Génesis 19 - Chayahuita (Shahui)

Sotomaroꞌsaꞌ, Comoraroꞌsaꞌ, inapita ataꞌhuantërinsoꞌ

¹ Nani yatashirahuasoꞌ, cato anquëniroꞌsaso Sotoma ninanoquë camapi. Ninano yaꞌcoanaquë chachin Noto huënsasoꞌ, camapi. (Inaquë yaꞌhuëhuanoꞌsa niyontonpi maꞌsha yonquiatona anoyatacaiso marëꞌ.) Cato yaꞌpi canquipiso quënanahuaton, paaparin nontapon. Isonin quëran noꞌpaquë huarëꞌ monshorin.

² Monshorin quëran itapon: —Caso siniororoꞌsa piyapinëma pochinco. Huëco pëinëhuëquë onpopionta huëꞌëcamaso nohuantocoꞌ. Inaquë nanitërama nipaꞌmorantëcamasoꞌ. Tashiraya yapaꞌpatama paantacoꞌ, itërin. Napotopirinhuëꞌ, inapitaso co nohuantopihuëꞌ. —Naporinchi paya. Napopiranhuëꞌ co nohuantëraihuëꞌ. Caniquë tëranta noya huëꞌëpoi, itopi.

³ Napotopirinahuëꞌ, Notori naquëranchin naquëranchin shaꞌhuitohuachina, napoin quëran pëinënquë paꞌpi huachi. Canconpachinara, noya cosharo nitërin. Pan co ahuëpocatopinanhuëꞌ anpitaton, inapitarëꞌ acotohuachina, niꞌtoroꞌsa coshatopi huachi.

⁴ Napoaponahuëꞌ, coꞌhuara chinochátërasoihuëꞌ yaꞌipi yaꞌhuëhuanoꞌsari Noto pëinën tancapitopi. Huiꞌnapiroꞌsa quëran, mashoroꞌsaquë huarëꞌ yamoipi.

⁵ Noto noꞌhuitonaꞌ, chiníquën nontiipi: —¡Quëmapiꞌsa pëinënquë canquipisoꞌ! ¿Intopata yaꞌhuapi? ¡Ocoiquë tëcariꞌi! itopi.

^6-7 Naporoꞌ Notosoꞌ pëinën noyá oncotahuaton, inapita nontapon pipirin. —Ama iyaroꞌsa napocosohuëꞌ, paꞌpi co noyahuëꞌ yonquiramaꞌ.

⁸ Cato huiꞌnahuëpita nanoꞌsa co quëmapiri sëꞌhuayátërarinsohuëꞌ, yaꞌhuëtërinco. Inapita nipachin ocoichinquëmaꞌ, nohuantëramasoꞌ nitocoꞌ. Isopita quëmapiꞌsaso nipirinhuëꞌ, ama napotocosohuëꞌ. Cari përarahuë pëinëhuëquë yaꞌconquipi niꞌton, napotaranquëmaꞌ, itërin.

⁹ Inapitariso nipirinhuëꞌ, itaponaꞌ: —¡Poꞌshaquë quëmasoꞌ! Nisha piyapinquën niponahuëꞌ, ¿yacamairancoi ti? ¡Iporaso huachi inapita quëran naꞌcon naꞌcon, quëma nitarainquën! itopi. Napotatonaꞌ, Noto ahuërapi. Pëinën yaꞌcoanantaꞌ, yapaparapitopi huachi.

¹⁰ Napoaponahuëꞌ, niꞌtoroꞌsari Noto mapi. Masahuatonaꞌ, acoana poꞌmopi. Napotatonaꞌ, yaꞌcoana oncotaantapi.

¹¹ Naporo chachin piyapiroꞌsa aipiran nisapisopita, aꞌnaroáchin asomarayapi huachi. Huiꞌnapiroꞌsa quëran, mashoroꞌsaquë huarëꞌ yaꞌipi somarayapi. Ina nipirinahuë tërantaꞌ, amiai huarëꞌ yaꞌcoana yonípi.

¹² Naporoꞌ niꞌtoroꞌsari, Noto itaponaꞌ: —¿Yaꞌhuëtërinquën aquëtë huarëꞌ quëmopiroꞌsa isëquë? Huiꞌnanpita quëmapiꞌsaꞌ, sanapiꞌsaꞌ, miꞌsëroꞌsa nicacaiso nipisopita yaꞌipi inapita, iso ninano quëran ocoiquëꞌ. Ocoiaton áquë quëpaquëꞌ.

