Génesis 11 - Chayahuita (Shahui)

Nisha nisha nananquë Yosëri anoninsoꞌ

¹ Pacon piquëran notohuaroꞌ piyapiꞌsa naꞌantapi. Naporoꞌ yaꞌipiya aꞌna nananquësáchin nonpi.

² Piꞌi pipirinso parti quëran pipirahuatonaꞌ, Sinaro parti canquipi. Inaso noꞌpaꞌ, noyápiroꞌtëchin niꞌton, inaquë yaꞌhuëcaiso marëꞌ quëparitopi.

³ Aꞌna tahuëri inahua capini ninontatonaꞌ, napopi: “Huëco paꞌahuaꞌ, natëricho noꞌpa quëran nicatëhuaꞌ, aꞌpëahuaꞌ,” nitopi. Ina nisahuatonaꞌ, natëricho quëran naꞌpi yaꞌhuërënamën pëipi. Achinpitacaiso marëntaꞌ, toꞌni pochin nininquë achinpitopi. Siminto pochin nininso yaꞌhuërënamën, inaquë achinpitopi.

⁴ Ina quëran ninontaantapi: “Huëco chiníquën cancantatëhuaꞌ, ninano ocoiaꞌahuaꞌ. Ina nisahuatëhuaꞌ, aꞌna torinta piꞌiroꞌtëquë huarëꞌ nincaninso niahuaꞌ. Inapoatëhuaꞌ, sacóshin nahuinarihuaꞌ. Naporahuaton, co huachi itohua itohua yanquëcaso yaꞌhuaponhuëꞌ,” nitopi.

⁵ Napopirinahuëꞌ, Sinioroso oꞌmarin. Oꞌmarahuaton ninanoꞌ, tori, inapita nisapiso niꞌquimarin.

⁶ Niꞌquimarahuaton, yonquirin: “Isopitaso inaquësáchin yaꞌhuatonaꞌ, ina nananquësáchin nonpi niꞌton, nani caniaritopi sacatacaisoꞌ. Poꞌpachinara, co incari tëranta nanitarinhuë atananpitacasoꞌ.

⁷ Napoaton acopitacaso marëꞌ, paꞌmatëhua nonpiso anishatahuaꞌ. Ama huachi ninatanacaiso marëhuëꞌ, napotahuaꞌ,” tënin.

⁸ Inapotaton, Siniorori piyapiꞌsa itohua itohua ayanquëërin. Ninano nisapisonta aꞌporahuatonaꞌ, tananpitopi huachi.

⁹ Inaquë chachin Siniorori, yaꞌipi piyapiꞌsa nonpiso anishatërin. Ina quëran chachin, yaꞌipi isoroꞌpaquë ayanquëërin. Napoaton ina ninanosoꞌ, Papiri itopi.

Simo shinpita napopisoꞌ

¹⁰ Simo shinpita napopiso shaꞌhuichinquëmaꞌ. Pacon paꞌninso piquëran cato piꞌipitapasoꞌ, Simo pasa piꞌipitarin. Naporoꞌ aꞌnara huiꞌnin nasitërin. Nasitohuachina, Aropasa, itërin.

¹¹ Ina piquëran Simosoꞌ, aꞌnatërápo pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

¹² Aropasa cara shonca aꞌnatërápo piꞌipitasoꞌ, huiꞌnin nasitërin. Nasitohuachina, Saro itërin.

¹³ Ina piquëran Aropasasoꞌ, catapini pasa cara piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

¹⁴ Saro cara shonca piꞌipitasoꞌ, huiꞌnin nasitërin. Nasitohuachina, Ipiri itërin.

¹⁵ Ina piquëran Sarosoꞌ, catapini pasa cara piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

¹⁶ Ipiri cara shonca catapini piꞌipitasoꞌ, huiꞌnin nasitërin. Nasitohuachina, Piriqui itërin.

¹⁷ Ina piquëran Ipirisoꞌ, catapini pasa cara shonca piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

¹⁸ Piriqui cara shonca piꞌipitasoꞌ, huiꞌnin nasitërin. Nasitohuachina, Nio itërin.

¹⁹ Ina piquëran Piriqui cato pasa iscon piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

²⁰ Nio cara shonca cato piꞌipitasoꞌ, huiꞌnin nasitërin. Nasitohuachina, Siroco itërin.

²¹ Ina piquëran Niosoꞌ, cato pasa canchisë piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

²² Siroco cara shonca piꞌipitasoꞌ, huiꞌnin nasitërin. Nasitohuachina, Nacoro itërin.

²³ Ina piquëran Sirocosoꞌ, cato pasa piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

²⁴ Nacoro cato shonca iscon piꞌipitasoꞌ, huiꞌnin nasitërin. Nasitohuachina, Tari itërin.

²⁵ Ina piquëran Nacorosoꞌ, pasa shonca iscon piꞌi aquëtë yaꞌhuaantarin. Aꞌnapita huiꞌninpitanta quëmapiꞌsaꞌ, sanapiꞌsaꞌ, yaꞌhuëtërin.

²⁶ Tari canchisë shonca piꞌipitasoꞌ, huiꞌnin paninantërinso nasitërin. Ina quëran cato huiꞌninpita yaꞌhuëtaantarin. Huiꞌninpitasoꞌ: Apran, Nacoro, Aran, inapita.

Tari, naporinsoꞌ

^27-28 Shaꞌhuitëranquëmaso chachin Tari huiꞌninpitasoꞌ, isopita: Apran, Nacoro, Aran, inapita. Aran huiꞌninsoꞌ, Noto itopi. Aransoꞌ, Orë ninanoquë chiminin. Ina ninanosoꞌ, Cartia parti yaꞌhuërin. Coꞌhuara paꞌpin chiminyátërasohuëꞌ, chiminin. Huaꞌhuatërinso ninanoquë chachin naporin.

²⁹ Apransoꞌ, Sarai manin. Nacorontaꞌ, Mirica manin. Miricasoꞌ, Aran huiꞌnin. Inasoꞌ, aꞌnara caipayain yaꞌhuëtërin, Isca itopisoꞌ.

³⁰ Saraiso co huaꞌhuanaꞌpihuë niꞌton, co huaꞌhuaninhuëꞌ.

³¹ Tarisoꞌ, Orë ninano quëran pipirin. Cartioroꞌsa yaꞌhuërin quëran pipirahuaton, Canaan parti chinoton, paꞌnin. Huiꞌnin Apran itopiso Sarairë chachin quëparin. Naporahuaton, shionta Noto itopiso quëparin. Paꞌsapirinahuëꞌ, Aran ninanoquë canconpachinara, inaquë quëparitonpi.

³² Inaquë yaꞌhuëasoiꞌ, Tariso chiminin. Cato pasa aꞌnatërápo piꞌipitaso chiminin huachi.