Génesis 20 - Chayahuita (Shahui)

Apraan Apimiricorë naporinsoꞌ

¹ Apraansoꞌ, piyapinënpitarë chachin yaꞌhuëapi quëran pipipi. Pipirahuatonaꞌ, Niquipi parti paantapi. Quiraro ninanoquë canconahuatonaꞌ, inaquë yaꞌhuëcaiso marëꞌ quëparitopi. Ina ninanosoꞌ, Catisë ninano quëran Shor parti ira paꞌninsoꞌ huáncana quëparitërin.

² Apraanso inaquë yaꞌhuapon pochin, Sara saꞌin nipirinhuëꞌ: “Oshihuë,” toconin. Napoaton Quiraro copirno Apimirico itopisori yamanin. Camaitohuachina, macacaso marëꞌ Sara quëpatopi.

³ Napoaponahuëꞌ, naporo tashi chachin Yosëri huëꞌënquë pënënin: “Quëmaso chiminaran. Sanapi mananso soꞌyahuan niꞌton, chiminamaso yaꞌhuërin,” itërin.

⁴ Apimiricosoꞌ, co Sara ichihuëꞌëshátërarinhuëꞌ. Napoaton Sinioro itapon: “Sinioro co manta onporahuë niꞌton, co tëpaancoso yaꞌhuërinhuëꞌ.

⁵ Coꞌta Apraan chachin naporin: ‘Oshihuë,’ tënin. Sarantaꞌ: ‘Yoꞌyohuë,’ tënin. Cato chachin napopi niꞌton, co nitotatohuë manahuë,” itërin.

⁶ Napotohuachina, Yosërinta huëꞌënquë chachin aꞌpaniantarin: “Tëhuënchachin co nitotatonhuëꞌ naporan. Napoaton ca nohuanto co ichihuëꞌëranhuëꞌ. Carinquën yaꞌcopiranquën ama oshahuanaton tëhuëtancoso marëhuëꞌ.

⁷ Iporaso nipirinhuëꞌ, soꞌin chachin quëtaantaquëꞌ. Inaso pënëntonaꞌpi niꞌton, quëma marëꞌ nontarinco. Ama chiminamaso marëhuëꞌ, nontarinco. Coꞌsoꞌ quëtaantahuatanhuëꞌ, saꞌan, huiꞌnanpita, inapitarëꞌquën chachin, taꞌhuantaran,” itërin huëꞌënquë.

⁸ Tahuërianpitohuachina, Apimiricoso huënsëintarahuaton, piyapinënpita amatërin. Huëꞌpachinara, yaꞌipi huaꞌnarinso shaꞌhuitërin. Natanahuatonaꞌ, piyapinënpitaso paꞌpi paꞌyanpi.

⁹ Ina quëran Apraan amatahuaton, itapon: —¡Maꞌhuantacha nitapirancoihuë paya! ¡Caso co maquë tëranta tëhuëtëranquënhuëꞌ! Quëmaso nipirinhuëꞌ, napotatoncoi panca yaaoshahuanpirancoihuëꞌ. Ca aoshahuanatonco, quëmopinëhuëpita, piyapinëhuëpita, inapita, naꞌinchitonhuëꞌ. ¡Co naporëhuëꞌ!

^10-11 ¿Maꞌta yonquiaton, napotopirancohuëꞌ? itërin. Napotohuachina, Apraani itapon: —Isëquësoꞌ, co manta Yosë natëpihuëꞌ. Saꞌahuë matiinacoso marëꞌ tëpaponaco casoꞌ, taꞌto naporahuë.

¹² Naporahuaton Sarasoꞌ, oshihuë antaꞌ. Ina tataquëranchin nipiraihuëꞌ, mamahuëi quëransoꞌ, nisha ninai. Napoaton cari manahuë.

¹³ Yosë chachin, tatahuë yaꞌhuërin quëran pipicasoꞌ camaihuachincora, saꞌahuë shaꞌhuitërahuë: “Insëquë tëranta paꞌnëhuaquë: ‘Inaso yoꞌyo masho,’ tëquë taꞌa, itërahuë,” tënin Apraan.

¹⁴ Ina natanahuaton, Apimiricoso saꞌin quëtaantarin. Naporahuaton, ohuicaroꞌsaꞌ, ohuacaroꞌsaꞌ, inapita quëtërin. Piyapinënpita camaicaso marëntaꞌ: Quëmapiꞌsaꞌ, sanapiꞌsaꞌ, inapita quëtërin.

¹⁵ Ina quëtahuaton, itërin: —Niꞌquë iya, noꞌpanëhuëso pancana, insëquëso costaranquë yaꞌhuëquëꞌ, itërin.

¹⁶ Sarantaꞌ, itapon: —Niꞌquë imoya, yoꞌyo masho huaranca coriqui prata quëran nininsoꞌ quëtërahuë. Yaꞌipiya quëran co tëhuëransohuëꞌ nitotacaiso marëꞌ ina nápo quëtarahuë. Co insonta pinoinquënso yaꞌhuërinhuëꞌ.

¹⁷ Ina quëran Apraan, Yosë nontërin Apimirico marëꞌ. Ina saꞌin, cosonanënpita, inapita marëntaꞌ, Yosë nontërin. Nontohuachina, Yosëri anoyatërin. Naquëranchin huaꞌhuasha yaꞌhuëtaantacaiso marëꞌ anoyatërin.

¹⁸ Siniorori nani Apimirico yaꞌhuërinquë, sanapiꞌsa anaꞌintopirinhuëꞌ. Ama huaꞌhuanacaiso marëhuëꞌ, Sara naꞌin quëran napotopirinhuëꞌ. Napoaton Apraani Yosë nontërin inari anoyatacaso marëꞌ. Napohuachina, Yosëri Apimirico saꞌin, piyapinënpita saꞌinaꞌ, inapita anoyatërin. Huaꞌhuasha yaꞌhuëtaantacaiso marëꞌ anoyatërin.