Génesis 14 - Chayahuita (Shahui)

Aprani Noto nichaꞌërinsoꞌ

¹ Naporoꞌ Misopotamia parti: Sinaro roꞌtëquë, Amarahuiro itopisoꞌ copirno nisarin. Irasaro roꞌtëquëntaꞌ, Arioco itopiso copirno nisarin. Iran roꞌtëquëso nipirinhuëꞌ, Quitaraomiro itopiso copirno nisarin. Coimo roꞌtëquëntaꞌ, Titaro itopiso copirno nisarin.

^2-3 Inapitasoꞌ, isopita aꞌnatërápo copirnoroꞌsarëꞌ, niinimicotatona niahuërápi: Pira, Pirsa, Sinapo, Simipiri, inapita itopisoarëꞌ niahuërápi. Pirasoꞌ, Sotoma ninano copirno. Pirsanta Comora ninano copirno. Sinaposo nipirinhuëꞌ, Atoma ninano copirno. Simipirinta Sipoin ninano copirno. Pira ninanoaꞌhua copirnontaꞌ, inapita catahuarin. (Pira ninanoaꞌhuasoꞌ, Soaro itopi antaꞌ.) Inapitarëꞌ, aꞌnatërápo copirnoroꞌsaꞌ, Sitin motopiana itopiquë, sontaronënapita yontonpi ahuëtacaiso marëꞌ. Inaso motopiana, Chimiriiꞌ marë parti quëparitërin.

⁴ Ina nápo copirnoroꞌsa chachin Quitaraomirori iráca canaton, shonca cato piꞌipi camairin. Napoaponahuëꞌ, ina piꞌi niantarinquë aꞌnatërápo copirnoroꞌsaso napopináchin yonquiatonaꞌ, Quitaraomiro yaahuëpi huachi.

⁵ Ina piꞌi huëantarinquë Quitaraomirosoꞌ, cara copirno catahuarinsopitarë chachin, huëantarin. Asotaroto Carnain parti huëꞌsahuatonaꞌ, nihuaimoroꞌsa canaipi. Ina quëran sosiroꞌsa yaꞌhuërëꞌ, An ninanoquë yaꞌhuëpisopita canaantapi. Imiroꞌsantaꞌ, Sapi-quiritain ninanoquë canaantapi.

⁶ Orioroꞌsanta Sëir motopiroꞌsaquë canatonaꞌ, Ir-paran ninanoquë huarëꞌ imapi. Ina ninanosoꞌ, inotëro intonquë yaꞌhuërin.

⁷ Quitaraomiroso cara copirno catahuarinsopitarë chachin tahuërëantarahuatonaꞌ, In-mispa ninanoquë canquipi. Ina ninanosoꞌ, Catisë itopi antaꞌ. Huëantapona pochin amaricoroꞌsa yaꞌhuërinso parti tiquitëriapi. Naporahuaton amororoꞌsantaꞌ, Asison-tamarquë yaꞌhuëpisopita inapotopi.

^8-9 Naporiatonaꞌ, Sitin motopianaquë canquipi huachi. Naporoꞌ Sotoma, Comora, Atoma, Sipoin, Pira, inapita ninanoroꞌsa copirnonënasoꞌ, inaquë paꞌmapi. Sontaronënapitarë chachin paꞌmapi. Inaquë inapita aꞌnatërápo copirnoroꞌsasoꞌ, Quitaraomiro, catahuarinsopita, inapitarëꞌ niahuëpi huachi.

¹⁰ Yaꞌipi Sitin motopianaquë, notohuaroꞌ toꞌni pochin nininsoꞌ posoroꞌsa yaꞌhuërin. Naporoꞌ quira nipachinara, Sotoma, Comora, inapita copirnoroꞌsaꞌ, piyapinënapitarë chachin taꞌapi. Taꞌapirinahuëꞌ, ina posoroꞌsaquë anotopi. Aꞌnapita cara copirnoroꞌsaso nipirinhuëꞌ, motopiroꞌsa taꞌatopi.

¹¹ Canatoroꞌsasoꞌ, Sotoma, Comora inapita ninanoroꞌsaquë yaꞌconpi. Inaquë yaꞌconatonaꞌ, cosharoꞌ, maꞌsharoꞌsa paꞌton nininsopita, inapita yaꞌipi macatona quiquipi.

¹² Sotomaquë, Apran apin Notontaꞌ, yaꞌhuërin niꞌton, inanta quëpapi. Yaꞌipi maꞌshanënpitarë chachin quëpapi.