¹³ Iso roꞌtë ataꞌhuantarai niꞌton, quëpaquëꞌ. Iso ninanoquë paꞌpi co noyahuëꞌ nipisoꞌ, naꞌa piyapiꞌsari Sinioroquë shaꞌhuirapipi. Napoaton, ataꞌhuantaꞌhuaiso marëꞌ aꞌparincoi, itopi.

¹⁴ Napotohuachinara, Notoso miꞌsënpita nicacaiso nipisopita shaꞌhuitacaso marëꞌ paꞌnin: —¡Manóton huëco paꞌahuaꞌ! Iso ninano quëran pipiaꞌahuaꞌ. ¡Siniorori iso ninano ataꞌhuantarin niꞌton, huëco paꞌahuaꞌ! itërin. Itopirinhuëꞌ, co natëpihuëꞌ.

¹⁵ Nani tahuëri yaꞌcari nipachina, anquëniroꞌsari Noto itaponaꞌ: —¡Pashi tëquëꞌ! Saꞌan, cato huiꞌnanpita, inapita masahuaton, iso ninano quëran ocoiquë huachi. Ninano ataꞌhuantëraiquë, chimintamaꞌ.

¹⁶ Napotopirinahuëꞌ, Notosoꞌ co manorinhuëꞌ niꞌton, Yosëri nosoroaton, yanichaꞌërin. Napoaton anquëniroꞌsari, saꞌinë chachin maimirarin. Huiꞌninpitanta maimirarahuatonaꞌ, ninano quëran chaꞌëcaiso marëꞌ ocoipi.

¹⁷ Ninano quëran nani pipihuachinara, aꞌna anquëniri itapon: —¡Chaꞌëcamaso marëꞌ manóton taꞌacoꞌ! Ama pinëma parti tahuërëcosohuëꞌ. Paꞌmia pacoꞌ. Ama maꞌsha marëꞌ tëranta iso motopianaquë chinicosohuëꞌ. Chaꞌëcaso nohuantohuatamaꞌ, motopiroꞌsa parti taꞌacoꞌ, itërin.

^18-19 Notoriso nipirinhuëꞌ, itapon: —¡Co Siniororoꞌsa topirahuëꞌ! Tëhuënchachin canpitasoꞌ, naꞌcon catahuaramaco huachi. Noyanquëma niꞌton, nichaꞌëramaco. Napoaponahuëꞌ, motopiroꞌsa parti taꞌacaꞌhuasoꞌ, co nanitarahuëꞌ. Huancopi niꞌsoiꞌ, ayaroꞌ icantatoncoi tiquihuachincoi.

²⁰ Niꞌcoꞌ, pasëyáquë aꞌna ninanoaꞌhuaya yaꞌhuërin. Inaquë tëhuënchinsoꞌ noya pacaꞌhuaisoꞌ topirahuë. Nohuantoco inaquë paꞌi chaꞌëcaꞌhuaiso marëꞌ. ¿Coꞌta inasoꞌ, co panca ninanoyahuëꞌ? itërin.

²¹ Napotohuachina aꞌna anquëniri itapon: —Nani natananquën nontërancosoꞌ. Nohuantëranso chachin nisarahuë. Co ina ninanosoꞌ, ataꞌhuantapohuëꞌ.

²² Napoaponahuëꞌ, ¡manóton inatohua pacoꞌ! Inatohua canama huarëꞌ Sotoma ninano ataꞌhuantarai huachi. Napoaton ina ninanosoꞌ, Soaro itopi.

²³ Nani tahuërihuachina Notosoꞌ, Soaro ninanoquë camarin.

²⁴ Naporoꞌ Siniorori, pën oꞌnan pochin aꞌpaimarin. Shaꞌpi moꞌshirë chachin, aꞌpaimarin. Sotoma, Comora, inapita ninanoroꞌsa aipi aꞌpaimarin.

²⁵ Inapotaton, ataꞌhuantërin. Yaꞌipi inaquë yaꞌhuëpisopitarë chachin ataꞌhuantërin. Ina motopianaquë papotërinsopitantaꞌ, yaꞌipi tiquirin.

