Génesis 16 - Chayahuita (Shahui)

Ismairo nasitërinsoꞌ

¹ Sarai co huaꞌhuanaꞌpihuë niꞌton, co Apran huiꞌnahuaninhuëꞌ. Napoaponahuëꞌ, Saraiso aꞌnara cosonanën yaꞌhuëtërin. Inaso iquipitoron. Acara itopi.

² Aꞌna tahuëri Saraisoꞌ, soꞌin itapon: —Niꞌquëchi, Sinioro co nohuantërinhuë niꞌton, co huaꞌhuanahuëꞌ. Napoaponahuëꞌ, cosonanëhuë acoanchinquën topirahuë. Tapona inasoꞌ, huaꞌhuanaꞌpi nisápirinhuëꞌ. Huaꞌhuanpachin cari masarahuë huaꞌhuahuë pochachin nicacaso marëꞌ, itërin. Napotohuachina, Apranta nohuantërin.

³ Naporo chachin Saraisoꞌ, Acara masahuaton, soꞌin acoantërin. Nani shonca piꞌipi Canaan parti yaꞌhuapona pochin, napoapi.

⁴ Shiarahuaton Acarasoꞌ, cayorin huachi. Inaporahuaton, huaꞌanën nocanin. Nocanaton, co yanatërinhuëꞌ.

⁵ Naporoꞌ Sarairi Apran itapon: —Quëma tëhuëran niꞌton, Acara nocaninco. Cari chachin acoantopiranquënhuëꞌ, iporasoꞌ huaꞌhuanaton, nocaninco huachi. Sinioro chachin inquënposona tëhuërësoꞌ anitochinpoꞌ: Quëma tëhuëmaranquën, ca aꞌna napomaraco, itërin.

⁶ Napotohuachina, Apranisoꞌ itapon: —Niꞌquëꞌ, cosonanënsoꞌ, natëinquënso yaꞌhuërin. Maꞌsona nohuantëransoꞌ nitëquëꞌ, itërin. Naporo quëran huarëꞌ Saraisoꞌ, Acara paꞌpi aparisitërin. Napoaton, inaso taꞌarin huachi.

⁷ Taꞌapirinhuëꞌ, Sinioro anquëninëni inotëro parti quënanin. Shor iraquë iꞌsha pipirinsoꞌ yaꞌcariꞌ, quënanin.

⁸ Quënanahuaton, natanin: —Quëmasoꞌ Acaranquën, nohuitëranquën. Sarai cosonanënquën. ¿Intoparanta huëcaton, intopata paꞌsaran? itërin. —Patronanëhuë Sarai itopisoꞌ taꞌananpiarahuë, tënin Acara.

⁹ Naporoꞌ Sinioro anquëninëni, itapon: —Naquëranchin patronanën paapantaquëꞌ. Maꞌsona camairinquënsopita, natëquëꞌ, itërin.

¹⁰ Napotahuaton itaantarin: “Ca nohuanto, huaꞌhuayátërahuë amiparinpita yaꞌhuëtarinquën. Co pichicasohuëꞌ naꞌaponaꞌ.

¹¹ Ipora cayoransoꞌ, quëmapiaꞌhuaya huaiyaran. Huaihuatan, Ismairo itëquëꞌ. Co napion ancantaton naꞌnëransoꞌ, Sinioro nataninquën niꞌton, ina nininën acotëquëꞌ.

¹² Mashotohuachin, tanan cahuario paꞌpi notëraya pochin nisarin. Yaꞌipiya inimicotarin. Inantaꞌ, yaꞌipiya quëran, inimicotaponaꞌ. Quëmopinënpitari co quëꞌyapirinahuëꞌ, inahua notënanquë chachin yaꞌhuapon,” itërin.

¹³ Siniorori nontërin niꞌton, Acarasoꞌ paꞌyanënquë tapon: “¿Yosë chachin nontaporahuë co chiminahuë ti?” tënin. Ina yonquiaton, iso pochin Sinioro nohuitërin: “Nicatonco, catahuarincoso Yosë,” itërin.

¹⁴ Napoaton inaquë poso yaꞌhuërinsontaꞌ, “Nanpiton, niꞌsárincosoꞌ posonën,” itopi. Ina pososoꞌ, Catisë ninanoꞌ, Piriti ninanoꞌ, inapita ninanoroꞌsari ahuancanapirin.

^15-16 Acarasoꞌ anquëni natërahuaton, patronanënquë chachin paantarin. Tahuëri nanihuachina huairin. Apran posa shonca saota piꞌipitasoꞌ, huiꞌnin nasitarin. Nasitohuachina, Ismairo itërin.