Génesis 13 - Chayahuita (Shahui)

Apran, Notorëꞌ niaꞌpopisoꞌ

¹ Apranso saꞌinë chachin Iquipito quëran pipirin. Maꞌshanënpitarë chachin Niquipi parti huënantatona yaꞌhuëinantapi. Apin Noto itopisontaꞌ, inarë chachin huënantarin.

² Apransoꞌ, notohuaroꞌ oro, prata, pëꞌtahuaroꞌsaꞌ, inapita yaꞌhuëtaton paꞌpi maꞌhuan.

³ Niquipi parti quëran oshaquëran paꞌsápatonaꞌ, Pitiri ninanoquë huarëꞌ huënantapi. Ina quëran paantarahuatonaꞌ, iꞌhua yaꞌhuërinquë chachin yaꞌhuëinantapi. Pitiri ninanoꞌ, Ai ninanoꞌ, inapita ninanoroꞌsa huáncana yaꞌhuëinantapi.

⁴ Iꞌhua artaro nininquë chachin, Sinioro chinotaantarin.

⁵ Notontaꞌ, apin pochachin paꞌpi maꞌhuan. Notohuaroꞌ ohuicaroꞌsaꞌ, ohuacaroꞌsaꞌ, inapita yaꞌhuëtërin. Piyapinënpitanta naꞌa yaꞌhuëtërin.

⁶ Nipirinhuëꞌ, notohuaroꞌ pëꞌtahua yaꞌhuëtopi niꞌton, co huachi pasto nanirinhuë pëꞌtahuaroꞌsa capacaisoꞌ. Napoaton co huachi nanitopihuë cato chachin inaquëráchin yaꞌhuëcaisoꞌ.

⁷ Apran pëꞌtahuanën aꞌpaipisopita, Noto pëꞌtahuanën aꞌpaipisopitarëꞌ, pasto niapiratatona yáninoꞌhuipi. Naporosoꞌ, cananoꞌsaꞌ, huirisiroꞌsaꞌ, inapitanta inaquë chachin yaꞌhuërapi.

⁸ Napoaton aꞌna tahuëri Aprani Noto itapon: “Canposoꞌ, quëmopinpo ninëꞌ. Co canpo capini ninoꞌhuicaso yaꞌhuërinhuëꞌ. Co piyapinënpopitantaꞌ, ninoꞌhuicaiso yaꞌhuërinhuëꞌ.

⁹ Niquë niquë nipachin, yaꞌhuëaꞌa. Niꞌquëꞌ. Noꞌpaso panca yaꞌhuërin. Insëquësona yaꞌhuëcamaso marëꞌ nohuantëranquë, quëma huayonquëꞌ. Pëꞌnatë parti huayonpatan, caso pëtëtë parti paꞌsarahuë. Pëtëtë parti huayonpatan, caso pëꞌnatë parti paꞌsarahuë,” itërin.

¹⁰ Natanahuaton Notosoꞌ, motopiaꞌhua quëran, Cortaniiꞌ yonsan noyarotomarinso nocorin. Sohuaro ninanoaꞌhuaquë huarëꞌ notërinsoꞌ icanin. Inaquësoꞌ, notohuaroꞌ iꞌ yaꞌhuërin niꞌton, paꞌpi noyaroꞌpaꞌ ninin. Sinioro shaꞌtërinquë pochin niꞌton, Iquipito noꞌpaꞌ pochin ninin. (Ina pochin iráca ina noꞌpaꞌ nipirinhuëꞌ, coꞌhuara Siniorori Sotoma, Comora, inapita ninanoroꞌsa ataꞌhuanchátërasohuëꞌ, naporin.)

¹¹ Ina niꞌsahuaton, Notoso yaꞌipi ina noꞌpaꞌ huayonin. Inaso noꞌpaꞌ, piꞌi pipirinso parti yaꞌhuërin. Inapoatonaꞌ, Apran Notorëꞌ niaꞌpopi.

¹² Apransoꞌ, Canaan parti quëparitërin. Notosoꞌ, Cortaniiꞌ yonsan ninanoroꞌsa parti yaꞌhuëconin. Sotoma yaꞌcariya yaꞌhuëconin.

¹³ Inaquësoꞌ, yaꞌhuëhuanoꞌsa paꞌpi co noyahuëꞌ nipi. Inapoatona oshahuanpi niꞌton, Yosëri noꞌhuípiro niꞌnin.

¹⁴ Noto paꞌpachina, Siniorori Apran yaꞌnotaton itapon: “Huaniran quëran yaꞌipi parti notëtëquëꞌ: Pëꞌnatë parti, pëtëtë parti, piꞌi pipirinso parti, piꞌi yaꞌconinso parti, yaꞌipi inaquëpita notëton, noya niꞌquëꞌ.

¹⁵ Yaꞌipi noꞌpaꞌ niꞌnansoꞌ, carinquën huaꞌanëntacaso marëꞌ quëtaranquën. Quëmari huaꞌanëntomiataran. Naporahuaton, shiparinpitarinta huaꞌanëntomiataponaꞌ.

¹⁶ Ca nohuanto shiparinpita paꞌpi notohuaroꞌ naꞌamiataponaꞌ. Moꞌshi co pichicasohuëꞌ ninin. Inapochachin shiparinpitanta co onpo pichicasohuëꞌ naꞌaponaꞌ.

¹⁷ Iporasoꞌ, paaton yaꞌipi iso noꞌpaꞌ paꞌtëquëꞌ. Itohua itohua paꞌtëquëꞌ. Carinquën quëtaranquën niꞌton, inapotëquëꞌ,” itërin.

¹⁸ Ina natanahuaton, Apranso piyapinënpitarë chachin nëꞌmëtë pëiroꞌsa ótënpiso mapi. Masahuatonaꞌ, insina nararoquë paꞌpi. Inaquë paꞌsahuatonaꞌ, yaꞌhuëconpi huachi. Ina nararosoꞌ, Mamiri itopisoari huaꞌanëntërin. Ipron ninano yaꞌcariya inasoꞌ. Inaquë Apran Sinioro chinotacaso marëꞌ aꞌna artaro niantarin.