²⁶ Noto saꞌinso nipirinhuëꞌ, co Soaroquë camarinhuëꞌ. Oshaquëran soꞌin imaquiáponahuëꞌ, pinën parti tahuërëhuachina, inaquë chachin yamora motoꞌ taranaton, chiminin.

²⁷ Tashiramiachin Apraansoꞌ, iꞌhuara Sinioro nontërintaquëchin paꞌnin.

²⁸ Ina quëran, Sotoma, Comora, inapita ninanoroꞌsa nocorin. Yaꞌipi ina motopiananta nocomapirinhuëꞌ, ina roꞌtë quëran paꞌpi huëhuëpiro conai pipirarin niꞌnin. Panca orno quëran tomontërinso pochin, pipirarin.

²⁹ Ina pochin, ina motopianaquë ninanoroꞌsa Yosëri ataꞌhuantërin. Noto yacapatërinso parti noyá ataꞌhuantërin. Notoso nipirinhuëꞌ, co ataꞌhuantërinhuëꞌ. Apraan yonquiaton, chaꞌëcaso marëꞌ ina quëran ocoirin.

Moaporoꞌsaꞌ, amonoꞌsaꞌ, inapita yaꞌhuërinsoꞌ

³⁰ Inapita ninanoroꞌsa taꞌhuantopi piquëran, Notosoꞌ tëꞌhuatërin. Tëꞌhuataton, Soaroquë yaꞌhuëcaso co nohuantërinhuëꞌ. Napoaton cato huiꞌninpitarë chachin motopiroꞌsa parti, yaꞌhuëcaiso marëꞌ paꞌpi. Inaquë aꞌna motopi naninquë, cara chachin yaꞌhuëpi.

³¹ Aꞌna tahuëri paya paya nininsoari, caiaꞌhuain, itapon: —Niꞌquë caira. Yaꞌipi parti sanapiꞌsa yaꞌhuërinsoꞌ, soꞌyatona huaꞌhuanpi. Canposo nipirinhuëꞌ, isoporinquë quëmapi pahuanin quëran, co inapochináchinhuëꞌ ninëꞌ. Tataíchin mini nipirinhuëꞌ, nani inanta mashotarin.

³² Napoaton, huëquë paꞌa oꞌshitatë tëpaitaꞌa. Inapotatëꞌ, huaꞌhuanpo yaꞌhuëtiinposo marëꞌ huëꞌëpaꞌa, itërin.

³³ Naporo tashi chachin paꞌpina huino oꞌshitomiatopi. Nani anoꞌpihuachinara, paninansoꞌ paꞌpin quëhuënaparin. Noꞌpirahuë niꞌton, co nataninhuëꞌ huiꞌnini quëhuënaparinsoꞌ. Co paꞌninso tëranta nataninhuëꞌ.

³⁴ Tahuëriantarinquë paninansoꞌ, cayaꞌhuain itaantapon: —Niꞌquë caira, achin tashi caso tata quëhuënaparahuë. Quëma yaꞌhuërëꞌ quëhuënapacaso marëꞌ ipora tashinta anoꞌpiantaꞌa. Inapoatë catonpo chachin tatanpo quëran tëranta huaꞌhuasha yaꞌhuëchinpoꞌ, itërin.

³⁵ Ninapotatonaꞌ, naporo tashi naquëranchin paꞌpina huino oꞌshitaantapi. Nani anoꞌpihuachinara, huaꞌhua nininso yaꞌhuërëꞌ, paꞌpin quëhuënaparin. Noꞌpirahuë niꞌton, Notosoꞌ co nataninhuëꞌ huiꞌnini quëhuënaparinsoꞌ. Co paꞌninso tërantaꞌ, nataninhuëꞌ.

³⁶ Inapoatonaꞌ, cato chachin cayopi. Paꞌpina quëran napopi.

³⁷ Paninansoꞌ huaihuachina, quëmapiaꞌhuaya huairin. Inasoꞌ, aꞌshini Moapo itërin. Iso quirica ninshitasoco huarëꞌ, ina ipora moaporoꞌsa yaꞌhuërinso shimashonëna ninin.

³⁸ Huaꞌhua nininsonta huaihuachina, quëmapiaꞌhuaya chachin yaꞌhuëtërin antaꞌ. Inanta aꞌshini Pin-ami itërin. Iso quirica ninshitasoco huarëꞌ, ina ipora amonoꞌsa yaꞌhuërinso shimashonëna ninin.