasoꞌ, naraaꞌhuaya tashinantërianaquë huaꞌhuin acorahuaton, patërin.

¹⁶ Aquëmiachin paꞌsahuaton, huënsëconin. Ama huaꞌhuin chimininso nicacaso marëhuëꞌ, inaquë huënsëconin. Huënsëhuachina, huiꞌnapiso naꞌnërin huachi.

¹⁷ Yosëri, huiꞌnapi naꞌnërinsoꞌ natanin. Napoaton Yosë anquëninëni, inápa quëran përasahuaton nontërin: “¿Maꞌta Acara onporan? ¡Ama paꞌyanquësohuëꞌ! Yosëri, huiꞌnapi naꞌnërinsoꞌ natanin.

¹⁸ Manóton paꞌsahuaton, macontaquëꞌ. Ama patëquësohuëꞌ. Ca nohuanto, huaꞌhuan quëran panca nacion pipipon,” itërin.

¹⁹ Naporoꞌ Yosë nohuanton, Acara aꞌna posoquë iꞌsha quënanin. Inaquë paꞌsahuaton, shaꞌhuëtë morsaquë manin. Ina masahuaton, huaꞌhuin oꞌshitonin.

^20-21 Yosëri, huiꞌnapi catahuarin niꞌton, nóya aꞌshinin. Paran inotëro parti yaꞌhuëpi. Míso pëꞌchinantërin. Oshaquëran aꞌshini Iquipito sanapi yoniton, acoantërin.

Apimirico Apraanë anoyatopisoꞌ

²² Naporo tahuëriꞌsa pochin Apimirico paꞌnin Apraan nontapon. Huicororëꞌ paꞌnin. Inasoꞌ, Apimirico sontaronënpita camairinsoꞌ. Inaquë Apimiricori Apraan itapon: —Tëhuënchachin quëmasoꞌ nani maꞌsha nipatana, Yosë catahuarinquënso niꞌnai.

²³ Napoaton isëquë chachin Yoscoarëꞌ taꞌton shaꞌhuitoco: Ama huiꞌnahuëpita, shihuëpita, ama ca tërantaꞌ, maꞌsha onpotancoso marëhuëꞌ, shaꞌhuitoco. Carinquënso nosoroatënquën co maꞌsha onpotëranquënhuëꞌ. Inapochachin quëmanta noya niꞌcoi. Aꞌnapita yaꞌhuëhuanoꞌsantaꞌ, noya niꞌcamaso marëꞌ Yoscoarëꞌ taꞌton shaꞌhuitoco, itërin.

²⁴ Napotohuachina Apraan tapon: —Yoscoarëꞌ co maꞌsha onpotaranquëmahuëꞌ, itërin.

²⁵ Napoaponahuëꞌ, Apraani itaantapon: —Carinquëmasoꞌ, noya yonquirapiranquëmaꞌ. Quëma piyapinënpitaso nipirinhuëꞌ, aꞌnara poso ihuaraiso matërinacoi, itërin.

²⁶ Ina natanahuaton, Apimiricori itapon: —Co shaꞌhuitërancohuëꞌ niꞌton, ipora huarëꞌ namaso natanahuë. Inpitaso inapotomarinquën. Co caso nitotërahuëꞌ, itërin.

²⁷ Napotohuachina, naporo tahuëri cato chachin, noya ninitona yaꞌhuëcaiso marëꞌ anoyatopi. Yoscoarëꞌ taꞌtonaꞌ, anoyatopi. Ina quëran anoyatopiso yonquicaiso marëꞌ Apraani ohuicaroꞌsaꞌ, ohuacaroꞌsaꞌ, inapita manin. Masahuaton Apimirico quëtërin.

²⁸ Naporahuaton canchisë ohuica nanoyan nipisopita huëntonën quëran nisha acoarin.

^29-30 Nisha acoasoꞌ, Apimiricori itapon: —¿Maꞌmarëta canchisë ohuicaroꞌsa nisha acoaran? itërin. —Isopita canchisë ohuica, quëtaranquën: “Tëhuënchachin Apraani ina poso ninin,” taꞌcamaso marëꞌ quëtaranquën, itërin.

³¹ Napoaton ina roꞌtësoꞌ, Piirsipa itopi. Inaquë cato chachin Yoscoarëꞌ taꞌtonaꞌ, anoyatopi niꞌton, ina pochin nohuitopi.

³² Nani anoyatohuachina Apimiricosoꞌ, Huicororë chachin huiristinoꞌsa noꞌpanën parti paantapi.

³³ Nani paꞌpachinara, Apraanso inaranchin Sinioro chinotërin. Inasoꞌ: “Yosë yaꞌhuëmiatërinsoꞌ,” itopi antaꞌ. Inaquë chinotaton, aꞌnara tamarisco nara shaꞌnin. Nani shaꞌhuirahuë chachin ina noꞌpasoꞌ, Piirsipa itopi.

³⁴ Huaꞌqui Apraan huiristinoꞌsa noꞌpanënaquë, yacapatërin.