¹³ Napoaponahuëꞌ, aꞌnara quira quëran chaꞌërahuaton, Apran shaꞌhuitapon paꞌnin. (Apransoꞌ, iprio piyapi itopi.) Naporoꞌ inasoꞌ, Mamiriri huaꞌanëntërinso insina nararoquë yaꞌhuërarin. Mamirisoꞌ, amoro piyapi. Iin mashonënpitasoꞌ: Aniri, Iscoro, inapita. Inapitasoꞌ Apran payatonaꞌ, catahuapi.

¹⁴ Apranso apin quëpapiso natantahuaton, piyapinënpita natëtonoꞌsa nipiso huayonin. Inapitasoꞌ, pëinënquë chachin huaꞌhuatatona soꞌsopisoꞌ. Ayontonpachina, cara pasa shonca posa quëmapiꞌsa yaꞌipiya quëran icanpi. Inapitarëꞌ, Apran paꞌnin copirnoroꞌsa imacaso marëꞌ. Tano ninanoaꞌhuaquë huarëꞌ imarin.

¹⁵ Paꞌsahuatonaꞌ, inimicoroꞌsa quënanconpi. Yono tashi nisahuasoꞌ, yaꞌcopirahuatonaꞌ, ahuëpi. Copirnoroꞌsa canarahuatonaꞌ, imapi. Opa ninanoquë huarëꞌ imapi. Ina ninanosoꞌ, Tamasco ninano quëran norti parti quëparitërin.

¹⁶ Inapoatonaꞌ, yaꞌipi maꞌsha quëpapisoꞌ matopi. Notonta nichaꞌërahuatonaꞌ, yaꞌipi maꞌshanënpitanta quëpatopisoꞌ, mataantarin. Naporahuaton, naꞌa piyapiroꞌsa nichaꞌërin. Sanapiꞌsanta quëparapirinahuëꞌ, nichaꞌërin.

Miriquisori Apran nacapirinsoꞌ

¹⁷ Apransoꞌ Quitaraomiro canarin. Cara copirno catahuarinsopitarë chachin canarin. Inapita canarahuaton huënantarin. Huëntasoꞌ, Sotoma copirnori nacapirin. Sapi motopianaquë nacapirin. Inasoꞌ, “copirno motopiana,” itopi antaꞌ.

¹⁸ Aꞌna copirnorintaꞌ, Apran nacapirin. Inasoꞌ, Miriquiso itopi. Sarimoquë copirno yaꞌconahuaton, corto huaꞌan nimantarin. Yosë chini chiníquën nanantërinso marëꞌ sacatërin. Inaso Apran aꞌcarahuaton, huinonta oꞌshitërin. Piyapinënpitantaꞌ, aꞌcarin, oꞌshitërin, napotërin.

¹⁹ Nani aꞌcarahuaton, Miriquisori Apran iso pochin shaꞌhuitërin: “Yosë chini chiníquën nanantërinsoꞌ, catahuainquën. Inasoꞌ, piꞌiroꞌtëꞌ, isoroꞌpaꞌ, inapita acorin.

²⁰ ¡Ma noyacha Yosëso chini chiníquën nanantërin paya! itahuaꞌ. Ina nohuanton, inimiconënpita minsëran,” itërin. Naporo Aprani inimicoroꞌsa maꞌsha matërinsoꞌ, shonca quëran aꞌnara Miriquiso quëtërin. Inasoꞌ, diesmo itopi.

²¹ Ina piquëran Sotoma copirnori, Apran itapon: —Piyapiꞌsaraꞌ quëtoco, yaꞌhuërëꞌ maꞌshasoꞌ, quëmari maquëꞌ, itërin.

^22-23 Napotopirinhuëꞌ, Apranisoꞌ itapon: —Yosë chini chiníquën nanantaton, piꞌiroꞌtëꞌ, isoroꞌpaꞌ, inapita acorin. Ina niꞌsárinco niꞌton, co piꞌshi tërantaꞌ, co sapatë nonin tëranta caora marëꞌ macapohuëꞌ: “Cari, Apran amaꞌhuanahuë.” Ama tëcamaso marëhuëꞌ, co macapohuëꞌ.

²⁴ Caso caora marëꞌ co manta nohuantërahuëꞌ. Piyapinëhuëpita caꞌpisoíchin tëhuënchinsoꞌ, nani matatë pochin nitëranquën. Naporahuaton, Aniri, Iscoro, Mamiri, inapitanta ahuëtaꞌhuasoꞌ, catahuarinaco. Inapita tëhuëchinsoꞌ maꞌsha mapisoꞌ, onpopionta macacaiso yaꞌhuërin, itërin.