Génesis 15 - Chayahuita (Shahui)

Yosë, Apranë anoyatërinsoꞌ

¹ Ina piquëran Siniorori, Apran yaꞌnotërin. Co huëꞌëponahuëꞌ, huaꞌnarëso pochin nontërinsoꞌ natanin: —Apran, ama tëꞌhuaquësohuëꞌ, carinquën paꞌpoyaranquën. Panca acanamiataranquën, itërin.

^2-3 Napotopirinhuëꞌ, Apranisoꞌ itapon: —Sinioro. Quëmaso Yosënquën. Panca acanamiatopirancohuëntaꞌ, co huiꞌnahuë yaꞌhuëtërincohuëꞌ niꞌton, topinan quëran nisarin. Co aꞌnaya tëranta huiꞌnahuë quëtërancohuë niꞌton, piyapinëhuë Irisëro itëraiso yaꞌhuërëtaponco. Inaso Tamasco piyapi nipirinhuëꞌ, chiminpato yaꞌhuërëtaponco, itërin.

⁴ Siniororiso nipirinhuëꞌ, itapon: —Co ina yaꞌhuërëtaponquënhuëꞌ. Huiꞌnan chachin yaꞌhuërëtaponquën, itërin.

⁵ Itahuaton, nëꞌmëtë pëinën quëran ocoirin. Ocoirahuaton, shaꞌhuitërin: —Piꞌiroꞌtë nëꞌpërahuaton, tayoraroꞌsa pichiquëꞌ. Nanitohuatan pichiquëꞌ. Ina nápo shiparinpita yaꞌhuëtarinquën, itërin.

⁶ Naporinso natanahuaton: “Yosë noꞌtëquën nontërinco,” tënin Apran. Naporinso marëꞌ Siniorori nóya niꞌnin huachi.

⁷ Napoaton itapon: —Caso Sinioroco. Orë ninano quëran ocoiranquën. Inaquëso cartiaroꞌsa yaꞌhuërin. Iso noꞌpaꞌ quëtaranquën huaꞌanëntomiatacaso marëꞌ, itërin.

⁸ —¿Onporahuatota huaꞌanëntomiataꞌhuaso nitotapo? tënin Apran.

⁹ —Aꞌnara ohuacaꞌ, aꞌnara capra, aꞌnara carniro, inapita cara piꞌipitopisoꞌ quëshico. Naporahuaton, aꞌnara nëpëꞌ, aꞌnara pëꞌtahua nëpëaꞌhuaꞌ, inapitanta quëshico, itërin Yosëri.

¹⁰ Aprani, inapita maꞌsharoꞌsa Yosë quëshirin. Tëparahuaton huancánachin nichatëraꞌpiarin. Nichatërinsopita, cato panshinquë yaꞌcarísha acorahuaton, anotëraꞌpiarin. Inairaroꞌsaso nipirinhuëꞌ, co nichatërinhuëꞌ.

¹¹ Maꞌsha tëparinsopita, capita marëꞌ tamëroꞌsa oꞌmapirinahuëꞌ, Apraniso aꞌparárin.

¹² Nani tashiahuachina, Apransoꞌ noyá huëꞌëtërin. Aꞌnanaya paꞌpi tashirori imotërin niꞌton, tëꞌhuatërin.

¹³ Naporoꞌ Siniorori itapon: —Aꞌna tahuëri shiparinpita, nisharoꞌsataquë yacapataponaꞌ. Inaquë piyapitatonaꞌ, camaiyaponaꞌ. Aparisitaponaꞌ. Catapini pasa piꞌi inapoaponaꞌ.

¹⁴ Cariso nipirinhuëꞌ, aparisitërinsopita anaꞌintarahuë. Ina piquëran shiparinpita, noya chaꞌëponaꞌ. Maꞌhuanoꞌsa pipiponaꞌ.

¹⁵ Quëmaso nipirinhuëꞌ, noyá mashoya nicama huarëꞌ chiminapon. Co parisitaranhuëꞌ. Inapoaton shimashonënpita quënancoanan.

¹⁶ Catapini shinpita huënton, yaꞌhuërin piquëran, shiparinpita isëquë chachin huëntaponaꞌ. Amororoꞌsa co noyahuëꞌ nipisoꞌ, co aquëtë huarëꞌ nishátërarinhuëꞌ. Napoaton naporo tahuëriꞌsa huarëꞌ anaꞌintarahuë huachi.

¹⁷ Nani tashihuachina, aꞌnanaya orno conaiꞌ tomontárinso yaꞌnorin. Naporahuaton, panca yanatëtë pochin pën orótahuaton, maꞌsharoꞌsa nichatërinsopita huáncana, naꞌhuërin.

¹⁸ Naporo tahuëri chachin, Sinioro Apranë anoyatërin. Anoyataton itapon: —Shiparinpita iso noꞌpaꞌ quëtarahuë: Iquipito iꞌ quëran huarëꞌ Iopiratisiiꞌ pancaiꞌpaꞌ, huaꞌanëntopiso naniarin.

^19-21 Iporasoꞌ: Quiniroꞌsaꞌ, sinisëroꞌsaꞌ, catomonoꞌsaꞌ, itiroꞌsaꞌ, huirisëroꞌsaꞌ, nihuaimoroꞌsaꞌ, amororoꞌsaꞌ, cananoꞌsaꞌ, quiriquiroꞌsaꞌ, quiposoroꞌsaꞌ, inapitari iso noꞌpaꞌ huaꞌanëntapi. Huaꞌanëntapirinahuëꞌ, quëma shiparinpita quëtarahuë, itërin.